Paulus susura na
fee lahenda kamahere' rai kota
Kolose
Paulus mulai dui' susura na
1
Soda-mole' neme au, Paulus. Manetualain here na au dadi Yesus Kristus lahenda nadedenun. Ita toranoon Timotius nai ia, ana haitua haraoe soda-mole' fee emi boe.2 Au dui' susura' ia fee emi, Manetualain lahendan rai kota Kolose, fo ri' tao tuka Yesus Kristus eno masoda Na la'o naroo.
Ami hule fo ita Aman Manetualain, natudu dale malole Na neu' emi, ela emi bisa masoda no tetu-tema', mole-dame ma tesatei-tamadale'.
Paulus hule-haradoi fee lahenda kamahere' rai Kolose
3 Fai bea ma ami nai ia hule-haradoi fee emi, sona ami hule makasi neu' Manetualain, ita Ramatuan Yesus Kristus Aman. 4 Ami mamanene hihii-nanau' dodou' la'e-neu' emi mamahere Yesus Kristus, ma la'e-neu' emi dale susue-lalaim, ma dale malole mara soa-neu' basa lahenda kamahere' ara. 5 Emi tao leo naa', nana huu emi malela' hihii-nanau' malole fo nana peda' soa-neu' emi nai nusatetu-ikutema' a. Parnaa emi mamanene hihii-nanau' ia ra neme dedea-nafada matetu' a, ri' Ramatua' a Tutui Malolen, 6 fo lahenda tui-beka fee emi neme ulu' mai. Tutui Malole ria nanatui-nanabeka' nai basa mamana' nai dae-bafo' ia, ma hapu buna-boa malole, nana huu tao na lahenda masoda na natafali dadi malole. Emi masoda ma boe natafali dadi malole leo naa', mulai neme masososa na emi mamanene Tutui Malole ria, ma bubulu' matetu' Manetualain dale malole Na.
7 Emi manori hihii-nanau' ia ra neme a'a Epafras, fo ri' ami tia-lai mana noi susuem. Ana makate nalala'o naroo Kristus nonoi-tataon nai emi talada.a 8 Ana tui ami nai ia, la'e-neu' emi susue-lalaim fo ri' Manetualain Dula-dale Na fee emi.
9 Huu ria naa, mulai neme masososa na, ami mamanene la'e-neu' emi, ami hule-haradoi fee emi la'o naroo. Ami hule neu' Manetualain, ela emi bisa malela' matetu' Ria hihii-nanaun, ma emi bisa bubulu' hihii-nanau' dodou', tuka hata fo Manetualain Dula-dale Na nanori-nafadan neu' emi. 10 No ria naa, emi bisa masoda raadale'-to'etei', ma meni Manetualain nade malole Na. Ma emi boe bisa tao mamaho'o Ramatua' a dale Na nai basa hihii-nanau' dale'. Kalu emi matudu dale malole neu' lahenda, neu' ko emi maboa boa malole la'o naroo. No ria naa, emi bisa boe-boe malela' Manetualain.
11-13 Ami boe hule-haradoi neu' Manetualain, fo fee Ria kuasa marela-masa'an, ela emi bisa sabar lepa-masaa ma basa hihii-nanau' sira. Ami hule fo emi dale ma bisa henu' no namaho'o, ela emi hule makasi maroo neu' Ama' Manetualain. Ana soi eno', ela emi bisa sipo babati' neme posaka' nai nusatetu-ikutema' a. Ana fee posaka ria neu' basa lahenda fo ramahere Yesus Kristus. Ana po'i-tata na ita teme kuasa maiu-mahatu' a mai, boe ma fee ita dadi Yesus Kristus lahendan, fo leo nai makaledo' a dale'. Ana so'u na Yesus Kristus dadi ita Mane na. Yesus nana Manetualain Ana susuen. 14 Manetualain fee heni Ana Na, ela soi-tefa na ita ma sae-safe heni ita sala-siko nara.b
Kristus, madema naan seli lena basa-basan
15 Kristus, rupa-lole' esa no Manetualain,
lahenda dae-bafo' a ta bisa ritan.
Ria ri' ulu', neme basa-basan,
ma Ana dadi Ramatua' neu' basa-basan fo ri' Manetualain adu naa si.
16 Manetualain pake Ni
fo adu lalai ma dae-ina' a no basa oe-isin.
Ana adu-tao hihii-nanau' fo ri' lahenda dae-bafo' a bisa ritan,
ma lahenda dae-bafo' a ta bisa ritan.
Conto leo-leo', mana pareta ra, sira si' homu kuasa,
mane' ara, ma malaka ra.
Basa-basan fo ri' Manetualain adu-tao,
Ana adu-tao soa-neu' Yesus Kristus,
ma Yesus boe noi-tao basa sira.
17 Tepo' fo basa feke' ara bei ta'a,
tehuu hapu Ni mema'.
Basa-basan nanaheke' ro Ni,
ma Ria ri' ator asa.
18 Ria dadi Malaka fee basa lahenda kamahere' ara,
ma lahenda kamahere' ara dadi sama leo' Ria ao-ina Na.
Ria nalala'o basa-basan.
Neme basa mana mate' fo ri' ara rasoda selu',
Ria ri' penting lena,
ela Ria ri' madema naan seli lena neme basa-basan.c
19 Basa-basan fo ri' rai Manetualain ao-inan dale',
rai Kristus ao-inan dale' boe,
ria ri' tao namaho'o Manetualain.
20 Manetualain pake Yesus Kristus,
ela basa-basan fo ri' Ana adu-tao a mole-dame ro Ni.
Ria fee Ana Na,
daa Na faa dadi tutunu-hohotu',
ma mate nai ai kake' a,
ela basa-basan rai lalai,
ma basa-basan rai dae-ina' a,
bisa ramole-radame ao selu' ro Manetualain.d
21 Fai a ulu na, emi masoda doo' a meme Manetualain mai. Emi musu mo Ni, ma bika-bati meme' Ana mai, nana huu emi dale tadalu mara, ma nonoi tadalu ma nalena-laka neu' Ana la'o naroo. 22 Leo mae leo' naa, tehuu besa' ia Ria soi eno', de ita bisa mole-dame selu' to Ni. Ria nadenu Ana Na fo dadi lahenda dae-bafo'. Ria nadenu Ana Na mai dadi lahenda dae-bafo', ela mate Ni nai ai kake' a dadi tutunu-hohotu', fo ita bisa mole-dame selu' to Ni. Yesus Kristus tao leo naa', ela Ana noo ita teu tapadei' nai Manetualain mata Na boe, ita lalao-lalafu', dale roo-tetu' ma sala-siko' ta'a. 23 Sadi emi muste manenete maroo nai emi namahere ma. Mamahere tebe-tebe, boso' keke-boi'! Boso' heo' meme Tutui Malole, fo ri' emi sipon tepo' fo ri' mamanenen masososa. Emi bisa tiadea-radaara meu' Tutui Malole a. Lahenda reu tui-beka Tutui Malole a nai basa mamana' ain nai dae-bafo' ia. Ma Manetualain nadenu au, Paulus, fo uu tui-beka Tutui Malole a boe.
Paulus noi-tao nalalau' Ramatua' a lahenda nara
24 Tepo' fo Kristus nasoda nai dae-bafo' ia, Ana hapu doidoso dodou'. Ma besa' ia au lepa-asaa doidoso rupa'. Leo mae leo' naa, tehuu au dale ka namaho'o la'o naroo. Kalu lahenda hapu doidoso, sona ela au ri' lepa-asaa kati si, sama leo' Kristus lepa-nasaa na doidoso sira kati lahenda nara. Ria lahenda nara, dadi sama leo' Ria ao-ina Na. 25 Manetualain fee au nonoi-laka', fo alalau' Ria lahenda nara. Huu ria naa, au anori-afada lutu-lutu Ria Hara-dasin soa-neu' emi. 26-27 Neme masososa na, lahenda ramanene Manetualain Hara-dasin. Tehuu ara bei ta bubulu' matetu' Hara-dasi' ria maksud na, nana huu ria bei nafuni'. Tehuu besa' ia, Manetualain naetu, fo buka maksud ria fee Ria lahenda Nara. Ma Ria maksud Na, nana tutui' kahere' soa-neu' basa leo rai dae-bafo' ia. Tutui' kahere' a nana ri':
Kristus nasoda nai emi dale mara!
Ria ri' tao na emi mamahere maroo mae,
neu' ko Ana tao hihii-nanau' malole naan seli soa-neu' emi nai nusatetu-ikutema' a.
Ia ri' ita lahenda dae-bafo' a tahanin neme fai a ulu na mai.
28 De ami mafada basa lahenda la'e-neu' Kristus. Ami manori-mafada basa lahenda ra, ma mafarerene' fee si, pake basa dudu'a-aafi tande' fo ri' Manetualain feen neu' ami. Ami tao leo naa', ela matetea basa lahenda fo tuka Kristus, losa' ramano'u-ramadai ela sira bisa rapadei rai Ria mata Na ma ta mae', nana huu masoda nara roo-tetu' la'o naroo. 29 Huu ria naa, au oi-tao sota aan seli fee emi. Au bisa anenete oi-tao sota leo' naa, nana huu Kristus kuasa Na tao natetea au. Ma Ria kuasa Na, marela-masa'a!