Gubernur Festus parisa lii langu Paulus
25
Lod'o èèna, gubernur hiu, Festus, pidha asa Kaisarea, ho neo pakako paredha na. Nèngu pea ètu èèna dhoka tèlu lod'o di, ka na la'e taruu asa Yerusalem. 2 Ètu nèi, kètu agama Yahudi, dènge dhèu heka-dhèu heka ad'a Yahudi sèra, mai paraga sèna ka neo patadha dènge gubernur hiu ne. Rèngu rèti kahèi dènge lii galaa rèngu mi Paulus ètu d'ara lii padhue-padhai rèngu. 3 Ra manèngi kahèi, ladhe bisa, na, gubernur pua dhèu nèngu sèra, rèti hari Paulus ho lèpa asa Yerusalem. Te ngaa rèngu pare'a lii, neo pamadhe Paulus ètu talora j'ara.4 Te ngaa gubernur dhaa, aku nèngu na, ‘‘Sèmi ne'e ku, ama-ama! Hud'i laa ra taha ne ètu Kaisarea. Te ja'a neo lèpa asa nèi d'ara lai-lai ne. 5 De ladhe nèti miu dhu abhu koasa ho uri lii langu ne, na, rèngu pakèd'i palere dènge ja'a asa Kaisarea. Ladhe tare'a dhèu ne'e tao sala ngaa, miu bisa tao lii dènge ne ètu nèi.’’
6-7 Èle èèna ka, Festus pea pe d'ai canguru lod'o sa ètu Yerusalem, heka na lèpa asa Kaisarea kèna. Lod'o èèna, abhu pèri-pèri dhèu Yahudi dhu madhutu dènge nèngu, d'ai nèi. Asa bèli èèna, hèia gubernur mulai parisa lii langu èèna. Ka na pua dhèu lasi rare Paulus mai asa madha na.
Ropa Paulus maso asa èèna, dhèu Yahudi se kèd'i titu rai-reo rare ne, ka ra mulai core sasala ae-ae mi nèngu. Te ngaa rèngu bisa boe pad'elo bukti èci sa hèi.
8 Hèia Paulus siri iisi na, aku nèngu na, ‘‘Ama gubernur. Ja'a tao boe ngaa-ngaa dhu nèti bhabhelu-katub'a. Ja'a tao boe kahèi j'ara èci sa dhu palab'a dènge agama Yahudi ji'i. Ja'a pakaj'alu boe Èmu Kapua Manèngi-Mangaj'i Ama Lamatua ètu Yerusalem. Aa ja'a tao boe kahèi ngaa-ngaa dhu palab'a dènge j'ara-j'ara paredha Roma.’’
9 Te ngaa lula gubernur neo nare d'ara dhèu Yahudi sèra, ka na karèi Paulus, aku nèngu na, ‘‘Èu ngee tasamia? Èu mo'o, do aad'o, ladhe ja'a uri lii langu èu ne ètu Yerusalem?’’
10 Ropa tadèngi lii karèi gubernur sèmi èèna, hèia Paulus dhaa, aku nèngu na, ‘‘Ama gubernur. Ja'a ne, ana kabarai Roma. Ka limuri ne, ja'a titu ètu madha ama gubernur, dhèu paredha Roma, dhu dènge hak ho parisa lii langu ja'a madhutu atora. De ja'a ko'o boe laku asa Yerusalem, ho pama'ète lii ja'a ètu nèi. Ama dhu me'a unu mu, peka na, ja'a ne tao boe sala ngaa-ngaa ho lab'a dhèu Yahudi se'e. 11 De ladhe tare'a-re'a ja'a tao sala ngaa-ngaa dhu palèke dènge huku mamadhe, ja'a sèmi kore. Te ngaa ladhe ngaa dhu rèngu peka na, lèke boe madhutu atora Roma, na, abhu boe ca dhèu sa dhu soro ja'a asa d'ara adhe-aai dhèu se'e. Rèngu dhodhoka tenge j'ara di, sèna ka neo pamadhe ja'a. De madhutu hak ja'a, ja'a manèngi sèna ka lii langu ja'a ne hia asa dhèu aae kapai, Keser, ètu kota Roma. Hud'i nèngu unu ku j'ue lii ja'a ne!’’
12 Ropa tadèngi Paulus manèngi sèmi èèna, ka gubernur padhue-padhai dènge anga na dhu madhutu uri lii langu èèna. Èle èèna ka, na peka dènge Paulus, aku nèngu na, ‘‘Lula èu manèngi le ca'e banding asa dhèu aae kapai, de èu hud'i lamu ku asa Roma.’’ Peka èle sèmi èèna ka, gubernur katange eele sidang èèna.
Festus manèngi a'abhu dhèu aae Agripa lula-nèti lii langu Paulus
13 Èle èèna ka, dhèu aae dhèu Yahudi, ngara na Agripa,a dènge ana hèni na, ngara Bernike, mai asa Kaisarea. Rèngu dua ra mai sèna ka hia hormat mi gubernur hiu. 14 Rèngu manubha pèri-pèri lod'o dènge gubernur Festus. Ca tèka, Festus lole lii langu Paulus dènge rèngu dua ra. Ka na peka, aku nèngu na, ‘‘Ama dhèu aae! Ètu Kaisarea ne'e, ji'i taha dhèu èci, ngara na Paulus. Uru èèna, gubernur dhui abhu boe lod'o ho pama'ète lii langu na. 15 D'ara lai-lai ne, lod'o ja'a ètu Yerusalem, kètu agama Yahudi dènge dhèu heka d'ara rai sèra, mai galaa sasala Paulus, ka ra manèngi ja'a sèna ka huku mema ka. 16 Te ngaa ja'a peka dènge rèngu, aku ja'a na, ‘Madhutu atora paredha Roma, ja'a hud'i parisa uru ku lii langu, heka hia huku kèna. Aa dhèu dhu tao lii langu sèra, hud'i mai patoo madha dènge madha kahèi. Sèna ka ja'a neo tadèngi ku sasala ngaa dhu miu pasale ne. Aa nèngu kahèi abhu tebho sèna ka siri iisi na. Dènge j'ara sèmi èèna ka, ja'a heka pama'ète lii langu na, ladhe na sala, ja'a huku ne.’ 17 Lod'o ja'a lèpa asa Kaisarea, abhu pèri-pèri dhèu Yahudi dhu palere dènge ja'a asa ne'e. Asa bèli èèna, ja'a parisa dènge lii ne. Ka ja'a hia rèti Paulus mai asa madha ja'a, sèna ka ja'a neo nanene j'aj'aj'i lii langu ne tasa mera mia. 18 Hèia dhèu-dhèu Yahudi se titu, ho ra lolo sasala Paulus èci-èci. Te ngaa, ngaa dhu ra peka sèra bia boe sèmi dhu ja'a ngee. 19 Rèngu se dhodhoka patasala ètu j'ara-j'ara agama rèngu di. Te rèngu pab'ala dènge Paulus, lula-nèti Dhèu èci, ngara na Yesus. Madhutu rare'a dhèu Yahudi, Yesus èèna, madhe le. Te ngaa Paulus dènge èra, peka na, Yesus mamuri hari le. 20 Rèngu pasisu sèmi èèna, te ngaa, lula ja'a ne dhèu hiu, ka ja'a ke'a mèka uri lii agama ne, tasamia. Nèti èèna ka, ja'a karèi Paulus, peka na, ‘Tasamia ladhe ja'a parisa lii langu èu ne ètu Yerusalem nèi?’ 21 Te ngaa na sèmi nare boe. Nèti èèna ka, na manèngi ca'e asa paredha dedha mi dhèu aae kapai ètu Roma. Ka ja'a patabuli boe ne, mate ja'a abhu lod'o ho rèti ne la'e asa Roma.’’
22 Ropa tadèngi lii lolo Festus sèmi èèna, hèia dhèu aae Agripa peka, aku nèngu na, ‘‘Be'a risi ja'a neo tadèngi unu ku, nèti dhèu èèna.’’
Hèia Festus dhaa, na, ‘‘Bisa! Bèli ku, pe ja'a uri ho ama nanene unu mu nèti dhèu èèna.’’
Dhèu aae Agripa neo nanene lii padhai Paulus
23 D'ai bèli èèna, gubernur Festus uri ho dhèu aae Agripa bisa nanene lii padhai Paulus. Na uri kahèi, sèna ka dhèu ae nanene Paulus. Nuka: komedhaa-komedhaa sordad'u, dènge dhèu-dhèu kapai ètu kota Kaisarea. Èle èèna ka, dhèu aae Agripa dènge Bernike maso dènge mèdha-papake dhèu aae. Ka dhèu aa'i-aa'i sèra pakab'ua si. Ropa rèngu pakaboko tesa-tesa le, hèia gubernur pua rèti Paulus asa d'ara.
24 Hèia ra rèti Paulus asa d'ara la'e. Ka gubernur bhoka hèb'a, peka na, ‘‘Ama dhèu aae Agripa, ama-ama, dènge miu tamu aa'i-aa'i mi dhu ja'a pakab'ua. Dhèu ne'e ne, ngara na Paulus. Pèri-pèri ama dhèu Yahudi sèra tao lii langu dènge ne. Ka abhu dhu mai asa ja'a, rèngu cahag'e nèti Yerusalem, aa cahag'e nèti era ne'e, mai laka-seti ja'a, peka na, dhèu ne'e ne, bisa heka hia ne mamuri. 25 Nèti èèna ka, ja'a parisa ne. Te ngaa ja'a abhu boe sasala dhu pamèci dènge huku madhe. Te ngaa, lula nèngu unu na dhu manèngi le, ca'e asa paredha dedha ètu Roma, nèti èèna ka, to'o do to'o boe, ja'a hud'i hia rèti ne ku la'e asa Roma. 26-27 Ladhe ja'a hia lere rèti ne, ja'a hud'i ku tao sasuri. Te ngaa deo ne'e ne, ja'a suri sasuri ne tasamia, hia mi dhèu aae kapai nèi? De nèti èèna ka, ja'a pakaboko ama-ama aa'i-aa'i, sèna ka miu nanene lii langu na. Ropa tadèngi mere lii na, ja'a manèngi sèna ka ama dhèu aae Agripa, nori ja'a, sèna ka ja'a bisa suri ngaa dhu palèke dènge ngangee dhèu aae kapai nèi. Ja'a ngee, na, lèke boe ladhe ja'a pa'adhu lii langu ne asa dhèu aae kapai la'e, te ngaa peka boe sasala dhu dhèu ne ad'u-ue.
D'ai sange ne'e ka, lii padhai lii ja'a. Makasi!’’