Dhèu unu Lamatua dhu pakako Lii Pajaji Hiu
3
Baku pangee, na, ji'i mulai padhai lii padedha iisi. Aad'o! Tao-tao miu pangee, na, ji'i sama sèmi dhèu leo dhu parluu ngèti sasuri hia miu dhu manèngi, ho miu sèmi ji'i dènge be'a, heka ji'i bisa pakako sasab'a-la'a ji'i, do? Do, ji'i parluu manèngi sasuri sèmi èèna kahèi nèti miu, ho ngèti asa dhèu leo? Aad'o, si? 2 Te sasuri ijin ji'i dhu abhu le. Sasuri ijin èèna nuka miu se. Te ji'i nge'a j'ara ae-ae nèti mamuri miu. J'ara se dhu tèke le ètu d'ara ji'i. Dhèu aa'i-aa'i bisa baca mamuri miu; nèti j'ara ne'e ra tadhe hua-hela nèti sasab'a-la'a èdhi. 3 Te dhu lèke le, na, miu nuka sèmi sasuri èci dhu Kristus suri nare le. Hèia Na pangèd'u mi ji'i. Kristus pake boe tinta ho Na suri sasuri ne, te ngaa Na pake Roh Mola-Mèci nèti Lamatua dhu Mamuri. Kristus kahèi dule boe Lii Lolo Be'a Na ètu hadhu kabela, nuka sèmi Ama Lamatua tao hia Musa. Te ngaa Kristus dule ètu d'ara èdhi dhu mamuri.a4 Ji'i bisa parcaya mi Ama Lamatua, na, j'ara se'e mema lèke tare'a, lula Kristus ka dhu pad'elo sèmi èèna. 5 Ladhe dhoka nèti ngi'u ji'i mesa mi, na, ji'i se unu boe koasa ho ad'u-ue ngaa-ngaa. Te koasa dènge hak dhu ètu ji'i, kapua na nèti Ama Lamatua. 6 Lamatua ka dhu ded'e ji'i j'aj'i dhèu sab'a Na, dhu lole dènge dhèu lula-nèti Lii Pajaji Hiu Na. Te ngaa Lii Pajaji Hiu Na èèna lula boe madhutu atora rupa-rupa, te ngaa lula-nèti dhèu pa'èki dènge Roh Mola-Mèci. Ladhe dhoka tao madhutu iia d'ara di atora sèra, èèna nuka sèmi d'ara rèngu dhu madhe le dènge unu boe mamuri dhu lèke, dhu ma'ète boe èèna. Te ngaa ladhe dhèu mamuri pa'èki dènge Roh Lamatua, nèngu unu mamuri dhu lèke.b
7 Uru-uru sèra, ropa Ama Lamatua dule Atora Na ètu hadhu kabela sèra, èèna mema be'a seli eele. Te ngaa masi ka dhèu madhutu aa'i Atora sèra, rèngu pacèri era dènge Ama Lamatua. Ka ropa Musa sèmi nare Atora se'e, rèhu na kaha'a. Nèti èèna ka, dhèu Isra'el bisa boe ladhe patae rèhu na. Te ngaa nèbhu-nèbhu ka, kaha'a ne ele.c 8 De ladhe dhu suri tèke ètu hadhu bisa abhu kale'e sèmi èèna, na, tasamia hari dènge ngaa dhu Roh Lamatua tao tèke le ètu d'ara èdhi? Tatu risi hari, si? 9 De Atora ne paj'uj'u, na, èdhi hud'i pasae tare ku huku madhe, ho pacèri nèti Lamatua, lula èdhi tao boe madhutu Atora aa'i-aa'i sèra. Masi ka sèmi èèna, te ngaa Atora ne èra taruu era nèti Lamatua. Te ngaa Roh Lamatua èra risi eele hari nèti èèna, te Nèngu ka pad'elo j'ara sèna ka èdhi pabe'a hari dènge Ama Lamatua. 10 De Atora dhu uru èèna dhèu pangee, na, dedha titu kèna, limuri ne dadedha na sèmi heka uru èèna, te ne'e ne abhu le dhu dedha risi. 11 Atora se dhu uru èèna, kaha'a nuka sèmi rèhu Musa, nèbhu-nèbhu ku heka kaha'a na ele. Musa dènge Atora se mema dedha tare'a, te ngaa dhu dedha risi hari, nuka dhu taha taruu dhu ma'ète boe.
12 Ji'i aa'i-aa'i mi nge'a mèu, na, Lii Pajaji Hiu Lamatua èèna taha taruu, dhu ma'ète boe ciki sa. Nèti èèna ka, ji'i padhai lii mola-mola dhu pa'abhe boe. 13 Ji'i tao boe sama sèmi Musa. Te nèngu hud'i pa'abhe ku rèhu na dènge bèla, sèna ka dhèu Isra'el bisa boe rèdhi rèhu na, ho re'a na, kaha'a èèna ele le, do dhae.d 14 Te ngaa Ama Lamatua tao ngangee dhèu Isra'el sèra topo. Te toke d'ai sange ne'e, ladhe rèngu baca ètu Sasuri Lamatua nèti Lii Pajaji dhu dhui èèna, nuka sèmi bèla èci dhu hutu nare kètu ra, ka ro'o boe nanene aa ro'o boe re'a. Abhu boe ca dhèu sa dhu bisa bhoke d'ara rèngu, sèna ka rèngu bisa re'a mèu. Dhodhoka Kristus mesa Na. 15 Toke d'ai sange ne'e, ladhe dhèu Yahudi baca Sasuri Musa, rèngu nanene, te ngaa re'a iia boe. Ne'e ne j'aj'i lula rèngu nanene pake boe d'ara ra, lula abhu dhu pa'abhe d'ara rèngu.
16 Te ngaa ladhe abhu dhèu dhu mulai parcaya Kètu èdhi, Yesus Kristus, na, Kristus ka dhu bhoke d'ara dhèu èèna, sèna ka nèngu bisa ne'a mèu. Èèna sama sèmi dhu suri tèke ètu d'ara Sasuri Lamatua, peka na, “Nèngu bhoke eele le bèla dhu pahutu rèhu na.”e 17 Ètu d'ara Sasuri Mola-Mèci Lamatua, lod'o Musa padhai lii, peka na, “Lamatua”, sasoa na, Roh Ama Lamatua. Ladhe èdhi abhu le Roh ne, Nèngu tao èdhi j'aj'i mi dhèu bebas. 18 Dènge j'ara sèmi èèna, Na tao èdhi asa tabha èra, sama sèmi Nèngu. Rèhu èdhi parluu heka pahutu. Aa èdhi pangee dhoka dadedha Lamatua èdhi, te Roh Na ka dhu soru-bara èdhi.