2 Mes Nai' Yesus nataah am nak, “Karu maans ee nmouf ma neon gwe snaa me'e, hi mtanar am mak, ‘Noka' te ka na'uur fa.’ 3 Ma karu maans ee nsae ma anbi neon gwe nmui' noep ma'fena', hi mtanar am mak, ‘Neno ia of na'uur.’ Onaim karu hi bisa mihiin oras on naan ate, nansaa' am es hi ka mihiin fa tanar na'ko oras neu oras, batan neu batan? 4 Airoo! Hi mansian oras ia, suma mihini haa he mmoe' rais maufinu! Hi ka mtae mituin fa hit Usi'! Maski hi mtoit rais sanmakat, mes Au ka 'moo' je fa, tua! Natuin afi unu' Uisneno nfee nrair rais sanmakat npaek mafefa kninu' nai' Yunus. Onaim naan, nanokab!” Na'uab anrair on naan ate, Nai' Yesus nasaitan sin.^b

5 Oras Nai' Yesus sin annaon neun neof gwe panin, na' In atoup noin' ein namnaun am nak, sin nniikn ein ma ka neikin fa utunu'. 6 Anneen neu sin na'uab ein on naan ate, In nak sin im nak, “Hi ro he mpaant om mi'ko atoin Farisis ma Sadukis sin raur haef ee, joo.”^c

7 Annenan on naan ate, In atoup noin' ein antaka'naan ein. Onaim sin na'uab ein es nok es am nak, “A'naef ee na'uab saa'? In na'uab on re' ne, natuin hit ka teik fa utunu', aa oo?”

8 Mes Nai' Yesus nahiin sin tenab. Rarit In na'uab am nak, “Hi bainesi' ki! Nansaa' am es hi mi'uab anmatoom nok utunu'? Hi ka mpirsai kau fa, oo? 9 Ro hi ka mihiin fa fe' neu Au 'mui' kuasa? Fin neon gwes ii, Au 'teib utunu' fua' niim ma 'tuthae tuaf nifun niim, hi mbubun mifani' mnaah neis fein a'kora' fauk?^d 10 Rarit, on mee nok re' utuun fua hiut ein re' Au 'bati 'fee 'eu tuaf nifun haa? Hi mbubun mifani' mnaah neis fein 'poni fauk?^e 11 Nansaa' am es hi ka mihiin fa Au uabak fe'e na? Au ka u'uab fa anmatoom nok utunu'. Au he umnaub ki, he hi mpaant om mi'ko atoin Farisis ma Sadukis sin noni'-taru' sin. Fin sin noni'-taru' sin bisa npengaru naan too mfaun ein, nahuum on re' raur haef re' nkuum na'bua' ee nok uut, rarit uut naan ansae.”

12 Nai' Yesus na'uab on naan ate, na' sin nahinin nak, In ka na'uab fa anmatoom nok utunu'. Mes In na'uab anmatoom nok atoin Farisis ma Sadukis sin noni'-taru' re' anbeon ma nsanan.

13 Rarit Nai' Yesus annao neu bare re' npaumaak kota Kaisarea Filipi. Anbi raan atnana', In nataan sin im nak, “Tatuin biak ein sin uab ein nak, Au re' ia, Mansian Batuur-Batuur re' ia, Au sekau Kau?”

14 Sin natahan am nak, “Bian nak, Ho re' ia, nai' Yohanis Asranit re' anmoni nfain. Bian nak, of oni' Ho re' ia, ka'o Elia. Bian anteni' nak, ka'o Yermias. Karu kaah fa te, mafefa kninu' Uisneno tuaf es na'ko un-unu'.”^f

15 Rarit Nai' Yesus nataan antein sin im nak, “Karu anbi hi teenb ein kiim ate, Au sekau Kau?”

16 Rarit nai' Simon Petrus nataah am nak, “Usi'! Ho re' ia, Kristus, Tuaf re' afi unu' Uisneno anba'an he nsoun Ee neem! Ma Usi'! Ho re' ia, Uisneno abar-barat In Anah!”^g

17 Rarit Nai' Yesus na'uab am nak, “Simon, nai' Yunus in aan moen ja ko! Ho mapae' reko ko! Ka mansian aa fa es re' natoon ko rasi naan. Mes Au Ama' et sonaf neno tunan es re' natoon ko. 18 Amneen! Oras ia, Au he ukanab ko ‘Petrus’. Fin kanaf naan in a'moufn ii es re' ‘fatu’.^h Natuin ho pirsait aan nahuum on re' fatu, ho of amjair fanderen meu Au nggwin re' npirsai Kau. Maski sin napenin ha'mu'it tar antea nmaten amsa', sin naarn ein ma ntaah ein piut-piut. 19 Au of a'fee hak 'eu ko, he ho m'urus Au nggwin, nahuum on re' ho mnaa' a'retu 'fo'e sonaf neno tunan. Fin saa' re' ho mtaar ee mbi pah-pinan, naan Uisneno ntaar ee et sonaf neno tunan amsa'. Ma saa' re' ho mfei ma mkonan ambi pah-pinan ia, naan Uisneno of nafeitn ee et sonaf neno tunan amsa'.”ⁱ

20 Na'uab anrair on naan ate, Nai' Yesus antaar sin he kais natonan neu sekau-sekau nak, In re' naan, Kristus.

21 Anmurai na'ko oras naan, Nai' Yesus natoon neu In atoup noin' ein am nak, “Au ro he 'nao 'eu kota Yerusalem. Anbi nee, Au upein ha'mu'it amfaun na'ko atoni mnais haart ein, a'naak rais pirsait Yahudi sin a'naakt ein, ma tunggur agaam ein ok-oke'. Sin of anroor na'maet Kau, mes anmeu te, Au 'moni 'fain.”^j

22 Nai' Yesus natoon on naan ate, nai' Petrus anheer napaisb Ee, rarit in nak, “Kais mu'uab on naan, Usi'! Ka neu fa he Uisneno nkonan rasi naan!”

23 Mes nai' Petrus in uaban naan, ka natuik-natai fa nok Uisneno In romin. Es naan ate, Nai' Yesus nabani' ma nakain ee mnak, “Hoe, mu'roo mu'ko ia! Naan nitu 'nakaf es re' a'uab! Ho kais am'eka' Kau! Ho suma mutenab mutuin mansian ii in romin kuun, mes ka mutuin fa Uisneno In romin!”

24 Rarit Nai' Yesus nanoni' In atoup noin' ein am nak, “Tuaf re' he natuin Kau, in ro he naran ma ntahan piut ansuun oras! In ro he nnikan nain in roimn aa kuun, he natuin Uisneno In romin. Maski atoni' he nroor na'maet je msa', in ro he natuin piut, nahuum on re' atoni' nasaah hau nehe, he nnao n'ain bare 'maten.^k 25 Fin tuaf re' nabarab in tuan ee, he nmaet natuin in natuina' Kau, in of napeni 'honis piut nok Uisneno. Mes tuaf re' suma nroim he nmoni nbi in tuan ee kuun, in a'monin naan of namsaab ma namneuk on ahaa re' naan!^l 26 Amneen! Karu ho mupein pah-pinan ia in afan sin ok-oke', mes Uisneno antorak napoitan ko te, in upan ma in pae' ji saa'? Maski ho mroi meik main pah-pinan ia in afan sin imsa', ho ka bisa fa he mtuik ma msenu' maan fa ho smanam!

27 Au utoon ki rasin re' ia ok-oke', natuin Au re' ia, Mansian Batuur-Batuur. Au of a'sanu 'fain 'uum a'paek Au Ama' In pinan ma krahan, ubu-bua 'ok In ameupt ein na'kon sonaf neno tunan. Oras naan, Au of a'baras 'eu tuaf mese'-mese' utuin saa' re' in nmo'e.^m 28 Mimnau mirek-reko'! Na'ko hi ar-arki re' ia, tuaf fak-fauk of ka nmaten fa fe', tar antea oras sin niit Kau, es re' Mansian Batuur-Batuur re' ia, a'jair Usif re' annaa' aprenat.”