4 Ai mamahele tebe-tebe mae, ai bisa mamahele Manetualain mae, basa dede'ak kala ia memak tetebes, huu Karistus natudun leo ndiak so. 5 Mete ma kada neme ai mesa nggai mai, na, ai ta maena koasa, fo bisa tao hata esa boe. Huu koasa ma haak manai ai ia, naoka nai Manetualain. 6 Manetualain ndia so'u nala ai dadik Ndia hataholi mana tao uen so, fo mafada hataholi la'e-neu Ndia Hehelu Beun. Tehuu Ndia Hehelu Beun ndia, ta la'e-neu kada hataholi fo tao tungga heti-heuk mata-matak, tehuu la'e-neu hataholi fo nana mba'ak no Manetualain Dula-dale Malalaon. Mete ma hataholi kada tao mboke-mbake tungga heti-heuk, na, ndia sama leo ala mate nai dalen nala so, ma ta hambu sodak tetebes fo ta mana ketuk. Tehuu mete ma hataholi nasoda nana mba'ak no Manetualain Dulan, na, ana hambu sodak tetebes ndia.^b

7 Makahulun, neu faik fo Manetualain doki Ndia Heti-heun neu batu bebelak kala, ndia memak ana seli. Tehuu mae hataholi tao tungga basa Heti-heuk kala sila, dei fo ala bei laelak lo Manetualain. Boe ma neu faik fo Musa simbo nala Heti-heuk kala sila so, matan nasa'a nalan seli. Huu ndia de, hataholi Israel asa ta bisa lita matan. Tehuu doo-doo boe ma, masa'ak ndia mopon.^c 8 De mete ma nana sulak nai batu bisa dadik ana seli leo ndiak, na, talo bee no hata fo Manetualain Dulan taon nai ita dalen so? Neu ko ana seli nalan seli bali, hetu? 9 Naa, Heti-heuk ndia natudu nae, ita musi hambu huku mates, fo taelak to Manetualain, huu ita ta tao tungga basa Heti-heuk kala sila. Mae leo ndiak, tehuu Heti-heuk ndia bei ana seli nahele boe. Tehuu Manetualain Dulan ana seli lena bali, huu Ana natudu dalak, fo ita bisa malole fali to Manetualain. 10 De Heti-heuk fo makahulun hataholi taok ana seli ndia, hatematak ia ta ana seli leo ndiak so bali, huu hatematak ia hambu mana ana selin lena so. 11 Heti-heuk kala ana selin ndia, sama leo ba'i Musa matan, fo makahulun nasa'a, basa bei fo sa'an mopon. Musa no Heti-heuk ndia bei ana seli, tehuu mana ana selin lena bali, ndia ana selin fo nakatataka nakandoo, ta mana ketuk.

12 Ai basa nggai mamahele tebe-tebe mae, Lamatuak Hehelu Beun sangga nakatataka nakandoo, ta mana ketuk. Huu ndia de ai kokolak ledo-ledo, ta no babaak. 13 Ai ta paluu tao leo ba'i Musa. Huu ana musi babaa matan nenik temak, fo suek hataholi Israel asa ta bisa lita, mete ma masa'ak ndia mopon so.^d 14 Tehuu Manetualain tao nala hataholi Israel asa langga uten nala mba'a. Huu losa hatematak ia boe oo, mete ma ala lees nai Manetualain Susula Malalaon la'e-neu Ndia Hehelu Laan ndia, na, ndia sama leo temak esa babaa nala langgan nala, de ala ta nau lamanene, ma ta nau lalelak. Ta hambu hataholi fe'ek bali, fo bisa buka sila dalen fo ala bisa lalelak. Kada Karistus mesak kana. 15 Losa hatematak ia boe oo, mete ma hataholi Yahudi la lees ba'i Musa susulan, na, lamanene, tehuu ala ta lalelak teteben. Ndia, huu ala ta lamanene pake sila dalen, sama leo hata esa tatana nala dalen nala.

16 Tehuu mete ma hambu hataholi mulai namahele ita Lamatuan Yesus Karistus, na, Karistus buka hataholi ndia dalen, fo suek ana bisa nalelak tebe-tebe. Ndia sama leo nana sulak nai Manetualain Susula Malalaon nae, “Ana buka heni temak nana mbotik nai matan so.”^e 17 Nai Manetualain Susula Malalaon, neu faik fo ba'i Musa kokolak nae, “Lamatuak”, na, ndia maksut, Manetualain Dulan. Mete ma ita hambu Dulak ndia, na, Ana nakambo'ik ita. 18 No leo ndiak, Ana tao ita tamba faik boe ana seli, sama leo Ndia. Ta paluu mboti ita matan. Ma ita dudu'a takandoo la'e-neu ita Lamatuan ana selin, huu Ndia Dulan fali nala ita leo ndiak.