2
De au mesa nggau aketun ae, au bei ta nau uu tilo ei, fo ela basa hataholi boso dale belak. 2 Mete ma au tao ei dalem belak, na, see dei fo tao au daleng namahoko bali? Kada ei. Tehuu mete ma hatematak ia au mai, na, au tao ei dalem hedis. 3 Huu ndia de au sulak susulak fai lai-laik ndia ae, au bei ta dadi uni ei neti. Au bei ahani tataak, fo suek ei makaneni basa ei dede'am dei. Dei fo mete ma au dadi mai, na, au boso ameda belak huu ei dede'am mala. Huu teteben, ei ndia tao au daleng namahoko. Au alelak ei basa nggei. De au amahele tebe-tebe, mete ma au daleng namahoko, na, ei dalem namahoko leo ndiak boe. 4 Neu faik fo au sulak susulak fee ei ndia fai lai-laik, au ameda au daleng hedis ma dale belak. Au boe oo amatani alan seli. Tehuu au sulak leo ndiak, fo suek ei bisa bubuluk au susueng neu ei. Huu au ta sulak dede'ak ndia fo tao ei mameda dale hedi.Mafalende heni hataholi salan
5 Nai ei salanim ndia, hambu hataholi esa tao hataholi no'uk dalen hedis. Au boe oo dale hedi tungga, huu hataholi ndia tataon. Naa te, ndia tatao-nono'in ndia, memak ta la'e bebeik au, tehuu no'un seli la'e-neu ei luma. 6 Au boso kokolak no'uk bali. Huu no'uk leme ei mai ka'in so, boe ma ana hahae. 7 De hatematak ia, ei musi mafalende heni ndia salan, basa na, ei musi kokolak malole mian. Huu, boso losak mopo ndia namahehelen. 8 Huu ndia de au oke fo ei makabubua sama-sama, fo taon namahele tebe-tebe nae, ei sue ndia.
9 Au sulak au susulang fai lai-laik ndia, fo sangga uku-sudi ei. Huu au nau bubuluk, mete ma ei tao ndoos, ma tao tungga basa au palendang neu ei. 10 Mete ma ei ta mambeda dalek bali, ma mafalende heni hataholi salan, na, au boe oo, tungga hata fo ei maketun so. Mete ma hambu ndia salan fo au paluu afalende henin, na au boe oo afalende heni hataholi ndia salan. Au tao leo ndiak nai Karistus matan, fo dadik conto malole soa-neu ei. 11 Huu au ta ahiik nitu la malanggan ika nala ita, do senggi ita. Ita musi bubuluk ndia rencana manggenggeon nala. De boso mamanggonggoa, baa!
Paulus dalen ta ndoo-ndoo nai Troas
12 Makahulun, neu faik fo au uni kota Troas uu, fo anoli hataholi la'e-neu Karistus Hala Malolen ndia, Lamatuak soi dalak fee au nai ele. 13 Tehuu au daleng ta ndoo-ndoo, huu au ta atonggo ua tolanoong Titus nai ele. Boe ma au oke fo la'o ela hataholi kamahelek manai Troas, de au la'o uni propensi Makedonia uu.a
Karistus ndia tao ita senggi
14 Tehuu mae au nai sudi bee mesan, au oke makasi no'uk neu Manetualain. Huu Karistus natati laban dede'a manggalauk kala so, de Ana senggi, ma ita boe oo nana mba'ak to Ndia. Huu ndia de, Manetualain natudu nakandoo nae, ita ia, Ndia hataholin. De neu faik fo ita tafada hataholi la'e-neu Karistus, ndia sama leo kaboo menik esa fo basa hataholi hae la'en. 15-16 Makahulun, neu faik fo hataholi Yahudi tao tunu-hotuk, masun boon hene neni Manetualain neu, de tao namahoko Ndia dalen. Ita boe oo, sama leo kaboo menik esa, fo fee nasanenedak neu Manetualain la'e-neu Karistus. Tehuu soa-neu hataholi luma, ita sama leo kaboo mbuluk esa. Mete ma hataholi fo sodan dook neme Manetualain mai, nita ita sodan, ndia tao nala sala dudu'a lae, dei fo ala mate, ma ala laelak dook neme Manetualain mai. Tehuu soa-neu hataholi luma bali, ita sama leo kaboo menik esa. Mete ma hataholi fo hambu sodak tetebes nita ita sodan, ndia tao nala sala lasaneda talo bee fo Karistus nasala'e nala sala so, ma fee sala sodak fo ta mana ketuk. Hataholi see ndia nabe'i tao basa dede'ak kala ia? Ta hambu, hetu?
17 Masaneda, huu ita ia, ta sama leo hataholi fe'ek, fo kada fee nanonolik la'e-neu Manetualain Dede'a-kokolan fo suek ala sangga nanalak, sama leo ala danggan pake Manetualain Dede'a-kokolan. Taa! Mete ma ai kokolak, na, basa hataholi bisa lita ledo-ledo lae, ai fee nanonolik no dale malalaok. Ai kokolan naoka neme Manetualain mai. Ma ai sodan nana mba'ak mia Karistus.