Ami haitua susura' ia fee basa lahenda, fo ri' ramahere Yesus Kristus nai kota Filipi. Ma ami nau basa mauli-malaka jama'at ara, ma manatulu-manafali mauli-malaka jama'at ara boe bubulu' ratalolole susura' ia isi na.

2 Manetualain nana ita Aman. Ma Yesus Kristus nana ita Ramatuan. Ami hule fo Ara ratudu dale malole Nara neu' emi, ela emi bisa masoda no tetu-tema', mole-dame ma tesatei-tamadale'.

3 Leo mae au ta ita emi doo' a, tehuu au ta afarene heni emi! Tuka-tuka fai' au afarene emi, au hule makasi neu' Manetualain, nana huu emi mamahere maroo Ni. 4 Fai bea ma au hule-haradoi fee emi, au dale ka namaho'o, 5 nana huu neme masososa na emi sipo' Manetualain Tutui Malole Na, emi malala'o maroo Ria nonoi-tataon sama-sama mo au. 6 Ria natudu nae, Manetualain mulai noi-tao nai emi dale mara. Ma au bubulu' matetu' neu' ko Ana nalala'o nabasa katema' Ria nonoi-tatao malole Na, losa' tepo' fo Yesus Kristus natafali mai.

7 Tebe naraa au sue-lai emi, nana huu neme ulu' mai au dale' esa oo emi. Fai' naa ra, emi moi-tao sama-sama mo au, tepo' fo au afada lahenda ra la'e-neu' Manetualain Tutui Malole Na, ma au ataa atafali' lahenda fo ta sipo' Tutui Malole ria. Leo mae au maso' bui a, tehuu emi ta malai ela au. 8 Manetualain bubulu' au dale ka nahii' na emi seli. Nana huu au susue-lalai ka neu' emi, sama leo' Yesus Kristus susue-lalain.

9-10 De au hule-haradoi fee emi, leo ia': Au hule fo emi masue-malai ao, boe-boe tamba naroo losa' henu-sofe'. Au hule fo Manetualain fee emi bubulu' matetu' hihii-nanau' malole a, ela emi masoda ma dadi lalao-lalafu'. No ria naa, tepo' fo Kristus naetu' basa lahenda ra dedean, sona Ana nafada nae, emi sala' ta'a, 11 nana huu Ria tao na emi dale mara lalao-lalafu', ela emi bisa masoda roo-tetu'. Ma emi masoda roo-tetu' leo naa', sona lahenda feke' ara so'u radedema Manetualain, ma io-oa Ni.

12 Toranoo susue kara emin! Au nau emi bubulu' mae, lahenda tao rasususa' au, losa' ara tee au leo bui dale' uu. Tehuu Manetualain Tutui Malole Na nanatui-nanabeka' la'o naroo, 13 losa' soldadu fo ranea nai uma mana pareta ma basa lahenda feke' ara boe bubulu' rae, au maso' bui a nana huu au tuka Yesus Kristus.^a 14 Manetualain lahendan nara boe rita hata fo ri' dadi, leo mae au nai bui dale'. Huu ria naa, ara boe-boe raparani, losa' ara ta bii'. Ma ara dedea leleka' Manetualain Hara-dasin nai basa mamana' ain.

15-17 Nai ia, hapu lahenda rupa' dua makate ranori-rafada la'e-neu' Kristus. Si' ruma roi-tao no dale roo-tetu', ma ruma bali roi-tao no dale peko-paki'. Roi-tao no dale roo-tetu', nana dale nara malole a ro au. Ara bubulu' matetu' rae, au lepa-asaa susa ia, nana huu alala'o au nonoi-tatao ka ma ta heo' bai' boe'.

Tehuu roi-tao no dale peko-paki' a, ara rapeda dale' ma saka nade'. Ara tao nabika-nabati' neu' lahenda kamahere' ara, sadi ruma tuka si. Ara saka eno', ela bisa io ao nara rae, sira kahere' lena neme au mai. Sira afi rae, kalu lahenda tuka si, sona neu' ko ria tao nambera au susa ka nai bui dale'.

18 Tehuu pesi si reme' naa! Au ta tao dale' neu' lahenda fo nanori-nafada no dale roo-tetu', do ta'a. Penting na ri' ara ranori-rafada la'e-neu' Kristus! Ria ri' tao na au dale ka namaho'o.

Ma au amaho'o tebe-tebe, 19 nana huu au bubulu' emi hule-haradoi fee au, ma Yesus Kristus Dula-dale Na tulu-fali au. Huu ria naa, au bubulu' neu' mate'e na, malole a. 20 Leo mae au asoda, do mate, ta hata-hata. Sadi Manetualain pake au fo so'u adedema Yesus Kristus nade Na, ma anori-afada leleka' la'e-neu' Ana, losa' ta hapu hata esa tao namamae' au. Au amahehena' au tao aroo basa ia ra, losa' doo na neu.

21-23 Au afi ae leo ia': kalu au asoda, sona ela au asoda abua-aesa oo Kristus, ma au alala'o aroo Ria nonoi-tataon. Ria malole a. Tehuu kalu au mate, au onto lena bali. Nana huu au bisa foa ela dae-bafo' ia, ma asoda selu' fo leo sama-sama oo Kristus nai nusatetu-ikutema' a. Huu ria naa, au dale ka kadudua, ma au ta bubulu' bea ri' malole lena! 24 De leo ia'! Huu no emi bei parluu au nai ia, de malole lena' au leo sama-sama oo emi nai dae-bafo' ia. 25 Au amahere ae au teu-fai ki bei naru' a, de au bisa leo sama-sama oo emi. Ramatua' a nau au tao atetea emi dale mara, boe ma emi boe-boe mamahere Ni no dale namaho'o. 26 De neu' ko emi bisa so'u madedema Yesus Kristus nade Na, nana huu Ana soi eno' de au bisa fali selu' mai dama emi.

27-28 Tehuu leo mae leo' bea boe, emi masoda ma muste roo-tetu', huu fo emi nana, Ramatua' a lahendan. De emi masoda ma muste naraa, ma tao tuka hata fo Kristus Tutui Malole Na, nanori-nafadan neu' emi a. Kalu au dadi atafali mai dama emi, do oi amanene' a neme lahenda mai rae, emi masoda no malole, sona au amaho'o. Au bisa bubulu' ae, huu no Dula-dale' malalao-malalafu a tataon, de emi masoda dale' esa. Ma au bisa bubulu' ae, emi sadia fo sama-sama malala'o Ramatua Yesus Tutui Malole Na, ela lahenda feke' ara ramahere. Ma emi ta bii', leo mae lahenda soa' emi. Ria dadi tanda fee musu-noo' ara nae, Manetualain nau tu'u-tapa heni si leo ai-pila naraka dale' reu. Tehuu Ana po'i-tata na emi ela emi hapu soda mana basa taa'. 29 Huu no Manetualain malolole na seli, de Ana soi eno', fo emi bisa mamahere Kristus ma dadi Ria lahenda nara. Ta noi namahere' a, tehuu Ana fee lela' fo emi hapu susa, nana huu emi tuka Ni. 30 Au ae leo' naa, huu fo lahenda ruma rai naa soa' emi, nana huu emi malala'o Kristus Tutui Malole Na. Mafarerene', te fai' naa ra, ara soa' au leo naa'. Ma besa' ia, bei hapu lahenda feke' nai ia soa' au boe.^b