Ita muste taloe-tadae ao' ara, sama leo' Yesus Kristus
2
Toranoo susue-lalai' fo ri' dadi Yesus Kristus lahendan! Ana fee emi hihii-nanau' malole dodou'. De emi bisa tao matetea esa no esa dalen. Emi bisa fee lelea-nonore' fo ri' naoka-nasamu neme emi nasue-nalai ao mara. Emi bisa masoda balaroe-balanau' esa no esa, nana huu Manetualain Dula-dale Na noi-tao nai emi basa talada. Ma bisa matudu emi dale kasian mara, ma dale balaroe-balanaum esa no esa. 2 Kalu emi tao leo naa', sona au amaho'o-atadale. Lena-lena' bali, kalu emi masue-malai ao ma teiesa-dale'esa, masoda no eno' esa' a, ma mala hara' fo moi-tao neu' esa. 3 Boso' tao hata fo saka noi oonto' soa-neu' emi ao-ina heheli mara. Ma boso' tao ao mara kahere' lena neme lahenda feke'. Sekonaa te, o koao ma ta nanuu nete'. Tehuu ita muste taloe-tadae ao' ara, fo tao lahenda feke' a lena neme ita. 4 Ma emi boso' urus noi nonoi mesa mara. Tehuu ita muste mete-relu lahenda feke' a parluu na boe.5 Ita dale na, ita dudu'a-aafin ma leleo-lala'o ara muste sama leo' Yesus Kristus.
6 Leo mae Ria rupa-lolen sama leo' Manetualain,
ma Ria boe Ramatua' sama leo' Manetualain,
tehuu Ana po'i haak Na,
ma Ana ta pake Ria pangkat Na.
7 Boe ma Ana onda leo dae-bafo' ia mai,
pake rupa-lole' sama leo' lahenda dae-bafo' a.
Ana foa ela katema' haak Na,
de tao aon dadi ata.
8 Ta dadi noi lahenda aana',
tehuu Ana tao aon leo' lahenda mana dadi taa',
ela tao tuka Manetualain hihii-nanaun.
Leo mae lahenda raisa Ni nai ai kake' boe, Ana noi sipo-sipo' a,
ma maten, sama leo' Ria nana lahenda tadalu'.
9 Huu no Ria naloe-nadae aon leo' naa,
de Manetualain so'u nadedema Ni.
Ma fee Ni nade kahere' naan seli.
Ta hapu nade' esa, kahere' lena heni Ria.
10 Manetualain so'u nadedema Ria nade Na,
ela basa lahenda ra fee hada-horomata neu' Ana.
Ri': lahenda rai lalai,
ma lahenda rai dae-ina' a.
Lahenda masoda' ma lahenda mana mate'.
Neu' ko basa lahenda ra sunda' undulaka nara fo do'o-tabe Ni.
11 Ma neu' ko basa lahenda ra rae, “Yesus Kristus nana tebe-tebe Ramatua', de nanuu haak pareta au!”
No ria naa, ara io-oa Ama' Manetualain.a
Ita dadi sama leo' ruu' fo nahaa-nakaledo soa-neu' dae-bafo' a
12 Toranoo susue kara emin! Nenene matalolole! Fai' naa ra au bei nai kota Filipi, emi mamanene neu' au, boe ma emi tuka Manetualain eno roo-tetu Na. Besa' ia ita esa' ko matan nai mamana feke', tehuu au hule fo emi sadia maroo ela masoda roo-tetu'. Mafarerene' te kalu emi ta mamanene neu' Ramatua' a, sona neu' ko emi dei mitan! Nana huu Ria ri' po'i-tata na emi neme sala-siko mara mai. Boe ma emi muste masoda no matetu-maraa', huu fo emi dadi Ria lahendan. 13 Manetualain noi-tao nai emi dale mara. Ria ri' soi eno' ela emi nau mamanene Ni. Ma Ria ri' fee kuasa de emi moi-tao fo tao mamaho'o dale Na.
14 Kalu emi tao sudi ubea', sona boso' mamumuu, ma boso' mareresi'. 15 Tao leo naa', ela emi bisa dadi lahenda dale malalao-malalafu', ma lahenda fo ta nanuu sala'. Emi masoda nai lahenda tadalu' ara ro mapuputa' ara talada. Tehuu emi boso' tuka si! Emi masoda ma muste malalao-malalafu', huu fo emi nana Manetualain ana Nara. No ria naa emi masoda ma muste nahaa ela natudu fee si eno', sama leo' ruu' ara rahaa-rakaledo nai maiu' a.b 16 Emi masoda no roo-tetu', ma malala'o Manetualain Hara-dasin. No ria naa, neu' ko emi tao ma au dale ka namaho'o-natadale, tepo' fo Yesus Kristus natafali mai. Ma au sosota ka hapu buna-boa malole, nana huu ta tu'u henin hihii'.
17-18 Tehuu uni' ko leo au fee heni laesa' au soda ka, dadi tutunu-hohotu' ela emi bisa mamahere tebe-tebe, ma malala'o Manetualain nonoi-tataon, sona au sipo' no dale namaho'o. [Ria, sama leo' malaka agama a po'a oe anggor neu' mei tutunu-hohotu' a fo do'o-tabe Manetualain.] No ria naa, ita bisa tamaho'o bela' a, nana huu tutunu-hohotu' ria nanuu sosoa-raraa'.c
Timotius nonoi-laka na
19 Au amahehena' ta doo' a so', te Ramatua Yesus soi eno' fo au fee Timotius neti, ela tao natetea emi dale mara. Basa nana, ana fali leo ia' mai bali, fo nafada au la'e-neu' emi leleo-lala'om, ma natetea au dale ka. 20 Au ta adenu lahenda feke'. Au adenu noi Timotius, nana huu ria dale' esa no au. Ma ana sue-lai matetu' emi. 21 Ria ta sama leo' toranoo feke' ara. Ara afi noi sira parluu mesa nara, tehuu ta urus hihii-nanau' penting soa-neu' Yesus Kristus. 22 Tehuu emi bubulu' Timotius noi-tao sota naan seli, ela nalala'o Manetualain nonoi-tataon. Ana noi-tao no au, sama leo ana' esa noi-tao fee papa na. Ami dua meu tui-beka Ramatua Yesus Tutui Malole Na nai basa mamana' ain. 23 Kalu ara raetu' basa au dedea ka nai ia, besa' ko au fee Timotius leo emi naa' neti. 24 Tehuu besa' ia, Manetualain natetea au dale ka nae, ta doo' a so' te au bisa mai dama emi.
Epafroditus nonoi-laka na
25 Maulu na, au hapu susa. Boe ma emi fee ita toranoon Epafroditus mai dama au. Ana nalala'o Manetualain nonoi-tataon sama-sama no au, sama leo' soldadu a makate tuka malaka na paretan. Tehuu besa' ia, au ameda aan, feen fali selu' leo emi neu. 26 Ria dale na nahii' nau nita emi. Ma ria dale na doda' neu' emi, nana huu bubulu' nae, emi mamanene rae ana oda' namahedi' a. 27 Mema' tebe. Fai' naa ra ana namahedi bera' losa' hisadei na maten. Tehuu Manetualain sue ni de puli naan. Ma Manetualain sue-lai au boe, de puli na Epafroditus, ela au boso' boe-boe susa. 28 Huu ria naa au ahii' aan seli feen fali leo emi neti, ela emi basa mabua no dale namaho'o. Kalu leo' naa, sona au dale ka tama. 29-30 De emi muste sipo' ana no malole, huu fo ria nana Ramatua' a lahendan. Ma emi muste fee hada-horomata neu' basa lahenda, fo sama leo' ria. Huu fo ana nalala'o Kristus nonoi-tataon, losa' hisadei na maten. Ma ana ta heo' bai' boe', nana huu ana nau tulu-fali au, huu fo emi ta bisa mai tulu-fali au. De emi muste sipo' selu' ana no dale balaroe-balanau'.