Paulus susura na
fee sarani' ara rai
Galatia
Paulus mulai dui' susura na
1
1-2 Soda-mole' neme au, Paulus. Au haitua susura' ia, fee basa toranoo kamahere' rai jama'at nai propensi Galatia. Basa toranoo' fo sama-sama ro au nai ia, ara haitua fee emi haraoe soda-mole' boe.Au fee emi nafarerene' ae, Ama' Manetualain no Yesus Kristus ri' radenu au, ta lahenda dae-bafo' a fa. Yesus Kristus nana, Lahenda fo ri' Manetualain feen mai. Kristus maten, tehuu Manetualain feen nasoda selu'. Boe ma Sira si' radenu au fo uu tui-beka fee lahenda ra Tutui Malole a.
3 Au hule-haradoi neu' Manetualain, ita Aman, ma Yesus Kristus, ita Ramatua na. Ami hule ela Ara ratudu dale malole Nara reu' emi, ela emi bisa masoda no tetu-tema', mole-dame, ma tesatei-tamadale'. 4 Kristus maten ela sae-safe heni ita sala-sikon, ma soi-tefa na ita teme tadalu' fo nai dae-bafo' besa' ia. Basa sira, nana tuka Ama' Manetualain hihii-nanaun. 5 Huu ria naa, ita muste io-oa Ni la'o naroo! Tebe ria!
Paulus namanasa nana huu lahenda Galatia ra ta ramahere nanori-nafada roo-tetu' a
6 Toranoo kara emin! Au ta bisa bubulu' emi so'! Manetualain teka-here na emi, nana huu Ana nau emi malela' Ria dale malole Na. Tehuu ubea' taon, de emi lai-lai mamahere nanori-nafada feke' 7 fo ri' ta matetu'? Maulu na, au anori-afada matetu' la'e-neu' Yesus Kristus Tutui Malole na. Tehuu besa' ia manatipu-manadai' ara mai tui-beka pepeko' Tutui Malole ria, losa' tao ra emi laka mara dile.
8 Besa-besa! Neu' ko Manetualain kutuk lahenda, fo mai nanori-nafada Tutui Malole fo ta sama leo' maulu na ami manori-mafada a. Leo mae lahenda ria neme ami mai, do Manetualain eila'o-limalopen esa neme nusatetu-ikutema' a mai, tantu ana hapu kutuk! 9 Neme ulu' mai ami mafada mema' hihii-nanau' ia. Tehuu besa' ia au nau fee selu' nafarerene' bali, leo ia': kalu lahenda mai nanori-nafada feke' neme Tutui Malole, fo maulu na emi sipo a, neme' naa ela Manetualain kutuk ana boe.
10 Au aparani dedea ae leo' naa, nana huu au nau tao amaho'o Manetualain dale Na, ta lahenda dae-bafo' a dale na. Emi afi mae au nau asosoro poo nai lahenda dae-bafo' a matan, do? Ta'a! Kalu au tao leo naa', sona ta araa dadi Kristus atan.
Paulus tui selu' tao leo' bea de ana dadi Ramatua Yesus lahenda nadedenun
11 Toranoo kara emin! Au nau afada ledo-ledo ae, Tutui Malole fo ri' au anori-afadan neu' emi, ta lahenda dae-bafo' a ri' aadun ria fa. 12 Au ta sipo neme' lahenda dae-bafo' a mai, ma ta hapu lahenda dae-bafo' a ranori-rafada au. Tehuu au sipo' noi neme Yesus Kristus mai.
13 Tantu emi mamanene tutui' la'e-neu' au masoda maulu ka, tepo' fo au bei homu agama Yahudi a, hete? Tepo' ria, au ese-rumu a Ramatua' a lahenda nara seli, fo nau aisa si ela boso' ramahere Ramatua' a.a 14 Ma tepo' ria boe, au amahana de anori la'e-neu' agama Yahudi a, lena neme lahenda Yahudi feke' fo dedena au a. Ma au makate alala'o ami bei-ba'i mara hadas na, ma atoran agama a katema'.b
15-16 Leo mae leo' naa, tehuu Manetualain naetu' basa, fo fee au alela' Ana Na. Au mama ka bei ta boki au fa, te Ana here mema' au, nana huu Ana nau natudu Ria dale malole na neu' au. Ana nadenu au boe, fo uu anori-afada lahenda fo ta Yahudi ra. Tepo' fo Ana nadenu au a, nana au ta uu hule lahenda feke' lelea-nonoren.c 17 Au ta uu dama lasi Kristen rai Yerusalem fo ri' dadi Yesus lahenda nadedenun raulu' au a, tehuu au leo dae Arab uu. Basa ria, boe ma au atafali selu' leo kota Damsik a mai bali.
18 Basa teu' telu, boe ma au uu dama Petrusd nai Yerusalem ela saka tutui' neme' ana mai. De au leo oo ni nai naa, losa fai' sanahulu lima.e
19 Tepo' ria, au uu dama Ramatua Yesus fadi bokin Yakobis boe. Tehuu au ta uu dama Ramatua' a lahenda nadedenu feke nara, noi sira dua. 20 Hata fo au dui' ia, nana tebe leo' naa! Au ta apuputa'! Manetualain bubulu'!
21 Boe ma au leo propensi Siria no propensi Kilikia uu. 22 Tepo' ria, Kristus lahendan fo rai Yudea bei ta ralela' au. 23 Ara ramanene noi hara' rae, “Lahenda ria ri' maulu na tao na ita doidoso a, besa' ia ana nanori-nafada Kristus Tutui Malole Na. Sekonaa te maulu na ria ri' nau naisa ita.” 24 Basa si ramanene au amahere Yesus Kristus, de ara io-oa Manetualain nade Na.