3 Au hule-haladoi neu Manetualain, ita Aman, ma Yesus Karistus, ita Lamatuan. Au oke fo Ala latudu Sila dale malolen neu ei, fo suek ei bisa masoda mia sodak, mole, ma ndoo-ndoo.

4 La'i-la'i esa au asaneda ei, na au kokolak ua au Lamatuang ae, “Makasi no'uk neu hataholi Korintus asa namahehelen!” Manetualain natudu Ndia dale malolen neu ei so, huu ei mamahele makandoo neu Yesus Karistus, fo Ana nadenun mai so. 5 Boe ma Ana tao ei mabe'i makalala'ok basa ues mata-matak, huu ei nana mba'ak mia Ndia so. Ndia tao nala ei mamasu'i, nai ei dalem. Huu ndia de, ei bubuluk tebe-tebe dede'a penting, la'e-neu Ndia dala sodan. Ei boe oo, bubuluk dalak bee ndia neulaun seli, fo mafada hataholi la'e-neu Karistus. 6 Basa dede'ak kala sila latudu lae, dede'ak kala fo ai mafada ei, la'e-neu Karistus ndia so, naoka natea nai ei dalem so. Huu ndia de ei bei mamahele tebe-tebe mae, dede'ak kala sila tetebes. 7 De ei simbo basa dede'a malole, fo Manetualain Dulan ba'e fee Ndia hataholin nala so. Ta kulan hata esa boe. Boe ma ei mahani-mahani faik ndia, fo dei fo Manetualain buka natudu ita Lamatuan Yesus Karistus, neu basa hataholi. 8 Karistus ndia tao natea ei, suek ei makatataka makandoo losa Ana fali neni dae-bafok ia mai. No leo ndiak, na ei ta tuda, ma ta hambu hataholi bisa soli salak neu ei. 9 Ita bisa tamahele neu Manetualain Dede'a-kokolan, huu hata fo Ana kokolak ndia, Ana taon dadi. De neu ko Ana nau tao dede'ak kala ia fee ei. Huu Ndia ndia soi dalak, fo ei bisa malelak neulalau Ndia Anan, fo ndia ita Lamatuan Yesus Karistus.

10 Tolanoo susue nggala ei! Nai dede'ak ia, au kokolak unik ita Lamatuan Yesus Karistus naden. De au hule tebe-tebe, fo ei hahae masisimbo bafak leo. Tehuu masusua, fo ei masoda dalek esa, ma boso masidak kala. Ei musi dudu'a naluk no'u, fo suek ei bisa bubuluk mae, ei maena hihiik esa.

11 Huu hambu hataholi neme ka'a inak Kloe uma isin mai nafada au nae, ei luma bei masisimbo bafak makandoo. 12 Au maksut leo iak: ei luma mae, “Au ia Paulus hataholin!” Ma luma lae, “Au ia Apolos hataholin!” Ma luma bali lafada lae, “Au ia, tungga ama Petrus!”^b Fe'ek bali lae, “Au ia, kada amanene neu Karistus!”^c

13 Ei dudu'am talo bee? Karistus bobonggin ta bisa latanggelak. Do, ei dudu'a mae, au ndia mate nai ai ngganggek soa-neu ei? Taa bou! Do, ledo-eik ala salani ei, ala pake au nadeng, fo tao ei maso dadik au hataholing, do? Ta bisa, hetu? 14 Au oke makasi neu Manetualain, huu ledo-eik au nai ele ua ei, au ta salani hataholi. Kada au salani ka'a Krispus ma ka'a Gayus.^d 15 No leo ndiak, na ta hambu hataholi bisa nae, “Ala salani au pake Paulus naden, de au dadik Paulus hataholin.” 16 (Eh, bei fo au asaneda. Au boe oo, salani hataholi luma leme Stefanus uma isin nala mai. Tehuu au ta asaneda, hambu hataholi fe'ek bali fo au salanin, do taa.)^e

17 Huu Karistus ta nadenu au fo uu salani hataholi. Au ue tetebeng ndia, tui-bengga hataholi la'e-neu Ndia Hala Malolen. Tehuu mete ma au tui-bengga hataholi leo ndiak, na, Ndia ta nahiik au kokolak pake dede'a bini, fo atudu au malelang, do atudu to'ok fo ana seli. Huu mete ma au kokolak leo ndiak, na, ndia tao kulan koasa neme tutuik la'e-neu Karistus mamaten nai ai ngganggek.

18 Hambu hataholi dudu'a nae, basa dede'ak fo ai tui la'e-neu Karistus mamaten nai ai ngganggek ndia, nggoan seli. Tehuu hataholi mata leo ndiak, dei fo naelak dook neme Manetualain mai. Naa te soa-neu ita, na Karistus mamaten ndia, natudu Manetualain koasan, fo nasala'e nala ita teme ita sala-singgon nala mai. 19 Ndia sama leo Manetualain mana kokolan Yesaya, sulak nitak nae,

20 Makahulun, Manetualain memak kokolak leo ndiak. De hatematak ia, ana dadi leo beek so? Hataholi malelak kala, dadik leo beek? Mese anggama la, dadik leo beek? Ma hataholi malela dede'ak kala, dadik leo beek? Mamanene sudik, baa! Manetualain tao sala sama leo hataholi nggoak so! Ana fe'a heni basa dudu'ak fo mana maokak nai dae-bafok ia so, ma taon leo sosoa taak.^g

21-22 Manetualain malelan ndia, ana seli. Huu mae hataholi taok aon malelak, sila dudu'a hehelin ta dai, fo bisa lalelak tebe-tebe Manetualain. Mae leo ndiak, tehuu Manetualain pake Ndia malelan, fo soi dalak fee hataholi so. Huu makahulun, Ana dudu'a so nae, “Mae hataholi lae hetuk Au nadedenu nggala kada hataholi nggoak, tehuu mae talo bee boe oo, Au musi adenu hataholi, fo neu nafada sala dede'a tetebes la'e-neu Au.” Huu Manetualain naketu nalan so, fo pake heheluk fo Ndia nadedenun nala lenik ndia, fo hataholi bisa lamahele neu Ndia. Ana nahiik pake dalak ndia, fo nasala'e hataholi leme sila sala-singgon nala mai.

Tehuu hataholi taok Manetualain dalan ndia, nggoak. Huu ndia de ala ta nau mbali Ndia nadedenun. Huu hataholi Yahudi la, kada nau loke tanda heran, fo bisa lita Manetualain koasan. Ma hataholi Yunani la kada nau lamanene dede'a malelak fo masok langga utek, tungga sila dudu'a hehelin. 23 Mae leo ndiak, tehuu ai fo mana dadik Lamatuak nadedenun nala, kada miu mafada hataholi mae, “Manetualain nadenu Karistus so, ndia Hataholi fo Ana helu memak so neme makahulun mai, fo nadenun mai. Basa de hataholi fe'ek kala mbaku lisan neme ai ngganggek.” Neu faik fo hataholi Yahudi la lamanene tutuik ndia, kada ala nau timba henin, huu tungga sila dudu'an, na Hataholi fo Manetualain sangga nadenun mai ndia, ta bisa mate leo ndiak. Neu faik fo hataholi Yunani la lamanene tutuik ndia, ala dudu'a lae, “Tutui nggoak ndia maa!” 24 Tehuu hambu hataholi fo Manetualain hele memak so, fo dadik neu Ndia enan. Sila luma leme hataholi Yahudi mai, ma luma leme hataholi ta Yahudi mai. Tungga sila, na Karistus mamaten natudu sala so nae, Manetualain koasa ina-huun ana seli, ma Ndia malelan ndia, ana seli. 25 Mae hataholi la taok Manetualain dalan ndia nggoak, tehuu Ndia malelan bei lena heni sila. Ma mae ala lae hetuk Manetualain ta naena koasa hata-hata, tehuu Ndia koasan bei ina-huun lena heni sila.

26 Tolanoo susue nggala ei! Suek ei bisa bubuluk au kokolang ia, na masaneda ei nanggatutuu-nambadedeim neu faik fo Manetualain hele nala ei dadik Ndia enan. Tungga hataholi timba-tain, nai ei laladam mala ta hambu hataholi malelak no'uk, ta hambu hataholi no'uk pangarun, ma ta hambu hataholi no'uk neme bobonggik mai naena nade ina-huuk. 27 Tehuu Manetualain hele nau pake sudi see fo hataholi taok nggoan ana seli, suek nakamamaek hataholi fo mana taok aon malelak. Ma Ndia boe oo, hele nau pake sudi see fo hataholi taok ta naena koasa hata-hata, suek nakamamaek hataholi fo mana taok aon naena koasa. 28 Boe ma Ana hele nala hataholi kadi'i-taidaek fo ta mana naena nadek ma hataholi lahiik lakadadaek kasa. Huu Manetualain nau pake sala, suek tao hataholi mana taok aon ana seli, dadik sama leo ta laena sosoa-ndandaan hata-hata bali. 29 De mete ma hataholi nasale Manetualain, na, dei fo ta hambu hataholi esa boe bisa babamba kalak nae, ndia, ana seli.

30 Kada Manetualain mesak kana soi dalak, fo ei bisa maso dadik Yesus Karistus hataholin. Manetualain ndia tao Yesus dadik Hataholi fo fee Ndia malelan neu ita. Yesus ndia, soi dalak fo ita bisa mole to Manetualain. Yesus ndia, tao nala ita bisa tasoda ndoos ma malalaok. Ma Ndia nakambo'ik ita neme salak koasan mai. 31 Ndia sama leo nana sulak nai Manetualain Susula Malalaon so nae,