Paulus susulan
fee hataholi kamahelek kala malai kota
Kolose
Paulus mulai susulan
1
Soda-molek neme au mai, Paulus. Manetualain mesak kana hele nala au, fo dadik neu Yesus Karistus nadedenun. Nai ia boe, ita tolanoon Timotius fee ei soda-molek.2 Au sulak susulak ia fee ei, fo ndia Manetualain hataholin nala malai kota Kolose, fo mana tao tungga nakandoo Yesus Karistus dala sodan.
Ai moke fo Manetualain, ita Aman, natudu Ndia dale malolen neu ei, fo suek ei bisa masoda mia sodak, mole ma ndoo-ndoo.
Paulus hule-haladoi fee hataholi kamahelek kala malai Kolose
3 Tungga-tungga ledo-eik, ai hule-haladoi nai ia fee ei, ai moke makasi neu Manetualain, fo ndia ita Lamatuan Yesus Karistus Aman. 4 Huu ai mamanene dede'ak no'uk la'e-neu ei namahehelem neu Yesus Karistus, ma la'e-neu ei susuem ma dale malolem neu basa hataholi kamahelek kala so. 5 Ei tao leo ndiak, huu ei bubuluk dede'a malole la, fo nana mbedak fee ei nai nusa sodak. Dede'ak kala ia, ei mamanene mitak neme dede'a-kokola ndoos mai, fo ndia Manetualain Hala Malolen, 6 fo hataholi neu nafada ei neme makahulun mai so. Hala Malole ndia nana tui-benggak sudi nai bee nai dae-bafok ia, ma hambu buna-boa malole so, huu ana tao nasafali hataholi sodan dadik malole. Ei sodam boe nasafali dadik malole leo ndiak, mulai neme fai sososan ei mamanene Hala Malole ndia, ma bubuluk tebe-tebe Manetualain dale malolen.
7 Ei manoli dede'ak kala ia neme ka'a Epafras mai so, fo ndia ai nonoon tao ues fo ai suek. Huu ana manggate nakalala'ok nakandoo Karistus uen nai ei laladam.a 8 Ana tui ai nai ia la'e-neu ei susuem, fo Manetualain Dulan fee ei so.
9 Huu ndia de, mulai neme sososan mai, ai mamanene la'e-neu ei, ai hule-haladoi makandondoo henin fee ei. Ai moke Manetualain fo ei bisa malelak tebe-tebe Ndia hihiin, ma ei bisa bubuluk dede'ak no'uk, tungga hata fo Manetualain Dulan nanoli ei. 10 No leo ndiak, na ei bisa masoda no mandaan, ma mini Manetualain nade malolen. Ma ei boe oo, bisa tao mamahoko Manetualain dalen nai basa dede'ak kala. Mete ma ei matudu dale malole neu hataholi, neu ko Manetualain fee ei buna-boa malole. No leo ndiak, ei bisa boe malelak Manetualain.
11-13 Ai boe oo hule-haladoi, fo moke Manetualain fee koasan fo ana seli ndia, suek ei bisa lemba basa dede'ak kala no nggale loak. Ai moke fo ei dalem bisa henuk no namahokok, fo ei moke makasi makandondoo henin neu Amak Manetualain. Huu Ndia soi dalak so, fo ei bisa simbo baba'ek neme pusaka nai nusa sodak. Pusaka ndia, Ana feen neu basa hataholi mana namahele neu Yesus Karistus. Huu Ana nakambo'ik ita neme koasa makiuk mai so, boe ma fee ita dadik neu Yesus Karistus hataholin, fo leo nai manggaledok. Ndia boe oo, so'u Yesus Karistus fo dadik ita Manen. Yesus ndia, Manetualain Ana susuen. 14 Huu Manetualain fee Anan so, fo soi nala ita ma koka heni ita sala-singgon nala.b
Karistus ndia, deman lena heni basa-basan
15 Karistus ndia, na mata-aok esa no Manetualain,
fo hataholi ta bisa nitan.
Ndia mana memak nakahuluk neme basa-basan mai,
ma Ana dadik Lamatuak neu basa Manetualain nakadadadin nala so.
16 Huu Manetualain pake Ndia
fo nakadadadik nala lalai ma dae-bafok no basa isin nala.
Ana tao dede'ak kala fo hataholi bisa nitan,
ma hataholi ta bisa nitan.
Boe ma mana to'u palenda, mana to'u koasa,
manek kala, ma malanggan nala.
Manetualain no Yesus Karistus tao basa sila la,
ma Ana fee Yesus Karistus,
fo Yesus Karistus heti sala.
17 Ledo-eik basa fe'ek kala bei taa,
tehuu Ndia mana memak so.
Basa manai ia la nana mba'ak no Ndia,
ma Ndia ndia, heti sala.
18 Ndia ndia dadik Malanggan neu basa hataholi kamahelek kala,
ma hataholi kamahelek kala dadik sama leo Ndia ao-inan.
Huu Ndia nakalala'ok basa-basan.
Neme basa mana matek kala mai, basa de lasoda fali,
Ndia ndia penting seli,
ma Ndia deman lena basan.c
19 Basa malai Manetualain aon dale,
nai Karistus aon dale boe,
ma ndia tao Manetualain namahoko.
20 Manetualain pake Yesus Karistus,
fo mole no basa Ndia nakadadadin so.
Ana fee Anan,
fo daan faa dadik tunu-hotuk,
ma mate nai ai ngganggek lain,
fo ela basa malai lalai,
ma malai dae-bafok,
bisa mole seluk lo Manetualain.d
21 Makahulun, ei mesa nggei masoda nai deak, dook mima Manetualain mai. Ei mamusuk mia Ndia, ma masoda maelak mia Ndia, huu ei dalem kabook, ma ei tatao manggalaum, laban Ndia nakandondoo henin. 22 Mae leo ndiak, tehuu hatematak ia Ana soi dalak fo ita mole seluk to Ndia so. Huu Ndia nadenu Anan fo dadik neu hataholi. Ma Ndia boe oo tao Anan dadik tunu-hotuk, losa maten nai ai ngganggek lain, fo ita bisa mole seluk to Ndia. Yesus Karistus tao leo ndiak, fo bisa noo ita teu tambadeik nai Manetualain matan, fo dadik hataholi malalaok, ma dale ndoos, fo sala-singgok ta faa boe. 23 Teteben, ei musi mahele makandoo mia ei namahehelem mala. To'u mahele, fo boso mangge'o! Boso heok mima Hala Malole ndia mai, fo ei simbon, neu faik fo makasososan ei mamanenen ndia. Te ei bisa to'u mahele Hala Malole Ndia. Hataholi neu tui-bengga Hala Malole ndia nai sudi bee so, nai dae-bafok ia. Ma Lamatuak nadenu au, Paulus, fo au uu tui-bengga Hala Malole ndia boe.
Paulus tao ues, fo ono-lau Lamatuak hataholin nala
24 Neu faik fo Karistus nasoda nai dae-bafok ia, Ana hambu doidosok no'uk. Ma hatematak ia, au boe oo lemba doidosok mata-matak. Mae leo ndiak boe oo, tehuu au daleng namahoko nakandondoo henin. Mete ma hambu hataholi fo ana musi doidoso, na, ela au ndia lemba tungga doidosok ndia fee sala, sama leo Karistus lemba doidosok fee Ndia hataholin nala. Huu Ndia hataholin nala sama leo Ndia ao-inan. 25 Manetualain fee au tao ues ia, fo ono-lau Ndia hataholin nala. Huu ndia de, au anoli Ndia Dede'a-kokolan neu ei, losa lutu-lutuk. 26-27 Neme sososan mai, hataholi lamanene Manetualain Dede'a-kokolan nala. Tehuu ala bei ta bubuluk Dede'a-kokolak ndia maksut no ledo-ledo, huu maksut ndia bei nana nafunik. Tehuu hatematak ia, Manetualain naketun so, fo Ana buka maksut ndia neu Ndia hataholin nala. Ma Ndia maksut ndia, halak fo ana seli fee basa hataholi nusak malai dae-bafok ia. Halak fo ana seli ndia, na ndia:
Karistus nasoda nai ei dalem!
Ndia ndia tao ei mamahele makandoo mae,
dei fo Ana tao dede'ak kala malolen ana seli, fee ei nai nusa sodak.
Ia, fo ita hataholi tahani-tahanik neme makahulun ele mai.
28 De ai mafada basa hataholi la'e-neu Karistus. Ai manoli basa hataholi, ma fee nasanenedak neu sala, fo pake basa dudu'ak fo Manetualain fee ai. Ai tao leo ndiak fo boe tao natea basa hataholi mana tungga Karistus, losa ala dadik mana daik fo dei fo ala bisa lambadeik nai Ndia matan, ta no mamaek, huu sila dalen ndoos lakandoo. 29 Huu ndia de, au mbalak eik ma tao ues mbilu-mbuse fee ei. Au bisa akatataka tao ues leo ndiak, huu Karistus koasan ndia tao natea au. Ndia koasan ndia, ana seli!