Mansian ii ka nfairoir fa prenat Uisneno
3
Na'ko are' kanan mu'it re' UISNENO nmoe' nain sin nbin pah-pinan ia, kaun ii es aputa-kriu anesit. Anbi oors es, kauna' naan nataan neu bifee naan am nak, “Hoe! Batuur, aa oo? Uisneno ntaar ki mnak, ‘Ka nabei' fa he hi miah hau fua' na'ko roet ein anbin po'on ia, ai' kaah?’” 2-3 Bifee naan nataah am nak, “Kahaf! Hai bole miah! Mes anmui' naan roet uu' gwes et poo'n ee tnanan re' Uisneno ntaar kai, he hai kais miah in fuan. In nak, hai kais miah in fuan, ma kais amreo' gwe msa', natuin hai of ammaet.”
4 Mes kauna' naan nataah am nak, “Hoe, napoi! Hi ka mmaet fa, tua! 5 Uisneno batuur antaar ki on naan, natuin In nahiin, karu hi miah hau fua' naan, hi mahiinm ein namnees nok Ne. Hi of mihiin mee es reko, ma mee es re'uf.”
6 Rarit bifee naan ankisu te, hau roet naan reokn ii kaah. Ma in naben ate hau fua' naan miin ii kah een. Onaim in natenab am nak, “Karu au 'uah hau fua' ia, au of uhiin ma 'manoe.” Rarit in nseu hau fua' naan, ma in naah. In neik ii ma nfeen in moen je msa', he naah nok. 7 Naah anrarin on naan ate, na' sin nahinin nak sin aaf ein. Es naan ate, sin nkaton apas hau no'o he natain.
8 Maans ee nmaeb on naan ate, sin nneen UISNENO neem annoon po'on naan. Rarit sin naen na'koor ein henati' UISNENO kais niit sin. 9 Mes UISNENO nhaman atoni' naan am nak, “Aupuu! Ho et mee, Adam?”
10 Atoni' naan nataah am nak, “Au 'neen Ho 'fookm ii mbi ia. Mes au umaeb ok, natuin au ao afa' kau. Etun au 'aen u'koro', tua.”
11 Rarit Usi' nataah am nak, “Sekau es natoon ko mnak ho m'ao aaf om? On mee? Of oni' ho muah amrair hau fua' re' Au 'taar ee naan, ai'?”
12 In nataah am nak, “Usi', bifee re' Ho mfee je naan, in es anfee kau hau fua taras naan, ma au 'uah!”
13 Rarit UISNENO na'uab nok bifee naan am nak, “Nansaa' am es ho mmoe' on naan?”
Onaim bifee naan nataah am nak, “Te kauna' naan es napoi kau, tua! Onaim es au 'uah hau fua taras naan, tua.”
Uisneno nkaas sin neik hukun ma'tani'
14 Rarit UISNENO na'uab kasat neu kauna' naan am nak,
“Natuin ho 'mo'em ia, Au 'hukun ko. Na'ko are' kanan mu'it, suma ho mmes-mees kuum es re' mupein kasat on nai: nmurai na'ko oras ia tar antea ho mmaet, ho suma mnonok meiki haa ho 'basam. Ma ho mnaaht ein maskuuk ein. 15 Au of a'moe' ko mok bifee naan, ammamuus piut. Hi sufam-kau'm ein on naan amsa'. Ho sufam-kau'm ein of anrau sin haek-tiik ein. Mes in sufan es, of antuut nakrat-rati' ho 'nakam.”a
16 Rarit Uisneno na'uab neu bifee naan am nak,
“Au of u'baba' ho susat oras ho mu'apu', ma mumeen anneisi nteni' oras ho muhoni'. Mes maski on naan, ho mroim he mubua piut mok ho mone. Ma in es naprenat ko.”
17 Rarit Usi' na'uab neu atoni' naan am nak,
“Ho ka mutuin fa Au prenat, mes mutuin ho fee ji in romin, tar antea ho muah hau fua' re' Au 'taar ee naan. Es naan ate, ho mupein kasat amsa'. Ma auf gwi msa' napein kasat. Anmurai na'ko oras ia tar antea ho mmaet, ho ro he mmepu mbain aetn om, ma mubani' auf gwi, hena' ho mupein he muah. Ammeup on naan ate, na' ho mmoin. 18 Maski ho mseen ma mroe huma'-huma', mes auf gwi suma napoitan 'aik kiisn aa ma krabat. 19 Rarit ho ro he mmepu mbain aetn om ma'tani', hena' auf gwi nfee ko mnahat. Ho ro he mmeup ma puus ee nsai tar ho mmaet. Au 'moe' ko na'ko afu. Onaim karu ho mmate te, ho mfani mrair afu.”
20 Rarit nai' Adam nakanab in fee je nak ‘bi Hawa’ (in a'moufn ii ‘re' anmoin’), natuin bifee naan es re' njair ainaf neu are' mansian amonit anbin pah-pinan ia.b
21 Rarit UISNENO nmoe' tais na'ko pasu, ma nfeen sin he npaken.
Uisneno nriu' napoitan nai' Adam ma bi Hawa
22 Rarit UISNENO na'uab am nak, “Oras ia mansian ein nahinin rais reko, ma rais re'uf, on re' Hit.c Kais-kaisa' sin naah hau fua' re' neiki 'honis abar-barat.” 23 Rarit In nriu' napoitan sin na'kon po'on Eden, he sin nua sin nnaon neun bare bian, ma nmonin on atoin tani, he sin amnaimt ein na'ko afu. 24 Anri'u nrair sin on naan ate, Uisneno nreun In ameup maniin ein na'ko sonaf neno tunan,d he nnao npao po'on naan nbin pasa' neon-saet. Sin nna'an suni' re' npiin ma nrirok neu-mneem. Usi' nreun sin he nhaken n'eka' ranan, natuin In ka nroim fa he tuaf anseu naan hau fua' re' neiki 'honis abar-barat.