Manetualain lahendan fo ri' ralala'o Hehelu Bebeu'
3
Boso' mae, bate ami mulai dedea io ao mara. Ta'a! Bate mae ami sama leo' lahenda feke' fo parluu meni susura isin fee emi, besa' ko bisa malala'o ami nonoi-tataom, do? Do, parluu ami hule susura isin neme emi mai, fo meni leo lahenda feke' neu? Ta'a, hete? 2 Huu fo ami manuu susura isin so. Susura' ria nana ri' emi. Ami malela' hihii-nanau' dodou' la'e-neu' emi masoda ma. Hihii-nanau' sira nana peda' nai ami dale mara. Basa lahenda bisa lees ra emi soda ma; neme naa' mai, ara ralela' ami nonoi-tataom buna-boan. 3 Huu fo matetu na, emi sama leo' susura' esa Kristus ri' dui', boe ma Ana fee ami homun. Kristus dui' susura' ia ta neni' tinta, tehuu Ana pake Manetualain Masoda' a Dula-dale Malalao-malalafu Na. Kristus boe ta sura-dui' Ria Hara-dasin nai batu lei, sama leo' Manetualain dui' fee Musa. Tehuu Ana dui' nai ita dale masoda na.a4 Ami mamahere tebe-tebe neu' Manetualain mae, mema' basa hihii-nanau' ia ra la'e, nana huu Kristus ri' natudu leo naa'. 5 Kalu neme noi ami ao-ina heheli mara, sona ami ta manuu kuasa fo bisa tao hata-hata esa boe'. Kuasa ma haak fo nai ami, naoka-nasamu neme Manetualain mai. 6 Manetualain so'u na ami dadi Ria lahenda malalau-maoonon, ela mafada lahenda la'e-neu' Ria Hehelu Bebeu Na. Tehuu Ria Hehelu Bebeu Na, ta la'e-neu' lahenda tao tuka atoran rupa' ara, tehuu la'e-neu' lahenda fo rabua-raesa ro Manetualain Dula-dale Malalao-malalafu Na. Kalu lahenda ratukalele atoran a, sona ria sama leo' mate dale nara, ma ta hapu soda matetu' mana basa taa'. Tehuu kalu lahenda nabua-naesa no Manetualain Dula-dale Na, ana hapu soda' matetu' a.b
7 Fai a ulu na, tepo' fo Manetualain sura-dui' Ria Atoran Na nai batu lei ra, tebe marela-masa'a. Leo mae lahenda tao tuka Atoran sira katema', tehuu fai fo ara mate, neu' ko bika-bati reme Manetualain mai. Tepo' fo Musa sipo na Atoran sira a, ria mata-idun nahaa ledo-ledo. Huu ria naa, lahenda Israel ara mata nara rahia'. Tehuu doo-doo boe ma makaledo' ria mopon.c 8 De kalu mana dui' nai batu a, bisa marela-masa'a leo' naa, sona hata fo Manetualain Dula-dale Na peda-fuan nai ita dale na a, leo bea' bali? Tantu lena bali, hete? 9 Atoran ria isi-liin nae, neu' ko ita hapu huhuku mamates, de bika-bati teme Manetualain mai, nana huu ita ta tao tuka Atoran sira katema'. Leo mae leo' naa, tehuu Atoran ria bei rela-sa'a nahere. Tehuu Manetualain Dula-dale Na narela-nasa'a lena bali, huu fo Ana natudu eno' ela ita bisa malole selu' to Manetualain. 10 De Atoran fo ri' fai a ulu na lahenda rae marela-masa'a a, besa' ia ta talalu marela-masa'a so', huu fo besa' ia esa marela-masa'a lena. 11 Atoran sira narela-nasa'a, sama leo' fai a ulu na ba'i Musa mata-idun nahaa, basa besa' ko haa' ria mopon. Musa, ma Atoran ria marela-masa'a, tehuu lena ria bali, nana ri' marela-masa'a manaetu-manabasa taa'.
12 Ami basa mamahere mae, Manetualain Hehelu Bebeu Na ta moi-mosa. Huu ria naa, ami dedea ledo-ledo, ta pake bibila-babaa'. 13 Ami ta parluu tao sama leo' ba'i Musa. Huu fo ria muste poti etu mata-idun pake tema', ela kalu haa' ria mopon boe, lahenda Israel ara ta bisa rita.d 14 Tehuu Manetualain tao na lahenda Israel ara dudu'a-aafi tuku'. Huu fo losa' besa' ia, kalu ara lees nai Manetualain Susura Makamoi Na, la'e-neu' Ria Hehelu Paraa Na, sona nonoo' leo' tema' esa poti etu laka nara, de ara ta nau ramanene, ma ta nau bubulu'. Noi Kristus ri' buka-soi sira dale nara, ela ara bisa bubulu-ralela'. Ta hapu lahenda feke' so'. 15 Losa' besa' ia boe, kalu lahenda Yahudi ra lees ba'i Musa susura na, sona ramanene, tehuu ara ta bubulu' matetu'. Ria sama leo' hata esa napoti etu dale nara, de ta ramanene.
16 Tehuu kalu lahenda fo mulai namahere ita Ramatuan Yesus Kristus, sona Kristus buka-soi lahenda ria dale na, ela ana bisa bubulu' matetu'. Ria sama leo' mana dui' nai Manetualain Susura Makamoi Na nae, “Ana buka heni tema' fo ri' nana poti' nai ria mata-idun.”e 17 Nai Manetualain Susura Makamoi Na, fai fo ba'i Musa dedea nae, “Ramatua'”, ria maksud na nae, Manetualain Dula-dale Na. Kalu ita hapu Dula-dale' ria, sona Ana po'i-tata na ita. 18 No ria naa, Ana tao na ita boe-boe dadi sama leo' Ramatua' marela-masa'a. Huu fo ita mata-idun ta mana poti', tehuu ita du'a-afi taroo la'e-neu' ita Ramatua na marela-masa'an. Ramatua' a Dula-dale Na ri' tulu-fali ita leo naa'.