Conto leo: kakanak kala lo ina-aman nala
6
Leo ndiak boe, neu kakanak kala! Ei musi mamanene ei ina-amam mala, huu ndia nandaa, tungga ita Lamatuan hihiin.a 2 Nai Manetualain Susula Malalaon nana sulak nae, “O musi fee hadak neu o inam ma amam.” Ia, Manetualain palenda kaesan fo pake heheluk. 3 Neu faik fo Manetualain fee palenda ndia, Ana helu nae, “Mete ma o tao leo ndiak, na, dei fo o hambu baba'e-babatik makadotok, ma o hambu teu naluk.”b4 Leo ndiak boe, neu ina-ama la! Boso tao ei anam mala ta no hadak, huu dei fo ndia tao nala sala luli. Malolenak makaneni neulalau sala, ma manoli sala neme kadi'i anan nala mai, fo tungga Lamatuak dalan. Mete ma ala tao salak, na matudu ndoon neu sala tungga Lamatuak hihiin.c
Conto leo: hataholi mana tao ues no malanggan
5 Leo ndiak boe, neu hataholi mana tao ues! Ei musi bii ei malanggam fo mana palenda ei nai dae-bafok ia, ma mamanene neu ndia boe. Boso tao ues kada faak, tehuu tungga tebe-tebe ei malanggam hihiin, sama leo ei boe oo, tungga tebe-tebe Karistus hihiin. 6 Ei ia, Karistus hataholi mana tao uen boe. De nai dae-bafok ia, boso ei malanggam nita ei dei, bei fo ei manggate. Tehuu tao ues tebe-tebe fee ndia, mae ndia ta nai ndia boe. Te ndia, tungga Manetualain hihiin. 7 De makalala'ok ei uem no boi-boik, sama leo ei tao ues fee ita Lamatuan Manetualain, fo ta kada tao ues fee malangga hataholik. 8 Huu ita bubuluk tae, dei fo Manetualain bala fee hataholi mana tao dede'a malole. Mae sila ndia, hataholi mana tao ues do, malanggan do, ata do, ta ata do, Ana bala basa sala.d
9 Leo ndiak boe, neu malanggan nala! Ei boso mambue makabibiik ei hataholi mana tao uen nala. Huu hambu sila Lamatuan nai nusa sodak, fo sama leo ei enam boe. Ana ta mete matak, tehuu Ana namanene sudi see. Mae malanggan do, hataholi mana tao ues do, Ana namanene basa sala.e
Pake basa Manetualain manalan fo mambadeik mbalak eik
10 Mamanene neulalau au kokola mate'eng ia. Ei musi to'u tea-tea ei namahehelem neu Manetualain, huu Ndia ndia naena haak palenda ei, ma koasan ana seli. Ndia ndia bisa tao natea ei. 11 Soldadu la pake manala fo laban sila musun. Leo ndiak boe Manetualain sangga pake ei sama leo soldadu. Ana nau ei laban basa dudu'a manggalauk, fo nitu la malangga ina-huun taon. Huu ndia de, ei musi mahehele pake Manetualain manalan fo mana daik. 12 Huu ita ia, nai natatik dale! Ita ta tatati laban hataholi, tehuu ita tatati laban koasa manggalauk fo ita ta tita sana, laban mana to'u palenda la, laban koasa makiuk kala, ma laban dede'a manggalauk kala. 13 De ei musi mahehele fo pake basa Manetualain manala natatin. Dei fo mete ma fai manggalauk kala mai so, na, ei bisa laban makandoo losa basan. Mete ma ei ta tuda, na, ei mahele losa ei senggin.
14 De ei musi mbalak eik fo mambadeik matetea! Kada mamahele neu Manetualain Dede'a-kokolan fo tetebes, huu ndia sama leo ei pake soldadu kalikeen.f Masoda ndoos, huu ndia sama leo ei pake badu besik, fo babaa kalak.g 15 Mahehele miu tui-bengga Hala Malole fo matudu dalak suek hataholi nasoda mole no Manetualain, huu ndia sama leo pake sapatu soldadu.h 16 Mamahele makandondoo henin neu Manetualain, huu ndia sama leo manala esa soa-neu sili aok. No manala ndia, na ei bisa tao misa basa nitu manggalauk kokou ha'in fo ala koun neu ei. 17 To'u matetea ei namahehelem mae, ei hambu nasalala'ek neme Manetualain mai so, huu ndia sama leo soldadu pake solangga besik. To'u matetea Manetualain Dede'a-kokolan neme Ndia Dula-dale Malalaon mai, huu ndia sama leo soldadu pake tafa.i
18 Mete ma ei sangga mambadeik tea-tea, na, ei musi hule-haladoi makandondoo henin pake Manetualain Dula-dale Malalaon koasan. Manea makandoo, ma boso hahae hule-haladoi fee basa Lamatuak hataholin sudi nai bee. 19 Ma boso lilii hule-haladoi fee au boe. Moke fo Manetualain fee au Ndia hehelun, fo suek au bisa afada ledo-ledo Ndia maksut neu hataholi fe'ek kala. 20 Mae au dadik hataholi bui so, tehuu Lamatuak Yesus nadenu au, fo dadik neu Ndia nadedenun. De hule-haladoi fee au, fo au ta bii kokolak tetebes, huu ndia memak au ueng!
Paulus nate'e susulan
21 Au nau ei bubuluk au nanggatutuu-nambadedeing. Huu ndia de, au adenu Tikikus neni ei neti. Ndia ndia, au tolanoo susueng, ma ndia manggate nakalala'ok Lamatuak Yesus Karistus uen.j 22 Elan fo ana tui la'e-neu ai sodan nai ia. Ma au nau fo ana tao natea ei dalem boe.k
23 Au hule Manetualain fo ita Aman, ma Yesus Karistus fo ita Lamatuan, fo Ala tao basa tolanook kala mole-dame ma lasue ao esa no esa, huu ei mamahele neu Sila. 24 Au boe oo hule-haladoi, fo ita Lamatuan Yesus Karistus natudu Ndia dale malolen neu basa hataholi fo mana sue Ndia nakandondoo henin.
Au susulang losa ia leo!
Soda-molek,
Paulus