2
De ja'a unu ku dhu pama'ète, na, ja'a bisa mèka dhiu ngad'o miu, sèna ka baku pabia miu aa'i-aa'i mi. 2 Te ladhe ja'a pabia d'ara miu, na, cee hari ka dhu pakarej'e d'ara ja'a? Dhoka miu di. Te ngaa ladhe ja'a dhiu d'ara lai-lai ne, ja'a pabia miu. 3 Nèti èèna ka, sasuri ja'a dhu uru èèna, peka na, ja'a lake kore mèka dhiu asa miu. Ja'a tatae era, sèna ka miu pamola mere ku lii langu miu. Hèia ropa ja'a dhiu, ja'a rasa bia heka, lula lii langu miu sèra. Te dhu lèke mola-mola, na, miu se ka dhu pakarej'e d'ara ja'a. Ja'a tadhe mèu miu se aa'i-aa'i mi. Ka ja'a ke'a mèu ladhe d'ara ja'a karej'e, na, d'ara miu sèmi èèna kahèi. 4 Lod'o ja'a suri sasuri dhu uru èèna hia miu, ja'a rasa susa dènge d'ara ja'a roe. Ja'a pahaa èi madha ae-ae. Te ngaa ja'a suri sèmi èèna, sèna ka miu me'a sasue ja'a mi dedha miu. Te ja'a suri boe j'ara ne, ho pasusa miu.Pabhèlu eele sasala dhèu
5 Ètu talora juma'at miu sèra, abhu ca dhèu dhu pasusa d'ara dhèu ae. D'ara ja'a susa kahèi lula tatao dhèu èèna. Masi ka tatao nèngu ne lèke iia boe mi ja'a, te ngaa dhu lèke ae mi miu. 6 Ja'a padhai lii pa'ae heka, te ae ka nèti miu dhu pasanèd'e nèngu le, hèia na ele-ho'a le. 7 De limuri ne miu pabhèlu eele ka sasala na, aa padhai lii pabe'a-be'a ka dènge ne. Te mage dhoka dhèu ne pakaj'èu iisi. 8 Nèti èèna ka, ja'a manèngi sèna ka miu pa'asu-pareo dènge ne, ho pa'èra d'ara na, peka na, miu sue nèngu taruu.
9 Ja'a suri sasuri ja'a dhu uru èèna, ho neo uji miu. Te neo ke'a, na, miu tao dhu lèke, dènge tao madhutu aa'i-aa'i dhu ja'a paredha mi miu. 10 Ladhe miu tèka heka d'ara, aa pabhèlu eele sasala dhèu, na, ja'a madhutu kahèi ngaa dhu miu pama'ète mere le. Ladhe abhu sasala na dhu ja'a parluu pabhèlu, na, ja'a pabhèlu eele sasala dhèu èèna kahèi. Ja'a tao sèmi èèna ka ètu madha Kristus, sèna ka j'aj'i conto dhu be'a hia miu. 11 Te ja'a d'èi boe ladhe dhèu aae nidhu sii nare èdhi, sèna ka segi èdhi. Èdhi hud'i te'a ku naneo aapa nèngu. De baku pagoa iisi!
D'ara Paulus mau boe ètu Troas
12 Uru èèna, lod'o ja'a ètu kota Troas, ho aj'a dhèu lula-nèti Lii Lolo Be'a Yesus Kristus, Lamatua bhoke j'ara hia ja'a. 13 Te ngaa d'ara ja'a mau boe, lula ja'a paraga boe dènge ari ja'a Titus ètu nèi. Hèia ja'a palangu lii dènge dhèu parcaya ètu Troas sèra, ka pakèd'i asa propensi Makedonia.a
Kristus ka hia èdhi segi
14 Te ngaa, masi ka ja'a ètu mia èèna ka, ja'a manèngi makasi ae-ae mi Ama Lamatua. Te Kristus lab'a le j'ara-j'ara dhu bhelu-katub'a, ka Na segi le. Aa èdhi pa'èki dènge Ne kahèi. Nèti èèna ka, Ama Lamatua pad'elo taruu, peka na, èdhi j'aj'i dhèu unu Na. De ropa èdhi peka dènge dhèu lula-nèti Kristus, èèna nuka sèmi hèu mèngi èci, dhu dhèu aa'i-aa'i sangèd'u rare. 15-16 Uru-uru sèra, lod'o dhèu Yahudi tao korban tunu, sèb'u hèu gèmu na ca'e asa Lamatua, ho pakarej'e d'ara Na. Èdhi èci èèna kahèi dènge hèu mèngi èci, dhu pasanèd'e Lamatua lula-nèti Kristus. Te ngaa bagi mi dhèu cahag'e, èdhi èci èèna ka dènge hèu badha madhe. Te ladhe dhèu dhu mamuri pakaj'èu nèti Lamatua rèdhi mamuri èdhi, èèna pasanèd'e rèngu, peka na, bèli-camèd'a rèngu madhe, aa cèri eele nèti Lamatua. Te ngaa mi dhèu cahag'e hari, èdhi èci èèna ka dènge hèu mèngi èci. Te ladhe dhèu dhu mamuri mola rèdhi mamuri èdhi, èèna pasanèd'e rèngu tasa mera mia Kristus hia mamuri mi èdhi, aa pala-bagi hia rèngu mamuri toke d'ai mia-mia. Dhèu rai-haha cee ka dhu bisa ad'u-ue j'ara se aa'i-aa'i? Aad'o, sina ma?
17 Sanèd'e, te ji'i se sama boe dènge dhèu leo dhu aj'a Lii Holo-Nori Lamatua, sèna ka abhu oto nuka sèmi pahia-pahèli pake Lii Holo-Nori Lamatua. Ji'i se sèmi boe èèna! Ladhe ji'i padhai lii, dhèu aa'i-aa'i bisa ladhe rèdhi iia-iia, peka na, ji'i aj'a-nori dènge d'ara mola. Lii padhai ji'i kapua nèti Ama Lamatua. Aa mamuri ji'i pa'èki dènge Kristus.