Reta' Ahun-hunut
Anmurai na'ko Uisneno nmoe' neno tunan ma pah-pinan
Uisneno nmoe' neno tunan ma pah-pinan nok in afan
1
Nahunu te, Uisneno nmoe' neno tunan ma pah-pinan.2 Oras naan, pah-pinan ka mamo'ek fa fe', ma are' saa'-saa' ii nbasiksakan. Suma nmu'i haa, oe. Ma meis'ookn ii n'aum naan ee. Uisneno In Asmaan ee nabra-rae nbi oe je fafon.a
3 Rarit Uisneno na'uab am nak, “Ro he nmui' me'u.” Na'uab anrair on naan ate, meu' gwi njair. 4 Ankius meu' gwi te, In nmariin, natuin saa' re' In nmoo' je naan ro reko. Rarit In nbatis meu' gwi na'ko meis'okan, he es-es ate nmui' kuun in oras. 5 In nakanab meu' gwi nak, ‘manas’, ma meis'ookn ii nak, ‘fai’. Neno naan, neon gwes namsoup gwen.
6-7 Rarit Uisneno na'uab anteni' mnak, “Ro he nmui' ruman he nbatis oe. Es naan ate, anmui' oe nbi faof, ma nmui' oe nbi 'piin.” Na'uab anrair on naan ate, oe naan anbaits ok anjair bare nua, fafo ma 'piin. 8 Rarit In nakanab baer ruman abit faofn ee, ‘neno’. Neno naan, neno nua namsoup gwen.
9 Rarit Uisneno na'uab anteni' mnak, “Oe abit a'pinan naan ro he nkaubuub ok nbi bare mese', maut he nmui' baer meto'.” Na'uab anrair on naan ate, baer meot ii npoi neem. 10 Rarit In nakanab baer meto' naan, ‘auf meto'’; ma In nteek oe re' ankaubuub on naan, ‘tasi’. Ankius are' naan ate, In nmariin, natuin saa' re' In nmoo' je naan, ro reko. 11 Rarit Uisneno na'uab anteni' mnak, “Auf meot ii ro he natorob hau huma'-huma'. Ro he nmui' hau mano'o, hau masufa', ma hau mafuaf. Maut he hau mese'-mese' te, napoitan fini natuin in atrekan.” Na'uaba' nrair on naan ate, are' hau nggwin naan anjarin. 12 Anbi auf meto' naan, hau nggwin napoitan fini natuin sin atreek ein mese'-mese'. Ankius on naan ate, In nmariin, natuin saa' re' In nmoo' je naan, ro reko. 13 Neno naan, neno teun namsoup gwen.
14-15 Rarit Uisneno na'uab anteni' mnak, “Anbi fafon ne, ro he nmui' baer me'u huma'-huma' he ntana' pah-pinan. Ro he nmui' baer atana' nbi oras manas, ma nmui' baer atana' nbi oras fai. Baer' ein naan anjarin on tanar hena' tsoi' tahiin neno, toon, ma oras.” Na'uab anrair on naan ate, baer me'un neon gwe tnanan sin nboran. 16 In nmoe' baer meu' huma' nua re' ko'u. Es ko'u nneis, ntana' nbi oras manas; es seor na'bau ntana' nbi oras fai. In nmoe' kfuun-akfuun amsa'. 17 In nakfirit baer' ein naan nbi neon gwe he ntana' pah-pinan. 18 Rarit sin ntaan' ein nbi oras manas, ma oras fai. Nok ranan naan, sin nbatis me'u na'ko meis'okan. Ankius niit sin ite, In nmariin, natuin saa' re' In nmoo' je naan, ro reko. 19 Neno naan, neno haa namsoup gwen.
20 Rarit Uisneno na'uab anteni' mnak, “Ro he nmui' kauna' huma'-huma' re' anmonin nbin oe. Ma ro he nmui' koro huma'-huma' re' natpenen nbin neon gwe tnanan.” 21 Rarit In nmoe' ika' huma'-huma' ma kauna' bian re' nmonin nbin oe. In nmoe' koro huma'-huma' msa' re' natpenen nbin neon gwe tnanan. Ankius saa' re' In nmoe' sin naan ate, In nmariin, natuin saa' re' In nmoo' je naan, ro reko. 22 Rarit In na'uab anfee tetus neu are' kanan mui't ein naan am nak, “Iik' ein ro he namsa'in, he naheun oe nbin bare-bare. Ma koorn ein on naan amsa'.” 23 Neno naan, neno niim namsoup gwen.
24-25 Rarit Uisneno na'uab anteni' mnak, “Ro he nmui' mu'it huma'-huma' re' anmonin nbin auf meto'. Sin esan re' mui' aem, mui' fui, ma anonok, es-es ate nok nain in atrekan.” Na'uab anrair on naan ate, mui't ein naan anjarin. Ankius on naan ate, In nmariin, natuin saa' re' In nmoo' je naan, ro reko.
26 Rarit Uisneno na'uab anteni' mnak, “Iim he Hitb tmoe' mansian tatuin Hit huumk am Hit masak, Hit moe'k am Hit taok. Maut he sin es anpafa' ma npainoet iik' ein nbin tasi, are' koro nbin neon gwe tnanan, are' mui' aem, ma mu'it bian re' nmonin nbin pah-pinan.”c
27 Onaim In nmoe' mansian ii natai nok In human ma In masan, In mo'en ma In taon. In nmoe' sin, atoni' ma bifee. 28 Onaim In na'uab anfeen sin tetus am nak, “Hi ro he mihoni' ma mimsai' he miheun pah-pinan, mpafa' ma mpainoet je msa'. Au 'fee ki prenat he m'urus ika'-ika', koro-koro, ma are' kanan mui't ein anbin auf meto'. 29 Amneen mirek-reko'! Au 'fee ki mnahat huma'-huma' nbi pah-pinan. Esan re': hau mano'o, hau masufa', ma hau mafua'. 30 Au 'fee haun re' naan he njarin amnahat neu mui't ein amsa'. Anmu'i mnahat neu mui' aem, mui' fui, anonok, ma koorn ein msa'.” Na'uab anrair on naan ate, are' kanan amnaaht ii namtiis. 31 Ankius niit sin on naan ate, In nmariin, natuin saa' re' In nmoo' je naan, ro reko 'maten. Neno naan, neno nee namsoup gwen.