Au fee nasanenedak neu ei ae, Amak Manetualain ma Yesus Karistus ladenu au, ta hataholi nadenu au. Yesus Karistus ndia, na Hataholi fo Manetualain nadenun mai so. Karistus mate, tehuu Manetualain tao nasoda falik kana. Boe ma Sila ndia ladenu au, fo au uu tui-bengga Hala Malole neu hataholi la.

3 Au hule-haladoi neu Manetualain, fo ita Aman, ma Yesus Karistus, fo ita Lamatuan. Au oke fo latudu Sila dale malolen neu ei, fo suek ei bisa masoda mia sodak, mole ma ndoo-ndoo. 4 Karistus mate fo Ana koka heni ita sala-singgon nala, ma nakambo'ik ita teme manggalauk manai dae-bafok hatematak ia mai. Basa sila, tungga Amak Manetualain hihiin. 5 Huu ndia de ita musi koa-kio Ndia takandondoo henin! Tetebes ndia!

6 Tolanoo nggala ei! Au ta bisa bubuluk ei bali! Manetualain hele nala ei so, huu Ana nau ei malelak Ndia dale malolen. Tehuu hatina de, ei lai-lai heok masadean, fo miu mamahele nanonoli fe'ek fo 7 ta tetebes? Makahulun, au fee nanonoli tetebes so la'e-neu Yesus Karistus Hala Malolen. Tehuu hatematak ia, mana masapepekok kala mai so, fo lasapepeko Hala Malole ndia, losa tao lakandaa ei.

8 Mata neuk! Neu ko Manetualain sumba-soo hataholi mana mai fee nanonolik, la'e-neu Hala Malole fo ta sama leo makahulun ai fee nanonolik ndia so. Mae hataholi ndia neme ai mai do, Manetualain atan neme nusa sodak mai do, na neu ko ana hambu sumba-sook! 9 Ai mafada memak dede'ak ia neme makahulun mai so. Tehuu hatematak ia, au sangga tao nasanenedak seluk bali, leo iak: mete ma hambu hataholi mai fee nanonoli fe'ek neme Hala Malole ndia mai, fo makahulun ei simbon ndia so, elan fo Manetualain sumba-soon boe.

10 Au ambalani kokolak leo ndiak, huu au nau tao amahoko Manetualain dalen, ta hataholi dalen. Ei mae hetuk au sangga matak neu hataholi, do? Taa! Mete ma au tao leo ndiak, na, au ta andaa dadik Karistus atan.

11 Tolanoo nggala ei! Au sangga afada manggaledok ae, Hala Malole fo au anoli ei ndia, na hataholi ta dudulan. 12 Au ta simbon neme hataholi mai, ma ta hambu hataholi nanoli au boe. Yesus Karistus mesak kana tao manggaleledo ndia ndandaan neu au.

13 Neu ko ei mamanene tutuik la'e-neu au soda makahulung so, neu faik fo au bei amahele anggama Yahudi, hetu? Faik ndia, au tao doidoso Manetualain hataholin nala, fo sangga tao akalulutu sala.^a 14 Ma faik ndia boe, au daleng manggate nalan seli anoli la'e-neu anggama Yahudi, lena heni hataholi Yahudi fe'ek fo teun leo au. Ma au manggateng ana seli akalala'ok basa ai bei-ba'i nala hadan ma basa anggama heti-heun.^b

15-16 Ma mae leo ndiak boe oo, tehuu Manetualain naketu basan so, fo Ana nalelelak Anan neu au. Au inang bei ta bonggi au, te Ana hele memak nala au so, huu Ana nau natudu dale malolen neu au. Ndia boe oo nadenu au, fo au uu anoli hataholi ta Yahudi la. Neu faik fo Ana nadenu au, au ta uu oke nanoli-nafadak neme hataholi fe'ek mai.^c 17 Ma au boe oo, ta uu atonggo ua lasi salanik kala, fo mana dadik Yesus nadedenun nala malai Yerusalem. Tehuu au la'o tutik uni dae Arab uu. Basa boe ma au fali uni kota Damsik uu bali.

18 Basa teuk telu, boe ma au uu atonggo ua Petrus^d nai Yerusalem, fo sangga bubuluk hata neme ndia mai. Boe ma au leo tataak nai ndia faik sanahulu lima.^e

19 Faik ndia, au boe oo atonggo ua Lamatuak Yesus fadi bonggin, nade Yakobis. Tehuu au ta atonggo ua Lamatuak nadedenu fe'en nala. Kada sila dua sala. 20 Hata fo au sulak ia, memak tetebes! Au ta asapepeko! Manetualain bubuluk.

21 Basa boe ma au fo'a la'o uni propensi Siria ma propensi Kilikia uu. 22 Faik ndia, Karistus hataholin nala malai Yudea, bei ta lalelak au. 23 Kada lamanene halak lae, “Hataholi ndia fo makahulun ana tao doidoso ita, te hatematak ia ana fee nanonolik la'e-neu Karistus Hala Malolen. Naa te makahulun ana soba tao nakalulutu ita.” 24 Basa sala lamanene leo ndiak, boe ma ala so'u dema-demak Manetualain, huu au amahele neu Yesus Karistus so.