3 Ja'a manèngi-mangaj'i mi Ama èdhi, Ama Lamatua, dènge Kètu èdhi, Yesus Kristus. Ja'a manèngi sèna ka Rèngu pad'elo d'ara hua iia Ra mi miu, ho miu mamuri dame dènge mera-milu.

4 Lod'o-lod'o ja'a ngee kèdhi miu, ja'a padhai lii dènge Lamatua ja'a, peka na, “Makasi ae-ae lula parcaya dhèu Korintus sèra!” Te Lamatua dhu pad'elo le d'ara hua iia Na mi miu, lula miu lèka taruu Yesus Kristus, dhu Lamatua pua Na mai. 5 Hèia Na hia miu a'èra, ka miu bisa pakako sasab'a-la'a aa'i-aa'i, lula miu pa'èki dènge Ne. Èèna ka dhu tao d'ara miu kaja-su'i dènge j'ara-j'ara dhu be'a. Nèti èèna ka miu me'a mèu madha j'ara aa'i-aa'i dhu hua iia risi, lula-nèti j'ara mamuri Nèngu. Miu me'a kahèi j'ara mia dhu be'a risi, ladhe miu lole mi dhèu lula-nèti Yesus Kristus. 6 J'ara aa'i-aa'i ne'e ka dhu padelo, na, j'ara-j'ara dhu ji'i peka le dènge miu lula-nèti Kristus èèna, dhu amo le ètu d'ara miu. Nèti èèna ka, miu me'a tare'a-re'a, na, j'ara sèra lèke. 7 De miu abhu le j'ara aa'i-aa'i dhu be'a, dhu Roh Lamatua pala-bagi hia dhèu unu Na. Kura boe ciki sa. Hèia miu tatae lod'o dhu bèli-camèd'a Lamatua bhoke ho pad'elo Kètu èdhi, Yesus Kristus mi dhèu aa'i-aa'i. 8 Kristus èèna ka dhu neo pa'èra miu sèna ka miu taha taruu, toke Na mai hari asa rai-haha ne. Dènge j'ara ne'e, miu manahu boe, aa abhu boe ca dhèu sa dhu bisa pèci sasala mi dedha miu. 9 Èdhi bisa parcaya Lii Holo-Nori Ama Lamatua, lula ngaa dhu Nèngu peka, èèna ka dhu j'aj'i. Tatu Nèngu neo tao j'ara se aa'i-aa'i hia miu. Te Nèngu ka dhu bhoke j'ara, sèna ka miu bisa tadhe Ana Na, nuka Kètu èdhi, Yesus Kristus èèna.

10 A'ari dhu pasue! Ètu d'ara aa'i-aa'i se, ja'a padhai lii pake kolongara Kètu èdhi, Yesus Kristus. De ja'a manèngi tare'a-re'a, sèna ka miu loe ka nèti padhèto ètu d'ara lii padhai. Te ngaa miu hud'i tenge j'ara sèna ka mamuri d'ara èci, aa baku mae-manyèla. Miu hud'i pake ngangee madhera, ho me'a, na, miu neo d'ai too-lane dhu èci èèna ka di.

11 Te abhu dhèu nèti isi èmu ana hèni èdhi Kloe dhu mai peka dènge ja'a, na, ètu talora miu abhu dhèu cahag'e dhu patao-palaha taruu. 12 A'abhu ja'a sèmi ne'e: miu cahag'e peka na, “Ja'a re Paulus!” Aa cahag'e peka na, “Ja'a re Apolos!” Aa abhu kahèi dhu paka'uu, na, “Ja'a re Petrus!”^b Aa dhu leo hari peka na, “Ja'a ne, nanene dhoka Kristus di!”^c

13 Miu pangee tasamia, ee? Dhèu unu Kristus bisa boe mae-manyèla. Do, miu pangee, na, ja'a ka dhu madhe pala miu ètu aj'u palolo-palèbha? Aad'o! Do, lod'o ra sarani miu, rèngu pake ngara ja'a, ho miu j'aj'i dhèu unu ja'a, do? Bisa boe, si? 14 Ja'a manèngi makasi mi Ama Lamatua, te lod'o ja'a ètu èèna dènge miu, ja'a sarani boe dhèu ae. Dhu ja'a sarani ètu nèi dhoka Krispus dènge Gayus di.^d 15 Dènge j'ara ne'e, abhu boe dhèu dhu bisa peka na, “Ra sarani ja'a pake ngara Paulus, ka ja'a j'aj'i dhèu unu Paulus.” 16 (Ee, ja'a heka sanèd'e kèna. Ja'a sarani isi èmu Stefanus cahag'e kahèi. Te ngaa ja'a sanèd'e heka, abhu dhèu era dhu ja'a sarani, do aad'o.)^e

17 Te Kristus pua boe ja'a ho laku sarani dhèu. Kapua sasab'a ja'a, nuka peka-padhai dènge j'ara-j'ara lula-nèti Lii Lolo Be'a Na. Te ngaa ladhe ja'a lole mi dhèu, Nèngu d'èi boe ja'a peka mamèu ja'a, do, pad'elo j'ara-j'ara dhu kapai. Te ladhe ja'a padhai lii sèmi èèna, èèna pakura koasa nèti lii lolo mamadhe Kristus ètu aj'u palolo-palèbha.

18 Abhu dhèu dhu pangee, na, madha j'ara aa'i-aa'i dhu èdhi peka-padhai lula-nèti mamadhe Kristus ètu aj'u palolo-palèbha èèna, goa titu kèna. Te ngaa dhèu sèmi sèra, bèli-camèd'a cèri eele nèti Ama Lamatua. Aa te ngaa, bagi mi èdhi, mamadhe Kristus ne, sèna ka pad'elo koasa Lamatua ho patabuli èdhi nèti koasa sasala-sasigo èdhi. 19 J'ara ne'e nuka sèmi dhèu nèti lii padhai Ama Lamatua, ngara na Yesaya, suri tèke, peka na,

20 Uru èèna, mema Lamatua padhai lii sèmi èèna ka. Te ngaa limuri ne, tasamia hari? Dhèu d'èlu-mèu sèra, sèmi ngaa sa? Mese agama sèra, j'aj'i sèmi ngaa? Aa tuka tao lii langu sèra, tasa mera mia? Miu nanene sèku! Lamatua tao si nuka sèmi dhèu goa! Nèngu bete eele aa'i le mamèu dhu amo ètu d'ara kahadhu dhèu rai-haha ne, aa tao mamèu sèra nuka sèmi mèdha dhu dènge boe kab'ua.^g

21-22 Mamèu Ama Lamatua lènge aa'i mèu-mèu. Masi ka dhèu rai-haha ne pangee, na, rèngu d'èlu-mèu, te ngaa j'ara ngangee rèngu mesa ra d'ai mèka ho ra tadhe hua iia Ama Lamatua. Masi ka sèmi èèna, te ngaa Lamatua pake le mamèu Na ho bhoke j'ara hia dhèu rai-haha. Te uru èèna, Lamatua pangee, peka na, “Masi ka dhèu rai-haha pangee, na, dhèu pajuu-paleha Ja'a sèra goa, te ngaa tasamia èèna ka, hud'i Ja'a pua ku dhèu lasi lole dènge ra j'ara dhu lèke nèti Ja'a.” Te Lamatua pua dhèu rèti lii padhai Na ho lasi lole dènge dhèu. Na pama'ète nare le neo pake lii moa èèna, sèna ka dhèu bisa parcaya Ne. Nèngu pake j'ara ne, ho patabuli dhèu nèti koasa sasala-sasigo ra.

Te ngaa dhèu rai-haha ne pangee, na, j'ara Ama Lamatua ne, goa. Nèti èèna ka, rèngu pusi-pahae boe dhèu pajuu-paleha Na. Te dhèu Yahudi neo manèngi dhoka tadha-tadha malaa di, sèna ka bisa rèdhi koasa Lamatua. Aa dhèu Yunani neo nanene dhoka j'ara-j'ara hua iia dhu maso asa d'ara kahadhu ra, madhutu ngangee rèngu mesa ra. 23 Masi ka sèmi èèna, te ngaa èdhi dhu j'aj'i dhèu pajuu-paleha Lamatua lati peka dènge dhèu, na, “Lamatua pua le Kristus, nuka Dhèu dhu Nèngu pajaji mema karèi nèti uru ka, mai asa rai-haha ne. Ka dhèu leo paku pamadhe Ne ètu aj'u palolo-palèbha.” Ropa dhèu Yahudi tadèngi lii lolo ne'e, rèngu sisu, te madhutu a'abhu ra, Dhèu dhu Lamatua neo pua mai èèna, bisa boe madhe sèmi èèna. Ropa dhèu Yunani tadèngi lii lolo ne, ra pangee na, “Lii lolo dhèu goa!” 24 Te ngaa abhu dhèu dhu Ama Lamatua hag'e nare le ho j'aj'i dhèu unu Na. Rèngu sèra cahag'e nèti dhèu Yahudi, aa cahag'e nèti dhèu Yahudi boe. Madhutu a'abhu rèngu, mamadhe Kristus dhu pad'elo le mi rèngu, na, koasa Ama Lamatua dènge boe too-lane, aa mamèu Na risi aa'i mèu-mèu. 25 Masi ka dhèu rai-haha pangee, na, j'ara Lamatua ne unu dhèu goa, te ngaa Nèngu mèu risi eele rèngu. Aa masi ka ra pangee, na, Lamatua dènge boe koasa, te ngaa koasa Na dedha risi eele nèti rèngu.

26 A'ari pasue! Sèna ka miu bisa me'a mèu lii padhai ja'a ne, sanèd'e mamuri miu, lod'o Lamatua hag'e nare miu, ho j'aj'i dhèu unu Na. Madhutu a'abhu dhèu rai-haha, ètu talora aae miu, abhu boe dhèu ae dhu d'èlu-mèu, abhu boe dhèu ae dhu dènge pangaru kapai, aa abhu boe dhèu ae dhu a'ari ra dhu dènge kolongara kapai. 27 Te ngaa Lamatua hag'e nare dhèu dhu madhutu ngangee dhèu rai-haha, na, tabhènga ana liku, sèna ka pamakae dhèu dhu pangee, na, rèngu d'èlu-mèu. Aa Na hag'e nare dhèu dhu madhutu dhèu rai-haha, dhèu dhu dènge boe koasa, sèna ka pamakae dhèu dhu pangee, na, rèngu dènge koasa. 28 Hèia Na hag'e nare dhèu haha dhu dènge boe kolongara, aa dhu biasa dhèu pahaha si. Te Lamatua neo pake si, sèna ka dhèu dhu pangee, na, rèngu dhèu kapai, j'aj'i sèmi dhèu dènge boe pangaru ngaa-ngaa. 29 Dènge j'ara èèna, bèli-camèd'a abhu boe dhèu èci sa dhu bisa tèb'a kakara ètu madha Ama Lamatua, peka na, nèngu dhèu kapai.

30 Te Ama Lamatua mesa Na ka dhu bhoke pataleo j'ara, sèna ka miu bisa maso j'aj'i dhèu unu Kristus. Lamatua ka pake Yesus j'aj'i Dhèu dhu pala-bagi mamèu Na mi dedha èdhi. Yesus èèna ka dhu oti j'ara ho èdhi bisa padame dènge Ama Lamatua. Yesus èèna ka dhu tao èdhi ho bisa mamuri mola dènge mèci. Aa Nèngu ka dhu patabuli èdhi nèti koasa sasala. 31 Èèna nuka sèmi dhu suri tèke ètu d'ara Sasuri Mola-Mèci Ama Lamatua, peka na,