4 Sèmi èèna kahèi, ina-ama sèra! Miu baku ènyi aa lii taka leli ana-ana miu, te aad'o na, ra nasa ka ra parui. Be'a risi miu lalau-lalo'o si paie-iie, aa nori si nèti ana iiki mai ho madhutu j'ara Lamatua. Ladhe ra tao sala, nori si dènge be'a madhutu dad'èi Lamatua.^c

5 Sèmi èèna kahèi dènge dhèu-dhèu sab'a! Miu hud'i madha'u ku dènge lamatua dhu paredha miu ètu rai-haha ne, aa nanene ne. Baku sab'a dènge d'ara cabèka, te ngaa madhutu dad'èi lamatua dènge d'ara kateme, nuka sèmi miu madhutu dad'èi Kristus dènge be'a. 6 Te miu dhèu sab'a unu Kristus. De ètu rai-haha ne miu baku sad'i sab'a di, lula lamatua dhu ladhe miu. Te ngaa sab'a dènge d'ara maj'èni hia lamatua mi, masi ka nèngu aad'o ètu madha. Te èèna ka dhu madhutu dad'èi Ama Lamatua. 7 De sab'a sasab'a miu dènge d'ara kateme hia lamatua miu ètu rai-haha ne, nuka sèmi miu sab'a hia Ama Lamatua, Kètu èdhi. 8 Lula èdhi te'a, na, bèli-camèd'a Ama Lamatua b'ala hia dhèu dhu tao j'ara be'a. Masi ka rèngu dhèu sab'a do, lamatua do, ènu do, ènu boe do, Nèngu b'ala aa'i mèu-mèu si.^d

9 Sèmi èèna kahèi, lamatua sèra! Baku miu j'ege pamadha'u leli dhèu dhu sab'a hia miu sèra. Te rèngu dènge Lamatua ètu sorga kahèi, èci èèna ka dènge miu. Ama Lamatua ladhe boe rèhu dhèu, te ngaa Na nanene dhèu cee èèna ka. Masi ka lamatua do, dhèu sab'a do, Na nanene si aa'i-aa'i.^e

10 Nanene pabe'a-be'a lii padhai ja'a dhu limuri tèka ne. Miu hud'i kèpe pa'èra-èra ku parcaya miu mi Ama Lamatua, lula Nèngu ka Kètu miu, aa koasa Na dhu dedha risi eele aa'i si. Èèna na dhu bisa pa'èra miu! 11 Sordad'u dènge rèka ho lab'a musu ra. Sèmi èèna kahèi, Lamatua neo pake miu sèmi sordad'u. Te Nèngu neo miu lab'a aa'i j'ara-j'ara bhelu-katub'a dhu dhèu aae nidhu ad'u-ue. Nèti èèna ka, miu hud'i pa'èra ku, sèna ka pake aa'i rèka nèti Ama Lamatua. 12 Te èdhi ètu d'ara pamusu! Èdhi lab'a boe musu dhèu rai-haha, te ngaa èdhi lab'a koasa bhabhelu dhu èdhi tèdhi boe, lab'a dhu rèd'u paredha, lab'a koasa maroga, aa lab'a j'ara-j'ara bhelu-katub'a. 13 De miu hud'i pa'èra pake rèka aa'i-aa'i nèti Ama Lamatua sèna ka bèli-camèd'a, ropa d'ai lod'o-lod'o bhabhelu-katub'a, miu bisa lab'a taruu. Te ladhe miu taha, miu bisa segi.

14 De miu hud'i titu pa'èra-èra! Parcaya dhoka Lii Holo-Nori Lamatua dhu lèke, te èèna nuka sèmi miu dhu bori dhari hake sordad'u.^f Mamuri mola, te èèna sama sèmi miu silu kodho bèsi pa'abhe kakara.^g 15 Pa'èra ho lami peka-padhai Lii Lolo Be'a dhu pad'elo j'ara, sèna ka dhèu bisa mamuri padame dènge Ama Lamatua, te èci èèna ka dènge miu pake salapa sordad'u.^h 16 Parcaya taruu mi Lamatua, te parcaya èèna sama sèmi mèdha èci dhu sordad'u pake ho sili iisi nèti rèka musu. Dènge parcaya sèmi èèna, miu bisa pamadhe ai ètu isi kataki nidhu bhelu, dhu ra siri mi miu. 17 Kèpe pa'èra-èra lalèka miu dhu peka na, miu unu le mamuri nèti Ama Lamatua, te èèna sèmi sordad'u pake solo bèsi. Kèpe pa'èra-èra Lii Holo-Nori Ama Lamatua nèti Roh Na dhu Mola-Mèci, te èèna sama sèmi sordad'u dhu kèpe samala.ⁱ

18 Ladhe miu neo titu èra, na, miu baku loe sabaj'a pake koasa nèti Roh Mola-Mèci Ama Lamatua. J'aga taruu aa baku bhèlu sabaj'a hia dhèu unu Lamatua buli mia-mia. 19 Aa baku bhèlu kahèi sabaj'a hia ja'a. Manèngi sèna ka Ama Lamatua hia kahèi lii holo-nori Na, sèna ka ja'a bisa peka mola-mola naneo Na mi dhèu leo.^j 20 Masi ka ja'a j'aj'i ana bèdho, te ngaa Lamatua Yesus pua-paleha ja'a, sèna ka j'aj'i mi ai g'ana Nèngu. De sabaj'a hia ja'a, ho ja'a baku madha'u padhai dhu lèke, te èèna ka dhu j'aj'i sasab'a-la'a ja'a!

21 Ja'a d'èi sèna ka miu me'a mèu mamuri ja'a. Nèti èèna ka, ja'a pua Tikikus dhiu asa miu. Nèngu ne, a'ari pasue ja'a, aa na maj'èni pakako sasab'a Kètu èdhi, Yesus Kristus.^k 22 Hud'i laa na lole j'ara-j'ara mamuri èdhi ètu ne'e. Aa ja'a neo, sèna ka na pa'èra d'ara miu kahèi.^l

23 Ja'a manèngi Ama èdhi, Ama Lamatua, dènge Kètu èdhi, Yesus Kristus, ho tao miu mamuri padame èci dènge èci, aa pasue èci dènge èci, lula miu parcaya mi Rèngu. 24 Ja'a manèngi-mangaj'i kahèi, sèna ka Kètu èdhi, Kristus pad'elo d'ara hua iia Na mi dhèu aa'i-aa'i dhu sue Ne taruu.

Sasuri ja'a, d'ai sange ne'e ka.