4 Èle èèna ka, rèngu lasi palème rae-rae, ho lole lii pama'ète nèti dhèu pajuu-paleha Lamatua Yesus dènge ama-ama Kristen leo sèra ètu kota Yerusalem. 5 Dènge j'ara ne'e, rèngu asa pa'èra d'ara dhèu sarani sèra. Bèli-bèli èèna, dhèu parcaya hiu asa tabha ae.

6 Èle èèna ka, Paulus si lasi taruu. Ka ra lasi asa propensi Galati dènge propensi Frigia, lula Roh Lamatua dhu Mola-Mèci kai si ho baku lasi lole Lii Lolo Be'a asa propensi Asia. 7 Ropa rèngu d'ai rai èci dhu patoo dènge propensi Misia, rèngu neo maso asa propensi Bitinia. Te ngaa Roh Yesus kai si, sèna ka baku lasi asa nèi.^b 8 Èle èèna ka, rèngu kako re propensi Misia, hèia d'ai kota Troas.

9 Mèda èèna, Paulus abhu tanila. Nèngu nèdhi dhèu èci titu ètu cabèka dhasi ètu propensi Makedonia. Dhèu ne, taraa manèngi tulu, aku nèngu na, ‘‘Ama! Mai asa ne'e, ho soru ku ji'i laa!’’ 10 Nèdhi sèmi èèna, hèia ji'i^c ngare lii èci ho la'a asa Makedonia. Madhutu ngangee ji'i, na, Ama Lamatua ka dhu pua ji'i la'a lole J'ara Mamuri Na mi dhèu ètu cabèka dhasi nèi. Nèti èèna ka, Na kai ji'i baku la'a asa era leo.

11 Èle èèna ka, ji'i ca'e balu ètu kota Troas, ho la'a asa pulu iiki cue, ngara na Samotrake. Asa bèli èèna, ji'i la'a taruu, ka d'ai kota èci, ngara na Neapolis. Ka ji'i puru ètu èèna. 12 Nèti èèna, ji'i kako haga la'a asa kota Pilipi, kota kapai cue ètu propensi Makedonia. Kota ne'e, ètu d'ara paredha Roma kahèi. Ji'i pea pèri-pèri lod'o di ètu èèna.

13 D'ai lod'o a'oro sasab'a dhèu Yahudi, ji'i la'a tenge era sabaj'a dhèu Yahudi. Ji'i pangee, na, era sabaj'a èèna ètu sebhe loko. Ka ji'i kako ako kaj'èu ciki nèti d'ara kota, hèia ji'i ngèdhi loko èci. Ètu era ne'e, ji'i paraga dènge pèri-pèri dhèu bhèni,^d ka ji'i madhèdi padhai lii dènge rèngu. 14 Nèti dhèu bhèni se, abhu dhèu èci, ngara na Lidia. Nèngu nèti kota kaj'èu èci ètu propensi Asia, ngara na kota Tiatira. Sasab'a Lidia, pahia bèla mea sanama mangèru dhu kab'ua titu kèna dènge dhèu aae-dhèu kapai. Nèngu maj'èni manèngi-mangaj'i mi Ama Lamatua. Nèti èèna ka, ropa na tadèngi lii padhai Paulus, ka na sèmi nare dènge.

15 Hèia ji'i sarani Lidia dènge isi èmu na aa'i-aa'i ra. Ropa sarani èle, ka na gale ji'i, aku nèngu na, ‘‘Ama si! Ladhe miu ngee, na, ja'a ne parcaya tare'a-re'a le Lamatua Yesus, na, miu mai manubha ètu d'ara èmu ji'i.’’ Lula na pamako loe boe, hèia ji'i la'a.

16 Ca lod'o, ropa ji'i la'a asa era manèngi-mangaj'i, ka ji'i paraga dènge ana bhèni èci. Nèngu ne, ènu dhèu. Nidhu bhèlu sab'a ètu d'ara nèngu, ka na ne'a ladhe kalua dhèu. Nèngu ne'a malare kahèi. Ka dhèu ae hia ne doi, ho ra manèngi nèngu ladhe kalua rèngu. Te ngaa lamatua ana bhèni ènu ne ka dhu abhu doi aa'i-aa'i sèra. Ka rèngu j'aj'i kaja. 17 Lod'o èèna, ropa ji'i kako, ana bhèni ne madhutu taruu ji'i. Ka na pa'oo-parodha, peka na, ‘‘Dhèu se'e se, ana madhutu Ama Lamatua dhu Koasa Kapai. Rèngu mai ho neo pad'elo j'ara tasamia ka dhèu bisa abhu mamuri, aa tasamia ka Lamatua saku eele sasala-sasigo rèngu.’’

18 Ana bhèni ne pa'oo taruu sèmi èèna d'ai pèri-pèri lod'o. Nèbhu-nèbhu hèia Paulus roca nanene lii pa'oo-parodha ana bhèni ne. Ca tèka, ka Paulus kabèli kabodho, ka na ladhe kaloo ne, hèia na hia paredha, peka na, ‘‘He! Èu nidhu bhèlu! Dènge koasa Lamatua Yesus, ja'a paredha èu kalua nèti ana bhèni ne, ètu d'ara ciki oo'e ne'e kahèi!’’ Ropa Paulus peka nare sèmi èèna, cag'ag'a laa, nidhu ne kalua dènge ka.

19 Lod'o lamatua ana bhèni ènu èèna re'a, na, koasa nèngu ele le, hèia ra nasa, lula rèngu abhu heka doi. Nèti èèna ka, ra kèpe Paulus dènge Silas, ka nuni rèti si asa era pama'ète lii langu, ètu d'ara pasa. 20 D'ai èèna, hèia ra pa'oo aae, peka na, ‘‘Dhèu se'e mai pa'ele iie kabarai èdhi. Te ngaa rèngu se dhèu rai leo. Dhèu Yahudi se mai nèti li'u, ho pamae kabarai èdhi! 21 Rèngu dadugu isi kabarai èdhi, ho baku pusi-pahae dènge j'ara paredha Roma, sèna ka madhutu dhoka j'ara rèngu di.’’

22 Ropa tadèngi rare sèmi èèna, dhèu ae sèra nasa, ka ra game Paulus dènge Silas. Ka dhèu kapai èci ètu èèna, pua dhèu ciu eele mèdha-papake ka hake si. 23 Ra hake rare, ka pamaso dua ra asa d'ara bèdho. Ra pua komedhaa j'aga ho j'aga paie, mage dhoka ra rai. 24 Tadèngi rare sèmi èèna, ka komedhaa j'aga ne pamaso Paulus dènge Silas asa d'ara kama èci ètu talora aae èmu bèdho èèna. Ka na ngapi haga si dua ra dènge aj'u ngangapi.

25 Pe d'ara talora mèda sa, Paulus dènge Silas sabaj'a dènge sod'a koa-kio kolongara Ama Lamatua. Aa ana bèdho leo sèra tadèngi lii sod'a ra. 26 Cag'ag'a laa, rai opo, ka èmu bèdho ne gaged'o. Hèia babèdho èmu ne bhoke eele. Aa rate ana bèdho sèra, bhoke eele aa'i kahèi.

27 Ropa komedhaa j'aga èmu bèdho na cag'ag'a, ka na kèd'i. Na ladhe hèb'a èmu bèdho bhoke eele aa'i. Ropa nèdhi sèmi èèna, ka na pangee, na, ana bèdho rai aa'i le. Ka na bete samala na, ho neo pamadhe iisi. 28 Te ngaa Paulus kai ne dènge lii mèdhu, peka na, ‘‘Baku pamadhe iisi èu, te ji'i aa'i-aa'i mi ka se'e dhu tesa-tesa era!’’

29 Ropa tadèngi nare lii èèna, komedhaa ne madha'u titu kèna dènge ele ngangee. Ka na pua dhèu rèti hia ne labhu, ka rai la'e asa d'ara bèdho, isi rèbha-rèbha sène. Ka la'e patitu kètu urutuu ètu madha Paulus dènge Silas.

30 Hèia lere nèti rèngu asa li'u, ka na karèi si, aku nèngu na, ‘‘Ama si! Ja'a ne, j'èra bia. Ja'a tao tasamia, sèna ka ja'a baku abhu hahuku?’’

31 Ka Paulus si dhaa ne, aku rèngu na, ‘‘J'ara ne sèmi ne'e: èu parcaya Lamatua Yesus, sèna ka Na patabuli èu. Sèmi èèna kahèi, dènge isi èmu èu.’’ 32 Hèia Paulus dènge Silas padhai lii dènge komedhaa èmu bèdho, dènge isi èmu na aa'i-aa'i ra. Rèngu peka dènge si J'ara Mamuri Lamatua Yesus. 33 D'ara talora mèda risi sa, hèia komedhaa j'aga èèna, lere nèti Paulus dènge Silas, ho ra pamèu nu'a ra. Èle èèna ka, Paulus dènge Silas sarani komedhaa dènge isi èmu na aa'i-aa'i ra. 34 Hèia komedhaa j'aga ne nèti Paulus si asa èmu na, hia si ra'a-rinu. Dhèu ne, dènge isi èmu na karej'e bia, lula rèngu parcaya le Ama Lamatua.

35 Bèli mad'ae aae èèna, dhèu kapai dhu pama'ète lii, hia lii asa komedhaa j'aga èmu bèdho, sèna ka na patabuli eele Paulus dènge Silas nèti d'ara bèdho.

36 Tadèngi nare lii èèna, hèia komedhaa ne peka dènge Paulus, aku nèngu na, ‘‘Dhèu kapai se, rare lii èci le, ho kalua eele miu. De miu dua mi lèpa ka dènge mera-milu.’’

37 Tadèngi rare sèmi èèna, ka Paulus no'o boe sèmi nare. Ka na peka hari dènge dhèu rèti lii sèra, aku nèngu na, ‘‘Aad'o sèmi èèna! Ji'i se dhèu kabarai Roma. De ji'i manèngi hak ji'i kahèi! Dhèu paredha hud'i j'ue lii langu ji'i madhutu atora. Dhu lèke, hud'i parisa uuru ku lii langu, heka huku kèna. Te ngaa rèngu tao boe sèmi èèna. Te rèngu dhae parisa mèka lii ho tenge sasala ji'i, te ngaa rèngu hake kalabhe ji'i ètu madha dhèu ae. Aa abhu mèka sasala èci sa, te ngaa rèngu pamaso le ji'i asa d'ara èmu bèdho. Ne'e ne sisu atora paredha Roma. De rèngu neo kalua eele ji'i iia-iia ka laa, sèna ka dhèu baku re'a sasala ji'i ngaa!? Ji'i ngo'o boe sèmi èèna! Pua dhèu kapai sèra mai unu ra ho kalua eele ji'i. Sèmi èèna ku, heka ji'i sèmi ngare kèna!’’

38 Ropa dhèu rèti lii sèra lèpa lasi peka lii èèna asa dhèu kapai kota èèna, heka rèngu re'a kèna, na, Paulus dènge Silas dhèu kabarai Roma kahèi. Ka ra madha'u bia. 39 Hèia dhèu kapai sèra mai asa èmu bèdho, ka ra mangaku sasala ra dènge manèngi, sèna ka Paulus dènge Silas baku nasa. Ka ra patabuli dua ra nèti d'ara bèdho. Aa ra manèngi ho dua ra pakèd'i dènge ka nèti kota èèna. 40 Kalua nèti èmu bèdho, ka Paulus si dhuli èmu Lidia. Ètu èmu èèna, dua ra paraga dènge dhèu parcaya sèra. Ka ra aj'a, aa pa'èra d'ara rèngu kahèi. Èle èèna ka, ra pakèd'i nèti kota èèna.