3 Au hule-haradoi neu' Manetualain, ita Aman, ma Yesus Kristus, ita Ramatuan. Au hule fo Ara ratudu Sira dale malole nara reu' emi, ela emi bisa masoda no tetu-tema', mole-dame, ma tesatei-tamadale'.

4 Fai bea ma au afarene emi, au dedea oo Manetualain ae, “Makasi dodou' soa-neu' lahenda Korintus ara namahere na!” Manetualain natudu dale malole Na neu' emi, nana huu emi mamahere maroo Yesus Kristus, fo ri' Ana fee Ni mai. 5 De Ana fee emi mabe'i malala'o nonoi-laka' dodou', nana huu emi mabua-maesa mo Ni. Ria tao na emi mamasu'i nai dale mara. Huu ria naa, emi bubulu' matetu' nanori-nafada' ara la'e-neu' Ria eno masoda Na. Emi boe malela' eno ubea' ri' malole lena, fo mafada lahenda la'e-neu' Kristus. 6 Ria natudu nae, ami mafada emi nanori-nafada' fo ri' la'e-neu' Kristus, naoka-nasamu nahere nai emi dale mara. Huu ria naa, emi mamahere mae, nanori-nafada' sira roo-tetu'. 7 De emi sipo basa hihii-nanau' malole, fo ri' Manetualain Dula-Dale Na fee neu' Ria lahenda nara. Ta kura-kai hata esa boe'. Besa' ia, emi mahani fai fo neu' ko Manetualain natudu ita Ramatuan Yesus Kristus soa-neu' basa lahenda ra. 8 Kristus ri', tao natea-namepe emi, ela manenete maroo losa' Ana natafali leo dae-bafo' ia mai. No ria naa, emi ta tuda, ma ta hapu lahenda bisa sale emi. 9 Ita bisa tamahere Manetualain Hara-dasin, huu fo Ana dedea ubea' sona tao naan dadi. Tantu Ana tao hihii-nanau' ia ra soa-neu' emi. Ma Ria ri' soi eno', ela emi bisa malela' matalolole Ana Na, fo ri' ita Ramatuan Yesus Kristus.

10 Toranoo susue kara emin! Au dedea hihii-nanau' ia, uni' ita Ramatuan Yesus Kristus nade Na. De tebe-tebe au hule emi hahae malelena ao' a leo. Tehuu afi fo emi masoda teiesa-daleesa, ma boso' mabika-mabati'. Emi muste sama-sama du'a-afi loa-naru', ela emi bubulu' mae, emi manuu noi du'a-afi' esa' a.

11 Huu fo lahenda neme susi Kloe uma isin tui au nae, emi ruma malelena ao' maroo. 12 Leo ia': emi ruma mae, “Ami nana Paulus lahendan! Ma ruma rae, “Ami nana Apolos lahendan!” Ma ruma bali rafada rae, “Ami tuka Petrus!”^b Feke' ara bali rae, “Ami mamanene noi neu' Kristus!”^c

13 Emi dudu'a-aafim leo bea'? Kristus kileo-bobokin ta bisa rabika-rabati'. Emi afi mae, au ri' mate nai ai kake a soa-neu' emi? Ta'a! Ara sarani emi a, pake au nade ka ela emi dadi meu' au lahenda ki, do? Ta leo naa' hete? 14 Au hule makasi neu' Manetualain, nana huu tepo' fo au oo emi nai naa, au ta sarani lahenda feke', tehuu au sarani noi a'a Krispus no a'a Gayus.^d 15 No ria naa, ta bisa hapu lahenda rae, “Ara sarani au pake Paulus nade na, boe ma au dadi Paulus lahendan.” 16 (Au besa' ko afarene. Au boe sarani Stefanus uma isin ruma. Tehuu au ta afarene sarani lahenda feke' do, ta'a.)^e

17 Kristus ta nadenu au uu sarani lahenda. Au nonoi-laka ka, ri' tui-beka fee lahenda la'e-neu' Ria Tutui Malole Na. Tehuu kalu au afada lahenda leo' naa, Kristus ta nahii' au dedea adedema ao ka, ela atudu au rolu-malela kara. Huu fo kalu au dedea leo' naa, sona nakura' kuasa neme tutui' la'e-neu' Kristus mamate Na nai ai kake'.

18 Lahenda afi rae, ami tui-beka hihii-nanau' koa-pakanaa' la'e-neu' Kristus mamate Na nai ai kake'. Tehuu lahenda rupa leo naa' a, neu' ko bika-bati neme Manetualain mai. Sekonaa te, ita bubulu' tae, Kristus mamate Na, natudu Manetualain kuasan fo ri' po'i-tata na ita teme sala-siko' ara. 19 Ria sama leo' ba'i Yesaya parnaa dui' nae,

20 Tebe fai a ulu na Manetualain dedea nae leo' naa. Boe ma besa' ia, dadi leo bea'? Lahenda manuu dudu'a-aafi tande' ara, dadi leo bea'? Mesen agama ra, dadi leo bea'? Ma lahenda malela masesefi dedea' ara, dadi leo bea'? Soba nenene! Manetualain tao na si sama leo' lahenda pakanaa'! Ana fe'a heni basa dudu'a-aafi' sosoa-raraa taa' fo raoka-rasamu nai dae-bafo' ia.^g

21-22 Manetualain dudu'a-aafi tande'. Leo mae lahenda dae-bafo' a rae dudu'a-aafi nara tande', sira dudu'a-aafin ta namadai fo ara bisa ralela' matetu' Manetualain. Leo mae leo' naa, tehuu Manetualain pake Ria dudu'a-aafi tande Na, fo soi eno' fee lahenda dae-bafo' a. Fai a ulu na Ana afi nae, “Leo mae lahenda dae-bafo' a rae Au lahenda nadedenu kara pakanaa', tehuu Au muste adenu lahenda, fo reu rafada si hihii-nanau' roo-tetu' la'e-neu' Au.” Huu fo Manetualain naetu' nau pake hehelu' fo ri' Ria lahenda nadedenu nara reni, ela lahenda bisa ramahere Ni. Ana pake eno' ria fo po'i-tata lahenda reme sala-siko nara.

Tehuu lahenda dae-bafo' a rae Manetualain eno Na, pakanaa'. Huu ria naa, ara ta tao dale' neu' Ria lahenda nadedenu nara. Lahenda Yahudi ra hule noi tanda heran, ela ara bisa rita Manetualain kuasa Na. Ma lahenda Yunani ra ramanene noi sira dudu'a-aafi tande mesa nara, besa' ko ara ramahere. 23 Leo mae leo' naa, tehuu noi ami fo ri' dadi Ramatua' a lahenda nadedenu nara, meu mafada lahenda mae, “Manetualain fee Kristus mai, Lahenda fo ri' Ana helu mema' neme fai a ulu na. Boe ma lahenda feke' ara paku raisa Ni nai ai kake'.” Lahenda Yahudi ra ramanene tutui' ria, ara nau tipa-tola' ana, huu fo tuka sira dudu'a-aafin, Lahenda fo Manetualain feen mai a, ta bisa maten fa. Lahenda Yunani ra ramanene tutui' ria, ara afi rae, “Tutui pakanaa' ria!” 24 Tehuu lahenda ruma, Manetualain teka-here mema' asa fo dadi reu' Ria nuu-enan. Sira ruma reme lahenda Yahudi, ma ruma reme lahenda fo ta Yahudi. Tuka sira, sona Kristus mamate Na natudu si Manetualain kuasa Na bau na seli', ma Ria dudu'a-aafin tande' a. 25 Ma leo mae lahenda dae-bafo' a rae Manetualain eno na pakanaa', tehuu Ria dudu'a-aafi tande Na lena sira. Ma leo mae ara rae Manetualain ta nanuu kuasa hata-hata esa boe', tehuu Ria kuasa Na bau lena sira.

26 Toranoo susue kara emin! Emi bisa bubulu' au dedea-nafada ka, mafarene emi natuu-napadeim tepo' fo Manetualain teka-here emi, dadi Ria nuu-enan. Tuka lahenda dae-bafo' a memete-rerelun, nai emi talada ta hapu lahenda malela' dodou', ta hapu lahenda dodou' ranuu lelea-nonore', ma ta hapu lahenda dodou' reme kileo-boboki' fo ranuu nade bau-ina'. 27 Tehuu Manetualain pake lahenda fo ri' lahenda dae-bafo' a rae pakanaa raan seli, ela tao ramamae' lahenda fo rae sira malela'. Ma Ria boe pake lahenda fo ri' lahenda dae-bafo' a rae ta ranuu kuasa hata-hata esa boe', ela tao ramamae' lahenda fo rae sira ranuu kuasa. 28 Manetualain teka-here lahenda aana' nade taa', fo ri' lahenda dae-bafo' ta hika-hada' neu' asa. Ana pake si, ela tao ra lahenda fo rae sira kahere' a, dadi sosoa-raraa' taa'. 29 Ela nai Manetualain matan, ta hapu lahenda esa fapa ara na nae, ria kahere'.

30 Huu fo Manetualain soi eno' ela emi bisa dadi meu' Yesus Kristus lahendan. Kristus mamate Na natudu fee Manetualain kuasan ma malela bau-ina Na, nana huu Yesus soi eno' fo ita bisa mole-dame too Manetualain. Yesus ri' tao na ita bisa tasoda roo-tetu' ma lalao-lalafu'. Ma Ria ri' po'i-tata na ita teme sala-siko' a mai. 31 Ria sama leo' mana dui' nai Susura Makamoi' a nae,