Paulus siri iisi na
22
Hèia Paulus mulai ded'e lii padhai, aku nèngu na, ‘‘Ama-ama, dènge mone-aanga angalai aa'i-aa'i! Ja'a manèngi, sèna ka miu nanene ku ja'a, te ja'a neo siri iisi ja'a.’’2 Lod'o èèna, dhèu ae ka nanene Paulus padhai lii tao lii rèngu. Ka ra mau-mau dènge ka, ho neo nanene paie-iie lii padhai lii na. Hèia na tuhu, peka na, 3 ‘‘Sèna ka miu me'a, ja'a ne dhèu Yahudi. Ina ku nara iisi ja'a ètu kota Tarsus, ètu propensi Kilikia. Te ngaa ja'a kapai ètu ne'e, ètu kota Yerusalem. Dhu aj'a ja'a, nuka mese aae ètu ne'e, ngara na Gamaliel. Na aj'a ja'a atora aa'i-aa'i nèti baki Musa toke d'ai lutu-sela. Ja'a maj'èni madhutu Ama Lamatua kahèi, sama sèmi miu aa'i-aa'i mi.a 4 Lod'o dhu uru sèra, ja'a loe boe laku paj'èra dènge pasusa dhèu-dhèu dhu madhutu J'ara Mamuri Yesus. Ja'a nuni kèti si, bhèni-mone, mai asa Yerusalem ne. Ho èèna na, core asa d'ara bèdho lasi. Lod'o èèna, abhu kahèi dhu madhe. 5 Kètu kapai risi agama Yahudi, dènge ama agama Yahudi dhu leo sèra, rèngu aa'i-aa'i ra re'a, ngaa dhu ja'a peka ne, lèke tare'a sèmi èèna! Ja'a padhai lii hèb'a hua boe. Te rèngu sèra ka dhu pangèd'u ja'a sasuri koasa, ho laku kèpe dhèu dhu madhutu Yesus sèra, toke d'ai kota Damsik. Ètu nèi, ja'a neo kèpe si, ho ère kèti mai asa Yerusalem. Madhutu dad'èi ja'a, hud'i laa dhèu-dhèu dhu pama'ète lii langu agama sèra ka dhu huku si.’’b
Paulus lole ngaa-ngaa dhu nèngu paraga
6 Hèia Paulus tuhu hari lii padhai lii na, peka na, ‘‘Nèti èèna ka, ja'a pakèd'i laku asa Damsik, ho tenge si ètu nèi. Pe d'ai lod'o titu mera sa, ji'i oe d'ai ka d'ara kota èèna. Cag'ag'a laa, saraa aae èci senter lèke ja'a nèti dedha-liru mai. 7 Hèia ja'a bèbhe baa-baa ètu rai, ka ja'a tadèngi lii èci, peka na, ‘He Saulus! Nga tao ka èu paj'èra ja'a sèmi ne'e ne?’ 8 Ja'a mema tadèngi lii èèna, te ngaa ladhe kèdhi boe dhèu. Hèia ja'a karèi, aku ja'a na, ‘Ama dhu padhai lii ne, cee ka èu?’
Ka lii èèna dhaa, aku Nèngu na, ‘Ja'a ne'e ka Yesus, dhèu Nasaret, dhu èu paj'èra!’ 9 Aa dhèu-dhèu dhu kako palere dènge ja'a, rèngu rèdhi saraa èèna kahèi, te ngaa tadèngi boe lii.
10 Ka ja'a b'ala lii èèna, aku ja'a na, ‘Ladhe sèmi èèna, ja'a hud'i tao tasamia hari ku?’
Hèia lii ne peka, aku nèngu na, ‘Kèd'i ka, ho lamu asa d'ara kota. Pe d'ai nèi, Ja'a heka peka dènge èu kèna ngaa dhu èu hud'i tao.’
11 Ropa tadèngi èle lii èèna, ja'a kèd'i titu. Te ngaa ja'a kèdhi heka ngaa-ngaa, lula saraa aae èèna madèka titu kèna. Ka anga ja'a sèra, sarad'e rèti ja'a asa d'ara kota Damsik.
12 Ètu èèna, abhu dhèu èci, ngara na Ananias. Nèngu ne, ca dhèu dhu d'ara mola, aa kèpe pa'èra atora nèti baki Musa. Dhèu Yahudi aa'i-aa'i dhu pea ètu d'ara kota èèna, ra d'èi ne, dènge pakab'ua ne kahèi. 13 Na mai tenge ja'a, ka na lii, aku nèngu na, ‘Saulus! Musi madha èu be'a le! De bhoke ka musi madha èu.’ Ropa na padhai lii nare, ka ja'a ded'e rèhu ja'a, ka ja'a kèdhi dènge ne ka. 14 Hèia na aj'a ja'a, aku nèngu na, ‘Ama Lamatua dhu bèi-baki èdhi manèngi-mangaj'i, Nèngu èèna ka dhu hag'e nare le èu. Sasab'a èu ka, nuka èu hud'i me'a pabe'a-be'a ku dad'èi Na. Aa èu hud'i tadhe ku Yesus, dhu karèi nèti uru ka mai, èdhi ale Ne, ‘‘Dhèu Mola-Mèci’’. Limuri ne, Lamatua bhoke le j'ara, ho èu tadèngi unu mu nèti Yesus. 15 Nèngu unu Na ka dhu hag'e nare èu, sèna ka lamu lole peka dènge dhèu ètu mia-mia Lii Lolo Be'a Na. Èu hud'i lole aa'i ku, ngaa-ngaa dhu èu mèdhi dènge musi madha unu mu, aa aa'i-aa'i dhu èu tadèngi nèti Nèngu. 16 Èu mate ia ka panèbhu. Lamu sèna ka manèngi ho ra sarani mu. Sena ka j'aj'i mi tadha dhu peka na, èu manèngi le sèna ka Lamatua Yesus saku eele sasala-sasigo èu aa'i-aa'i ra.’’’
Ama Lamatua pua Paulus ho nèti Lii Holo-Nori Na mi suku Yahudi boe sèra
17 ‘‘Èle èèna ka, ja'a lèpa asa Yerusalem. Ca lod'o ja'a laku sabaj'a asa d'ara Èmu Kapua Manèngi-Mangaj'i. Ropa ja'a sabaj'a era, Lamatua hia ja'a kèdhi ètu d'ara tanila. 18 Ja'a ladhe kèdhi Yesus. Hèia Na paredha ja'a, peka na, ‘Limuri ne, èu hud'i tèke eele ka kota Yerusalem ne! Te dhèu ètu se'e se, ro'o boe sèmi rare ngaa dhu èu aj'a rèngu lula-nèti Ja'a.’
19 Te ngaa ja'a ko'o boe sèmi lii paredha èèna, lula uru èèna, ama agama sèra mema d'èi le ja'a. Ka ja'a dhaa, peka na, ‘Sèmi ne'e, Lamatua! Rèngu aa'i-aa'i dhu re'a le, uru èèna ja'a ka dhu maso-kalua èmu sabaj'a ètu mia-mia, ho kèpe aa game dhèu dhu parcaya mi Lamatua sèra. 20 Rèngu re'a kahèi, lod'o rèngu pèci pamadhe dhèu pajuu-paleha Lamatua, Stefanus, ja'a ètu madha kahèi, aa ja'a ko'o kahèi. Lod'o ra oru hadhu ho pèci ne, ja'a ka dhu pua si, aa ja'a ka dhu laladhe kodho si.’c
21 Masi ka ja'a pasanèd'e Ne, te ngaa Yesus hia hari paredha, peka na, ‘Tenge ia ka madha j'ara ae-ae! Tèke eele ka Yerusalem. Lamu dènge ka, d'ara lai-lai ne! Te Ja'a neo pua èu lamu asa era-era kaj'èu, ho aj'a dhèu-dhèu leo dhu Yahudi boe.’’’
22 Ropa dhèu ae se tadèngi Paulus peka na, Lamatua pua le nèngu la'e asa dhèu-dhèu leo, ka ro'o heka nanene lii padhai na. Rèngu aa'i-aa'i ra nasa, hèia ra pa'oo palere-lere, aku rèngu na, ‘‘Mi nanene ia ka dhèu ne'e ne! Kalabhe pamadhe ne! Tèke ia ka na mamuri.’’
Sordad'u sèra rèti Paulus asa d'ara benteng
23 Ropa dhèu ae se pa'oo-parodha sèmi èèna, ka ra bhoke eele kodho li'u si nèti ua ra, dènge ra da'u ahu ho ceb'e asa dedha, lula ra nasa ae titu kèna. 24 Lod'o komedhaa sordad'u ladhe, na, dhèu se maruru hari, ka na pua ana bua na ère rèti Paulus asa d'ara benteng la'e. Hèia komedhaa pua ra kalabhe Paulus, sèna ka na mangaku na tao sala ngaa, ka dhèu Yahudi se neo pamadhe ne. 25 Ropa ra èki Paulus ho neo kalabhe ne, hèia na piku koko na, ka na karèi sordad'u èèna, peka na, ‘‘Madhutu atora paredha Roma, mia dhu lèke? Ladhe ca dhèu dhu dènge hak ana kabarai Roma, sèmi nèngu dhu ètu d'ara lii langu, miu tao ne tasamia? Mi hake paparu uuru, do, mi parisa ne uru ku?’’
26 Ropa tadèngi nare lii sèmi èèna, sordad'u èèna la'e karohe-rohe tenge komedhaa na. Ka na peka, ‘‘Ama! Dhèu ne'e ne, dènge hak ana kabarai Roma! De ama neo tao ne tasamia?’’
27 Tadèngi nare sèmi èèna, hèia komedhaa la'e karèi Paulus, aku nèngu na, ‘‘Ra peka, na, èu ne dènge hak ana kabarai Roma. Tare'a, do?’’
Ka Paulus b'ala, aku nèngu na, ‘‘Mema tare'a! Ja'a unu hak èèna.’’
28 Èle èèna ka, komedhaa peka, aku nèngu na, ‘‘Ja'a sèmi èèna kahèi. Ja'a b'ae kab'ua aae, heka abhu hak èèna kèna.’’
Te ngaa Paulus dhaa, aku nèngu na, ‘‘Ja'a ne, b'ae boe ngaa-ngaa. Karèi nèti ina ku nara iisi ja'a, ja'a dhu dènge le hak èèna. Ama ku unu hak èèna kahèi.’’
29 Ropa rèngu tadèngi dhu Paulus dènge hak ana kabarai Roma, ka sordad'u sèra hari kabodho, ka ra bani heka game dènge parisa lii langu nèti Paulus. Ka komedhaa ne j'aj'i madha'u, lula nèngu èki le Paulus, aa dhu peka na nèngu sisu le madha j'ara paredha.
Paulus ètu era pama'ète lii langu agama Yahudi
30 Asa bèli èèna, komedhaa èèna neo ne'a tare'a-re'a, j'aj'aj'i nèti lii langu èèna, tasamia. Hèia na pua dhèu sab'a na lasi paroa kètu agama Yahudi dènge dhèu aa'i-aa'i dhu biasa uri lii langu agama Yahudi, sèna ka ra pakaboko. Ka na pua si bhoke eele rate nèti Paulus, ho rèti ne la'e asa madha dhèu sèra aa'i-aa'i ra.