Paulus susulan
fee hataholi kamahelek kala malai
Efesus
Paulus mulai susulan
1
Soda-molek neme au mai, Paulus. Au sulak susulak ia, fee ei basa nggei fo mana dadik Yesus Karistus hataholin so, nai kota Efesus,a ma makatataka fo masoda malalaok tungga Ndia hihiin. Ndia mesak kana nadenu au tungga Manetualain hihiin.b2 Naa! Manetualain ndia, ita Aman. Ma Yesus Karistus ndia, ita Lamatuan. Au oke fo latudu Sila dale malolen, fo suek ei masoda mia sodak, mole ma ndoo-ndoo.
Paulus koa-kio Manetualain ma Yesus Karistus
3 Koa-kiok neu Manetualain! Koa-kiok neu ita Lamatuan Yesus Karistus, Aman. Manetualain fee ita baba'e-babatik mata-matak so neme nusa sodak mai, huu ita dadik Yesus Karistus hataholin so.
4 Neu faik fo dae-bafok bei taa, Manetualain sue ma hele nala ita so, fo dadik Karistus hataholin. Ana nau fo ita tasoda malalaok losa hataholi ta bisa fee salak neu ita. 5 Ana naketu memak neme makahulun mai so, fo pake Yesus Karistus tao ita dadik Ndia anan. Ia ndia tao Ndia dalen namahoko. 6 Huu ndia de ita koa-kio Ndia. Huu natudu Ndia dale malolen neu ita so, fo ita bisa tasoda nana mba'ak to Ndia Ana susuen.
7 Mae makahulun ita ta tasoda malalaok tungga Manetualain dala sodan, tehuu natudu Ndia dale malolen, ma nadenu Ndia Anan mai, fo daan faa losa maten. No leo ndiak, Ndia Anan soi nala ita teme ita sala-singgon nala mai.c 8 Huu Ndia susuen ana seli neu ita, Ndia boe oo tao manggaledo ita dalen, fo suek ita bubuluk Ndia maksut. 9 Makahulun, Manetualain bei ta nafada hataholi, basa Ndia maksut. Tehuu hatematak ia, tungga Ndia hihiin, Ana tao ita bubuluk so tae, neme makahulun ele mai Ana naketun pake Yesus Karistus so, suek nakamomolek hataholi no Manetualain. 10 Ma dei fo losa fain, Yesus Karistus boe oo dadik Malanggan fo heti basa hata fo malai dae-bafok ma malai nusa sodak.
11-12 Huu ita nana mba'ak to Karistus, de ita boe oo simbo tala pusaka neme Manetualain mai. Te neme makasososan mai, Ana hele nala ai hataholi Yahudi so, fo dadik neu Ndia hataholin nala. Ndia maksut, na Ana sangga pake ai fo soi dalak fee hataholi nusa fe'ek kala, fo ela basa hataholi bisa lamahele neu Karistus. Basa ia dadi tungga hata fo Ana naketu memak kana so. No leo ndiak, ita basa nggata bisa so'u dema-demak Manetualain naden fo ana seli.
13 Huu ai soi dalak so, de ei mima hataholi nusa fe'ek mai boe oo, bisa maso dadik Karistus hataholin, sadi ei mamahele Ndia Hala Malolen fo tetebes. Huu Hala Malole ndia nasala'e nala ei.
Mete ma ei mamahele leo ndiak, na, ei boe oo simbok Manetualain Dula-dale Malalaon fo Ana heluk so. Huu Dula-dale Malalaok ndia, sama leo kee-dedek fo dadik neu tanda nae, ei dadik Ndia ena teteben so. 14 Ndia Dula-dale Malalaon ndia boe oo dadik hehelu matea nae, dei fo Manetualain fee basa hata fo Ana heluk so, losa soi nala ita, fo dadik Ndia hataholin nala. Huu ndia de ita koa-kio neu Ndia.
Paulus hule-haladoi fee hataholi Efesus asa
15 Au amanene no'uk so, la'e-neu ei namahehelem neu ita Lamatuan Yesus Karistus, ma ei susuem neu hataholi kamahelek kala. Huu ndia de 16 au ta hahae oke makasi neu Manetualain. 17 Au hule-haladoi ae, “Ama Bonggik! Amak fo au Lamatuang Yesus Karistus Manetualain. Ma Amak ndia ana seli. Au hule fo Ama fee Ama Dulan neu hataholi Efesus asa, suek ala bisa bubuluk dede'a ndoos sala, ma bisa lalelak neulalau Ama. 18 Au hule fo Amak Manetualain buka sila dudu'an ma tao manggaleledo sila dalen, fo suek ala bisa bubuluk basa hata fo Ama helu sangga fee sala so. Au boe oo, nau fo ala bisa bubuluk pusaka ndia fo Ama helu sangga fee sala. Huu pusaka ndia, ana seli! 19 Au boe oo hule fo Ama tulun, fo ala bisa bubuluk neulalau Ama koasan fo ana seli ndia. Te Ama pake koasa ndia fo tulu-fali Ama hataholi kamahelen nala. 20 Manetualain koasan ndia, ana seli! Ana pake koasa ndia so, fo tao nasoda falik Karistus neme Ndia mamaten mai. Boe ma Manetualain so'u Karistus neni nusa sodak neu, ma feen nanggatuuk neu Manetualain boboa konan nai mamana nana hadak nalan seli.d 21 Ndia deman lena heni basa hataholi manai dae-bafok ma manai nusa sodak so. Ndia deman lena heni basa koasa ma basa mana to'u palenda la. Ana to'u Ndia koasan fo ana seli ndia, ta kada hatematak ia. Tehuu Ana to'u nakandoo losa dodoon neu. 22 Manetualain mesak kana tao basa sala do'ok neu Karistus. Ma Ndia boe oo, so'u Karistus dadik Malanggan fo heti basa hata fo natutik no hataholi kamahelek kala.e 23 De, mete ma Ndia dadik Malanggan, na, ita hataholi kamahelek kala, dadik sama leo Ndia aon. Dei fo ita tao basa ues, fo Ana nakalala'ok kana neu faik fo bei nai dae-bafok. Te Ndia naena koasa, fo tao basa-basan dadik tungga Manetualain maksut.f
Au huhule-haladoing neu ei memak leo ndiak.”