Ita musi dale taidaek, sama leo Yesus Karistus
2
Tolanoo susue nggala ei, fo mana dadik Yesus Karistus hataholin nala! Ana fee dede'a neulauk makadotok neu ei so. De ei bisa tao matea esa no esa dalen. Ei bisa manoli-mafada hata fo naoka neme ei dale susuem mai. Ei bisa masoda malole esa no esa, huu Manetualain Dulan tao ues nai ei laladam. Ma ei bisa matudu ei namemeda kasian ma dale malolem esa no esa. 2 Mete ma ei tao leo ndiak, na, au daleng namahoko. Nakalenak bali, mete ma ei masoda masue ao mia dalek esa, masoda no hihiik esa, ma mala halak fo tao ues sama-sama. 3 Boso tao hata-hata fo kada sangga nanalak soa-neu ao-ina hehelik. Ma boso tao aok lena heni hataholi fe'ek. Naa te o koaom ndia ta naena netes. Tehuu ita musi dale taidaek, fo tao hataholi fe'ek lena heni ita. 4 Ma boso kada makaneni ei esa-esak paluum. Tehuu ita musi mete hataholi fe'ek kala paluun boe.5 Huu ita dalen, dudu'an ma tatao-nono'in musi sama leo Yesus Karistus.
6 Huu mae Ndia mata-aon sama leo Manetualain,
ma Ndia boe oo Lamatuak sama leo Manetualain,
tehuu Ndia mbo'i heni Ndia haak,
ma ta pake Ndia panggan.
7 Boe ma Ana konda neni dae-bafok ia mai,
pake mata-aok leo hataholi basa faik.
Ana la'o ela basa Ndia haak
fo tao aon dadik ata.
8 Ta kada dadik hataholi kadi'ik,
tehuu Ndia boe oo tao aon dadik hataholi papake taak,
fo tao tungga Manetualain hihiin.
Mae hataholi la tao lisan nai ai ngganggek lain boe oo, kada Ana simbok,
ma Ana mate sama leo hataholi manggalauk.
9 Huu Ndia dalen taidaek leo ndiak,
de Manetualain so'u dema-demak Ndia.
Ma feen nadek fo ana seli.
Huu ta hambu nadek esa boe fo ana seli lena Ndia.
10 Manetualain so'u dema-demak Ndia naden leo ndiak,
fo basa hataholi fee hada-holomata neu Ndia.
Fo ndia, hataholi manai lalai,
ma hataholi manai dae-bafok.
Hataholi kasodak ma hataholi kamates.
Dei fo basa hataholi sendek fo lakaluku-lakatele neu Ndia.
11 Ma dei fo hataholi lae, “Yesus Karistus ndia, tetebes Lamatuak fo naena haak palenda au!”
No leo ndiak, na sila boe oo koa-kio Amak Manetualain.a
Ita dadik sama leo nduuk fo nasa'a tao manggaledo dae-bafok ia
12 Tolanoo susue nggala ei! Mamanene neulalau! Fai maneuk fo au bei nai kota Filipi, ei mamanene au, boe ma ei tungga Manetualain dala ndoon. Hatematak ia ita taelak dook nai mamana fe'ek so, tehuu au oke fo ei mbalak eik makandoo, fo masoda ndoos. Masanenedak, mete ma ei ta mamanene Lamatuak, na, dei fo ei hambu huhukuk! Huu Ndia nasala'e nala ei, mima ei sala-singgom mala mai. Boe ma ei musi masoda no mandaan, huu ei dadik Ndia hataholin so. 13 Huu Manetualain mesak kana tao ues nai ei dalem. Ndia ndia soi dalak, fo ei nau mamanene Ndia. Ma Ndia boe oo, fee koasa fo ei tao ues fo tao mamahoko Ndia dalen.
14 Boe ma mete ma ei tao sudi hata, na, boso manggalau, ma masisimbo bafak. 15 Tao leo ndiak, fo ei bisa dadik hataholi dale malalaok, ma hataholi fo sala taak. Ei masoda nai hataholi manggalauk ma mana masapepekok kala laladan. Tehuu ei boso tungga sala! Ei sodam musi malalaok, huu ei ndia, Manetualain anan nala. Boe ma ei sodam musi lasa'a, fo matudu dalak neu sala, sama leo nduuk fo nasa'a nai makiuk.b 16 Boe ma ei masoda ndoos ma makalala'ok Manetualain Dede'a-kokolan nala. No leo ndiak, dei fo ei tao au daleng namahoko, neu faik fo Yesus Karistus fali main. Ma au sosotang ndia, hambu buna-boa malole, huu ta nana nggali henik no sosoa taak.
17-18 Tehuu mae au fee heni basa au sodang, fo dadik neu tunu-hotuk, suek ei bisa mamahele matea ma makalala'ok Lamatuak uen, na, au simbok no namahokok. [Ndia, sama leo malangga anggama di'a anggol oek neu mei tunu-hotuk fo nakaluku-nakatele neu Manetualain.] No leo ndiak, na ita bisa tamahoko no'u, huu tunu-hotuk ndia, kasosoak.c
Timotius uen
19 Au amahena, ta dook so bali, Lamatuak Yesus soi dalak fo au adenu Timotius neu tao natea ei dalem. Basa ndia, na ana fali neni ia mai bali, fo nafada au la'e-neu ei nanggatutuu-nambadedein, ma tao natea au daleng. 20 Au ta adenu hataholi fe'ek. Kada au adenu Timotius, huu ndia dalek esa no au. Ma ndia sue ei tebe-tebe. 21 Ndia ndia, ta sama leo tolanoo fe'ek kala. Huu sila kada dudu'a sila dede'a hehelin nala, tehuu ta lakaneni dede'a penting neu Yesus Karistus. 22 Tehuu ei bubuluk so mae, Timotius tao ues mbilu-mbuse fo nakalala'ok Manetualain uen. Ana tao ues no'u no au, sama leo kakanak esa tao ues fee aman. Ai dua nggai miu tui-bengga Lamatuak Yesus Hala Malolen sudi nai bee so. 23 Mete ma ala laketu heni au dede'ang nai ia so, bei fo au adenu Timotius neni ei neti. 24 Tehuu hatematak ia, Lamatuak tao natea au daleng nae, ta dook bali te au boe oo bisa mai tilo ei so.
Epafroditus uen
25 Makahulun, au hambu toto'ak. Boe ma ei madenu ita tolanoon Epafroditus mai tilo au. Ana nakalala'ok Manetualain uen no'u no au, leo soldadu manggatek tungga ndia malanggan palendan. Tehuu hatematak ia, au ameda musi adenu falik ndia neni ei neti. 26 Huu ndia dalen dokodoe sangga neu tilo ei so. Ma ndia boe oo dudu'a ei, huu ana bubuluk nae, ei mamanene ndia hedi-hedi. 27 Memak tetebes. Fai maneuk ana namahedi belak losa elaba'ik maten. Tehuu Manetualain suen, de tao nahain. Ma Manetualain boe oo sue au, de Ana tao nahai Epafroditus, suek au boso to'a tamba bali. 28 Huu ndia de au sangga adenu falik ndia, fo ei bisa matonggo mian no dale namahokok. Mete ma leo ndiak, na, au daleng ndoo-ndoo. 29-30 De ei musi simbok neulalau ndia, huu ndia, Lamatuak hataholin. Ma ei musi fee hada-holomata neu basa hataholi fo mata-aok sama leo ndia. Huu ana nakalala'ok Karistus uen, losa elaba'ik maten. Ma ana ta heok faa boe, huu ana nau tulu-fali au, nggati ei. De ei musi simbo falik ndia no dale malole.