3 Rarit Nai' Yesus annao ntoko nbi 'to'ef Saitun. Onaim In atoup noin' ein neman he na'uab anmes-mesen nok Ne. Sin na'uab ein am nak, “Aam! Mutoon mufani' kai saa' re' Ho mu'uab ee fe'e na. Of reka' te Ho mfain uum, tua? Ma in a'taak ein on re' mee? On mee nok neon amsoput naan amsa'?”

4 Rarit Nai' Yesus nataah am nak, “Ampanat hi tuam ein rek-reko, he kais napoi naan ki. 5 Fin of anmui' tuaf huma'-huma' neman rarit anpaas ok am nak, ‘Au re' ia Kristus, Tuaf re' Uisneno anba'an anrair Je na'ko unu'.’ Nok ranan naan, sin napoi too mfaun. 6 Karu hi mkius makenat, ai' hi mneen uab anin am nak, anmui' taisibu ma makenat et mee-mee, hi kais mimtau. Fin rasin re' naan ro he njarin. Mes neon amsoput naan ka ntea fa fe'. 7 Uuf es of anmakeen nok uuf bian. Pah es anmakeen nok pah bian. Of antainuun nbi mee-mee. Ma oras amnahas ma'tain besi! 8 Mes naan ok-oke', fe' tanar ahunut re' natoon am nak, oras neon amsoupt ii he neem een. Naan nahuum on re' bifee re' he fe' nmurai nnaben menas, natuin in oras he nahoni' anpaumaak een.

9 Onaim hi ro he mpanat hi tuam ein rek-reko! Sin of anha'mui' ki ma nroor na'maet ki. Ma tuaf na'ko pah-pah of ka nroim nain ki fa, natuin hi mituina' Kau.^a 10 Oras naan, too mfaun ii nkoit ma ka npirsain ntein Kau fa. Sin ka nmaka'roim ein fa, ma of anma'soos ein es nok es. 11 Of anmui' aputa-kriut nak sin re' naan, Uisneno In mafefa kninu'. Ma too mfaun ii npirsai sin. 12 Of tuaf ein sin maufiunk ein amfaun ma na'baab ok antein, tar antea sin ka nmanekan fa es nok es. 13 Mes tuaf re' naran ma ntahan piut-piut tar antea in nmaet, Uisneno of ansoi nafetin naan ee.^b 14 Fin tuaf ro he natoon ma nasina' Uisneno In Rais Reko, tar antea pah-pinan ia no mes-mese', maut he bifee-atoni' sin ok-oke' nahiin Uisneno In raan a'honis re' batuur. Rarit na' neon amsoupt ii neem.”

15 Nai' Yesus na'uab ankoon am nak, “Uisneno In mafefa kninu' nai' Daniel antui anmatoom nok tuaf re' in maufinu ma'tain re'uf. In of antaam anhaek neu baer nuni nbi Uisneno In Uim Onen Uuf. Nok ranan naan, in nhai'niis bare naan. Es naan ate, Uisneno naikoit bare naan. Oras hi mkius miit on naan, ampaant om! (Sekau re' anrees tuis ia, ro he nahiin narek-reko'!)^c 16 Naan anjair tanar nak, neon suust ein anpaumaak een. Oras amkius on naan ate, abitan propinsi Yudea maen nai meu 'to'ef. 17 Karu tuaf anpoi nrair na'ko umi, kais anfain he nait bare' ntein. Maen amkoon, maut he kais mipein siraak. 18 Tuaf re' nbi rene ma po'on, kais anfain he nait tainusat antein. Maen amkoon nai!^d 19 Re' tkasian sin baineis-neis ii, es re' bifee ma'apu', ma bifee re' nasuus ri'ana kru'uf. Te sin ka bisa naen nanan fa. 20 Onaim reko nneis hi m'onen he siraak naan kais nateef nok oras na'uur, ai' nateef nok neno snasat. 21 Fin neno naan susat ma'tani'! Anmurai na'ko oras Uisneno nmoe' pah-pinan tar antea oras ia, atoni' ka nkius niit fa susat ma'tani' nahuum on re' naan. Ma atoni' of ka nkius niit antein fa susat ma'tani' nahuum on re' naan amsa'.^e 22 Mes hi m'ua reok, fin Uisneno na'paran neno naan. Karu kaah fa te, ka tiit tain fa tuaf re' ntahan he nmoin nabaar. Mes, natuin Uisneno nneek In tuaf ein re' In npiir nain sin, es naan ate In na'paran neon suust ein naan.

23 Karu neno naan antea gwen, hi mneen tuaf nak, ‘Amkius! Kristus es ia!’ Ma tuaf bian nak, ‘Kristus es nee!’ Mes hi kais ampirsai, joo! 24 Fin of anmui' tuaf anpoi ma npaas ok nak, ‘Au re' ia, Kristus!’ Ma bian antein nak, ‘Au re' ia, Uisneno In mafefa kninu'.’ Sin of anmo'en rais sanmakat huma'-huma' anpaken niutn ein sin kuasa he nputa-kriu atoni'. Sin nsoob ein he napoi Uisneno Iin na msa'. 25 Onaim hi ro he mpaant om rek-reko, joo! Neon suust ein naan ka ntean fa fe', mes Au utoon 'ain ki!

26 Karu tuaf natoon ki mnak, ‘Kristus et amnera' nee, joo!’ hi kais amnao meu nee. Ma karu nmui' tuaf nak, ‘Kristus et umi ia nanan!’, hi kais ampirsai sin aputa-kriut ein naan. 27 Fin Au re' ia, Mansian Batuur-Batuur. Oras Au 'fain 'uum a'bi pah-pinan ia, too mfaun ii niit Kau, nahuum on re' rimat re' nariim na'ko pasa' maans ee 'saen neu pasa' neon-teas.^f

28 Oras Au 'fain 'uum, hi of mihiin mak Au et mee. On re' tuaf nahiin nak, karu nmui' koor amneuk puun ein nabu-buan anbin baer jes, naan anmui' punu' et bare naan.”^g

29 Rarit Nai' Yesus na'uab antein, he natoon neu In atoup noin' ein am nak, “Oras neon suust ein naan oke' nrair,

30 Rarit mansian ii niit tanar anbi neon gwe tnanan nak, Mansian Batuur-Batuur ii he nkoen On anfain neem. Ankisun on naan ate, uuf-uuf ma pah-pah abitan pah-pinan namtaun tar antea sin ankaen. Au of a'saun 'uum a'bi nope, na' mansian ii niit Au kuasat ma Au 'pina' ma kraha' sin ok-oke'.ⁱ 31 Rarit Au 'paek to'is re' in haan ee ma'tani' he uprenat Uisneno In ameupt ein etan sonaf neno tunan annaon na'bua' tuaf re' Au 'piir 'aan sin na'kon pah-pinan ia pani-mpain, na'ko pasa' maans ee 'saen tar antea pasa' neon-teas, na'ko pasa' ponain tar antea pasa' haa'-nua.”

32 “Au 'pake 'tope' na'ko hau. Karu in noon ein nmurai namnaut moor ein, naan anjari 'takaf nak, oras fauk nais ii he ntaam een. 33 On naan amsa', oras hi mkius neon suust ein neman, on re' Au utoon 'ain ki, tanar naan 'ak, oras he Au 'uum ii npaumaak een. 34 Oras ia, mneen mirek-reko'! Na'ko mansian ii ok-oke' re' nmonin oras ia, of anmui' tuaf re' ka nmaet fa fe', oras neon suust ein naan neman. 35 Maski neon gwe ma pah-pinan ia namnekun, mes Au a'at ma kabin sin nabar-baran kuuk.”

36 “Ka tiit fa tuaf re' nahiin oras Au 'fain 'uum. Uisneno In ameupt ein et sonaf neno tunan, ka nahinin fa msa'. Au kuuk, ka uhiin fa msa'. Suma Au Ama' kuun es re' nahini nmees. 37 Fin Au re' ia, Mansian Batuur-Batuur. Oras Au 'fain 'uum, nahuum on re' un-unu' oras nai' Noh anmoin fe'.^j 38 Noe sako' naan ka nsaen sin fa fe', mansian ii nbukaen amin-minat, ma nmatsaon on re' biasa. Sin nmo'en on re' naan piut-piut, tar antea nai' Noh antaam neu bnao ko'u naan. 39 Mes oras noe sako' ansaen sin, na' sin maatk ein natfe'in, he sin nahinin saa' re' njair naan. On naan amsa', oras Au 'fain 'uum.^k 40 Anbi oras naan, karu tuaf nua antofan nbin rene, nok askeken ate, Uisneno nait neik es, ma namaika' es. 41 Karu bifee nua napaun maka', nok askeken ate, Uisneno nait neik es, ma namaika' es.

42 Es naan ate, hi ro he mpao ma mpanat ansuun oras et fai ma manas, fin hi ka mihiin fa oras re' reka' te, hi Usi' ankoen On anfain neem. 43 Mitenab mirek-reko'! Karu anmui' uim tuaf re' nahiin neu abaakt ee he ntaam mabe' ia, in ro he npao ma npanat piut-piut, maut he abaakt ee kais antaam neu uim je nanan. 44 Onaim hi ro mibaarb om batuur-batuur. Fin oras Au 'fain 'uum re' naan, nok askeekn aah!”^l

45 Rarit Nai' Yesus na'uab antein am nak, “Hi ro he mjair on re' ameput re' natuin in uisn ee romin. Karu in uisn ee he nnao neu bare 'roo, in nait ameput on re' naan, he n'urus mnahat ma mninut neu in uim je nanan. 46 Karu in uisn ee nfain neem ma nkius niit in ameput naan anmeup rek-reko, ro tebes in of anmariin nok ameput naan. 47 Ampirsai Kau, fin usi' naan of anfee kuasa neu ameput naan, he n'urus in a'mui'k ein ok-oke'.

48 Mes karu ameput naan maufinu, in of natenab anbi in nekan am nak, 49 ‘Reko! Usi' nnao on nai te, sekau nahiin oras usi' nfain neem, oo!’ Natenab on naan ate, in nmurai nbeos ma npokos ameput bian. Ma in ntoko ma naah-niun amin-minat nok amauft ein. 50 Mes fe' ka natenab naan fa saa'-saa', nok askeken ate, in uisn ee nfain neem. 51 Onaim usif naan anha'mui' je ma'tani', rarit nait inpoirn ee neu mone', he in nabua nok atoin aputa-kriut ein. Anbi bare naan, sin ok-oke' ankaen npin-piuns ein, natuin sin napenin susat ma nana'renat ma'tani'.”