Ji'i pa'adhu sasuri ne, hia mi dhèu unu Ama Lamatua dhu parcaya Yesus Kristus ètu kota Pilipi. Ji'i neo kahèi, ho dhèu dhu j'aj'i kètu juma'at dènge dhèu dhu soru-bara kètu juma'at sèra, re'a mèu isi sasuri ne'e.

2 Ama Lamatua èèna, Ama èdhi. Aa Yesus Kristus èèna, Kètu èdhi. Ji'i manèngi sèna ka Rèngu pad'elo d'ara hua iia Ra mi miu, ho bisa mamuri dènge mera-milu.

3 Masi ka nèbhu le ja'a paraga heka dènge miu, te ngaa ja'a bhèlu boe miu! Lod'o-lod'o ja'a sanèd'e miu, ja'a manèngi makasi mi Lamatua, lula miu parcaya Ne taruu. 4 Lod'o ja'a sabaj'a hia miu, d'ara ja'a karej'e-karae, 5 lula karèi nèti hiu-hiu miu sèmi mere Lii Lolo Be'a Lamatua, miu pakako taruu sasab'a Na, sama-sama dènge ja'a. 6 Èèna j'aj'i mi tadha, peka na, Ama Lamatua mulai sab'a ètu d'ara miu kèna. Aa ja'a ke'a tare'a, na, Lamatua pakako taruu sasab'a Na dhu be'a èèna, toke pamèci aa'i mèu-mèu, toke d'ai lod'o Yesus Kristus mai hari.

7 Mema lèke tare'a ladhe ja'a sue miu, lula d'ara ja'a dhu pa'èki le dènge miu karèi nèti uru ka. Ca hari nèi, miu sab'a le bera-bera dènge ja'a, lod'o ja'a lole dènge dhèu Lii Lolo Be'a Lamatua, aa ropa ja'a dhaa mi dhèu dhu lab'a Lii Lolo Be'a èèna. Masi ka ja'a maso bui, te ngaa miu hari boe nèti baboa ja'a. 8 Ama Lamatua dhu ne'a, na, d'ara ja'a neo taruu paraga dènge miu. Te sasue ja'a mi dedha miu, èci èèna ka dènge sasue Yesus Kristus.

9-10 De ja'a sabaj'a hia miu sèmi ne'e ka: ja'a manèngi ho miu asa tabha pasue èci dènge èci. Ja'a manèngi kahèi sèna ka Ama Lamatua hia miu me'a mèu, mia dhu be'a, sèna ka miu mamuri mola-mèci. Pe d'ai lod'o Kristus pama'ète lii langu dhèu aa'i-aa'i, Na peka na, miu sala boe ngaa-ngaa, 11 lula Nèngu mesa Na ka dhu tao d'ara miu mola-mèci, ho bisa mamuri mola. Dènge mamuri mola sèmi èèna ka, dhèu leo ded'e padedha-dedha aa koa-kio kolongara Ama Lamatua.

12 A'ari pasue aa'i-aa'i! Ja'a d'èi sèna ka miu me'a, na, abhu dhèu dhu pasusa ja'a, toke pamaso ja'a asa d'ara bèdho. Te ngaa te'a boe, na, Lii Lolo Be'a Lamatua pale-lème le ètu mia-mia, 13 toke sordad'u dhu madhenga èmu dhèu aae, dènge dhèu leo aa'i-aa'i re'a, na, ja'a maso bui lula madhutu Yesus Kristus.^a 14 Ka dhèu unu Ama Lamatua ètu se'e se rèdhi, na, Lamatua ka dhu tao j'ara èèna lod'o ja'a ètu d'ara bui ne. Nèti èèna ka, rèngu asa tabha bani, toke re'a heka madha'u. Hèia ra padhai paled'a-led'a Lii Holo-Nori Lamatua ètu mia-mia.

15-17 Ètu ne'e abhu dua rupa dhèu dhu maj'èni aj'a j'ara-j'ara lula-nèti Kristus. Nèti èèna ka, abhu dhu sab'a dènge d'ara mola, aa abhu dhu sab'a dènge d'ara koe-kapengo. Dhu sab'a dènge d'ara mola, rèngu be'a dènge ja'a. Dhèu se re'a mèu, na, ja'a dui sasusa ne, lula pakako sasab'a ja'a, dhu hari boe kabodho ciki sa.

Te ngaa dhu sab'a dènge d'ara koe-kapengo, d'èi boe dhèu risi nèti rèngu aa tenge kolongara di. Rèngu pamae-pamanyèla dhèu-dhèu parcaya, sad'i abhu dhèu dhu madhutu ra. Te ra tenge j'ara ho bisa padedha iisi ra, peka na, rèngu risi ja'a. Rèngu pangee, na, ladhe abhu dhèu dhu madhutu rèngu, èèna na asa tabha paj'èra ja'a ètu d'ara bui.

18 Te ngaa hud'i rèngu sène! Ja'a pusi-pahae boe, ladhe dhèu aj'a dènge d'ara mola, do aad'o. Sad'i dhu rèngu aj'a, dhoka lula-nèti Yesus Kristus di! Èèna ka dhu pakarej'e d'ara ja'a.

Aa ja'a karej'e tare'a-re'a, 19 lula ja'a ke'a, na, miu sabaj'a hia ja'a, aa Roh Yesus Kristus dhu soru-bara ja'a. Nèti èèna ka, ja'a ke'a, na, lèpa lod'o limuri, aa'i-aa'i se èle dènge sod'a-mole! 20 Masi ka ja'a muri do, madhe do, ngaa-ngaa tao boe. Sad'i Ama Lamatua pake ja'a, sèna ka ded'e padedha-dedha kolongara Yesus Kristus, aa aj'a mola-mola lula-nèti Nèngu, toke abhu boe ngaa èci sa dhu pamakae ja'a. Se'e se ka dhu ja'a sanao karèi nèti uru, toke doe ne'e ne.

21-23 Te ja'a pangee sèmi ne'e ka: ladhe ja'a mamuri, na, hud'i laa pa'èki dènge Kristus, aa pakako taruu sasab'a-la'a Na. Èèna ka dhu be'a. Te ngaa ladhe ja'a madhe, ja'a oto risi hari, lula ja'a tèke eele rai-haha ne, aa mamuri hari ho pea pa'èci dènge Kristus ètu sorga. Nèti èèna ka, d'ara ja'a kajari, aa ke'a boe mia ka dhu be'a risi eele! 24 De sèmi ne'e ka laa! Lula miu parluu ja'a era ètu ne'e, be'a risi ja'a pea pa'èci dènge miu ètu rai-haha ne. 25 Ja'a ke'a, na, mamuri ja'a madhera era, sèna ka paraga hari dènge miu. Te Lamatua neo ho ja'a pa'èra d'ara miu, hèia miu asa lèka Ne dènge d'ara karej'e. 26 De bèli-camèd'a miu ded'e padedha-dedha kolongara Yesus Kristus, lula Na bhoke le j'ara sèna ka ja'a lèpa pa'asu-pareo hari dènge miu.

27-28 Masi ka tasa mera mia, mamuri miu hud'i lèke ku, te miu dhèu unu Lamatua. De miu hud'i mamuri dhu mèci ku, aa tao madhutu Lii Lolo Be'a Yesus Kristus dhu peka le dènge miu. Aa ladhe bèli-camèd'a ja'a lèpa hari dhiu pangad'o dènge miu, do tadèngi dhoka lii nèti dhèu di, peka na, miu mamuri mola, na, d'ara ja'a karej'e. Te ja'a bisa ke'a, na, miu dhu mamuri d'ara èci, lula pa'èki dènge Roh èci di. Aa bisa ke'a, na, miu pa'èra ho pakako sama-sama Lii Lolo Be'a Lamatua Yesus, sèna ka dhèu leo parcaya kahèi. Aa miu me'a boe madha'u kahèi, masi ka abhu dhèu dhu lab'a miu. Ne'e ne j'aj'i mi tadha hia musu, na, Ama Lamatua neo lalèta eele si. Te ngaa Ama Lamatua hia miu mamuri, ho bèli-camèd'a miu mamuri taruu dènge Nèngu. 29 Te, lula Ama Lamatua d'ara hua iia risi, nèti èèna ka Na bhoke le j'ara, sèna ka miu bisa parcaya Kristus, aa j'aj'i dhèu unu Na. Mesa boe parcaya di, te ngaa Lamatua soro tèke miu abhu sasusa kahèi, lula miu madhutu Nèngu. 30 Te dhu ja'a tadèngi, abhu dhèu ètu sèra dhu lab'a miu, lula miu pakako Lii Lolo Be'a Kristus. Sanèd'e, te ca hari ni rèngu lab'a le ja'a kahèi, toke d'ai doe ne'e ne.^b