3 Au unoni' 'rair ki are' rasi re' pentiing, re' unu' te, tuaf nanoni' niit anrair kau sin. Sin esan re': Kristus, re' Uisneno nreek Ee neem naan, anmate nrair he nsoi nafetin kit na'ko hit sanat ma penu sin, natai nok saa' re' matu'i nbi Uisneno In Suur Akninu' na'ko unu'.^a 4 Rarit sin nsuub Ee. Anmeu te, Uisneno namonib nafain' Ee, natai nok saa' re' matu'i nain anbi Uisneno In Suur Akninu' na'ko unu'.^b 5 Rarit Kristus nakrira' In tuan ee neu nai' Petrus.^c In nakrira' In tuan ee msa' neu In atoup noin' ein tuaf bo'es am nua.^d 6 Neot es, In nakrira' In tuan ee neu apirsait ein tuaf natun niim anneis. Sin aar sin ankius niit Ee. Na'ko sin aar sin re' naan, tuaf amfaun anmonin fe'. Amaets ein, sin fauk aah. 7 Rarit In nakrira' In tuan ee neu nai' Yakobus. Rarit In nakrira' In tuan ee neu In haef ein ok-oke'.

8 Au es re' amunit a'neis, a'kius 'iit Ee msa'. Fin au on re' aheit susu re' nahoins ee namuin.^e 9 Uisneno In haef bian sin, sin aar sin pentiing anneis na'ko kau. Amneon ii, au ka pantas fa he 'jair In haef. Fin unu' te, au es re' ususab ma 'ha'mui' Uisneno Iin na nbin bare-bare.^f 10 Mes Uisneno naruru' ma nakrira' In nekan arekot neu kau. Rarit In es re' anmoe' kau 'jair on re' ia, oras ia. Oras In nmoe' rais reko neu kau, In ka nporin fa oras nok ruum am parsuum. Namuni te, au es re' a'haek ma'tani' 'neis u'ko sin aar sin ok-oke'! Te kaah, Uisneno In nekan arekot es re' nmeup anbi au 'monik, mes ka au fa es re' a'meup.

11 Onaim ka pentiing fa karu au es re' unoni' tuaf, ai' haef bian sin es re' nanoni' tuaf. Fin hai aar kai minoni' rasi re' huma' mese'. Hai aar kai mitoon piut-piut meu tuaf anmatoom nok Uisneno In Rais Reko. Nok ranan naan, hi mpirsai meu Rais Reko re' naan.

12 Hai minoni' tuaf am mak, Kristus, re' Uisneno nreek anrair Je neem naan, anmoni nfain na'ko In a'maten. Onaim nansaa' am es hi bian mak, “Amaets ein ka nmoni nfanin fa”? In a'suikn ii saa'? 13 Fin karu amaets ein ka nmoni nfanin fa, in sairt ii nak, Kristus ka nmoni nfain fa msa'! 14 Ma karu Kristus ka nmoni nfain fa, are' saa' re' hit biasa tatoon sin teu too mfaun ein, ka mapake' fa gwen. Ma hi rais pirsait meu Ne, ruum am parsuum aah! 15-16 Ma karu batuur amaets ein ka nmoni nfanin fa, hai mjair saksii poi anmatoom nok Uisneno. Fin hai biasa minoni' tuaf am mak, “Uisneno es re' namonib nafani' Kristus!” Ro tebes hai mitoon on re' naan. Ma karu amaets ein ka nmoni nfanin fa, in sairt ii nak, Uisneno ka namonib nafani' niit fa Kristus. 17 Mitenab miit rasi ia: karu Kristus ka nmoni nfain fa, hi rais pirsait meu Uisneno ruum am parsuum aah! Fin hi misaah hi sanat ma penu sin fe'! 18 Ka naan anmees jah fa, fin amaets ein ok-oke', re' unu' fe'e te, anmafutun nok Kristus, karu Kristus ka nmoni nfain niit fa, sin nmaten ma napasib sin na'kon Uisneno msa'. 19 Hit ta'peis ok teu Kristus. In sairt ii nak, In of anmoe' rais reko neu kit. Mes karu hit tafneek on naan suma tbi pah-pinan ia gwah, naan ruum am parsuum aah! Ma hit tjair atoin kasian atneis ta'ko biak ein ok-oke'!

20 Te kaah, ka on fa naan, tua. Amneon ii, es re': Kristus re' Uisneno nreek Ee neem naan, anmoni nfain na'ko In a'maten! In ka nmees fa, fin apirsait ein re' nmate nrarin, of anmoni nfanin amsa'. Kristus re' naan on re' fua unu, re' naruru' ma nakrira' am nak, sin re' amaets ein naan, of anmoni nfanin natuin Ee. 21 Un-unu' te, suma tuaf mees' aah, es re' nai' Adam, re' antanhai Uisneno In aprenat. Onaim in napein hukun, es re' rais mates. Hukun naan ansaen kit aar kit ok-oke'. Mes oras ia, anmui' tuaf es antein, es re' Kristus, re' nmoin natuin Uisneno In aprenat. Onaim natuin In arekon, amaets ein bisa nmoni nfanin! 22 Ansuun tuaf re' antanhai Uisneno In aprenat, napein hukun a'maten amsa', on re' nai' Adam. On naan amsa', ansuun tuaf re' anmafuut nok Kristus, Uisneno of namonib nafani' sin.

23 Mes es-es ate nok in tabu. Kristus anjair tuaf ahunut re' nmoni nfain, on re' fua unu fe'e na. Ma oras In nkoen On anfain neem neu pah-pinan ia, na' Iin na nmoni nfain amsa'. 24 Rarit, na' pah-piin ii namsoup. Oras naan, Kristus anjair Usif re' nareu' are' kanan kuasa, are' kanan aprenat, ma are' kanan re'u re' anmamuus nok Ne. In njair Usif re' nnona' nafani' In hak aprenat neu In Amaf, es re' Uisneno.

25 Fin In ro he nnaa' aprenat piut, tar antea Uisneno niis naan are' kanan saa' re' anraban Kristus, he sin na'ruir ein neu Ne.^g 26 Anmui' rais jes anteni' re' anmamuus nok kit mansian. Es re' hit ro he tmaet. Mes namuni te, Uisneno he niis naan rasi 'maten in kuasan amsa'. In nmo'e nrair on naan ate, ka tiit fa tuaf re' nmate ntein. 27 Anbi Suur Akninu' Uisneno matu'i mnak, “Uisneno nmoe' are' kanan saa' re' In niis naan sin, he na'ruir ein neu Tuaf re' In nba'an he nreek Ee neem.” Oras antui mnak, “are' kanan saa' re' In niis naan sin, he na'ruir ein neu Tuaf”, nakninu' nrair nak, Uisneno ka ntaam fa neu naan. Fin Uisneno kuun es re' nait Je njair Usif neu are' saa' ii ok-oke'.^h 28 Karu of are' saa' ii nneen ma natniin batuur neu Uisneno In Anah, na' Anah naan of annona' are' saa' ii ok-oke' neu In Amaf, re' nait Je njair Usif neu are' saa' ii ok-oke'. Rarit Uisneno annaa' aprenat piut anbi are' kanan rasi, ma neu are' kanan mansian.

29 Anmui' tuaf re' nasrain he nsenu' ma nseka' amates re' ka nasrain fa fe'. Mes karu amaets ein ka nmoni nfanin fa, nansaa' am es sin he nasranin neun amaets ein?ⁱ 30 Ma nansaa' am es hai he mibarab he mmaet fani-fani, karu amaets ein ka nmoni nfanin fa? 31 Fin au he noi 'maet neno-neno! Mes aok-bian manekat aar ki! Au 'suup, au 'naben ate ka saa'-saa' fa karu au 'maet. Fin au bisa u'aiti' au humak, natuin hi mmafuut piut mok hit Usi' Yesus Kristus, re' Uisneno nreek anrair Je neem. 32 Neno naan, oras au 'bi kota Efesus fe', au 'matoe piut 'ok atoin ein naan on re' mui' fui apisut. Mes karu au suma 'mabaan he au bisa 'iis kuuk, ka 'fee je fa 'eu Uisneno, naan ruum am parsuum aah. Ka mapake' fa, tua! Fin karu batuur amaets ein ka nmoni nfanin fa, reko nneis hit tatun-tuin ahaa biak ein sin uab re' nak,

33 Hi kais mipein rais poi he mitenab on naan! Fin anmui' uab re' nak,

34 Kais ammoe' rais maufinu mtein! Misnaas nai! Am'ator ho tuam aan rek-reko! Ammoe' 'moe' amneot aah! Amneon ii, hi ro he mimaeb om, fin anbi hi tnaanm ein, anmui' tuaf re' ka nahiin Uisneno fa fe'.

35 Anmui' tuaf nataan am nak, “Karu amaets ein anmoni nfanin, in raan ii on mee? Ma sin aok ein anjarin on mee?”

36 Naan mono! Karu amseen fini te, fini naan ro he npunu nbi auf gwe nanan, na' in bisa nmoin ma natoor. 37 Ma fini re' hit tseen, in masan ka huma' mese' fa nok saa' re' natoor ma nanoo. In fini re' anmeot, on re' maak-gandum ai' maka', ai' fini bian. 38 Es-es ate natuin in masan kuun, natuin Uisneno In romin. Fin In es re' nafeek roet ein sin maask ein.

39 Mu'it ma mansian ii on naan amsa'. Es-es ate nok in masan, natuin Uisneno In romin. Rarit mansian ii in aon, natuin mansian in human ma in masan. Mui't ein sin aok ein, es-es ate natuin in masan. Koorn ein nok sin iin. Iik' ein nok sin iin. Bian antein nok sin iin.

40 Anmui' bare' et neon gwe tnanan, ma nmui' bare' et pah-pinan. Re' abitan neon gwe tnanan anmui' sin pinan ma krahan kuuk. Re' abitan pah-pinan ia amsa' anmui' sin pinan ma krahan kuuk. Mes pinan ma krahan naan a'teta' na'ko abitan neon gwe tnanan. 41 Anbi neon gwe tnanan, maans ee in pinan ma krahan a'teta'; funan in pinan ma krahan a'teta'; ma kfuun ein, sin pinan ma krahan a'teta' amsa'. Es-es ate nok In masan. Es-es ate nok in pinan ma krahan. Onaim are' saa' ii anmui' kuun in pinan ma krahan, tua.

42 Karu amaets ein anmoni nfanin, naan on re' fini fe'e na. Fin karu tsuub amates, in aon amates naan npunu nreu', tua. Mes karu in nmoni nfain, in ka on fa unu' naan. Fin karu in nmoni nfain, in ka bisa nmate ntein fa heen. 43 Oras hit tsuub amates, hit tnaben tak, aof amates naan an'oemeet. Mes karu atoni' naan anmoni nfain, in ro npiin ma nakraah! Fin in nakninu' nrair. Amates ka bisa nmoe' fa saa'-saa' oras ansuub ee. Mes oras in nmoni nfain, in ma'tain besi ntein! 44 Karu atoni' nmoin fe', in suma natenab ma nnaebn ahaa, tua. Mes oras in nmaet, he nmoin anfain, Uisneno In Asmaan ee nfee ne 'monit batuur. Ma in ka huma' mese' fa on re' unu'.

45 Mansian ahunut re' on re' hit, es re' nai' Adam. Tatuin Uisneno In Suur Akninu', matu'i mnak, “in anjair mansian re' anmoin, re' natenab ma nnaben nahiin.” Mes mansian re' In masan on re' nai' Adam, re' a'raat reu'f ii, es re' Kristus. In Asmanan es re' bisa nfee 'monit batuur neu tuaf.^k 46 Ahuunt aan, es re' atoni' re' suma natenab ma nnaben nahiin jah, rarit in bisa nmaet. Mes re' anmoni nfain naan, es re' atoni' re' napein 'monit batuur na'ko Uisneno In Asmanan. 47 Mansian ahunut anbi pah-pinan ia, anmoo' je na'ko auf afa'. Mes re' no nuan ii, es re' Kristus re' neem na'ko neon gwe tnanan. 48 Hit re' tmoin anbi pah-pinan ia, tahuum on re' mansian ahunut, re' Uisneno nmoe' na'ko auf afa'. Mes tuaf re' nmafuut nok Uisneno nbi neon gwe tunan, in masan nahuum on re' Kristus re' neem na'ko neon gwe tunan. 49 Hit aar kit oras ia, hit tahuum on re' nai' Adam re' Uisneno nmoo' je na'ko auf afa'. Mes noki-noki te, hit tsenu' ma tseka' masaf fe'u, huma' mese' on re' Kristus re' nkoen On neem na'ko neon gwe tunan.

50 Aok-bian manekat aar ki! Re' au he utoon 'eu ki ji, on nai: hit re' atjair mansian masaf amnaa', hit aok ii na'ko naa' ma nuif. Nok ranan naan, hit ka bisa ttoup fa hit pusaak he tjair Uisneno In anah et sonaf neno tunan. Ka bisa fa! Fin tuaf masaf on re' naan, sin aok ein of anpunun nre'un, rarit sin ka bisa ntoup fa rasi re' nabar-baar kuun.

51 Onaim amneen ma mitniin mirek-reko'! Fin au he 'fei 'eu ki rais ma'nifa' es. Of anmui' apirsait bian re' ka nmaten fa. Mes hit aar kit of atsenu' ma tseka' masaf fe'u. 52 Oras toi's ee in hanan amunit nahaan, are' saa' ii njair nok askeken. Rabah anneis na'ko ho mu'mera'. Fin oras toi's ee nahaan, oras naan amaets ein anmoni nfanin amsa'. Ma karu sin anmoni nfanin jen, sin ka nmate ntein' ein fa heen, ma ka npunu ntein' ein fa gwen. On naan msa' nok hit aar kit re' amonit. Hit aar kit atjair masaf fe'u.^l 53-54 Fin hit aok ii re' bisa npuun oras ia, of na'bani' neu masaf re' ka bisa npuun antein fa! Ma hit aar kit re' oras ia bisa tmaet, of na'bani' kit atjair masaf re' ka bisa tmate ntein fa! Naan anjair natuin saa' re' matu'i nain anbi Suur Akninu' mnak,

56 Nansaa' am es rasi 'maten neik menas neu hit mansian? Naan natuin hit tmo'e tsaan. Es re' naan! Nansaa' am es hit sanat ma penu sin anmu'in kuasa on naan? Naan natuin Uisneno In atoran naruru' ma nakrira' nak, hit sanat ma penu sin antanhai In aprenat. Es re' naan! 57 Mes oras ia, are' saa' ii ok-oke' njarin a'teta'! Rarit hit aar kit attoit makasi kou'-ko'u teu Uisneno. Fin In es re' anmoe' kit he bisa tiis taan rais maufinu, tanete tpeo' hit Usi' Yesus Kristus, In a'monin. Ro tebes, Kristus es re' niis batuur, tua!

58 Onaim aok-bian manekat aar ki! Maran miheer! Kais mi'oni'! Hi mepu meu Uisneno ro he na'baab on reko, ma na'baab on piut. Fin hi mihini mmak, hi maskeet meu hit Usi' naan, ka ruum am parsuum fa, tua.