Lahenda hohoke nai jama'at dale'
5
Au amanene rae, nai emi jama'at dale', lahenda esa hohoke. Sekonaa te, ana tao a, tadalu lena heni lahenda fo ta nalela' Manetualain. Huu fo ana suku no' mama pala na la'o naroo!a 2 Tehuu emi koao mara seli, sama leo' nai emi jama'at ma ta hapu sala'! Matetu na, emi muste mae' ma mameda susa. Lahenda leo naa' a, muste usi madoon neme' emi mai!3 Leo mae ita esa doo' a no esa, tehuu au dale ka nai emi talada. De au aetu' lahenda tadalu' ria dedea na, sama leo' au nai naa mema'. 4 Au anuu haak aetu' leo naa', nana huu Yesus dadi neu' ita Ramatua na, ma au nana Ria lahenda nadedenun. Emi muste matuu mabua fo maetu' dedea' ria meni' Ramatua' a nade Na. Ma au dale ka boe sama-sama no emi. 5 Emi muste fee lahenda ria leo nitu ra malaka na neu, ela lahenda ria tu'u-tapa heni basa hihii-nanau' tadalu' fo rai ria dale na. Kalu ita Ramatua na natafali mai, sona Ana bisa po'i-tata na lahenda ria neme sala-sikon mai.
6 Kalu emi mabafa koao, sona ta malole! Boso' mafarene henin mae, ita epo' ralu tetei' noi bai', fo tao na roti katema' a reis. Ralu tetei' a nana, sama leo' lahenda ria tadalu na. Kalu mataa' ana tao tadalu' nai emi talada, neu' ko lahenda sarani feke' ara boe tao tadalu' leo naa'!b c 7 Usi heni lahenda tadalu' ria neme emi jama'at ma, sama leo' maulu na lahenda Yahudi ra tu'u heni basa ralu tetei' neme sira uma na mai fo sadia raa feta Paska. No ria naa, besa' ko emi bisa dadi selu' leo' lahenda fo ta nanuu tadalu' nai dale na. Emi muste dadi leo naa'. Maulu na ara hala bibi-lopo ana sala taa', fo tao tutunu-hohotu Paska. Nai fai mabui' a ara raisa Manetualain Lahenda Malalao-malalafu Na, fo dadi tutunu-hohotu' ela tao nalalao-nalalafu ita dale na.d 8 Maulu na, lahenda Yahudi ra raa feta Paska pake roti tua-lepa fo ri' ta pake ralu tetei'. Besa' ia, ita muste sama leo' roti fo ta pake ralu tetei'. Huu ria naa, muste tanea ita ao na fo boso' tao hihii-nanau' tadalu' ara, ma boso' tao dale hedi lahenda feke' ara. Ita muste dedea roo-tetu' la'o naroo. No ria naa, lahenda rita ita tao basa-basan tuka ita dale malole na.e
9 Maulu na, au parnaa dui' susura' ae, “Boso' mabua mo lahenda mana hohoke.” 10 Au ta anuu maksud ae, emi boso' mabua mo basa lahenda dae-bafo' fo ta tao dale' neu' Manetualain, ri' mana hohoke, mana tendetuu, mana tipu-dai lahenda hata-nuun, ma mana soko ra. Kalu leo' naa, sona emi bisa bika-bati meme basa lahenda nai dae-bafo' ia. 11 Besa' ia, au dedea a, ri': emi boso' mabua mo lahenda fo nae ria lahenda sarani', sekonaa te ana hohoke, tendetuu, mana soko, mamumulu-mamamae', mana mafu', ma tipu-dai lahenda hata-nuun. Ita boso' tabua to lahenda rupa leo naa' ara. Boso' matuu' mia-minu moo si!
12 Emi manuu haak uku-sudi lahenda sarani' ara masoda na. Tehuu au ta anuu haak aetu' dedea' soa-neu' lahenda fo ta namahere Manetualain. 13 Huu fo Ria ri' neu' ko naetu' dedea' soa-neu' lahenda fo ta namahere Ni. Ma emi boso' mafarene heni mana dui' nai Manetualain Susura Makamoi Na nae, “Lahenda fo hule aon nae ria dadi Manetualain lahendan, tehuu ana tao hihii-nanau' tadalu' la'o naroo, sona usi henin!”f