Timotius nakabubua no Paulus ma Silas
16
Basa boe ma Paulus asa la'o lakandoo lakahuluk leni kota Derbe leu. Neme ndia mai, ala la'ok lakandoo leni kota Listra leu. Nai kota ndia, ala latonggo lo ta'e anak esa, nade Timotius. Aman, hataholi Yunani. Tehuu inan, ina Yahudi fo namahele neu Yesus so. Timotius boe oo, dadik Yesus hataholin so. 2 Basa hataholi kamahelek malai kota Listra, ma kota Ikonium bubuluk lae, Timotius ndia, hataholi neulauk. 3 Paulus nau fo Timotius tungga sala. Tehuu hambu hataholi Yahudi nai ndia bubuluk nae, Timotius aman hataholi Yunani, de ndia bei ta sunat tungga hada Yahudi. Huu ndia de Paulus heti fo ala sunat Timotius.a 4 Basa boe ma ala la'ok leme mamanak esa mai leni mamanak esa leu, fo lafada nakeketuk fo Lamatuak Yesus nadedenun, ma lasi salanik kala laketun neme Yerusalem so. 5 No leo ndiak, ala tao latetea hataholi kamahelek kala dalen. Tungga faik hataholi beuk fo kamahelek kala, boe lamano'u.
Paulus neni Makedonia neu
6 Basa boe ma Paulus asa la'o lakandoo. Ala leni propensi Frigia ma propensi Galati leu, huu Manetualain Dula-dale Malalaon ka'i sala, fo boso leu tui-bengga Lamatuak Tutui Malolen nai propensi Asia. 7 Neu faik fo ala losa nusak esa, fo natoo no propensi Misia, ala sangga soba maso leni propensi Bitinia leu. Tehuu Yesus Dulan ka'i sala, fo boso leni ele leu.b 8 Boe ma ala la'ok lesik propensi Misia, de ala losa kota Troas nai tasi bifin.
9 Le'odaen ndia, Manetualain fee Paulus nita sama leo nai me'is dale. Nita hataholi esa nambadeik nai tasi selik, nai propensi esa, nade Makedonia. Hataholi ndia nanggou noke tulu-falik nae, “Ama! Muni ia mai, fo tulu-fali mala ai dei!” 10 Paulus nita leo ndiak, boe ma aic maketun fo ai mini Makedonia miu. Ai dudu'a mae, memak Manetualain ndia nadenu ai miu tui-bengga Ndia Dala Sodan, neu hataholi malai tasi selik. Huu ndia de Ana ka'i ai, fo ta bole mini mamana fe'ek miu.
Ina Lidia namahele Lamatuak Yesus nai kota Filipi
11 Basa boe ma ai sa'e ofak mima kota Troas mai, fo mini pulu kadi'ik esa miu, nade Samotrake. Fo'a mai, boe ma ai sa'e ofak makandoo losa kota esa, nade Neapolis. De ai konda mima ndia. 12 Neme ndia mai, ai la'ok tungga madak lain mini kota ina-huuk esa miu, nade Filipi. (Filipi ndia, kota penting nai propensi Makedonia; mana palenda Roma boe oo, to'u koasa nai ndia.) Ai leo faik hida mima ndia.
13 Nandaa no hataholi Yahudi fai hahae tao uen, ai miu sangga hataholi Yahudi la mamana huhule-haladoin. Ai makandandaak mamana huhule-haladoik ndia, neu ko nai lee bifin. De ai la'o kalua ta dook mima kota ndia mai, losa ai hambu lee esa. Ai matonggo mia inak hida lai ndia.d De ai manggatuuk makokola mia sala. 14 Neme basa inak kala sila mai, hambu esa nade Lidia. Ndia neme kota esa dook nai propensi Asia, nade Tiatira. Inak ia, ana se'o tema mbila balanggeok fo belin ana seli, soa-neu hataholi ina-huuk kala. Ana manggate hule-haladoi neu Manetualain. De ledo-eik namanene Paulus kokolan, ana simbo tutik.
15 Boe ma ai salani tutik ina Lidia no uma isin nala. Salani basa, boe ma ana noke ai nae, “Ama nggala ei! Mete ma ei dudu'a mae au ia amahele tebe-tebe neu Lamatuak Yesus so, na, ei mai leo tataak nai au umang dei.” Ana kokoe nakandoo, losa ai tungga.
Ala landee Paulus no Silas leni bui dale leu nai kota Filipi
16 Faik esa, ledo-eik ai bei la'o mini mamana huhule-haladoik miu, boe ma ai matonggo mia ina anak esa neme dalak. Ndia ndia hataholi atan. Ndia nitu nalak, losa ana bisa nafada hataholi ua-nalen nala. Ndia boe oo, bisa bubuluk dede'ak kala huu-okan sudi neme bee mai. De hataholi no'uk lateme feen doik, fo loken mete sila ua-nalen nala. Tehuu doik kala sila, ina anak lamatuan nala hambu basan, losa ala lamasu'i. 17 Faik ndia, ledo-eik ai bei la'ok, ina anak ndia tungga no ai nakandoo. Boe ma nanggou nae, “Hataholi la ia Manetualain fo Naden Manai Lain Seli atan nala. Ala mai fo latudu dalak lae, talo bee fo hataholi bisa hambu nasalala'ek, ma lakambo'ik leme sala-singgon nala mai!”
18 Ina anak ndia tao leo ndiak losa faik hida. Doo-doo boe ma Paulus mbela namanene ina anak ndia nanggonggoun. Boe ma ana heok de nakabubulak matan neu ina anak ndia, boe ma ana palenda nitu ndia nae, “Heeh! O nitu manggalauk! No Lamatuak Yesus koasan, au palenda o kalua muma ina anak ia mai, hatematak ia boe!” Paulus kokolak basa leo ndiak, boe ma nitu ndia kalua tutik.
19 Ledo-eik ina anak ndia malanggan nala bubuluk lae, sila atan mopo koasan so, boe ma ala luli, huu ala ta hambu doik bali. Boe ma ala to'u lala Paulus no Silas, de hela loo sala leni pasak leu, nai mamanak fo hataholi lateme paken fo laketu dede'ak. 20 Nai ndia, langgou lo hala malii lae, “Hataholi sila ia mai fo tao lakalulutu ita kotan. Naa te sila hataholi ta manai iak. Hataholi Yahudi la ia leme dook mai fo kada tao nahuuk nai ia! 21 Ala lanoli hataholi boe lae, ita boso mbali mana palenda Roma heti-heun nala, fo tungga sila heti-heun.”
22 Hataholi no'uk lamanene leo ndiak, boe ma ala manggalau, de leu mbomboko Paulus no Silas. Boe ma mana maketu dede'ak malai ndia ladenu hataholi la sii heni dua sala balo'an nala, boe ma filo sala. 23 Ala filo lakamiminak Paulus no Silas, boe ma landee sala leni bui dale leu. Ala ladenu malangga soldadu mana maneak nai ndia, fo nanea natalolole hataholi kaduak sila. Boso losak lalai. 24 Malangga soldadu mana maneak namanene leo ndiak, boe ma ana kena sala leu kama esa, nai bui ndia laladan. De ana kabi ein nala nenik ai kakabik.
25 Meda fatilada, Paulus no Silas hule-haladoi ma soda koa-kio Manetualain. Hataholi bui fe'ek kala malai ndia, tungga lamanene sila sosodan. 26 Kada nggengge neuk, dae nangge'o nalan seli, losa uma bui ndia katematuan boe oo nangge'o. Ma lelesun nala latahu'a maloa. Boe ma basa hataholi bui tali besin nala, mbo'i heni sala boe.
27 Faik ndia, malangga soldadu mana maneak nai uma bui nggengge, de ana nita basa bui lelesun nala latahu'a maloa. Ana nita leo ndiak, boe ma nae hetuk basa hataholi bui lalai so. De ana fe'a nala felan, fo sangga hala aon. 28 Tehuu Paulus nanggou no hala malii ma ka'in nae, “Wei, Ama! Boso hala aom! Te ai basa nggai bei nai ia, bou!”
29 Malangga soldadu namanene halak ndia, boe ma ana bii nalan seli ma nasapangga. Boe ma nadenu leni feen mbele, de nalai maso neni bui ndia neu, ma aon dele nggebe-nggebe. Boe ma sendek neu Paulus no Silas ein.
30 Boe ma noo sala kalua leme bui mai, de natane nae, “Ama nggala ei. Au hambu toto'ak alan seli. Au musi tao hata, fo bisa akambo'ik uma toto'ak sila mai?”
31 Paulus asa lataa lae, “Dalan leo iak: o mamahele Lamatuak Yesus, dei fo Ana nasala'e nala o. Leo ndiak boe oo neu o uma isim mala.” 32 Boe ma Paulus no Silas kokolak lo malangga soldadu bui, ma basa uma isin nala. Lafada Lamatuak Yesus Dala Sodan neu sala. 33 Seli fatilada faa, boe ma malangga soldadu bui ndia noo Paulus ma Silas, fo leu tao lalalao hinan nala, fo afik nana filok. Basa boe ma Paulus asa salani malangga soldadu no basa uma isin nala. 34 Boe ma noo sala leni uman leu, fo fee sala la'a. Ndia no basa bobonggin nala lamahoko lalan seli, huu lamahele neu Manetualain so.
35 Fo'a fafai anan, boe ma mana maketu dede'ak kala haitua halak neu malangga soldadu bui ndia, fo nadenu mbo'i heni Paulus asa leme bui mai.
36 Malangga soldadu bui namanene leo ndiak, boe ma nafada heheluk ndia neu Paulus nae, “Ama nggala ei! Hataholi ina-huuk kala laketun so, fo lakambo'ik ei. De ama sala miu mia sodak leo.”
37 Paulus namanene leo ndiak, boe ma ta nau simbok no malole. De nafada nasafali neu mana manea la, fo mana leni hala isinaak ndia nae, “Boso leo ndiak! Te ai ia, hataholi Roma. De ai moke ai haak! Mana palenda la musi tao ai dede'an ia, tungga heti-heuk. Tungga teteben, musi nadede'a dei, bei fo huku hataholi. Tehuu ala ta tao leo ndiak. Ala ta ladede'a dei, fo sangga bubuluk ai salan hata, tehuu lambue filo lakamiminak ai nai hataholi no'uk matan. Ta hambu to'ok hata-hata, boe ma landee ai mini bui dale miu. Ia manggaledok so, ala la'o lena mana palenda Roma heti-heun. Boe ma hatematak ia, ala kalua lafufunik ai mima bui dale mai, fo suek hataholi ta bubuluk lae, ai salan hata? Ta bisa leo ndiak! Madenu malanggan nala sila mai matan, fo lakambo'ik ai. Leo ndiak dei, bei fo ai simbok.”
38 Ledo-eik mana maneak kala sila leu lafada Paulus kokolan ndia, malanggan nala sila bubuluk lae, dua sala laena haak hataholi Roma. De ala bii lalan seli. 39 Boe ma hataholi ina-huuk kala leni bui leu, fo manaku salan nala, ma loke ambon neu Paulus ma Silas. De ala kalua heni dua sala leme bui mai, boe ma loke fo dua sala la'o ela kota ndia. 40 Ala kalua leme bui mai, boe ma Paulus asa leni ina Lidia uman leu. Ala lakabubua lo hataholi kamahelek kala lai ndia. Ala fee nanonolik ma latetea dalen nala la'i esa bali. Basa boe ma ala la'o ela kota ndia.