4 Leo' naa boe, ina-ama ra! Emi boso' bara'aai ana mara, ta'a sona ete' ao nara. Malole lena' urus matalolole si, ma manori-mafada si reme aana nara ela ara tuka Ramatua' a eno Na. Kalu ara tao sala, sona matudu si eno roo-tetu' tuka Ramatua' a hihii-nanaun.^c

5 Leo' naa boe, ata ra! Emi muste bii neu' malakam fo ri' pareta emi nai dae-bafo' ia, tiadea-radaara ma mamania-mamanene neu' ana. Boso' moi-tao no poo seseri', tehuu tuka matetu' malaka a hihii-nanaun, sama leo' emi tuka matetu' Kristus hihii-nanaun. 6 Emi nana, Kristus atan. De nai dae-bafo' ia, boso' malaka a nita emi dei, sona besa' ko makate. Tehuu leo mae ne'es ana boe, moi-tao matetu' fee ni. Huu fo ria ri' tuka Manetualain hihii-nanaun. 7 De emi makate malala'o nonoi-tatao mara, sama leo' emi moi-tao fee ita Ramatuan, ta moi-tao fee malaka dae-bafo' a. 8 Huu fo ita bubulu' neu' ko Manetualain balas lahenda fo ri' tao hihii-nanau' malole. Leo mae sira malaka, ata, do ta ata, Ana balas katema' asa.^d

9 Leo' naa boe, malaka ra! Emi boso' matata'u ata mara. Huu fo sira ma emi sama-sama manuu Ramatua' esa' a nai nusatetu-ikutema' a. Ana ta mete mata', tehuu namanene sudi la'e bea a. Leo mae malaka, do ata, Ana namanene katema' asa.^e

10 Nenene matalolole au dedea mate'e ki ia. Emi muste mamahere tebe-tebe neu' Manetualain, huu fo Ria nanuu haak pareta emi ma kuasa Na marela-masa'a. Ria ri' bisa natetea emi! 11 Soldadu ra pake tee-tafa' fo soa' sira musu nara. Leo' naa boe, Ramatua' a pake emi sama leo' soldadu. Ana nau emi soa' basa nitu ra malaka bau-ina tipu-dai nara. Huu ria naa, emi muste mahehere ao mara pake Manetualain tee-tafan katema'. 12 Huu fo ita tatati ao! Ita ta soa' lahenda dae-bafo' a, tehuu soa' kuasa tadalu' fo ta tita ni, mana homu pareta ra, kuasa maiu' ma soa' hihii-nanau' tadalu' ara. 13 De emi muste sadia pake Manetualain tee-tafa nara katema'. Kalu fai tadalu' sira mai, sona emi bisa soa' asa la'o naroo losa' babasan. De kalu emi ta tuda, sona manenete losa maseki.

14 De emi muste mapadei mahere ao mara! Mamahere noi Manetualain Hara-dasi roo-tetu Na, huu fo ria sama leo' emi pake soldadu ra tali-ee na.^f Masoda roo-tetu', huu fo ria sama leo' emi pake badu besi babaa ara'.^g 15 Mahehere ao mara meu tui-beka Tutui Malole, fo matudu eno' ela lahenda rasoda mole-dame ro Manetualain, huu fo ria sama leo' emi pake sopatu soldadu.^h 16 Mamahere maroo Manetualain, huu fo ria sama leo' tee-tafa' esa rian ela sili meni'. No tee-tafa' ria, emi bisa mamate nitu makaresi' a o'ou ai-pilan fo ri' ara uku tino' emi. 17 Mamahere tebe-tebe mae, emi hapu soda' neme Manetualain mai, huu fo ria sama leo' soldadu a pake silaka besi. Homu mahere Manetualain Hara-dasin neme Ria Dula-dale Malalao-malalafu Na mai, huu fo ria sama leo' soldadu homu tafa'.ⁱ

18 Kalu emi nau mapadei mahere, sona emi muste hule-haradoi maroo pake Manetualain Dula-dale Malalao-malalafu Na kuasan. Manea maroo, ma boso' hahae hule-haradoi fee Manetualain lahenda nara rai basa mamana' ain. 19 Ma boso' mafarene henin hule-haradoi fee au boe. Hule fo Manetualain fee dedea-nafadan, ela au bisa tui-beka leleka' Ria maksud Na neu' lahenda feke' ara.^j 20 Leo mae au dadi lahenda mana huku', tehuu Ramatua Yesus nadenu au, dadi Ria lima boa ona Na. De hule-haradoi fee au, ela au boso' bii dedea roo-tetu', huu fo Ramatua' a nau au tao leo naa'!

21 Au nau emi bubulu' au soda ka leo bea' nai ia. Huu ria naa, au adenu Tikikus leo emi naa' neu. Ria nana, au toranoo susue ka ma ana makate nalala'o Ramatua Yesus Kristus nonoi-tataon.^k 22 Au nau ana tui la'e-neu' ami soda ma nai ia. Ma au nau ria natetea emi dale mara.^l

23 Au hule Manetualain, ita Aman, ma Yesus Kristus, ita Ramatuan, ela Ara tao ra basa toranoo' ara mamole-madame ao, masue-malai ao, nana huu emi mamahere Si. 24 Au hule-haradoi, ela ita Ramatuan Yesus Kristus natudu dale malole Na neu' basa lahenda fo sue-lai raroo Ni.

Au susura ka te'e ada' ia!