3 Anneen on naan ate, Nai' Yesus nareta' sin anpaek uab manporin am nak, 4 “Karu anmui' tuaf es na'ko ki, in nmui' 'bib-kase mana' nautn es. Onaim namneuk es. Oras ia, in he nmoe' on mee? In ro nnao nasaitan bo' seo mseo nggwin nbi baer mamut es, rarit nnao naim amneukt ee reka' niit ee. 5 Karu in napein 'bib-kaes amnekut naan ate, in nasaah neik je nok neek marine. 6 Antea umi te, in no'en in nonot-asar sin ma natoon neu sin am nak, ‘Hae! Hi iim he mmarin-riin mok kau fe'! Fin au upein ufani' au 'bib-kaes amnekut naan.’ 7 Anbi sonaf neno tunan on naan amsa'. Karu anmui' tuaf asanat es na'piis, rarit antebi nfain neu Uisneno, sonaf neno tunan in naan ee anmarinan ok-oke'. Sin nmarinan nneis, natuin tuaf mese' re' anfain neem neu Uisneno, na'ko tuaf bo' seo mseo re' anmonin nok amne'o ma ka nseken fa.”

8 Rarit Nai' Yesus nareta' anpaek uab manporin es antein am nak, “Anmui' bifee mnais es anmui' roi muti' fua' bo'es.^b In ka nakeo naan fa te, fua' es namneuk. Onaim oras ia, in he nmoe' on mee? In ro he nnao nout paku, rarit antana' narek-reko' nbi mee-mee, ma nsaup umi naan barisi, he naim roit naan rek-reko. 9 Oras in niit nafani' roit naan ate, in no'en abitan in uim je aon bian, rarit natoon neu sin am nak, ‘Au uskau ki, he hi iim ammarin-riin mok kau fe', tua! Fin au 'iit ufani' au roi muit amnekut naan!’ 10 Anbi sonaf neno tunan on naan amsa'. Karu anmui' tuaf asanat es re' na'piis, rarit antebi nfain neu Uisneno, ameput sonaf neno tunan sin barisi anmarinan nmaten.”

11 Rarit Nai' Yesus antuut In reta' npaek uab manporin es antein am nak, “Anmu'i 'naef es nok in aan moen ee tuaf nua. 12 Neot es, aheit suus gwe nak in aamf ee mnak, ‘Aam honi'! Ambati mfee kau au pusaak ein oras ia nai!’ Onaim In aamf ee nbait in a'mui'f ein neun in aanh ein nua sin. 13 Ka 'roo fa te, aheit suus gwe na'sosa' in sapaan. Rarit in n'aum in tais ein, ma nnao kuun neu pah a'roo-'roo. Anbi bare naan in nbis-biisn ahaa roit ma nmoin nok marine re' ka mapanat fa. 14 Oras in narair roit on naan ate, pah re' naan amnaahs ee ntaamn ee, tar antea in a'moin ee njair atoin kasian. 15 Onaim in nnao naim mepu. Atoin es nbi pah re' naan antoup gwe he nmeup. Atoni' naan naruur ee meup gwes, re' he nhao fafi. 16 Natuin ri'ana' ia namnaah ka nabei' fa gwen, onaim in neekn ee he naah mnaah fafi naan. Fin ka tiit fa tuaf he nfee ne he naah.

17 In natenab a'roo-'roo neu-mneem am nak, ‘Anbi au ama' in umi, ameupt ein ok-oke', sin nahan tar namsenan. On nai te, au es ia ma umnaah a'maet. 18 Reko nneis, au 'tebi 'fain 'eu au ama' nee. Rarit utoon ne m'ak, “Aam honi'! Au usanab a'rair 'eu Uisneno ma 'eu ko, aam honi'. 19 Au ka pantas fa he 'jair ho aan hoin aa gwen. Maski ho mtoup kau 'jair aet kuri 'bi ho umi ia msa', reko!’”

20 Natenab anrair on naan ate, in nfeen ma nnao nfain neu in aamf ee umi. Oras in anbi 'roo gwe fe', mes a'naef ee niit anrair je, onaim ansaon ee nmouf ma nkasian ee. In npoi na'ko uim je naan ee, ma naen anseun gwe. Rarit a'naef ee nhoo ma nneek naan ee.

21 Onaim ri'ana' naan na'uab neu in aamf ee mnak, ‘Aam honi'! Au usanab ko'u 'eu Uisneno ma 'eu ko, tua. Au ka pantas fa he 'jair ho aan hoin aa gwen.’

22 Mes in aamf ee naprenat in ameupt ein am nak, ‘Hae! Rabah! Mait meik maan baru mnaun feu' gwes he mibaru. Mikrein je ma msapaut in haek ein rek-reko. 23 Amnao mheer bijae paron es ma mroor gwe, he hit tmoe' fesat kou'-ko'u. 24 Natuin au anah re' ia on re' anmaet jen, mes oras ia nmoni nfain jen. In namneuk, mes oras ia au upein ufain' ee.’ Na'uab anrair on naan ate, sin nmurai nfeest ein bu'-bua', ma sin nmarinan nmaten.

25 Oras naan, aan moen uun gwe ka nbi fa umi, in nbi rene. Oras in nfain neem na'ko rene, in anbi 'roo gwe fe'e te, in nneen areukt am abobet ansiin ma nabso'on. 26 In neem antea te, in no'en ate es, rarit nataan ee mnak, ‘Hae! Hi mmariin ambi fesat ia neu saa'?’

27 Ate naan nataah am nak, ‘Usi', ho ori' nfain neem. Onaim ama' nreek kai he hai mroor bijae he mmoe' fesat ia, fin in aanh ee nfain neem nok ao-mina', tua.’

28 Anneen on naan ate, aan unu naan natoo'. In ka nromi ntein fa he ntaam neu umi. Onaim in aamf ee nnao nfuir ee he ntaam.

29 Mes in nmaheek je mnak, ‘Aam honi'! Ho mutenab miit! A'roo-'roo re' ia, au 'meup on re' kuri 'eu ko. Au ka 'tanhai 'iit fa ho atoran mese' msa'. Mes ho ka mroor miit fa 'biib aan es, he au 'fesat ma 'mariin-riin 'ok au aok-bian sin. 30 Mes ho aan neka' re' ia, annao ma nporin roit ruum-ruum, anmakoin tafi'-tafi' nok bifee a'haek ein. Oras ia, in nfain neem on nai te, ho mroor bijae paron ma mmoe' fesat ko'u neu ne.’

31 Mes in aamf ee nataah am nak, ‘Unu! Amneen murek-reko', hee! Ho mok kau 'roo-'roo gwen. Are' saa'-saa' re' ho ama' kau gwi 'mu'i sin, naan ho nggoa. 32 Mes oras ia, hit ro he tfesat he tmariin, natuin ho ori', fua' mese'. Unu' te, in on re' nmaet, mes oras ia in nmoni nfain. In namneuk, mes oras ia, tiit tafain' ee.’”