Ja'a pasanèd'e miu, na, Ama Lamatua dènge Yesus Kristus ka dhu pua-paleha ja'a. Nèti boe dhèu rai-haha ne. Yesus Kristus èèna, nuka Dhèu dhu Ama Lamatua pua mai le. Kristus madhe, te ngaa Lamatua pamamuri hari Ne. Hèia Ra pua-paleha ja'a, ho laku peka-padhai Lii Lolo Be'a dènge dhèu-dhèu.

3 Ja'a sabaj'a mi Ama èdhi, Ama Lamatua, aa Kètu èdhi, Yesus Kristus. Ja'a manèngi ho Rèngu pad'elo d'ara hua iia Ra mi miu, sèna ka miu mamuri padame èci dènge èci. 4 Kristus madhe, sèna ka saku eele aa'i sasala èdhi aa pakaj'èu èdhi nèti bhabhelu-katub'a rai-haha ne. Aa'i-aa'i dhu Kristus ad'u-ue sèra, madhutu dad'èi Ama Lamatua. 5 Nèti èèna ka, èdhi hud'i koa-kio Ne taruu! Dhu lèke kèna!

6 A'ari aa'i-aa'i! Ja'a ke'a heka tao miu sa mia! Ama Lamatua hag'e nare le miu, lula Na neo ho miu me'a d'ara hua iia Na. Te ngaa tasamia ka miu malai titu kèna lami madhutu lii lolo leo 7 dhu lèke boe? Uuru èèna, ja'a aj'a le dhu mola-mola Lii Lolo Be'a nèti Yesus Kristus. Te ngaa limuri ne, dhèu kapod'e-kabèli sèra mai pakapod'e Lii Lolo Be'a èèna, toke miu malaa-maloha.

8 Sanèd'e, ee! Te bèli-camèd'a Lamatua huku dhèu dhu aj'a Lii Lolo Be'a dhu sama boe dènge dhu ji'i aj'a-nori uru èèna. Masi ka dhèu nèti ji'i do, ana pajuu nèti sorga do, hud'i laa Lamatua hia ne mamadhe-mamopo! 9 Ji'i dhu peka le karèi nèti uru ka. Te ngaa limuri ne, ja'a neo hari pasanèd'e sèmi ne'e: ladhe abhu dhèu dhu aj'a leo nèti Lii Lolo Be'a dhu miu abhu le uru èèna, hud'i laa Lamatua hia ne mamadhe-mamopo.

10 Ja'a bani peka sèmi èèna, lula ja'a neo pakarej'e d'ara Ama Lamatua, neo boe pakarej'e dhèu rai-haha ne. Miu ngee, na, ja'a tenge kolongara nèti dhèu rai-haha, do? Aad'o! Te ladhe ja'a tao sèmi èèna, ja'a pantas boe j'aj'i ana pua-paleha nèti Kristus.

11 A'ari aa'i-aa'i! Ja'a peka paled'a dènge miu, na, Lii Lolo Be'a dhu ja'a aj'a-nori miu, nèti boe tatao dhèu rai-haha. 12 Ja'a abhu boe nèti dhèu rai-haha, aa abhu boe ca dhèu sa dhu aj'a-nori ja'a. Te Yesus Kristus mesa Na ka dhu bhoke sasoa na mi ja'a.

13 Tatu miu tadèngi le lii lolo nèti j'ara mamuri ja'a, lod'o ja'a madhutu agama Yahudi era, si? Lod'o èèna, ja'a paj'èra titu kèna dhèu-dhèu unu Lamatua, aa neo pa'ele iie aa'i si.^a 14 Aa lod'o èèna kahèi, d'ara ja'a neo titu kèna aj'a j'ara-j'ara agama Yahudi, risi nèti dhèu Yahudi dhu leo dhu ca dadena dènge ja'a. Aa ja'a ne maj'èni risi pakako ad'a bèi-baki èdhi dènge atora agama aa'i-aa'i.^b

15-16 Masi ka sèmi èèna, Ama Lamatua dhu pama'ète nare le ho patadhe Ana Na mi ja'a. Ina ku dhae nara iisi mèka ja'a, te Nèngu dhu hag'e mema le ja'a, lula Na neo pad'elo d'ara hua iia Na mi ja'a. Nèngu kahèi pua ja'a ho laku peka-padhai dènge dhèu Yahudi boe sèra. Lod'o Na pua ja'a èèna, laku boe manèngi a'abhu nèti dhèu leo.^c 17 Aa laku boe paraga dènge dhèu heka-dhèu heka Kristen dhu j'aj'i mema le dhèu pajuu-paleha Yesus ètu kota Yerusalem. Te ngaa laku dènge ka asa rai Arab. Èle ka, ja'a lèpa hari asa kota Damsik.

18 Hèia lalu eele tèlu tèu ku, heka laku paraga dènge Petrus^d ètu Yerusalem, ho pakarèi j'ara-j'ara nèti nèngu. Ka ja'a manubha taha canguru lèmi lod'o ètu nèi.^e

19 Lod'o èèna, ja'a paraga kahèi dènge Yakobis, ari d'èlu Lamatua Yesus. Te ngaa ja'a paraga boe dènge dhèu pajuu-paleha Lamatua dhu leo sèra. Dhoka dua ra di. 20 Ngaa dhu ja'a suri ne, mema tare'a sèmi èèna! Ja'a kapod'e boe! Lamatua ne'a aa'i!

21 Èle èèna, hèia ja'a laku asa propensi Siria dènge propensi Kilikia. 22 Lod'o èèna, dhèu-dhèu unu Kristus ètu propensi Yudea, dhae tadhe mèka ja'a. 23 Dhèu se'e dhoka tadèngi lii palolo, dhu peka na, “Dhèu dhu uru èèna paj'èra èdhi, limuri ne nuka aj'a Lii Lolo Be'a Kristus. Nèngu ka dhu uru èèna, neo pa'ele iie aa'i èdhi.” 24 Ropa ra tadèngi sèmi èèna, aa'i-aa'i ra koa-kio Ama Lamatua, lula ja'a parcaya le Yesus Kristus.