Maria bonggi Lamatuak Yesus
2
1-2 La'i esa, neu faik fo Kirenius dadik malangga nusa Siria, boe ma mane ina-huuk nade Agustus, fee palenda nae, “Basa hataholi malai mana to'u palenda Roma koasan, musi fali leni nggolon nala leu, suek ala tungga sulak nadek!” Ndia sososan fo mana to'u palenda Roma hingga ndia lau-inggun nala leo ndiak. 3 De basa hataholi la fali leni nggolon nala leu, fo ala tungga sulak nadek.4-5 Faik ndia, Yusuf leo nai nggolo Nasaret, nai propensi Galelea. Ana nafufudik no ina anak esa nade Maria, fo kailus so. Yusuf ndia, na mane Dauk numbu-sadun, de ana musi fali neni Dauk kotan Betlehem neu, nai propensi Yudea fo ana tungga sulak nadek.
Huu ndia de, dua sala la'o leni kota Betlehem leu. 6 Ledo-eik ala bei lai ele, Maria fain sangga bonggi losa so. 7 Tehuu nai ndia, ala ta hambu kama nai uma sesebak. Huu ndia de ala leni lalae dale leu. Basa boe ma ana bonggi Ana sososan, tou anak. Boe ma ala lalusen temak, de lakambembe'un neu banda la ha'on dale.
Manetualain nafada mana hoo la
8 Le'odaen ndia, hambu mana hoo hida be'e lanea sila bi'iae-bi'ilombon nala lai mook kota deak.
9 Kada nggengge neuk, ala lita Manetualain ata nusa sodan. Boe ma Manetualain manggaledon nasa'a ndule sala, de ala bii lalan seli. 10 Tehuu ata ndia nafada nae,
“Ei boso bii dei! Mamanene neulalau baa! Huu au ia, mai afada ei hala malole esa. Basa mana mamanene hala malole ia, neu ko lamahoko.
11 Hala malole ia liin leo iak:
Faik ia, inak esa bonggi Karistus nai Betlehem so, nai mane Dauk kotan.
Karistus ndia, Hataholi fo Manetualain helu memak kana neme makahulun mai so.
Manetualain nadenun mai fo Ana nasala'e nala hataholi leme sala-singgon nala mai!
Ndia ia, fo dei fo hataholi la loken lae, ‘Lamatuak’, fo mana naena haak palenda basan!
12 Dei fo ei bisa malelak Ndia leo iak: ei matonggo mia Kakana mbimbila anak esa, lalusen nenik temak. Ana sunggu nai banda la ha'on dale.”
13 Ana kokolak nate'e, boe ma kada nggengge neuk, Manetualain ata nusa soda fe'en nala makadotok mai lakabubua lo ndia. Boe ma ala koa-kio Manetualain ma soda lae,
14 “Ai so'u dema-demak Manetualain naden!
Ndia fo mana manggatuuk palenda nai lalai fo deman seli.
Manetualain nau fee dame neu hataholi malai dae-bafok,
fo mana tao namahoko Ndia dalen!”
15 Basa boe ma Manetualain atan nala fali leni nusa sodak leu. Boe ma mana hoo la sila lakokola lae,“Wei! Mai fo teni Betlehem teu, fo teu tita Kakanak ndia dei! Huu Manetualain haitua fee ita halak ndia so.”
16 Boe ma ala la'ok lai-lai leni Betlehem leu. De ala latonggo lo Maria ma Yusuf. Ala lita Kakana mbimbila anak ndia, sunggu nai banda la ha'on dale boe.
17 Ledo-eik ala lita Kakanak ndia, boe ma ala tui lae, “Isinaak Manetualain ata nusa sodan nala lafada ai la'e-neu Kakanak ia so!” Boe ma ala tui basan losa mate'en.
18 Basa hataholi la heran lalan seli, lamanene mana hoo la tutuin ndia. 19 Tehuu Maria mbeda basa mana dadik ndia nai dalen so. De ana dudu'a nee-neek fo sangga bubuluk dede'ak ia ndandaan hata. 20 Basa boe ma mana hoo la fali leni sila bi'iae-bi'ilombon nala leu. De ala so'u dema-demak Manetualain naden. Ala loke makasi neu Ndia, huu lamanene ma litan, nandaa leo hata fo Manetualain atan kokolan ndia so.
Ala foi Kakana mbimbila anak ndia, nade Yesus
21 Bonggi basa Kakana mbimbila anak ndia faik falu, boe ma ala sunat Ndia tungga ba'i Musa heti-heun. Boe ma ina-aman foin, nade ‘Yesus’. Nadek ndia, fo ata nusa sodak nafada sila so, neu faik fo Ndia inan bei ta nailun.a
Ala loo Kakana mbimbila anak Yesus neni Uma Ina Huhule-haladoik neu
22 Hambu ba'i Musa heti-heun esa nae, inak fo bonggi basa faik 40 so, na ana musi neu tao tungga hadak, fo tao nalalao aon nai Uma Ina Huhule-haladoik. No leo ndiak, na ala bisa maso leni uma huhule-haladoik leu so, sama leo basa faik. Huu ndia de Yusuf ma Maria leni kota Yerusalem leu, fo sangga tao tungga hadak ndia. Boe ma ala loo sila Ana mbimbila anan ndia, neni Uma Ina Huhule-haladoik dalek neu, fo feen dadik Manetualain enan.b 23 Ala tungga Manetualain heti-heun fo nae, “Inak fo ana bonggi ana ulun, mete ma touk, na, ana musi fee kakanak ndia dadik Manetualain enan.”c 24 Tungga Manetualain heti-heun, na, mete ma fee kakanak ndia neu Manetualain, na, ina-aman musi fee tunu-hotuk mbui kateu pasan esa, do lunda mulik dua. Huu ndia de Yusuf no Maria tao tungga heti-heuk ndia boe.d
Ba'i Simeon nae, Kakana mbimbila anak Yesus ndia, na, Karistus fo Manetulaian heluk so
25-26 Faik ndia, ba'i esa, nade Simeon, fo ana leo nai kota Yerusalem. Ndia ndia, hataholi dale ndoos, ma dokodoe neu Manetualain. Manetualain Dula-dale Malalaon nafada ndia so nae, dei fo ana bisa nita Karistus dei, bei fo ana mate. Karistus ndia, fo dei fo nasala'e nala hataholi Israel asa.
27 Faik ndia, Manetualain Dulan noo Simeon neni Uma Ina Huhule-haladoik neu. Ndia ndandaak no Yesus ina-aman nala loo Ndia neni ndia neu, fo fee Ndia dadik Manetualain enan. 28 Ba'i Simeon nita Kakanak ndia, boe ma ana ko'o nalan, de ana so'uk koa-kiok neu Manetualain nae,
29 “Koa-kio Manetualain!
Manetualain tao natetu Ndia hehelun neu au so.
De hatematak ia, Manetualain bisa nakambo'ik au so,
fo ela au bisa mate no ndoo-ndoo,
30 huu au ita Hataholi fo Manetualain nadenun mai so,
fo nasala'e nala ai mima ai sala-singgon nala mai!
31 Manetualain nau pake Kakanak ia,
fo nasala'e nala basa hataholi nusak kala.
32 Dei fo Ndia sama leo masa'ak,
fo neni hada-holomata neu Manetualain hataholi nusa Israel asa.
Ndia boe oo, sama leo manggaledok,
fo natudu Manetualain dalan
neu basa hataholi nusa fe'ek kala.”e
33 Yusuf no Maria lamanene leo ndiak, boe ma ala heran lalan seli, no hata fo ba'i Simeon kokolan la'e-neu sila Anan. 34 Basa ndia boe ma Simeon kokolak baba'e-babatik neu sala. Boe ma ana nafada Maria nae, “Yesus inan aa! Dei fo hataholi no'uk lai Israel, timba heni ina Anan ia. Tehuu sila tataon neu Ndia ndia, dei fo natuda nasafali sala. Ina Anan ia tao namahoko hataholi no'uk dalen nala boe. 35 No leo ndiak, dei fo Manetualain tao nakaholak hataholi la dalen. Tehuu o, Maria, dei fo o hambu doidosok belak, sama leo tafa nana mbauk neu o mbo'om.”
Bei Hanaa noke makasi neu Manetualain, huu Yesus
36-37 Nai Uma Ina Huhule-haladoik boe oo, hambu ina lasik esa, nade Hanaa. Ndia teun teuk falu hulu haa ia so. Aman, nade Fanuel, neme leo Aser mai. Ana sao teuk hitu, boe ma saon mate la'o elan. Bei Hanaa ndia, na, Manetualain mana kokolan. Ndia uen, ndia hule-haladoi, ma puasa nai Uma Ina Huhule-haladoik, fo nakaluku-nakatele neu Manetualain leledo-le'odaen.
38 Ledo-eik Simeon bei nakokola no Yusuf ma Maria, tehuu ina lasik ndia neu deka-deka so. Boe ma ana namanene neu sala, de ana so'uk koa-kiok neu Manetualain. Basa de ana kokolak la'e-neu Yesus neu basa hataholi la, fo mana lahahanik Manek fo Manetualain heluk fo nadenun mai so, suek nakambo'ik hataholi nusa Israel.
Ina-ama lo Kakanak fali leni nggolo Nasaret leu
39 Ledo-eik Yusuf no Maria tao tungga basa ba'i Musa heti-heun nai kota Yerusalem so, boe ma ala fali leni propensi Galelea leu, nai sila nggolon Nasaret.f 40 Yesus ina-huu mai, de Ana tamba balakai, tamba malelak, ma bubuluk dede'ak no'uk kala. Manetualain boe oo natudu dale malolen neu Ndia.
Tou anak Yesus nai Uma Ina Huhule-haladoik
41 Tungga-tungga teuk, Yusuf ma Maria la'o leni kota Yerusalem leu, fo la'a feta Paska nai ndia.g 42 La'i esa, neu faik fo Yesus teun sanahulu dua, boe ma ala la'o no'u leni Yerusalem leu, fo ala tungga la'a feta sama leo natetemek. 43-44 Ledo-eik fai-fai Paska basan so, boe ma Yusuf no Maria mulai la'o fali leni Nasaret leu, sama-sama lo hataholi no'uk mana sangga fali leni Galelea leu. Tehuu ala ta bubuluk, Yesus nana la'o elak nai Yerusalem. Lae hetuk Ana la'o sama-sama no Ndia nonoon nala. Tehuu losa bobok, ala ta lita Ndia. Boe ma ala mulai la'o lafeok, leu sanggan nai sila bobonggin ma nonoon nala. 45 Huu ta latonggo lo Ndia, boe ma ala fali leni Yerusalem leu, fo nau sanggan nai ele.
46 Losa ele, boe ma ala sanggan losa faik telu, bei fo latonggo lo Ndia nai Uma Ina Huhule-haladoik dale. Ana nanggatuuk natane-nataak no mese anggama Yahudi la. 47 Basa hataholi mana mamanenek kala heran lalan seli, huu Ana bubuluk tebe-tebe Manetualain Susulan isin, ma Ana bisa nataa no malole sila natatanen nala. 48 Ina-aman lita leo ndiak, boe ma ala heran. Basa de Ndia inan nae, “Yesus! Hatina de O tao makatoto'ak ai leo iak? O amam ma au masapangga malan seli, de ai mafeok sangga O miu-mai!”
49 Tehuu Yesus nataa nae, “Hatina de ama no ina masambute sangga Au? Kada malelak malan, hetu? Au kauek nai Au Amang Uman.” 50 Tehuu ta lalelak tebe-tebe Ndia maksut.