Ai haitua susulak ia fee basa hataholi kamahelek neu Yesus Karistus malai kota Filipi. Ma ai boe oo mahiik, fo basa malangga salanik, ma mana tulu-fali malangga salanik kala, bubuluk latalolole susulak ia isin boe.

2 Manetualain ndia, na ita Aman. Ma Yesus Karistus ndia, na ita Lamatuan. Boe ma ai moke fo Ala latudu Sila dale malolen neu ei, fo suek ei bisa masoda mia sodak, mole ma ndoo-ndoo.

3 Mae au ta ita ei dook so, tehuu au ta lilii heni ei! Tungga ledo-eik, au asaneda ei, na au oke makasi neu Manetualain, huu ei mamahele makandoo neu Ndia. 4 Tungga ledo-eik au hule-haladoi fee ei, au daleng namahoko, 5 huu neme fai sososan mai, ei simbok Manetualain Hala Malolen, ei makalala'ok makandoo Ndia uen no'u mia au. 6 Ndia natudu nae, Manetualain mulai tao ues nai ei dalem so. Ma au bubuluk no teteben ae, Ana nakalala'ok nakandoo Ndia ue malolen ndia, losa dadik mana daik neu faik fo Yesus Karistus fali main.

7 Memak nandaa au sue ei, huu au daleng nana mba'ak no ei neme makahulun mai so. Fai maneuk, ei tao ues no'u mia au, neu faik fo au afada hataholi la la'e-neu Manetualain Hala Malolen, ma neu faik fo au ataa bala hataholi mana laban Hala Malole ndia. Mae au maso bui boe oo, tehuu ei ta malai la'o ela au. 8 Manetualain mesak kana bubuluk nae, au dokodoe tebe-tebe neu ei. Huu au susueng neu ei ndia, sama leo Yesus Karistus susuen boe.

9-10 De au hule-haladoi fee ei leo iak: au oke fo ei susuem esa no esa, boe tamba nakandoo, losa sasi deak mai. Au boe oo oke, fo Manetualain fee ei bubuluk tebe-tebe dede'ak bee ndia malole, fo suek ei sodam dadik malalaok. Boe ma neu ko faik fo Karistus naketu basa hataholi dede'an, na Ana nafada nae, ei ta hambu salak faa boe, 11 huu Ndia mesak kana tao ei dalem malalaok so, fo ei bisa masoda ndoos. Ma ei masoda ndoos leo ndiak, na hataholi fe'ek kala so'u dema-demak Manetualain, ma koa-kio Ndia.

12 Tolanoo susue nggala ei! Au nau fo ei bubuluk mae, hambu hataholi tao nakatoto'ak au, losa ala sese au uni bui dale uu. Tehuu Manetualain Hala Malolen nana tui-benggak nakandoo, 13 losa soldadu mana lanea nai uma malanggan ma basa hataholi fe'ek kala boe oo bubuluk lae, au maso bui huu au tungga Yesus Karistus.^a 14 Boe ma Manetualain hataholin nala malai ia lita, de lae, Manetualain tao leo ndiak neu faik fo au nai bui ia dalek. Huu ndia de ala boe lambalani, losa ala ta bii so. Boe ma ala kokolak ledo-ledo Manetualain Dede'a-kokolan sudi nai bee.

15-17 Nai ia hambu hataholi matak dua fo manggate fee nanonolik la'e-neu Karistus. Fo ndia, mana tao ues no dale ndoos, ma mana tao ues no dale pepekok. Mana tao ues no dale ndoos, dalen nala malole lo au. Ala bubuluk no teteben lae, au lemba au toto'ang ia, huu au akalala'ok au ueng, ma ta heok faa boe.

Tehuu mana tao ues no dale pepekok, ala dale hedi ma sangga nadek. Ala tao latanggenggelak hataholi kamahelek kala, sadi hambu mana tungga sila. Huu ala sangga dalak, fo bisa soso'uk aok lae, sila ana seli lena au. Lae hetuk mete ma hambu hataholi tungga sala, na, dei fo ndia boe tao namabela au toto'ang nai bui dale.

18 Tehuu neme naa! Au ta mbali, mae hataholi fee nanonolik no dale ndoos, do, taa. Sadi ala fee nanonolik la'e-neu Karistus! Naa, ndia tao nala au daleng namahoko.

Ma au amahoko tebe-tebe, 19 huu au bubuluk ae, ei hule-haladoi fee au, ma Yesus Karistus Dulan tulu-fali au. Huu ndia de au bubuluk ndia sasai-main ndia, au musu nggala ta bisa lakalulutu au! 20 Mae au asoda do au mate, na ta hata-hata. Sadi Manetualain pake au fo so'uk dema-demak Lamatuak Yesus naden, ma anoli sala ledo-ledo la'e-neu Ndia, losa ta hambu hata esa boe, fo ana tao au mae. Basa ia, au amahena akandoo neme makahulun mai losa hatematak ia.

21-23 Huu au dudu'a leo iak: mete ma au asoda, na, ela au asoda nana mba'ak ua Karistus, ma au akalala'ok akandoo Ndia uen. Ndia malole. Tehuu mete ma au mate, na, au hambu nanalak lena bali. Huu au bisa la'o ela dae-bafok ia, ma asoda fali fo leo no'u ua Karistus nai nusa sodak. Huu ndia de au daleng naba'e, ma au ta bubuluk bee ndia malolen lena! 24 De kada leo iak! Huu ei bei paluu au nai ia, de malolenak au leo no'u ua ei, nai dae-bafok ia leo. 25 Au amahele au teung bei naluk, de au bisa leo no'u ua ei. Huu Lamatuak nau fo au tao atea ei dalem mala, boe ma ei tamba mamahele neu Ndia, no dale namahokok. 26 De dei fo ei bisa so'uk dema-demak Yesus Karistus naden, huu Ana soi dalak so, fo au bisa fali uu tilo ei bali.

27-28 Tehuu mae leo beek boe oo, ei sodam mala musi ndoos, huu ei ia Lamatuak hataholin nala. De ei musi masoda no mandaan, ma tao tungga hata fo Karistus Hala Malolen nafada neu ei so. Boe ma mete ma au dadi fali uu tilo ei do, kada au amanene neme hataholi mai lae, ei masoda neulalau, na, dei fo au bisa amahoko. Huu au bisa bubuluk ae, ei masoda dalek esa, huu ei nana mba'ak mia Dulak esa. Ma au bisa bubuluk ae, ei mbalak eik, fo makalala'ok sama-sama Lamatuak Yesus Hala Malolen, fo suek hataholi fe'ek kala tungga lamahele boe. Ma ei boe oo ta bii, mae hambu hataholi laban ei. Ndia dadik tanda neu musu la lae, Manetualain nau mbia heni sala. Tehuu Ana nasala'e nala ei, fo dei fo ei masoda makandoo mia Ndia. 29 Huu Manetualain malolen seli, losa Ana soi dalak so, fo ei bisa mamahele Karistus, ma dadik Ndia hataholin nala. Ta kada mamahele, tehuu Ana hanuk ei hambu toto'ak, huu ei tungga Ndia. 30 Au amanene hambu hataholi nai ele laban ei, huu ei makalala'ok Karistus Hala Malolen. Masanenedak, huu fai maneuk sila boe oo laban au leo ndiak. Ma hatematak ia, ala tao leo ndiak lakandoo boe.^b