2 Ja'a suri sasuri ne hia miu, dhèu unu Ama Lamatua ètu kota Kolose, dhu tao madhutu taruu j'ara mamuri Yesus Kristus.

Ji'i manèngi sèna ka Ama èdhi, Ama Lamatua, pad'elo d'ara hua iia Na mi miu aa'i-aa'i mi, ho miu mamuri dènge mera-milu.

3 Lod'o-lod'o dhu ji'i sabaj'a hia miu, ji'i manèngi makasi mi Ama Lamatua dhu j'aj'i Ama nèti Kètu èdhi, Yesus Kristus. 4 Te ji'i tadèngi ae le, nèti parcaya miu mi Yesus Kristus, aa nèti sasue dènge d'ara hua iia miu mi dhèu parcaya aa'i-aa'i. 5 Miu tao sèmi èèna, lula miu me'a mèu madha j'ara dhu be'a dhu tao tèke le hia miu ètu sorga. J'ara-j'ara sèra, miu tadèngi mèdhi le nèti lii holo-nori dhu lèke, nuka Lii Lolo Be'a Lamatua, 6 dhu dhèu peka le dènge miu karèi nèti uru ka. Lii Lolo Be'a ne, pale-lème le buli mia-mia ètu rai-haha ne, aa abhu hua-hela dhu be'a, lula lii ne ub'a mamuri dhèu j'aj'i be'a. Mamuri miu j'aj'i be'a sèmi èèna kahèi, karèi nèti hiu-hiu èèna miu tadèngi Lii Lolo Be'a, dènge me'a mèu d'ara hua iia Ama Lamatua.

7 Miu se abhu le a'aj'a ne'e nèti Epapras, angalai d'ara sasab'a ji'i dhu ji'i sue. Te nèngu maj'èni pakako taruu sasab'a Yesus ètu talora aae miu.^a 8 Na lolo hia ji'i ètu ne'e lula-nèti sasue miu dhu Roh Lamatua pala-bagi hia miu.

9 Nèti èèna ka, karèi nèti lod'o hiu-hiu ji'i tadèngi j'ara mamuri miu, ji'i loe boe sabaj'a hia miu. Ji'i manèngi Ama Lamatua, ho miu bisa me'a mèu dad'èi Na, aa bisa me'a madha j'ara ae-ae, madhutu ngaa dhu Roh Na aj'a miu. 10 Dènge j'ara ne'e, miu bisa mamuri dhu lèke, dènge mèti kolongara hua iia Ama Lamatua. Aa miu bisa pakarej'e d'ara Lamatua ètu madha j'ara aa'i-aa'i ra kahèi. Ladhe miu pad'elo d'ara be'a mi dhèu, pe Lamatua hia miu hua-hela dhu be'a. Dènge sèmi èèna, miu asa tadhe mèu Lamatua.

11-13 Ji'i manèngi-mangaj'i kahèi mi Ama Lamatua, sèna ka Nèngu hia miu koasa Na dhu dedha risi èèna, ho miu bisa tago j'ara aa'i-aa'i ra dènge taha d'ara. Ji'i manèngi ho d'ara miu dènge karej'e-karae, sèna ka miu manèngi makasi taruu mi Ama Lamatua. Te Na bhoke le j'ara, sèna ka miu sèmi mere pusaka pala miu ètu sorga. Pusaka èèna ka dhu Na pala-bagi mi dhèu aa'i-aa'i ra dhu parcaya Yesus Kristus. Te Na patabuli eele le èdhi nèti koasa maroga, hèia Na pamaso èdhi j'aj'i dhèu unu Yesus Kristus sèna ka pea ètu d'ara saraa. Ama Lamatua ka dhu ded'e Yesus Kristus j'aj'i Dhèu Aae èdhi. Yesus ne, Ana Pasue Ama Lamatua. 14 Te Ama Lamatua hia Ana Na, sèna ka sui nare èdhi, dènge saku eele sasala-sasigo èdhi.^b

21 Uru èèna, miu mamuri ètu li'u, pakaj'èu nèti Ama Lamatua. Miu pamusu dènge Ne, ka mamuri pacèri nèti Nèngu, lula d'ara miu karehe dènge tatao dhu bhelu èèna ka, miu lab'a taruu Ne. 22 Masi ka sèmi èèna, te ngaa limuri ne Nèngu ka dhu bhoke le j'ara, ho èdhi bisa padame hari dènge Ne. Te Nèngu ka dhu pua Ana Na, ho j'aj'i dhèu rai-haha. Aa Nèngu ka dhu hia Ana Na èèna j'aj'i mi korban, aa madhe ètu aj'u palolo-palèbha, sèna ka èdhi bisa padame hari dènge Ne. Yesus Kristus tao j'ara ne'e, ho bisa lere nèti èdhi lati titu ètu katanga madha Ama Lamatua, sèna ka j'aj'i dhèu mola-mèci dènge d'ara mola, dhu dènge heka sasala ngaa-ngaa. 23 Sad'i miu taha taruu dènge lalèka miu. Kèpe pa'èra-èra, sèna ka baku kalau! Baku pakaj'èu nèti Lii Lolo Be'a èèna, dhu miu sèmi mere ropa miu nanene hiu-hiu Lii èèna. Te Lii Lolo Be'a èèna j'aj'i mi era sarai miu. Dhèu lasi palolo lème le Lii Lolo Be'a èèna ètu mia-mia ètu rai-haha ne. Aa Lamatua ka pua ja'a, Paulus, sèna ka laku lole Lii Lolo Be'a ne kahèi.

24 Lod'o Kristus mamuri ètu rai-haha ne, Na dui j'aj'èra ae d'ai seli. Aa limuri ne, ja'a pasae rupa-rupa j'aj'èra kahèi. Masi ka sèmi èèna, te ngaa d'ara ja'a karej'e taruu. Ladhe abhu dhèu dhu hud'i abhu ku j'aj'èra, na, hud'i laa ja'a dui j'aj'èra èèna sama-sama dènge ra, nuka sèmi Kristus pasae nare j'aj'èra nèti dhèu-dhèu unu Na. Te dhèu unu Na, j'aj'i sama sèmi ngi'u Nèngu. 25 Ama Lamatua hia ja'a sasab'a Na kahèi, ho ladhe-leru dhèu-dhèu unu Na. Nèti èèna ka, ja'a aj'a Lii Holo-Nori Na, toke lutu-sela hia miu. 26-27 Dhèu tadèngi Lii Holo-Nori Lamatua karèi nèti uru ka. Te ngaa dhae re'a mèu mèka naneo nèti Lii Holo-Nori se'e dènge be'a, te naneo na dhu pahuni era. Te ngaa limuri ne, Lamatua bhoke le naneo ne hia dhèu unu Na. Aa naneo Na èèna, lii dhu kapai titu kèna pala mi suku aa'i-aa'i ètu rai-haha ne. Lii babe'a dhu kapai risi èèna, nuka:

28 De ji'i peka dènge dhèu aa'i-aa'i lula-nèti Kristus. Ji'i aj'a-nori dènge pasanèd'e dhèu aa'i-aa'i ra, pake ngangee lii padhai dhu Ama Lamatua hia mi ji'i. Ji'i tao j'ara se'e, ho pa'èra dhèu aa'i-aa'i dhu madhutu Kristus, sèna ka bèli-camèd'a rèngu bisa titu ètu madha Na, dhu dènge boe makae, lula ra mamuri mola taruu. 29 Nèti èèna ka, ja'a titu pa'èra, aa sab'a j'èra titu kèna hia miu. Ja'a bisa taha sab'a bia sèmi èèna, lula koasa Kristus ka pa'èra ja'a. Aa koasa Na èèna, kapai titu kèna!