2
Nok ranan naan, Uisneno nmoe' naan neno tunan ma pah-pinan nok in aafn ii ok-oke'.2 Anmoe' narair sin aar sin, noka' on naan ate, neon hiut ii ntea. Onaim In nasnaas na'ko In meupn ein naan. 3 Es naan ate, In nbetis neon hitu' naan na'ko neon biak ein ii, he njair neno snasat, natuin In narair In mepun naan, ma nbi neno naan, In nasnaas. 4a Reta' re' natoon nak Uisneno nmoe' neno tunan ma pah-pinan, on re' naan, tua.
Uisneno nmoe' atoni' ma bifee
4b Oras UISNENO fe' nmurai nmoe' neno tunan ma pah-pinan naan ate, 5-6 ka nmui' hau saa'-saa' fa fe', natuin In ka nasanut uran fa fe'. Oras naan, suma nmu'i haa nipu' re' nsae na'ko afu, ma napeet pah-pinan. Ma ka nmui' fa fe' mansian re' nareen. 7 Rarit UISNENO nnau afu, ma nmoo' je njair mansian. Rarit In nfuu nataam snasaf npeo' in panan konan. Onaim mansian naan anmoin oras naan.
8 Rarit UISNENO nroe naan poo'n es anbi bare Eden, et pasa' neon-saet. Onaim In natokob mansian naan anbi bare naan. 9 Anbi po'on naan In namonib are' kanan roet, re' tkisu te namasan, ma taah sin ate miin-oni. In namonib amsa' hau 'u'u nua nbi poo'n ee tnanan. Karu mansian ii naah hau fua' na'ko uu' gwes in fuan, in of anmoin piut. Ma karu mansian ii naah na'ko uu' gwes anteni' in fuan, in bisa nahiin rais reko ma rais re'uf.
10 Anbi naan, anmui' naan noe jes, nasai npoi na'ko po'on naan. Noe naan a'saif haa. 11 A'saif ahuunt ee, in kaann ee Pison. A'saif ia nasai nfuun naan pah Hawila. Anbi bare ia, nmu'i mnatu' mfa-faun. 12 Anbi bare re' ia, nmui' mnaut afa', nmui' hau re' in oen ee foo meni', ma nmui' faut arimat. 13 A'saif es anteni', in kaann ee Gihon. A'saif ia, ansai nfuun naan pah Kus.a 14 A'saif es anteni', in kaann ee Tigris. A'saif re' ia njair nakat nbi pah Asurb ntoom maans ee 'saen. Ma in a'sain amuint ee, kaann ee, Efrat.
15 UISNENO nreek mansian naan natua nbi Eden, he npairoir po'on naan rek-reko. 16 Onaim In naprenat mansian naan am nak, “Au 'konan ko he muah hau fua' saa'-saa' ahaa, na'ko are' kanan roet anbi po'on ia. 17 Mes anmui' naan hau uu' gwes, re' Au 'taar ko ma'tani', he kais muah in fuan. Hau naan es re' hau roet re', karu mansian ii naah in fuan, in bisa nahiin rais reko ma rais re'uf. Mes karu ho muahn ee te, ho ro he mmaet.”
18 Rarit UISNENO na'uab anteni' mnak, “Ka reko fa karu mansian ia nmoni nmes-mees. Onaim Au he 'mo'e 'fee ne atuurn am abaabt es re' natai nok ne.”
19-20 Oras naan UISNENO nnau afu, ma nmoe' mu'it ma koro huma'-huma'. Rarit In nnao naat sin neu mansian naan, maut he in nakanab sin. Rarit mansian naan nakanab mu'it ma koron naan, es-es ate nok kuun in kanan. Mes neu iin, ka nmui' fa atuurn am abaabt es, re' natai nok ne.
21 Rarit UISNENO narour natupa' mansian naan. Oras in ntuup anfiin ite, Uisneno nait naan in nui bnapa' tuuk es, rarit In ntoeb nareko' papa' naan. 22 Ma In nmoe' bifee na'ko nuif naan. Rarit In nnona' bifee naan neu atoni' naan. 23 Oras atoni' ia niit bifee naan ate, in nak,
“Haaa! Esai fe'! Ia ro natai nok kau!
In nuif ein huma' mese' nok au nu.
Ma in sisin huma' mese' nok au sisik.
Natuin in njair na'ko atoni', es na' au ukaanb ee, ‘bifee’.”c
24 Natuin rasi naan, es na' atoin es ro he annao nasaitan in ainaf-amaf,
he nmoin nabua nekaf mese' ma ansaof mese' nok in fee,
henati' sin nua sin njarin mese'.
25 Oras naan sin aaf ein, mes sin ka nmu'in fa rais mae kre'o msa'.