Keta halo lia ho maluk sarani to'o tama moon-metan
6
Kalo ema sarani ida nalo lia no niakaan mamaluk sarani, tan saa emi hasa'e lia nia baa makotu lia mak la fiar baa Kristus? Keta nunia. Di'ak liu, mai hariik iha fukun sarani oin, nebee sia mak nakotu emikaan lia nia! 2 Emi ahan la hatene dauk ha'ak, baa oras rai falu fila, ita ema sarani mak atu hakotu lia bodik ema hotu-hotu iha raiklaran ne'e. Kalo ita bele hakotu nunia, tan saa emi la bele hakotu hola du'uk lia ki'ik oan nunia sia? 3 Tuir loos, ita ema sarani moos atu hakotu lia bodik Na'i Maromak Niakaan makbukar lale'an sia. Tan lia nia, emi musti hatene babilan du'uk lia loron-loron nia sia. 4 Dadi, kalo ema sarani nalo lia no mamaluk sarani, emi keta husu makotu lia mak la fiar Kristus, tan nia la noo naran iha hutun sarani.5 Ha'ukaan dalen ne'e musti namoe emi. Iha emikaan leet, ahan nu'u la noo ema ida kois mak matenek babilan lia ki'ik oan sia mak moris iha hutun sarani leet, 6 to'o ema sarani kona lia, dada malu baa ema makotu lia mak la fiar baa Kristus.
7 Lia nia la loos. Kalo emi hodi malu baa moon-metan, ne'e na'ak, emi monu ti'an. Kalo okaan maluk nalo sala baa o, di'ak liu, mabusik baa dei. Kalo nia nana'o nola okaan naha, di'ak liu mabusik baa dei! 8 Mais emi du'uk halo sala baa malu. Emi hana'o malu du'uk. La bele nunia. Emi ne'e, ema sarani bele-bele!
9 Emi ahan nu'u la hatene lia nia sia! Tuir loos, ema mak la nakara nalo loos, nia la bele tama dadi baa Na'i Maromak renun. Keta habusik emi na'in du'uk kona be'ur, to'o halo sala! Ema mak nalo lia kfo'er, ema mak lo'u-sudur baa ai'oi lulik no buat sia mak seluk Na'i Maromak, ema mak nakur biti-kluni, mane mak toba no mane, 10 ema mak nana'o, ema mak rotus teen, ema mak nemu tua lanuk, ema mak dale nahaat ema naran, ema mak tolek nola ema nahan, ema oin nunia sia la bele dadi baa Na'i Maromak renun!
11 Uluk, emi balu nanis nunia! Mais Na'i Maromak kasu mohu emikaan salan sia nodi namoos emi. Hodi nunia, Nia loke dalan nebee emi bele di'a-di'ak hikar ho Nia. Nia nalo lia nia sia hotu-hotu, tan emi talin malu ho itakaan Na'in Yesus Kristus no Maromak Kmalar.
Moris di'a-di'ak hodi babilan isin lolon, ne'e na'ak, ita hakneter Na'i Maromak
12 Noo ema balu na'ak, “Ita bele halo hotu-hotu mak ita hakara.” Tebes. Mais tuir ha'u du'uk, lia malolok nune'e: Hahalok hotu-hotu sei la nanis di'ak bodik ita. Ha'u kbele kalo lia hotu-hotu mak kakara, mais la ko'uk dadi ata baa lia mak la di'ak sia.a 13 Knaninuk nune'e: “Hahaak buka kabun. Kabun buka hahaak.” Mais keta halu'a ha'ak, nosi ikus Na'i Maromak atu nadodok lia kabun no hahaak nia. Knaninuk seluk, itakaan isin lolon du'uk. Na'i Maromak la nalo itakaan isin lolon nebee ita hodi hakur biti-kluni, mais nebee ita hodi serwisu bodik Nia. Tan Nia mak itakaan Na'in. Nia noo beran atu babilan itakaan isin lolon. 14 Itakaan Na'in Yesus Kristus mate, mais Na'i Maromak nalo Nia moris nikar. Dadi, nosi ikus kalo ita mate, Nia moos noo beran atu nalo ita moris hikar.
15 Itakaan isin lolon dadi baa Kristus Niakaan, tan ita nu'u isin rohan hosi Kristus isin lolon. Nanis emi hatene ti'an lia nia! Dadi, kalo ha'u ktau isin rohan nosi Kristus isin, hotu baa kahur ko feto aat isin, nunabee? La bele! Hahalok nia la fatan. 16 Emi nanis hatene ti'an, kalo ema nakur biti-kluni no feto aat nunia, sia na'in rua talin malu dadi mesak. Hakerek Moon na'ak, “Sia na'in rua talin malu, dadi mesak ti'an.”b 17 Mais ema mak moris neon ida no itakaan Na'in, dadi mesak no Nia ti'an, nu'u sia na'in rua talin malu nodi kmalar mesak.
18 Kalo o metan leet atu malo lia kfo'er, malai mela nia! Sala wa'in nahaat ema mahalo du'uk, no nahaat ema seluk. Mais ema mak nalo lia kfo'er, nahaat isin lolon du'uk. 19 Kmalar Lulik moris iha okaan neon, tan Na'i Maromak du'uk mak foo. Ne'e na'ak, okaan isin lolon dadi Kmalar Lulik uman hamulak. O la moo beran ona atu dadi ulun baa okaan isin lolon du'uk. Tan saa o moris ahan nu'u o la matene lia ne'e?c 20 Kristus selu kotu ita nodi folin todan. Tan lia nia, ita musti moris hodi hakneter itakaan isin lolon du'uk, atu hatudu ha'ak, ita moos hakneter Na'i Maromak.