Èdhi hud'i pahaha iisi nuka sèmi Yesus Kristus
2
A'ari pasue aa'i-aa'i, unu Yesus Kristus! Na pangèd'u le miu j'ara be'a ae-ae. De miu bisa pa'èra d'ara èci dènge èci. Miu bisa holo dhu mai nèti sasue miu. Miu bisa mamuri pabe'a èci dènge èci, lula Roh Lamatua dhu sab'a ètu talora aae miu. Aa miu bisa pad'elo rasa kasia miu dènge d'ara be'a èci dènge èci. 2 Ladhe miu tao sèmi èèna, na, d'ara ja'a karej'e kea rae-rae. Risi-risi hari, ladhe miu pasue dènge d'ara èci, mamuri ètu ca j'ara, aa mere lii èci ètu d'ara sasab'a-la'a. 3 Baku tao ngaa-ngaa dhu tenge dhoka pa'oto ngi'u èu risi nèti dhèu leo. Aa baku pangee, na, èu risi nèti dhèu leo. Te pamone do pabhèni èu èèna, dènge boe kolo-kapua. Te ngaa èdhi hud'i pahaha iisi ku, sèna ka te'a, na, dhèu leo risi nèti èdhi. 4 Aa baku dhoka uri mamuri miu mesa-mesa mi. Te ngaa èdhi hud'i ladhe kahèi, ngaa dhu dhèu leo parluu.5 Te d'ara èdhi hud'i sama ku sèmi d'ara Yesus Kristus.
6 Masi ka Nèngu ca ropa dènge Ama Lamatua,
aa Nèngu Kètu èdhi kahèi, èci èèna ka dènge Ama Lamatua,
te ngaa Na tèke eele hak Na,
aa pake boe dadedha dènge kapai Na.
7 Hèia Na puru mai asa rai-haha ne,
ca ropa dènge dhèu rai-haha.
Na tèke eele hak Na aa'i-aa'i,
sèna ka tao iisi Na j'aj'i nuka sèmi ènu sa.
8 Mesa boe j'aj'i dhèu haha d'ai seli di,
te ngaa Na tao ngi'u Na j'aj'i dhèu dhu laku-laku boe kahèi,
sèna ka tao madhutu dad'èi Ama Lamatua.
Masi ka ra pamadhe Ne ètu aj'u palolo-palèbha, Na sèmi nare kahèi,
aa madhe, nuka sèmi dhèu bhelu.
9 Lula Nèngu pahaha iisi sèmi èèna,
nèti èèna ka Ama Lamatua ded'e Ne padedha-dedha.
Aa pangèd'u Ne ngara dhu kapai aae.
Te abhu boe ngara èci sa dhu kapai aae risi nèti Nèngu.
10 Ama Lamatua ded'e padedha-dedha ngara Na èèna,
sèna ka dhèu aa'i-aa'i pakab'ua Ne.
Nuka: dhèu ètu dedha-liru,
dènge dhèu ètu rai-haha ne.
Dhèu mamuri dènge dhèu madhe.
Bèli-camèd'a dhèu aa'i-aa'i patitu kètu urutuu, ho pahaha iisi mi Nèngu.
11 Aa bèli-camèd'a dhèu aa'i-aa'i peka na, “Yesus Kristus èèna, tare'a-re'a Lamatua!”
Dènge sèmi èèna, rèngu koa-kio Ama Lamatua kahèi.a
Èdhi nuka sèmi hua-hètu dhu pasaraa rai-haha
12 A'ari pasue aa'i-aa'i! Nanene paie-iie! Uru èèna, lod'o ja'a pea ètu kota Pilipi era, miu nanene lii padhai ja'a, ka miu madhutu j'ara mola Ama Lamatua. Limuri ne, èdhi pahag'a, te ngaa ja'a manèngi ho miu titu èra ètu d'ara mamuri mola. Sanèd'e, te ladhe miu nanene boe Nèngu, bèli-camèd'a pe mèdhi unu mi! Lula Nèngu ka dhu patalale miu nèti koasa sasala-sasigo mi. Hèia miu mamuri dhu mèci, te miu j'aj'i le dhèu unu Na. 13 Te Ama Lamatua mesa Na ka dhu sab'a ètu d'ara miu. Nèngu ka dhu bhoke j'ara, sèna ka miu neo nanene Ne. Aa Nèngu ka dhu hia koasa kahéi, ho miu d'èi sab'a pakarej'e d'ara Na.
14 De ladhe sad'i miu tao ngaa èèna ka, na, baku ka'uu-kamuki, aa baku pasibha d'ara lii. 15 Tao sèmi èèna, sèna ka miu j'aj'i dhèu dhu d'ara mola-mèci, aa dhèu dhu dènge boe sasala. Miu mamuri ètu d'ara talora aae dhèu bhelu dènge dhèu kapod'e-kabèli. Te ngaa baku madhutu si! Te mamuri miu hud'i mola-mèci ku, lula miu ana-ana Lamatua. Hèia mamuri miu hud'i heo ku, ho pad'elo j'ara hia rèngu, nuka sèmi hua-hètu dhu pasaraa ètu d'ara maroga.b 16 Hèia miu mamuri mola dènge pakako Lii Holo-Nori Lamatua. Dènge sèmi èèna, bèli-camèd'a miu tao d'ara ja'a kea rae-rae, lod'o Yesus Kristus lèpa hari mai. Aa rui-j'aj'èra ja'a core eele boe iia d'ara, te ngaa dènge kab'ua.
17-18 Te ngaa ladhe sèmi ja'a dutu pa'èle aa'i mèu-mèu mamuri ja'a, ho j'aj'i nuka sèmi korban èi anggor, sèna ka miu bisa parcaya asa èra, aa pakako sasab'a Lamatua, ja'a sèmi kore mamadhe dènge karej'e. [Èèna nuka sèmi ama agama tiko èi anggor ètu mei korban, ho pahaha iisi mi Lamatua.] Dènge j'ara ne, èdhi bisa sama-sama karej'e, lula korban ne, iia d'ara boe.c
Sasab'a Timotius
19 Ja'a sanao, nèbhu heka, Lamatua Yesus bhoke j'ara, ho ja'a pua Timotius dhiu, sèna ka na pa'èra d'ara miu. Èle èèna, na lèpa hari mai sa ne'e, ho na lolo dènge ja'a kakako miu, aa pakarej'e d'ara ja'a. 20 Ja'a pua boe dhèu leo, dhoka Timotius di, lula nèngu ne d'ara èci dènge ja'a. Aa na sue tare'a-re'a miu. 21 Nèngu ne, sama boe dènge a'ari dhu leo sèra. Te rèngu sèra pangee dhoka ngi'u rèngu unu ra, te ngaa uri boe ngaa-ngaa dhu pamèci hia Yesus Kristus. 22 Te ngaa miu me'a le, na, Timotius sab'a d'ai madhe, pakako sasab'a Ama Lamatua. Na sab'a dènge ja'a nuka sèmi ana dhu sab'a hia ama na. Ji'i dua mi la'a peka-padhai Lii Lolo Be'a Lamatua Yesus ètu mia-mia. 23 Ladhe rèngu pama'ète rare ku lii langu ja'a, ja'a heka pua Timotius dhiu asa miu kèna. 24 Te ngaa limuri ne, Lamatua pa'èra d'ara ja'a, na, nèbhu heka ja'a bisa dhiu paraga dènge miu.
Sasab'a Epaproditus
25 Uru èèna, lod'o ja'a ètu d'ara j'aj'èra era, miu pua a'ari èdhi Epaproditus mai ladhe-leru ja'a. Na pakako sasab'a Lamatua sama-sama dènge ja'a, nuka sèmi ca dhèu sordad'u dhu maj'èni madhutu paredha komedhaa na. Te ngaa ne'e ne, ja'a neo pua na lèpa hari asa miu. 26 Te d'ara na neo ae le nèdhi miu. Aa na ngee miu, lula ne'a, na, miu tadèngi le nèngu dhu pèd'a. 27 Mema lèke tare'a. Ca hari ni, na pèd'a aae oe madhe. Te ngaa Ama Lamatua sue ne, aa Lamatua sue ja'a kahèi, ka Na puri-pa'èle Epaproditus, sèna ka ja'a baku asa susa. 28 Nèti èèna ka, ja'a neo pua hari na lèpa, ho bisa paraga hari dènge miu dènge d'ara karej'e-karae. Ladhe sèmi èèna, d'ara ja'a heka mau kèna. 29-30 De miu hud'i sèmi mere ne dènge be'a, te nèngu ne dhèu unu Lamatua. Aa miu hud'i pakab'ua ku dhèu aa'i-aa'i ra dhu ca ropa dènge ne. Te nèngu pakako sasab'a Kristus, toke oe madhe. Aa nèngu hari boe kabodho ciki sa, lula na neo soru-bara ja'a, gati miu. De sèmi mere hari ne dènge d'ara karej'e.