Paulus susura na
fee lahenda kamahere' rai
Efesus
Paulus mulai dui' susura na
1
Soda-mole' neme au, Paulus. Au dui' susura' ia, fee emi basa fo ri' dadi Yesus Kristus lahendan nai kota Efesus,a ma ranenete rasoda lalao-lalafu', tuka Ria hihii-nanaun. Ria ri' nadenu au, tuka Manetualain hihii-nanaun.b2 Manetualain nana, ita Aman. Ma Yesus Kristus nana, ita Ramatuan. Au hule fo Ara ratudu dale malole nara ela emi masoda no tetu-tema', mole-dame ma tesatei-tamadale'.
Paulus io-oa Manetualain ma Yesus Kristus
3 Io-oa Manetualain! Ria nana, ita Ramatuan Yesus Kristus Aman. Manetualain fee ita ua-nale' dodou-ina' neme nusatetu-ikutema' a mai, nana huu ita dadi Yesus Kristus lahendan.
4 Tepo' fo dae-ina' a bei ta'a, Manetualain sue ma here mema' ita, ela dadi Kristus lahendan. Ana nau ita tasoda lalao-lalafu' losa' lahenda ta bisa sale ita. 5 Neme fai a ulu na mai Ana naetu' mema', de pake Yesus Kristus ela tao na ita dadi Ria anan. Ia ri' tao namaho'o Ria dale Na. 6 Huu ria naa, ita io-oa Ni. Ana natudu dale malole Na neu' ita, ela ita bisa tasoda tabua-taesa to Ria Ana susue Na.
7 Leo mae maulu na ita ta lalao-lalafu' nai Manetualain eno masoda Na, tehuu Ana natudu dale malole Na, ma fee Ana Na mai, daa Na faa losa' maten. No ria naa, Ria Ana Na soi-tefa na ita teme sala-siko' ara mai.c 8 Huu no Ana sue na ita seli, de Ana fee makaledo' nai ita dalen, ela ita bisa talela' Ria maksud Na. 9 Fai a ulu na, Manetualain bei ta nafada lahenda dae-bafo' a Ria maksud Na katema'. Tehuu besa' ia, tuka Ria hihii Na, Ana tao na ita bubulu' neme fai a ulu na mai Ana naetu' nau pake Yesus Kristus, ela tao na lahenda dae-bafo' a mole-dame ro Manetualain. 10 Ma neu' ko losa ledo-fai na, Yesus Kristus boe dadi Malaka, de ator basa-basan nai dae-ina' a ma nai nusatetu-ikutema' a.
11-12 Huu no ita tabua-taesa to Kristus, de ita boe sipo posaka' neme Manetualain mai. Neme masososa na Ana here na ami lahenda Yahudi ra, ela dadi Ria lahenda nara. Ria maksud Na sona Ana nau pake ami, fo soi eno' fee lahenda nusa feke' a, ela basa lahenda ra bisa ramahere Kristus. Basa ia ra dadi tuka hata fo Ana naetu' mema'. No ria naa, ita bisa so'u tadedema Manetualain nade marela-masa'an.
13 De emi lahenda nusa feke' a boe, bisa dadi Kristus lahenda nara, nana huu emi mamahere Ria Tutui Malole roo-tetu Na. Huu fo Tutui Malole ria neni popo'i-tatata' soa-neu' emi.
Emi mamahere leo' naa, sona emi boe sipo Manetualain Dula-dale Malalao-malalafun fo ri' Ana helu. Dula-dale Malalao-malalafu' a sama leo' e'ee-dedede' dadi tanda nae, emi dadi meu' Ria nuu-ena tean. 14 Manetualain fee Dula-dale Malalao-malalafun fo ri' ita bubulu' tae, neu' ko Ana tao natetu' basa hata fo ri' Ana helu, losa' soi-tefa na ita, ela dadi Ria lahendan. Huu ria naa, ita io-oa Ni.
Paulus hule-haradoi fee lahenda Efesus ara
15 Au amanene dodou', la'e-neu' emi namahere ma neu' ita Ramatuan Yesus Kristus, ma emi susue ma neu' lahenda kamahere' ara. Huu ria naa, 16 au ta hahae hule makasi neu' Manetualain. 17 Au hule-haradoi ae, “Ama Boki'! Ama' a nana au Ramatuak Yesus Kristus Manetualain Na. Ma Ama' a marela-masa'a. Au hule fo Ama' a fee Dula-dale Ma neu' lahenda Efesus ara, ela bisa ralela' hihii-nanau' roo-tetu', ma bisa ralela' matetu' Ama' a. 18 Au hule fo Ama' Manetualain soi sira dudu'a-aafi nara, ma tao makaledo sira dale nara, ela ara bisa bubulu' basa hata fo ri' Ama' a helu nau fee si. Au boe ahii' ara bisa bubulu' posaka' fo ri' Ama' a helu nau fee si. Huu fo posaka' ria, kahere' naan seli! 19 Au hule Ama' a tulu-fali si, ela ara bisa bubulu' ratalolole Ama' a kuasa marela-masa'am. Ama' a pake kuasa ria, ela tulu-fali Ama' a lahenda kamahere mara. 20 Manetualain kuasa Na marela-masa'a! Ana pake kuasa ria, fo fee Yesus nasoda selu' neme mamate Na mai. Boe ma Manetualain nahene-naae' Kristus leo nusatetu-ikutema' a neu, ma fee Ni natuu' neu' mamana hada-horomata naan seli, nai Manetualain boboa ona Na.d 21 Ana dema lena basa-basan nai dae-ina' a ma nusatetu-ikutema' a. Ana dema lena basa kuasa ma basa mana homu pareta ra. Ana homu Ria kuasa marela-masa'an ta noi besa' ia, te Ana homu naroo losa doo na neu. 22 Manetualain tao na basa-basan do'o-tabe Kristus. Ma Ria so'u Kristus dadi Malaka, ela ator basa-basan fo natuti-nanato' no lahenda kamahere' ara.e 23 De kalu Ria dadi Malaka, sona ita lahenda kamahere' ara dadi sama leo' ao-ina Na. Neu' ko ita toi-tao tabasa nonoi' fo ri' nalala'on, tepo' fo Ana nai dae-ina' a. Ana nanuu kuasa ela tao na basan dadi, tuka Manetualain maksud Na.”f
Au huhule-haradoi fee emi, mema' leo naa'.