2 Ama Lamatua ne, Ama èdhi. Aa Yesus Kristus, Kètu èdhi. Ja'a manèngi sèna ka Rèngu pad'elo d'ara hua iia Ra ho miu mamuri dènge mera-milu.

3 Koa-kio mi Ama Lamatua! Nèngu ka Ama nèti Kètu èdhi, Yesus Kristus. Te Ama Lamatua pala-bagi le mi èdhi mèngi-nale aa'i-aa'i nèti sorga, lula èdhi j'aj'i le dhèu unu Yesus Kristus.

4 Te lod'o rai-haha dhae j'aj'i mèka, Ama Lamatua sue aa hag'e nare le èdhi, sèna ka j'aj'i dhèu unu Yesus Kristus. Na d'èi sèna ka èdhi mamuri mola-mèci. Dènge sèmi èèna, dhèu bisa boe pasala èdhi. 5 Nèngu ka dhu pama'ète mema karèi nèti uru ka, ho ded'e èdhi j'aj'i ana Na, lula Yesus Kristus. Ne'e ne ka dhu pakarej'e d'ara Na. 6 Nèti èèna ka, èdhi koa-kio Ne. Te Nèngu pad'elo le d'ara hua iia Na mi èdhi, ho èdhi bisa mamuri pa'èci dènge Ana pasue Na.

7 Masi ka èdhi uru èèna mamuri mola-mèci boe madhutu j'ara mamuri Ama Lamatua, te ngaa Na pad'elo d'ara hua iia Na, aa hia Ana Na mai, sèna ka pasuti raa Na toke madhe. Dènge j'ara ne'e, Ana Na sui nare èdhi nèti sasala-sasigo èdhi.^c 8 Lula Na dutu-bhori sasue Na mi èdhi, Nèngu pasaraa d'ara èdhi kahèi, ka bisa te'a mèu dad'èi d'ara Na. 9 Uru èèna, Ama Lamatua dhae peka aa'i mèka dad'èi d'ara Na mi dhèu rai-haha ne. Te ngaa limuri ne, madhutu dad'èi Na, Na hia le èdhi te'a, peka na, karèi nèti uru ka, Na pama'ète nare le ho neo pake Yesus Kristus sèna ka padame dhèu rai-haha dènge Ama Lamatua. 10 Aa, pe d'ai lod'o na, Yesus Kristus j'aj'i Kètu ho uri aa'i ngaa-ngaa ètu rai-haha dènge ètu sorga.

11-12 Lula èdhi dhu pa'èki le dènge Kristus, nèti èèna ka èdhi abhu pusaka kahèi nèti Ama Lamatua. Te karèi nèti uru j'ara ka, Na hag'e nare ji'i dhèu Yahudi, ho j'aj'i dhèu unu Na. Dad'èi Nèngu ka, neo pake ji'i ho bhoke j'ara hia dhèu-dhèu leo, sèna ka dhèu aa'i-aa'i bisa parcaya Kristus. Aa'i-aa'i se j'aj'i, madhutu ngaa dhu Na pama'ète nare le. Dènge j'ara ne, èdhi aa'i-aa'i ti bisa ded'e padedha-dedha risi hari, kolongara Ama Lamatua.

13 Lula ji'i bhoke le j'ara, nèti èèna ka miu nèti suku leo bisa mai j'aj'i dhèu unu Kristus, sad'i miu parcaya Lii Lolo Be'a Na dhu mola. Te Lii Lolo Be'a èèna ka dhu pamamuri miu.

Ladhe miu parcaya sèmi èèna, miu sèmi mere kahèi Roh Ama Lamatua dhu Mola-Mèci dhu Na moa mema le. Te Roh Lamatua Mola-Mèci ne, nuka sèmi cap ho patadha, peka na, miu tare'a-re'a j'aj'i le dhèu unu Lamatua. 14 Roh Mola-Mèci ne'e j'aj'i mi jaminan kahèi, dhu peka na, pe Ama Lamatua hia aa'i mèu-mèu dhu Na moa mema sèra, toke Na sui nare èdhi, sèna ka j'aj'i dhèu unu Na. Nèti èèna ka, èdhi koa-kio dadedha Na.

15 Ja'a tadèngi ae le, j'ara-j'ara lalèka miu mi Kètu èdhi, Yesus Kristus, aa nèti sasue miu mi dhèu parcaya sèra. Nèti èèna ka, 16 ja'a loe boe manèngi makasi mi Ama Lamatua. 17 Ja'a sabaj'a, peka na, “Ama Pasue! Ama ku, Ama Lamatua nèti Kètu ja'a, Yesus Kristus. Aa Ama ku ka dhu kapai risi aa'i. Ja'a manèngi sèna ka Ama hia Roh Ama mi dhèu Epesus, ho re'a j'ara-j'ara dhu lèke, aa bisa tadhe Ama mèu risi hari. 18 Ja'a manèngi ho Ama Lamatua bhoke ngangee dènge pasaraa d'ara ra, sèna ka bisa re'a aa'i ngaa dhu Ama padhadha neo hia si. Ja'a neo kahèi sèna ka rèngu re'a pusaka dhu Ama moa neo hia si bèli-camèd'a. Te pusaka èèna kab'ua titu kèna. 19 Ja'a manèngi kahèi, ho Ama bhoke j'ara hia si, sèna ka bisa re'a mèu koasa Ama dhu dedha risi èèna. Te Ama pake koasa èèna, ho soru-bara dhèu parcaya dhu unu Ama sèra. 20 Te koasa Ama Lamatua èèna, risi aa'i mèu-mèu. Nèti koasa ne'e ka Na pamamuri Kristus nèti mamadhe Na. Hèia Ama Lamatua ded'e Kristus asa sorga, ka hia Ne madhèdi ètu era dhu kab'ua risi eele, ètu baboa g'ana Na.^d 21 Nèngu dedha risi nèti aa'i-aa'i dhu ètu rai-haha dènge ètu sorga. Te Nèngu dedha risi nèti koasa aa'i-aa'i, aa dènge dhu rèd'u paredha aa'i-aa'i ra. Na kèpe koasa Na dhu risi nèti aa'i-aa'i sèra, mesa boe doe ne'e ne di. Te Na nèd'u koasa ne taruu toke d'ai mia-mia. 22 Ama Lamatua unu Na ka dhu tao sèna ka aa'i-aa'i se pahaha iisi mi Kristus. Aa Nèngu kahèi ded'e Kristus j'aj'i Kètu, sèna ka uri aa'i-aa'i dhu pa'èki dènge dhèu parcaya sèra.^e 23 De ladhe Na j'aj'i Kètu, èdhi dhèu parcaya j'aj'i nuka sèmi ngi'u Na. Bèli-camèd'a èdhi ka dhu sab'a pa'èle aa'i mèu sasab'a dhu Na pakako lod'o Na ètu rai-haha ne era. Te Nèngu ka dènge koasa ho paj'aj'i aa'i mèu-mèu madhutu dad'èi Ama Lamatua.”^f

Lii sabaj'a ja'a sèmi ne'e ka hia miu.