Ka Paulus tao tadha dènge kacui-aai na, hèia na padhai lii, aku nèngu na,

2 ‘‘Ama dhèu aae Agripa dhu ja'a pakab'ua. Ja'a rasa oto, lula ama hia ja'a tebho sèna ka ja'a padhai lii dènge miu, j'ara aa'i-aa'i dhu dhèu Yahudi se galaa mi ja'a. 3 Ja'a ke'a, na, ama me'a risi eele ad'a èdhi dhèu Yahudi, dènge j'ara madhe-muri èdhi. De ja'a manèngi ho ama nanene paie ku lii ja'a ne.

4 Karèi nèti ana iiki ka mai, ra aj'a-nori le ja'a, sèna ka mamuri madhutu ad'a èdhi dhèu Yahudi. Uru èèna, ra aj'a ja'a ètu rae. Èle èèna ka, ja'a sakola tabha hari ètu Yerusalem. Dhèu Yahudi ètu Yerusalem sèra re'a le j'ara mamuri dènge tatao ja'a. 5 Ladhe kètu agama se ro'o, rèngu bisa lolo, peka na, rèngu se ka dhu tadhe le ja'a karèi nèti uru èèna ka. Te ja'a ne maso partei agama Parisi kahèi. Dhèu aa'i-aa'i ra re'a, na, ji'i dhèu Parisi se, dhu kèpe pa'èra aa madhutu atora aa'i-aa'i nèti agama Yahudi.^a 6-8 Ja'a dènge dhèu aa'i-aa'i nèti canguru dua suku Isra'el, mate tae-tae ho Ama Lamatua tao madhutu lii moa Na. Lii moa èèna, dhu Na peka tèke le dènge bèi-baki èdhi karèi nèti uru ka. Ka toke d'ai sange ne'e, èdhi aa'i-aa'i ti manèngi-mangaj'i mèu-mèda, sèna ka lii moa Lamatua èèna j'aj'i ka. Isi lii moa èèna, peka na, Èèna na Nèngu neo pamamuri hari dhèu dhu madhe sèra.

Ama dhèu aae Agripa dhu ja'a pakab'ua. Lula ja'a parcaya, peka na, èèna na Lamatua pamamuri hari dhèu madhe, nèti èèna ka, rèngu se tao lii langu dènge ja'a. De ja'a karèi ku: tasamia ka ètu talora aae miu se, abhu dhu mo'o boe parcaya, peka na, Ama Lamatua bisa pamamuri hari dhèu dhu madhe le? Tatu Nèngu bisa!

9 Uru èèna, mema ja'a tao rupa-rupa j'ara ho palab'a dènge dhèu aa'i-aa'i dhu madhutu Yesus, dhèu Nasaret. 10-11 Lod'o èèna, kètu agama Yahudi sèra hia ja'a koasa, sèna ka laku paj'èra dhèu unu Yesus ètu mia-mia. Ja'a kèpe si, ka nuni kèti si asa Yerusalem, ho core si pamaso asa d'ara bèdho. Ja'a madhutu pama'ète sèna ka huku madhe si cahag'e. Ja'a laku kahèi asa d'ara èmu-èmu sabaj'a, ho paj'èra si. Aa ja'a neo pakaseti si, sèna ka rèngu tèke eele parcaya rèngu mi Yesus. Ae ka dhu ja'a laku magèi si dènge d'ara sagoro tob'i-tob'i. Sad'i ja'a tadèngi dhèu parcaya Yesus sèra ètu era èci, do masi ka d'ai rai leo èèna ka, ja'a laku magèla kore si!’’^b

12 Èle èèna ka, Paulus tuhu hari lii na, peka na, ‘‘Ca tèka, kètu agama Yahudi sèra hia ja'a sasuri koasa ho laku magèla dhèu parcaya Yesus ètu kota Damsik. Ka ja'a laku. 13 Ama dhèu aae Agripa! Ropa ji'i ètu talora j'ara era, pe d'ai lod'o titu mera sa, cag'ag'a laa, saraa aae èci dhu mariu nèti dedha-liru, senter lèke ja'a dènge anga ja'a sèra. 14 Ji'i aa'i-aa'i mi bèbha baa-baa ètu rai, lula saraa èèna mariu aae. Hèia ja'a tadèngi lii èci, pake lii Aram,^c peka na, ‘We, Saul! Nga tao ka èu loe boe paj'èra Ja'a ne? Bia titu kèna, ladhe èu sisu taruu dad'èi Ja'a.’ 15 Ja'a tadèngi lii èèna, te ngaa ladhe kèdhi boe dhèu èèna. Ka ja'a karèi, peka na, ‘Ama dhu padhai lii ne, cee ka èu?’

Hèia lii èèna dhaa mi ja'a, peka na, ‘Ja'a ne, Yesus, dhu èu paj'èra taruu èèna. 16 Saul! Kèd'i ka! Ja'a pad'elo iisi mi èu ne, sèna ka èu j'aj'i dhèu unu Ja'a. Èu hud'i lamu ku lole dènge dhèu aa'i-aa'i ra, ngaa dhu èu mèdhi le nèti Ja'a limuri ne. Ladhe èèna na, Ja'a pad'elo asa ae hari dènge èu, ngaa-ngaa dhu hiu, sèna ka lamu lole dènge dhèu aa'i-aa'i ra. 17 Èèna na, èu paraga dènge j'aj'èra ae-ae. Te ngaa Ja'a j'aga èu nèti dhèu dhu neo paj'èra èu, masi ka nèti dhèu Yahudi, do nèti dhèu Yahudi boe. Tare'a! Ja'a pua èu lamu asa dhèu dhu Yahudi boe. 18 Lamu bhoke musi madha si, sèna ka re'a, ho ra mamuri ètu d'ara saraa. Hèia ra tèke eele j'ara-j'ara mamuri ra dhu koe-kapengo sèra. Aa èu hud'i pad'elo kahèi, j'ara mamuri dhu mola. Lamu ho patabuli eele si nèti koasa dhèu aae nidhu, sèna ka mèti si asa Ama Lamatua. Dènge j'ara ne, Ama Lamatua saku eele sasala-sasigo aa'i-aa'i si. Ka rèngu j'aj'i dhèu unu Lamatua kahèi, èci èèna ka dènge dhèu-dhèu leo dhu Lamatua hag'e nare le, lula rèngu parcaya Ja'a. Èèna ka dhu Ja'a peka dènge èu, Saul!’’’

19 Hèia Paulus tuhu hari lii, peka na, ‘‘De ama dhèu aae. Sasab'a dhu ja'a sèmi kore unu ku nèti sorga, ja'a pakako ne. Toke d'ai doe ne'e ne, ja'a sab'a taruu, ae mèka ciki sa. 20 Hiu-hiu èèna, ja'a lole J'ara Mamuri Yesus mi dhèu Yahudi ètu Damsik sèra. Èle èèna ka, ja'a mai lole dènge dhèu Yahudi dhu ètu Yerusalem dènge palème propensi Yudea. Hèia ja'a laku palème kabarai dhèu dhu Yahudi boe sèra. Ja'a padhai lii pahuni boe dènge rèngu aa'i-aa'i ra, ho ra tèke eele j'ara mamuri rèngu dhu sala sèra, sèna ka ra saraka mamuri rèngu mi Ama Lamatua. Rèngu hud'i tao dhu be'a ku ètu d'ara mamuri rèngu hia mi dhèu leo kahèi, ho j'aj'i tadha, peka na, rèngu j'aj'i le dhèu hiu ètu Lamatua.^d 21 Lula sasab'a ja'a sèmi èèna, ka dhèu Yahudi sèra kèpe ja'a ètu d'ara Èmu Kapua Manèngi-Mangaj'i ètu Yerusalem. Rèngu neo pamadhe ja'a kahèi. 22 Te ngaa malo-malo ka Ama Lamatua soru ja'a. Nèti èèna ka, ja'a mamuri d'ai sange ne'e ne. De ja'a bisa titu ètu ne'e, ho lole dènge dhèu aa'i-aa'i ra, ana iiki-dhèu kapai, lula-nèti J'ara Mamuri Yesus. Ngaa dhu ja'a peka ne, aa'i-aa'i ra, èci èèna ka dènge lii a'aj'a-nanori nèti Musa dènge dhèu rèti lii padhai Lamatua uru sèra. 23 Rèngu aj'a-nori lula-nèti Kristus, Dhèu dhu Ama Lamatua moa neo hia mai. Dhu peka na, Kristus hud'i pasae ku j'aj'èra. Hèia Na madhe. Te ngaa èle èèna, Nèngu ka dhu j'aj'i dhèu uru dhu Ama Lamatua pamamuri hari. Nèngu ka dhu pasaraa dhèu Yahudi sèra, dènge dhèu-dhèu leo ètu rai-haha ne.’’^e

24 Ropa Paulus lole sasab'a na era, ka Festus cag'ag'a laa poro ète lii padhai na dènge lii mèdhu, peka na, ‘‘He! Paulus! Èu ne, tao-tao dhu huj'u le. Èu mèu ae ka, kahadhu èu, ele iie.’’

25 Te ngaa Paulus dhaa, peka na, ‘‘Ama gubernur dhu ja'a pakab'ua. Ja'a ne huj'u boe. Ngaa aa'i-aa'i dhu ja'a lole ne, mema lèke tare'a. Ja'a leko boe. 26 Ama dhèu aae Agripa unu na dhu ne'a le kahèi, ngaa dhu ja'a peka-padhai ne. Nèti èèna ka, ja'a bani padhai lii dènge boe pasili. Ja'a lèka ama dhèu aae dhu tadèngi le j'ara se'e aa'i-aa'i, lula ngaa dhu j'aj'i sèra, j'aj'i boe ètu era pahuni. Dhu peka na, Yesus dhu madhe èèna, muri hari le. Dhèu aa'i-aa'i ra re'a le j'ara ne. 27 Karèi nèti uru ka, dhèu rèti lii padhai Ama Lamatua sèra peka mema le j'ara ne'e. Ja'a bani patèka, peka na, ama dhèu aae parcaya kahèi, lii dhèu rèti lii padhai sèra, sina ma?’’

28 Ka dhèu aae Agripa, poro ète lii padhai lii na, aku nèngu na, ‘‘Ee, Paulus! Nèbhu boe, te èu pamaso ja'a j'aj'i dhèu sarani!’’

29 Te ngaa Paulus dhaa, ‘‘Sèmi ne'e, ama. Ja'a manèngi mi Ama Lamatua, sèna ka d'ara lai-lai ne, do ako nèbhu hari ciki, baku dhoka ama dhèu aae di mesa na, te ngaa dhèu aa'i-aa'i dhu deo ne'e ne tadèngi lii padhai ja'a ne, j'aj'i sama sèmi ja'a, nuka dhèu unu Yesus! Sad'i dhodhoka ama si baku j'aj'i dhèu bèdho, sama sèmi dhu ja'a pasae ne.’’

30 Ropa Paulus peka nare, ka dhèu aae Agripa dènge ana hèni na Bernike, gubernur Festus, dènge dhèu kapai aa'i-aa'i sèra, kèd'i titu, hèia lèpa aa'i.

31 Ropa rèngu d'ai li'u, ra padhue, aku rèngu na, ‘‘Dhèu ne, tao sala boe ngaa-ngaa dhu palèke dènge huku madhe, do pamaso ne asa d'ara bèdho!’’ 32 Èle èèna ka, dhèu aae Agripa peka dènge gubernur Festus, aku nèngu na, ‘‘Kasian. Dhèu ne manèngi le ca'e asa paredha dedha mi dhèu aae kapai ètu Roma. Ladhe aad'o, na, lii langu ne èle le, aa bisa patabuli ne.’’