Timotius nabua no Paulus ma Silas
16
Boe ma Paulus no Silas raulu' leo kota Derbe reu. Neme naa' mai, ara raroo leo kota Listra reu. Nai kota ria, ara raneta ro lahenda muri-ana' esa, nade Timotius. Papa na, lahenda Yunani, tehuu mama na, lahenda Yahudi fo ri' namahere Yesus. Timotius dadi Yesus lahendan so. 2 Basa lahenda kamahere' rai kota Listra, ma kota Ikonium, ara bubulu' Timotius nana lahenda malole. 3 Paulus nau Timotius tuka si. Tehuu lahenda Yahudi fo rai naa, bubulu' Timotius papa na lahenda Yunani, de ria bei ta sunat tuka hadas Yahudi. Huu ria naa, Paulus ator fo ara sunat Timotius.a 4 Boe ma dua si la'o reme mamana' esa, leo mamana' esa reu, rafada naetu' fo ri' Ramatua Yesus lahenda nadedenu nara ro lasi' Kristen ara raetu raan nai Yerusalem. 5 No ria naa, ara boe-boe ratetea lahenda kamahere' ara dale nara. Tuka-tuka fai', lahenda kamahere' ara, boe-boe tamba.
Raloo Paulus leo Makedonia neu
6 Paulus asa la'o raroo leo propensi Frigia no Galatia reu, nana huu Manetualain Dula-dale Malalao-malalafu Na horo si, boso' reu tui-beka Manetualain Tutui Malole Na nai propensi Asia. 7 Ara losa nusa' fo ri' natoo no propensi Misia, ara rae leo propensi Bitinia reu. Tehuu Yesus Dula-dale Na horo si boso' leo naa' reu.b 8 De dua si la'o resi' propensi Misia, ara losa kota Troas nai tasi suu'.
9 Hatun ria, Manetualain natudu Paulus sama leo' meis. Ana nita lahenda esa napadei' nai tasi seri', nai propensi esa, nade Makedonia. Lahenda ria naloo hule tutulu-fafali' nae, “Papa! Mai tulu-fali ami nai ia dei!” 10 Paulus nita leo' naa, boe ma amic maetu' maan, leo Makedonia meu. Ami afi mae, ria mema' Manetualain nadenu ami meu tui-beka Ria Eno Masoda Na neu' lahenda rai tasi seri'. Huu ria naa, Ana horo ami fo boso' leo mamana feke' meu.
Nai kota Filipi, mama Lidia namahere Ramatua Yesus
11 Boe ma ami sa'e ofa' nai kota Troas, leo pulu ana' esa meu, nade Samotrake. Balahaa' boe ma ami sa'e ofa' leo kota esa meu, nade Neapolis, ami onda nai naa. 12 Neme naa' mai, ami la'o ei' leo kota bau-ina' esa meu, nade Filipi. (Filipi nana, kota penting esa nai propensi Makedonia; mana pareta Roma pareta nai naa). Ami leo fai' hida nai naa.
13 Naraa la'e lahenda Yahudi ra fai hahae aon, ami meu saka lahenda Yahudi ra uma mamaso na. Ami bareken maan nana tantu uma mamaso' a nai lee a suu na. De ami maola ela kota a, boe ma ami hapu lee esa. Ami mita ina' hida rai naa.d De ami matuu' dedea mo si. 14 Neme ina' sira mai, esa nade Lidia. Ria lahenda mana se'o tema' pilas barakeo' mabeli fee lahenda bau-ina' ara. Ana neme kota doo' esa mai, nade Tiatira nai propensi Asia. Ana makate hule-haradoi neu' Manetualain. De fai ria namanene Paulus dedea na, boe ma ana sipo tuti' a.
15 Ami sarani mama Lidia no basa uma isi nara. Sarani basa, boe ma ana hule ami nae, “Papa kasa! Kalu emi afi mae au amahere tebe-tebe Ramatua Yesus, sona emi mai leo lalai nai au uma ka.” Ana lele'o la'o naroo, de mate'e na, ami tuka.
Nai kota Filipi, ara ena Paulus no Silas rai bui dale'
16 Fai' esa, ami leo uma mamaso' a meu, nai eno' ami mita ana feto' esa. Ria nana lahenda atan. Nitu makaresi' ara heke raan, losa' ana bisa sii-ura. De lahenda dodou' seban doi' fo mete fee sira ua-nale nara. Tehuu doi' sira, ana feto' ria malaka nara hapu katema' asa, losa' ramasu'i. 17 Fai ria ana feto ria boe tuka nahere ami, ma dedea nambebera nae, “Lahenda ia ra, nana Manetualain Madema Naan Seli ata nara. Ara mai ratudu fee eno na leo bea' lahenda bisa hapu popo'i-tatata', ma sosoi-tetefa' neme sala-siko nara mai!”
18 Ana feto' ria tao leo naa' losa' fai' hida, de Paulus doa' namanene ana feto' ria nasapapara na. Boe ma ana lipe dea na, de mete nahere ana feto' a, ma ana pareta nae, “Nitu makaresi' on! No Ramatua Yesus kuasa Na, au pareta o kalua meme ana feto' ia, besa' ia leo!” Paulus dedea nae leo' naa, boe ma nitu ria kalua tuti' a.
19 Ana feto' ria malaka nara bubulu' sira ata na kuasa na mopon, de ramanasa, huu fo ara ta hapu doi' so'. Boe ma homu ra Paulus no Silas, de hela roo si leo pasar dale' reu, nai mamana' fo ri' biasa lahenda raetu' dedea'. 20 Nai naa, ara rahara rambera rae, “Lahenda ia ra mai, tao ralutu ita kota na. Sekonaa te, sira ta lahenda bai ia'. Lahenda Yahudi ia ra, reme doo' a mai tao kaco nai ia! 21 Ara ranori-rafada lahenda rae, ita boso' tao dale' neu' mana pareta Roma atoran nara, fo tuka noi sira atoran.”
22 Lahenda dodou' ramanene leo naa', boe ma ramanasa, de ara popo'o Paulus no Silas. Mana ee dedea' fo rai naa, radenu lahenda ra sii heni dua si papake nara, fo fepa-li'u si. 23 Ara fepa-li'u basa Paulus no Silas, boe ma tee si leo bui dale' reu. Ara rafada komendaan manea rai naa, fo ranea ratalolole lahenda sira dua. Boso' losa ralai. 24 Komendaan manea a namanene leo' naa, boe ma ana ena dua si nai kama esa, nai uma bui a talada. Ana lake dua si ei nara pake ai lake.
25 Fatilada boe ma Paulus no Silas hule-haradoi ma soda io-oa Manetualain. Lahenda mana huku' feke' fo rai naa, ramanene si soda. 26 Kekeneu te, dae a natakeko losa' uma bui a boe naleu'. Uma a lelesu nara mana soi'. Ma lahenda mana huku' ara rante besi nara, boe etu heni katema' asa.
27 Fai ria, komendaan manea bui a kekes ara de foa na aon, te nita uma huhuku' a lelesu nara mana soi'. Ana nita leo naa', de naendobuko lahenda mana huku' ara ralai heni ao nara. Boe ma lesu na tafa na, fo nau pau aon. 28 Tehuu Paulus naloo nambera nae, “Papa! Boso' pau aom! Ami basa bei nai ia!”
29 Komendaan namanene haraoe' ria, boe ma ana bii naan seli, ma noi namakokoa' a. Ana nadenu fo reni feen obor, de ana nalai leo bui dale' neu ma dere naan seli. Ana sunda' undulaka na neu' Paulus no Silas ei dae nara.
30 Boe ma ana noo si leo dea' mai, de natane si nae, “Papa kasa emin. Au susa aan seli. Au muste tao ubea' fo bisa lui a ao ka eme susa ia ra mai?”
31 Paulus asa rataa rae, “Eno na leo ia': mamahere Ramatua Yesus, sona neu' ko Ana po'i-tata na o mo uma isi mara.” 32 Boe ma Paulus no Silas dedea ro komendaan bui ria no basa uma isi nara. Ara tui-beka fee si Ramatua Yesus Eno Masoda Na. 33 Fatilada lena bai', boe ma komendaan bui ria noo Paulus ma Silas reu safe makamomoi dua si hina nara, fo ri' usele' a fepa si a. Boe ma Paulus asa sarani komendaan ria no basa uma isi nara. 34 Basa de ana noo dua si leo uma na reu, fo fee si raa-rinu. Ana no kileo-boboki nara ramaho'o raan seli', nana huu ramahere Manetualain.
35 Balahaa' balahaa anan, boe ma mana ee dedea' ara fee komendaan bui ria hara', fo ana po'i Paulus no Silas reme bui dale' mai.
36 Komendaan bui namanene leo' naa, boe ma ana nafada hehelu' ria neu' Paulus asa nae, “Papa kasa! Lahenda bau-ina' ara raetu', fo po'i emi dua. De papa kasa fali no soda' leo.”
37 Paulus namanene leo' naa, boe ma ana ta sipo'. Ana nafada manea fo ri' reni hara' ria a nae, “Boso' leo naa'! Huu fo ami, lahenda Roma. De ami hule fo matetu ma ami haak ma! Mana pareta ra muste urus ami dedea ma tuka atoran. Tuka matetu na, muste parisa dedea a dei, besa' ko huku lahenda. Tehuu sira ta tao leo naa'. Ara ta parisa dedea' a, ela ara bubulu' ami sala ubea', tehuu ara fepa-li'u ami nai lahenda dodou' matan. Ta bubulu' ami sala' ubea', de ara tu'u ami leo bui dale' meu. Ia nana ara ralena laka neu' mana pareta Roma atoran na. Besa' ia, sira nau kalua rafufuni' ami meme bui dale' mai, ela lahenda boso' bubulu' ami sala ubea'? Ta bisa leo naa' fa. Mafada lahenda bau-ina' sira, mai po'i mata' ami. Leo naa' sona besa' ko ami sipo'.”
38 Fai ria manea sira reu tui malaka ra, Paulus dedean ria, besa' ko ara bubulu' sira dua lahenda Roma. De ara bii raan seli. 39 Boe ma lahenda bau-ina' ara leo bui a mai, fo manaku sira sala na, ma ara holu-ei Paulus no Silas. Boe ma ara po'i dua si reme bui dale mai, ma ara hule fo dua si foa ela kota ria. 40 Paulus asa kalua reme bui a mai, boe ma ara leo mama Lidia uma na reu. Nai naa, ara rabua ro lahenda kamahere' ara. Ara ranori-rafada si ma ratetea dale nara lai' esa selu'. Boe ma ara foa ela kota ria.