Saulus j'aj'i dhèu madhutu Yesus
9
Lod'o èèna, Saulus paj'èra taruu dhèu-dhèu dhu madhutu Yesus. Na tenge j'ara ho neo pamadhe si. Nèti èèna ka, la'e asa kètu kapai risi agama Yahudi, 2 ka manèngi pèri-pèri sasuri koasa, ho nèti la'e asa ama-ama èmu manèngi-mangaj'i agama Yahudi ètu kota Damsik nèi. Na manèngi, ladhe nèngu rage dhèu dhu madhutu J'ara Mamuri Yesus ètu nèi, bhèni-mone, nèngu kèpe ho èki si, sèna ka ère nèti hari si asa Yerusalem.3 Ropa sèmi nare sasuri koasa sèra, ka nèngu dènge angalai na lasi asa kota Damsik. Ropa oe dètu dènge kota èèna, cag'ag'a laa, saraa puru nèti dedha-liru sarimu nare Saulus. 4 Ka na bèbhe rai la'e. Hèia na tadèngi lii èci padhai lii dènge ne, peka na, ‘‘Saulus! Saulus! Nga tao ka èu paj'èra Ja'a sèmi ne'e?’’
5 Hèia Saulus karèi, aku nèngu na, ‘‘Ama dhu padhai lii ne, cee ka èu?’’
Lii èèna, peka hari, ‘‘Ja'a ne, Yesus, dhu èu paj'èra aae ne. 6 Kèd'i, ho lamu asa d'ara kota. D'ai nèi, pe Ja'a peka dènge èu, ngaa dhu èu hud'i tao.’’
7 Aa angalai nèngu sèra tadèngi kahèi lii èèna, te ngaa rèdhi boe cee-cee. Dhèu se'e malaa, ka re'a heka padhai lii ngaa-ngaa.
8 Hèia Saulus kèd'i titu. Ka na neo bhoke musi madha na, te ngaa nèdhi heka ngaa-ngaa. Ka ra sarad'e rèti ne asa d'ara kota Damsik. 9 Ètu d'ara tèlu lod'o, na bisa boe nèdhi ngaa-ngaa. Aa na'a-ninu boe ngaa-ngaa kahèi.
10 Ètu d'ara kota èèna, abhu dhèu unu Lamatua Yesus èci, ngara na Ananias. Lamatua mai pad'elo iisi dènge ne, sama sèmi tanila sa. Na paroa, peka na, ‘‘Ananias!’’
Hèia Ananias dhaa, peka na, ‘‘Oo, Lamatua!’’
11 Lamatua peka, na, ‘‘Nanene ku! Èu lamu tenge ku dhèu unu Ja'a èci. Kako lamu asa j'ara èci, dhu ngara na J'ara Mola. Lamu asa èmu dhèu èci, ngara na Yudas. Ètu èèna, karèi rèngu dhèu èci nèti kota Tarsus, ngara na Saulus. Dhèu èèna sabaj'a era. 12 Ja'a hia ne tanila kahèi, na, èèna na dhèu mone èci neo mai paraga dènge ne, nuka èu, Ananias. De lamu ho bane ai èu mi nèngu, sèna ka na bisa nèdhi hari.’’
13 Te ngaa Ananias b'ala, aku nèngu na, ‘‘Sèmi ne'e, Lamatua! Ji'i tadèngi le lii palolo lula-nèti dhèu èèna. Nèngu èèna ka dhu paj'èra dhèu-dhèu unu Lamatua ètu Yerusalem. Nèti èèna ka, dhèu bani heka bhodho baboro! 14 Limuri ne, ji'i tadèngi hari, peka na, kètu agama Yahudi sèra hia ne koasa ho mai kèpa dhèu-dhèu dhu madhutu J'ara Mamuri Lamatua Yesus.’’
15 Te ngaa Lamatua padhai lii hari dènge Ananias, peka na, ‘‘Masi ka sèmi èèna, èu hud'i lamu ku! Te Ja'a hag'e kore nèngu le, ho na bhoke j'ara, sèna ka na lole Lii Lolo Be'a Ja'a hia dhèu kabarai leo sèra, hia dhèu aae-dhèu aae, dènge dhèu Isra'el kahèi. 16 Aa èèna na, Ja'a pad'elo dènge ne, sèna ka nèngu ne'a mema j'aj'èra tasa mera mia ka dhu bèli-camèd'a nèngu pasae, lula nèngu madhutu Ja'a.’’
17 Tadèngi nare lii padhai lii Lamatua, hèia Ananias la'e ka maso asa èmu èèna. Ka na bane ai na mi Saulus, peka na, ‘‘Angalai Saulus! Lamatua Yesus dhu pad'elo iisi mi èu ètu talora j'ara lod'o èu mai asa ne'e, Nèngu èèna ka dhu pua ja'a mai paraga dènge èu ètu ne'e. Na pua ja'a kahèi ho sabaj'a dènge tao kacui-aai mi dedha èu, sèna ka èu bisa mèdhi hari. Aa Na d'èi ho èu sèmi more Roh Na dhu Mola-Mèci.’’
18 Cag'ag'a laa, Saulus rasa ngaa èci bèbhe eele nèti musi madha nèngu, sèmi nai i'a. Hèia na ladhe nèdhi hari. Ka na kèd'i, aa ra sarani dènge ne. 19a Èle èèna ka, na na'a-ninu. Ka na abhu hari a'èra.
Saulus lole Lii Lolo Be'a ètu kota Damsik
19b Ka Saulus pea hari dènge dhèu unu Lamatua Yesus pèri-pèri lod'o ètu kota Damsik. 20 Aa la'e asa d'ara èmu manèngi-mangaj'i dhèu Yahudi, ka na peka dènge si, aku nèngu na, ‘‘Mi nanene paie! Mema Yesus tare'a-re'a Ana Ama Lamatua.’’
21 Ka dhèu aa'i-aa'i ra malaa dènge bingu, ropa ra tadèngi Saulus padhai lii sèmi èèna. Hèia ra papeka, aku rèngu na, ‘‘Nèngu ka dhu paj'èra dhèu unu Yesus ètu Yerusalem, sina ma? Aa mamai ne, sèna ka na kèpe dhèu se'e ho nèti asa kètu agama Yahudi sèra! Na, tasamia ka ne?’’
22 Te ngaa Saulus padhai lii taruu, aku nèngu na, ‘‘Yesus èèna, nuka Dhèu dhu Ama Lamatua moa nèti uru, ho pua Na mai.’’ Saulus padhai lii dènge d'èlu-mèu aa d'ara adhu, toke dhèu Yahudi sèra segi boe nèngu. Nèti èèna ka, a'èra Saulus asa tabha kapai.
23 Nèbhu boe ka, dhèu Yahudi sèra sanunu ho neo pamadhe ne. 24 Te ngaa Saulus ae nare ngangee aapa rèngu èèna, dhu peka na, ra mate ne mèu-mèda ètu hèb'a-hèb'a tebho kota, ho ra neo pamadhe ne. 25 Ka ca tèka hari, d'ara mèda, angalai Saulus pèri-pèri dhèu mai rare ne, ka ra papuru ne ètu d'ara kadhari cue, re karasa li'u tebho kota. Dènge j'ara èèna ka, nèngu rai nèti kota Damsik.a
Saulus la'e asa Yerusalem
26 Èle èèna ka, Saulus la'e asa Yerusalem. D'ai nèi, ka na neo pa'èci dènge dhèu unu Lamatua Yesus. Te ngaa dhèu sèra madha'u dènge nèngu, lula ra pangee, na, nèngu dhoka sangaja di, j'aj'i dhèu parcaya dhu madhutu Lamatua Yesus. Èle èèna na, nèngu kabèli hari ho neo kèpe rèngu. 27 Te ngaa dhèu èci, ngara na Barnabas, nèngu ka dhu nèti Saulus ho patadhe mi dhèu pajuu-paleha Lamatua ètu èèna. Na lole ngaa dhu j'aj'i mi dedha Saulus ètu talora j'ara. Na peka, na, Saulus paraga le dènge Lamatua Yesus kahèi. Aa Yesus padhai lii dènge nèngu kahèi. Na lolo kahèi babani Saulus padhai lii J'ara Mamuri Lamatua Yesus mi dhèu Damsik sèra.
28 Ropa ra tadèngi rare Barnabas peka sèmi èèna, heka ra sèmi rare Saulus kèna. Ka ra pea pa'èci ètu kota Yerusalem. Saulus bani lole Lii Lolo Be'a Lamatua Yesus kahèi, sad'i dènge dhèu cee èèna ka. Nèngu madha'u boe. 29 Na pakarèi dènge pèri-pèri dhèu Yahudi dhu padhai lii Yunani. Te ngaa rèngu ro'o boe sèmi rare lii padhai lii nèngu. Nèti èèna ka, ra tenge j'ara neo pamadhe ne. 30 Ropa dhèu unu Lamatua Yesus re'a ngangee karehe dhèu sèra, hèia lasi rare Saulus rèti asa kota Kaisarea. D'ai nèi, ka ra pua ne lèpa asa kota na, Tarsus.
31 Èle èèna ka, dhèu unu Lamatua Yesus ètu propensi Yudea, propensi Galilea, dènge propensi Samaria, mamuri dènge mera-milu. Rèngu asa tabha ae. Rèngu mamuri madhutu dad'èi Lamatua. Ka Roh Lamatua dhu Mola-Mèci pa'èra d'ara rèngu.
Petrus puri-pa'èle dhèu mone èci ètu rae Lida
32 Lod'o-lod'o sèra, Petrus biasa kako palème asa mia-mia, ho pa'èra d'ara dhèu unu Lamatua sèra. Ca lod'o ka na la'e ngad'o rèngu ètu rae Lida. 33 Ètu nèi, na paraga dènge dhèu mone èci, ngara na Eneas. Dhèu ne, karuku aru tèu kèna, ka na kèd'i nare heka nèti era j'unu na.
34 Hèia Petrus peka dènge ne, aku nèngu na, ‘‘Eneas! Limuri ne, Lamatua Yesus Kristus pa'èle èu. De kèd'i ka! Lalau paie era j'unu èu!’’
Nanene nare sèmi èèna, hèia na kèd'i dènge ka. 35 Ropa ladhe rèdhi Eneas èle le, dhèu aa'i-aa'i ètu rae Lida dènge rae Saron parcaya Lamatua Yesus.
Petrus pamamuri hari Tabita
36 Lod'o èèna, dhèu bhèni èci, ngara na Tabita, pea dètu dènge nebhe dhasi ètu kota Yope. (Madhutu lii Yunani ra paroa bhèni ne, ngara na Dorkas. Sasoa na ‘rusa’.)b Bhèni ne parcaya Lamatua Yesus. Tatao bhèni ne be'a mi dedha dhèu leo, aa na tema laladhe dhèu j'èra. 37 Lod'o èèna, Tabita ne pèd'a aae, ka madhe. Ka dhèu padiu ne èi. Èle èèna ka, ra papake ne mèdha-papake, ka ra paj'unu ne ètu kama dedha. 38 Lod'o èèna, dhèu se tadèngi, na, Petrus ètu rae Lida, dhu kaj'èu nèti kota Yope, sèmi kako haga na ele boe ca'èta lod'o sa. Ka ra pua dhèu dua lasi paroa Petrus, peka na, ‘‘Ama! Ji'i manèngi ama mai ku lai-lai asa kota Yope.’’
39 Tadèngi nare sèmi èèna, ka Petrus kèd'i dènge ka, la'e madhutu rèngu. D'ai nèi, ka na maso taruu asa d'ara kama Tabita. Ètu d'ara kama na, pènu le dènge bhèni balu dhu mai tangi. Bhèni balu sèra pad'elo mi Petrus kodho dènge mèdha-papake leo, dhu Dorkas j'au hia rèngu, lod'o na mamuri era.
40 Hèia Petrus pua si kalua nèti kama. Ka na patitu urutuu ho na manèngi-mangaj'i. Hèia na ladhe asa dhèu madhe ne, ka na padhai lii, peka na, ‘‘Tabita! Kèd'i ka!’’ Cag'ag'a laa, Tabita bhoke musi madha na. Ropa ladhe nèdhi Petrus, ka na kèd'i madhèdi. 41 Hèia Petrus kèpe kacui-aai na, ho hia ne titu. Ka Petrus paroa bhèni balu sèra dènge dhèu-dhèu leo ètu èèna, ho na hia bhèni dhu mamuri hari ne asa rèngu.