2
De au aetu' basa ae, au bei ta nau uu dama emi, ela emi boso' dale hedi, nana huu au amanasa oo emi. 2 Kalu au tao a emi dale hedi, sona bea ri' tao mamaho'o au dale ka bali? Noi emi ri' tao ma au dale ka namaho'o. Kalu besa' ia au eti, sona au tao a emi dale hedi. 3 De au ta uu dama emi fa, tehuu au haitua susura' fee emi, ela au afarerene' fee emi la'e-neu' basa hihii-nanau' sira. Kalu au uu dama selu' emi, sona emi boso' tao ma au dale hedi, nana huu emi nonoi-tatao tadalu mara. Matetu na, emi ri' tao ma au dale ka namaho'o. Ma au amahere ae, kalu au dale ka namaho'o, sona emi dale mara boe ramaho'o. 4 Tehuu fai fo au dui' susura' ia fee emi a, au dale ka hedis naan seli ma dola aan seli. Au haitua susura' ia nana, au ta saka eno' fo tao a emi dale hedi, tehuu au tao leo naa', ela emi bisa bubulu' mae au sue a emi seli.Fee ampon neu' lahenda sala-sikon
5 Nai emi jama'at ria, lahenda esa ri' tao na lahenda dodou' dale nara susa. Au boe susa nana huu lahenda ria nonoi-tataon. Tehuu tao na au susa noi baiana', emi ruma susa maan dodou'. 6 Boso' boe au dedea dodou' bali. Huu fo neme emi mai dodou rasa'ai ni, de ana hahae so. 7 De besa' ia, emi muste fee ampon neu' ria sala-sikon, boe ma dedea matalolole mo ni. Boso' losa mopo ao masee na. 8 Huu ria naa, au hule emi mabua mo ni, ela ana namahere nae, emi sue-lai ni.
9 Bei lalai' ia au dui' susura ka, fo saka' uji emi. Huu fo au nau bubulu' emi tao malole, ma tao tuka basa-basan fo au pareta emi a. 10 Kalu emi ta mapeda dale' so', ma fee ampon neu' lahenda sala-sikon, sona au boe tuka hata fo emi ma'etu' a. Kalu ria nanuu sala' fo parluu au feen ampon, sona au boe fee ampon neu' lahenda ria sala-sikon. Au tao leo naa' nai Kristus matan, fo dadi conto malole soa-neu' emi. 11 Huu fo au ta ahii' nitu ra malaka na natuda ita, do naseki ita. Ita muste bubulu' ria dudu'a-aafi tadalu nara. De boso' emi momoo' pakanaa'!
Nai Troas Paulus dale na ta tama
12 Maulu na, tepo' fo au leo kota Troas uu a, Manetualain soi fee au eno' nai naa, de tui-beka fee lahenda la'e-neu' Kristus Hara-dasin. 13 Tehuu au dale ka ta tama, nana huu au ta aneta oo toranoo ki Titus nai naa. De au ate'a lahenda kamahere' ara rai Troas, boe ma au leo propensi Makedonia uu.a
Kristus ri' tao na ita taseki
14 Tehuu leo mae au nai bea boe, au hule makasi dodou' neu' Manetualain. Huu fo Kristus natati soa' hihii-nanau' tadalu' ara, boe ma Ana naseki, ma ita boe tabua-taesa to Ni. Huu ria naa, Manetualain natudu naroo nae, ita nana Ria lahendan. De tepo' fo ita tui-beka fee lahenda la'e-neu' Kristus, ria sama leo' lahenda hae ra maboo meni' esa. 15-16 Maulu na, tepo' fo lahenda Yahudi ra tao tutunu-hohotu', ria masu na ae leo Manetualain neu, de boo na tao namaho'o dale Na. Ita boe tuka Kristus, de ita sama leo' boo meni' esa nai Manetualain matan. Tehuu soa-neu' lahenda ruma, sona ita sama leo' boo puru' esa. Kalu lahenda fo ri' masoda nara doo' a reme Manetualain mai, rita ita masoda na, ria tao na si aafi rae, neu' ko ara mate, ma bika-bati reme Manetualain mai. Tehuu soa-neu' lahenda ruma bali, ita sama leo' boo meni' esa. Kalu lahenda fo ri' hapu soda manaetu-manabasa taa' rita ita masoda na, sona ria tao na si rafarene Kristus po'i-tata naa si, ma fee si soda' manaetu-manabasa taa'. Ta hapu lahenda dae-bafo' esa bisa naboo meni leo naa' nai Manetualain matan.
17 Mafarerene', te ami ta leo' lahenda feke' fo saka oonto' reni' ara tui-beka Manetualain Hara-dasin, sama leo' ara dagan Manetualain Hara-dasin. Ta'a! Kalu ami dedea, sona basa lahenda bisa rita ledo-ledo ami manori-mafada no dale lalao-lalafu'. Ami dedea ma, naoka-nasamu neme Manetualain mai. Ma ami masoda mabua-maesa mo Kristus.