Abhu dhèu ètu talora juma'at dhu ad'u j'ara karehe dènge dhèu bhèni
5
Ja'a tadèngi, na, ca dhèu nèti juma'at miu dhu ad'u j'ara karehe dènge dhèu bhèni. Ngaa dhu nèngu ad'u-ue ne bhelu risi nèti dhèu dhu tadhe boe Ama Lamatua. Lula nèngu j'unu pa'èci dènge ina bhala na!a 2 Te ngaa miu pamone-pabhèni, sèmi juma'at miu mola-mèci le! Te ngaa madhutu iia-iia na, miu hud'i makae ku, aa d'ara pèd'a. Dhèu sèmi èèna, babège eele ne pakaj'èu!3 Masi ka èdhi pakaj'èu èci dènge èci, te ngaa d'ara ja'a dhoka ètu miu di. De ja'a pama'ète kore le lii langu dhèu dhu tao j'ara makae èèna, nuka sèmi ja'a dhu ètu èèna le. 4 Ja'a dènge hak ho pama'ète sèmi èèna, lula Yesus j'aj'i Kètu èdhi, aa ja'a dhèu pajuu-paleha Na. De miu hud'i madhèdi pa'èci ku ho pama'ète lii langu èèna pake kolongara Kètu èdhi. Aa d'ara ja'a sama-sama dènge miu kahèi. 5 Hèia miu hud'i saraka dhèu ne asa dhèu aae nidhu, sèna ka nèbhu-nèbhu na core eele j'ara bhelu-katub'a nèti d'ara na. Sèna ka ladhe Kètu èdhi mai hari, na, Nèngu patabuli dhèu ne'e nèti koasa sasala-sasigo na.
6 Be'a boe ladhe miu nged'e! Baku bhèlu, na, èdhi pakihu bibit roti ciki di ho bisa pakapai adonan aa'i-aa'i. Bibit roti, nuka sèmi bhabhelu dhèu. De ladhe soro tèke dhèu ad'u-ue bhabhelu ètu talora aae miu, bèli-camèd'a dhèu sarani leo sèra madhutu tao bhelu kahèi!b 7 Babège eele dhèu bhelu èèna nèti juma'at miu, sèmi uru èèna dhèu Yahudi sèra core eele ragi aa'i-aa'i nèti èmu rèngu sèra ho neo ra'a kalela Paska. Dènge j'ara ne, miu bisa j'aj'i hari nuka sèmi dhèu dhu d'ara na abhu heka bhelu-katub'a. Miu hud'i j'aj'i ku sèmi èèna. Uru èèna, dhèu roro ana kahib'i-kalèbho sèna ka tao badha korban kalela Paska. D'ai limuri ku, rèngu pamadhe Dhèu Mola-Mèci Ama Lamatua, sèna ka j'aj'i korban dhu pamèu d'ara èdhi.c 8 Uru èèna, dhèu Yahudi ra'a gee-j'ara nèti roti dhu pake boe ragi ètu d'ara lod'o kalela Paska. Limuri ne, èdhi nuka sèmi roti dhu pake boe ragi èèna. Nèti èèna ka, èdhi hud'i j'aga paie mamuri èdhi sèna ka baku tao ia ka j'ara-j'ara dhu bhelu, aa baku papèd'a d'ara dhèu leo. Èdhi hud'i padhai lii dhu lèke taruu. Hèia ropa dhèu ladhe rèdhi mamuri èdhi, ra peka na, tatao èdhi madhutu d'ara mola.d
9 Ca hari ni, ja'a suri kèdhi le sasuri dhu peka na, “Baku pa'èci dènge dhèu dhu tao j'ara makae dènge dhèu dhu dhèu èmu nèngu boe.” 10 A'abhu ja'a ne peka boe, na, miu baku pa'èci dènge dhèu aa'i-aa'i ètu rai-haha ne, dhu pusi-pahae boe Ama Lamatua, do dhèu manga'a, do dhèu kapod'e-kabèli dhu mana'u rare mèdha-panyau dhèu, do dènge dhèu sogo-tagu nidhu. Te ladhe sèmi èèna, miu hud'i tao iisi mi pakaj'èu nèti dhèu aa'i-aa'i ètu rai-haha ne. 11 Te ngaa dhu ja'a peka ne nuka: miu baku pa'èci dènge dhèu dhu peka na, nèngu dhèu sarani, aa te ngaa nèngu tao j'ara makae dènge dhèu dhu dhèu èmu nèngu boe, do dhu manga'a, do dhu sogo-tagu nidhu, do dhu pahahe kolongara dhèu, do dhu mahu, do dhu kapod'e mèdha-panyau dhèu. Èdhi baku pa'èci dènge dhèu sèmi sèra. Aa loe eele ka madhèdi mi'a-minu pa'èci dènge dhèu sèmi sèra!
12 Miu dènge hak ho lee mamuri dhèu sarani. Te ngaa ja'a dènge boe hak, sèna ka pama'ète lii langu dhèu dhu parcaya boe Ama Lamatua. 13 Te Ama Lamatua mesa Na ka bèli-camèd'a pama'ète hia dhèu dhu parcaya boe Ne. De miu baku bhèlu, ètu d'ara Sasuri Ama Lamatua dhu suri, peka na, “Dhèu dhu peka na, nèngu dhèu unu Lamatua, te ngaa loe boe tao bhabhelu, na, babège eele ne!”e