Reta' anmatoom nok banu' tuaf es, ma afeek rasi re' maufinu
18
Neot es, Nai' Yesus nanoni' In atoup noin' ein, anpaek uab manporin, maut he sin n'oen ein kais natfeek ma kais an'oren. Sin ro he npirsain piut-piut neu Uisneno. 2 In reta' naan on nai: “Anbi kota es anmui' afeek rasi re' ka nfairoir fa Uisneno. In ka nrae natuin fa sekau-sekau msa'. 3 Anbi bare naan anmui' bifee baun es, neem fani-fani ma ntoit afeek rasi naan am nak, ‘Aam afeek rasi! Mufeek maan kau au rais ji, tua. Mufeek ee te, ro he natai!’4 Nahunu te, afeek rasi naan ka nrae natuin fa bifee banu' naan. Mes anna-nao te, in nrenan bifee banu' naan in hanan. Rarit in ntoko ma natenab am nak, ‘Batuur, au re' ia ka 'fairoir fa Uisneno, saa' antein mansian. 5 Mes bifee banu' ia, annaak menab kau gwen. Es naan ate, maut he au ufeek in rais ji, natai fe'! Kaah fa te, in of para nfain neem, he nahaeb niis kau gwen.’
6 Hi mitenab miit afeek rasi re' amaufinut naan in uaban. 7 Karu nna-nao ma in nturun bifee banu' naan, Uisneno of anturun Iin na msa', re' an'oen ein fai-manas he ntotin turun-babat na'kon Na. Mes Uisneno ka nfe'-fe'en fa. 8 In n'urus sin rasin naan rabah. Onaim Au he utaan ki on nai: oras Au, Mansian Batuur-Batuur re' ia, 'tebi 'fain 'uum a'rair, Au of uteef 'ok atoin apirsait anbin pah-pinan ia, ai' kaah?”
Atoin Farisis tuaf es, ma ahoik beo tuaf es annaon n'oen ein
9 Nai' Yesus nareta' ntein anpaek uab manporin, anmatoom nok tuaf-tuaf re' naan in tuan ee amneot, ma nasbini' biak ein. In nareta' mnak, 10 “Anmui' naan a'naef nua nnaon n'oen ein nbin Uim Onen Uuf. Tuaf es na'ko pukan partei pirsait Farisi; es antein ahoik beo. [Atoin Yahudis sin naan atoin Farisis sin, atoni kninu'. Mes sin naan ahoik beon gwin, atoin re'uf.] 11 Antean uim onen on nai te, atoin Farisis naan anfeen anhaek ma n'onen am nak, ‘Makasi Usi', natuin au re' ia, atoin reko. Au ka maufiun fa on re' biak ein. Au ka ubaak, ka ukoom, ka 'makoin fa 'ok es in fee. Makasi Usi', natuin au ka 'maufiun fa on re' ahoik beo re' ia. 12 Au unaah au tuak ii no nua nbi krei jes in nanan. Au 'fee bait bo' na'ko saa'-saa' re' au upein kuuk sin.’ Atoin Farisis naan, an'onen on re' naan.
13 Mes ahoik beo naan anhaek na'roo-'roo nbi kotin nee. In ka nabrain fa he nait in a'nakan ma nbaiseun on neno. In n'onen, mes in na'ruir aah, ma in neekn ee krati'-krati' mnak, ‘Koi Usi'! Amkasian maan kau, mansian asanat re' ia, tua! Amfee maan kau saok sanat neu are' au saant ein, tua!’
14 Oras tua nua' ein naan anfanin neun sin umin, sekau es re' nmarame' nrair nok Uisneno? Atoin Farisis abe'ot naan aa oo, ai', ahoik beo? In ro he ntoup ahoik beo re' neek ma'nura' naan. Mes In ka nrae naan fa atoin Farisis naan. Fin Uisneno ntetak namouf abe'ot, ma ntuna' na'ratan atoin neek ma'nura'.”a
Usif Yesus na'uab anfee tetus neu ri'aan ein
15 Neot es, mahoint ein naskau neik sin ana kruu'f ein neu Nai' Yesus, he In ntao In a'niimk ein he na'uab anfeen sin tetus-athoen. Ankius on naan ate, Nai' Yesus In atoup noin' ein nakain mahoint ein naan. 16-17 Mes Nai' Yesus anseun ri'aan ein naan, he neman neu Ne. Rarit In nakain In atoup noin' ein am nak, “Amkonan ri'ana kruu'f ein naan neman neun Kau. Hi kais am'eka' sin. Mimnau mirek-reko'! Fin tuaf-tuaf re' anroim he njair Uisneno Iin ja, in ro he na'pesi' in tuan neu Uisneno nahuum on re' ri'ana kru'uf re' na'peis ok neu sin ainaf-amaf sin.”
Amu'it re' nroim he ntaam neu sonaf neno tunan
18 Neot es, a'nakat tuaf es na'ko atoin Yahudis neem nataan Nai' Yesus am nak, “Aam Tungguru re' mahormata'! Au he 'moe' on mee he uhiin batuur-batuur 'ak, au bisa 'taam 'eu sonaf neno tunan ma 'moin ubar-baar 'ok Uisneno?”
19 Onaim Nai' Yesus nataah am nak, “Nansaa' am es ho musee Kau mmak, ‘re' mahormata'’? Suma tuaf mees' aah re' mahormata', es re' Uisneno. 20 Ho muhini mrair Uisneno In atoran na'ko unu' nak:
Kais ammakaek;
kais amroor mansian;
kais mibaak;
kais amjair saksii poi;
ma amhormaat ho aina'-ama' sin.”b
21 Atoni' naan nataah am nak, “Batuur, Aam! Au utuin a'rair atoorn ein naan nmurai na'ko au aan'-ana' fe'!”
22 Anneen on naan ate, Nai' Yesus nak, “Reko! Mes ho mkuran rais jes. Oras ia, amtebi mfain nai he mu'sosa' mporin ho 'mui'm ein ok-oke'. Rarit amnao mbait roit ein meu ama'mui't ein. Rarit amtebi mfain uum he mutuin Kau. Fin Uisneno of anbaras anfee ko a'mu'if sonaf neno tunan.” 23 Anneen on naan ate, atoni' naan neekn ee nsuus, natuin in a'mui'n ii kah een.
24 Ankius neu in ntebi nfain nok neek susat on naan ate, Nai' Yesus natoon neu In atoup noin' ein am nak, “Atoin amui't ii, susa ma'tani' he ntaam neu sonaf neno tunan. 25 Hit tataib ee nok rasi bian. Ka neu fa he bikaes unta ntaam neu in o'of anpeo' aent ee konan. On naan amsa' atoni' re' suma nharap ma nafnekan anbi in a'mu'in, mes ka nharap ma nafnekan fa neu Uisneno, ka neu fa he in ntaam neu sonaf neno tunan.”
26 Too mfaun ein re' annenan Nai' Yesus na'uab on naan, nataan Ee mnak, “Karu batuur susa neu atoin amu'it on re' naan, atoni' human on re' mee na' bisa napeni saok sanat ma 'honis?”
27 Nai' Yesus nataah am nak, “Neu mansian ii te, batuur rasi namfaun ka neu he njair fa. Mes neu Uisneno te, are' saa'-saa' ii ro bisa njarin.”
28 Onaim nai' Petrus antuut am nak, “Aam! Hai mnao misaitan hai 'mui'm ein oek' een, he mituin Ko. Onaim hai of mipein saa'?”
29 Nai' Yesus nataah am nak, “Petrus! Amneen murek-reko'! Atoni' re' nasaitan in umi, in fee, in orif-tataf, in ainaf-amaf, ai' in aanh ein, natuin in nanaob Uisneno In mepu, 30 ro tebes, in ntoup nafani' sin amfaun anbin pah-pinan ia. Rarit anbi oras neon amsoput, in nmoin nabar-baar nok Uisneno.”
No teun gwen Usif Yesus na'uab anmatoom nok In a'maten
31 Nai' Yesus annao nok In atoup noin' ein tuaf bo'es am nua ma na'uab nok sin anmesen am nak, “Hi ar-arki mihini mrair mak, oras ia hit atnao teu kota Yerusalem. Attea nee te, are' rasin re' Uisneno In mafefa kniun' ein antui sin unu' anmatoom nok Mansian Batuur-Batuur naan, of anjair teb-tebe on re' saa' re' sin ntui sin. 32 Sin of nana'at Kau neu atoin sona' re' ka npirsain fa neun Uisneno. Rarit sin nakre'et Kau, na'paran Kau huma'-huma', npuran hape neu Kau, 33 nbeos Kau, rarit anroor na'maet Kau. Mes anmeu on naan ate, Au 'moni 'fain.”
34 Annenan on naan ate, Nai' Yesus In atoup noin' ein ankekun, natuin sin ka nheek naan fa In uab naan in a'moufun.
Usif Yesus nareko' afoort es
35 Oras Nai' Yesus sin he noi ntaman neu kota Yeriko, anmui' atoin afoort es antook ma ntoit roit anbi raan ee ninin. 36 Oras in nneen too mfaun ein nnaon npe'on naan ate, in nataan sin im nak, “Hoe! Saa' na es re' ia, tua?”
37 Onaim sin natoon ee mnak, “Nai' Yesus na'ko Nasaret, neem annao npeo' re' ia.”
38 Anneen on naan ate, aforot naan ankoa' naher-heer am nak, “Yesus! Sufa'-ka'uf usif nai' Daut. Amkasian maan kau, tua!”c
39 Tuaf-tuaf re' nahunun anbin Nai' Yesus In matan nakain ee he namninu'. Mes in nkoa' piut, ma naher-heer am nak, “Auwoo, sufaf Daut! Amkasian maan kau, tua!”
40 Oras Nai' Yesus anneen on naan ate, In nasnaas. Rarit In nreek tuaf he nnao nnaa' neik aforot naan. Neman ntean Nai' Yesus In matan ate, Nai' Yesus nataan ee mnak, 41 “Ho mroim he Au 'moe' saa' 'eu ko?”
In nataah am nak, “Aam! Au 'toit he au bisa 'iit, tua.”