3 Ji'i pakèd'i tèke eele Kaisarea. Ka d'ai bèli èèna, ji'i d'ai kota Sidon. Komedhaa Yulius tao Paulus dènge be'a, aa na peka dènge ne kahèi, bisa la'e pangad'o dènge angalai na ètu dae. Dad'èi Yulius sèna ka Paulus bisa abhu nèti rèngu, ngaa dhu na parluu ètu d'ara kakako na.

4 Hèia ji'i aa'i-aa'i mi ca'e hari, ho pakèd'i. Te ngaa ngèlu madha kapai seli, toke kapa ne oe kako nare boe. Ka ra pod'e kaduru kapa ne, re talora aae pulu Siprus dènge rai Siria, sèna ka ako abhe ngèlu nèti madha. 5 Nèti èèna, ji'i pab'ab'e j'ara, ète re madha propensi Kilikia dènge propensi Pamfilia. Ka ji'i la'a taruu d'ai kota Mira, ètu rai Likia. D'ai nèi, ji'i aa'i-aa'i mi puru tèke eele kapa èèna. 6 Ètu Mira, komedhaa Yulius tenge kapa leo dhu neo pakèd'i asa Italia. Ka na abhu kapa cue dhu mai nèti kota Aleksandria, dhu neo pakèd'i asa Italia. Hèia na pua ji'i aa'i-aa'i mi ho ca'e kapa èèna.

7 Ji'i pakèd'i pèri-pèri lod'o kèna, te ngaa ngare boe mia-mia, lula ngèlu madha mèdhu aae. Nèbhu j'oo-aae ku, heka ji'i padètu dènge kota Knidus. Te ngaa ngèlu madha loe boe, ka ji'i poro hari j'ara la'a asa pulu Kreta, sèna ka ako pa'abhe ciki. Èle èèna ka, ji'i oe seli suu rai èci, ngara na Salmone. 8 Ji'i seli suu rai èèna dènge j'èra titu kèna. Ka ji'i oro-oro re sebhe pulu Kreta, hèia ji'i heka d'ai era èci, ngara na hèb'a-namo Saraga. Era èèna, padètu dènge kota Lasea.

9 D'ai èèna, ana mataroo kapa se ae rara iisi ciki, lula ji'i nèbhu ae le ètu lèu, te ngaa d'ai mèka Italia. Lod'o èèna, seli le lod'o kalela Saku Eele Dosa dhèu Yahudi.^a Dhu tema le, ropa èle lod'o kalela èèna, j'aj'i ngèlu aae dènge dhasi kapai. Hèia ana mataroo kapa se pakarèi, j'aj'i pakèd'i, do aad'o. Ropa tadèngi lii ana mataroo kapa se, Paulus padhai lii, peka na, 10 ‘‘A'ari aa'i-aa'i. Ja'a neo padhai lii ciki. Ja'a pangee, ladhe sèmi èdhi kako taruu, bisa èdhi paraga dènge j'aj'èra ae. Kapa ne bisa molo kahèi, mèdha-panyau ela aa'i mèu-mèu, aa èdhi bisa madhe aa'i ti kahèi.’’ 11 Te ngaa komedhaa sordad'u èèna, d'èi boe nanene lii Paulus. Nèngu lèka risi juraga dènge lamatua kapa èèna. Lula rèngu neo kako taruu, tèke eele era èèna. 12 Dhu carui ka, ladhe d'ai lod'o dhasi aae, kapa bisa boe panahu dènge be'a ètu hèb'a-namo Saraga èèna. Nèti èèna ka, ae ka nèti rèngu d'èi sèna ka ji'i pakèd'i taruu, ho la'a asa kota Feniks. Rèngu sanao ladhe bisa, na, ji'i aa'i-aa'i mi pea ètu nèi, d'ara hèru dhasi aae ne. Kota Feniks nèi, hèb'a-namo pulu Kreta dhu mau, lula nèngu ne era dhu abhe nèti ngèlu badae-haa dènge ngèlu badae-dhimu, aa abhu boe naha kapai.

13 Ropa ngèlu balèu tiu g'oro mau-mau, ra pangee, na, ngèlu ne bisa lere ji'i d'ai kota Feniks, ka ra peka na, ‘‘Ngèlu ne be'a. De mai ti pakèd'i ka!’’ Hèia ra balu tangad'a, dènge ère lai, ka la'a oro-oro re sebhe pulu. 14-15 Ji'i dhu pakèd'i nèbhu mèka, te ngaa ngèlu aae mai. (Dhu dhèu peka na, ‘ngèlu badae-dhimu’). Ka lai ngèlu ne, tiu nèti kapa ne asa talora lèu. Ana mataroo se soro lèke heka kad'uru kapa, ka ra soro tèke ne sène, hud'i madhutu ngèlu tao ne.

16 Naha hae nèti kapa, toke d'ai padètu pulu iiki cue, ngara na Kauda. Lod'o èèna, ana kèni dhu èki ètu hui kapa. Hèia ji'i d'ai madhe ère ana kèni ne asa dedha kapa mai. 17 Ropa ana kèni d'ai dedha kapa, ra hèlu kapa ne dènge dhari, lula mage dhoka papa aj'u se bhoke eele, ho molo. Rèngu madha'u kahèi, mage dhoka naha hahake kapa ne, ho eta ètu d'ara mara Sirtis ètu Afrika nèi. Ka ra palalodhe tangad'a, sèna ka taha kakako kapa ne.

18 Ngèlu aae hahake kapa ji'i ne sebhe g'ana-kariu. Ka asa bèli mad'ae èèna, ana mataroo kapa se mulai core eele mèdha asa d'ara dhasi. 19 Toke d'ai camèd'a èèna, ngèlu dhu kapai era. De rèngu asa madha'u. Nèti èèna ka, ra core eele tabha hari mèdha-mèdha dhu ra hua ètu dedha kapa, sèna ka pasamaa kapa. Aa ana mataroo kèpe rare kahèi, mèdha-panyau kapa èèna, ka ra core eele. 20 Mèu-mèda ngèlu aae ne loe boe ciki sa, toke d'ai pèri-pèri lod'o. Aa liru bhoka boe ciki sa, ka ji'i ladhe ngèdhi boe madha lod'o dènge hua-hètu. Ji'i aa'i-aa'i mi ele ngangee, ka dhu ngee, na, ji'i mamuri heka.

21 Pèri-pèri lod'o kèna, ji'i nga'a-nginu boe ciki sa. Hèia Paulus paroa rèngu aa'i-aa'i ra, aku nèngu na, ‘‘A'ari aa'i-aa'i! Sèmi dhu miu se madhutu lii ja'a, baku tèke eele hèb'a-namo Saraga, tatu èdhi abhu boe j'èra ae sèmi ne'e, aa èdhi rugi boe ngaa-ngaa. 22 Deo ne'e ne, ja'a manèngi miu aa'i-aa'i mi, sèna ka pa'èra d'ara mi. Èèna na kapa èdhi ne laho mae-mae. Te ngaa baku madha'u, te ca dhèu sa nèti èdhi madhe boe. 23 Ja'a neo sèna ka miu aa'i-aa'i mi me'a, na, ja'a ne dhèu unu Ama Lamatua. Nèngu ka dhu pangèd'u ja'a sasab'a. Mèda deo na, Na pua ana pajuu Na èci nèti sorga, mai ka titu ètu sebhe ja'a. Hèia na peka dènge ja'a, aku nèngu na, 24 ‘Paulus! Èu baku madha'u. Èèna na, èu lamu paraga dènge dhèu aae kapai ètu Roma, sèna ka uri lii langu èu. Lula d'ara Lamatua be'a dènge èu, nèti èèna ka Na hia mamuri kahèi mi dhèu aa'i-aa'i ètu dedha kapa ne.’ 25 De a'ari aa'i-aa'i mi! Miu baku ele ngangee. Ja'a ne lèka tare'a-re'a Ama Lamatua, peka na, ngaa dhu Na peka dènge ja'a mèda deo na, èèna na j'aj'i sama sèmi èèna. 26 Te ngaa ladhe èèna na, kapa ne eta ètu pulu cue.’’

27 Lod'o èèna, dhasi-ngèlu hahake kalabhe ka ji'i eeb'o-eeb'o ètu lèu aae d'ara canguru èpa lod'o kèna, ètu dhasi Adria. Te ngaa pe d'ai talora mèda sa, ana mataroo kapa se, sèmi dhu re'a, na, ji'i oe dètu le dènge dae. 28 Hèia ra papuru dhari ho uku marèma dhasi. Era èèna, marèma na dua nguru rèpa. Kapa ara hari ciki asa madha, ra papuru hari dhari, ka era èèna, canguru lèmi rèpa. 29 Rèngu aa'i-aa'i ra madha'u, mage dhoka kapa ne rage hadhu. Ka ra papuru tangad'a hui, èpa bua. Ka ji'i aa'i-aa'i mi sanao, sèna ka mèu ka lai-lai. 30 Te ngaa ana mataroo kapa se, rare lii èci, ho neo rai eele kapa ne dènge mau-mau, sèna ka dhèu re'a boe. Ka ra papuru ana kèni, tao nuka sèmi neo papuru tangad'a-tangad'a kaduru.

31 Te ngaa Paulus bhoke ngangee karehe rèngu mi komedhaa dènge sordad'u na sèra, peka na, ‘‘Ladhe ana mataroo se rai eele kapa ne, miu madhe aa'i mi.’’

32 Ropa tadèngi Paulus peka sèmi èèna, hèia sordad'u sèra j'ue pama'ète dhari ana kèni na, sèna ka ana kèni na pataleb'o eele pakaj'èu nèti kapa. Nèti èèna ka, ana mataroo se j'aj'i heka rai.

33 Ropa d'ara oe mèu sa, hèia Paulus rarange dhèu aa'i-aa'i ra ho ra'a-rinu, aku nèngu na, ‘‘Canguru èpa lod'o kèna, èdhi dhoka madhèdi di, dènge sanao-maena, dhu ta'a-tinu boe ngaa-ngaa ciki sa. 34 De ja'a manèngi sèna ka èdhi ta'a-tinu ku ciki, ho èdhi abhu hari a'èra. Ja'a parcaya, na, abhu boe èci sa nèti èdhi dhu paraga dènge j'aj'èra. Tatu èdhi aa'i-aa'i ti mamuri!’’

35 Ropa padhai lii nare sèmi èèna, ka Paulus nare roti. Ka na sabaj'a manèngi makasi mi Ama Lamatua ètu madha rèngu aa'i-aa'i ra. Hèia nare ca'èta, ka na'a. 36-37 Ladhe rèdhi sèmi èèna, ka d'ara rèngu aa'i-aa'i ra j'aj'i èra hari. Aa rèngu aa'i-aa'i ra ra'a kahèi. Ji'i aa'i-aa'i mi ètu dedha kapa ne, dua ngasu pidhu nguru èna dhèu. Ji'i aa'i-aa'i mi nga'a-nginu. 38 Ropa bècu ngare, ana mataroo kapa se core eele karo-karo are-gandum asa d'ara dhasi, sèna ka ngi'u kapa abhu samaa hari.

39 Ropa d'ara mèu te'e sa, ana mataroo kapa se ladhe rèdhi rai-dedha. Te ngaa rèngu re'a boe rai mia èèna. Rèngu ladhe rèdhi kahèi sai èci, dhu dènge salae. Ka rèngu sanao ka, teko-teko rèngu bisa rèti kapa ne, maso asa hèb'a, ladhe oro-oro ku re sebhe lia ètu d'ara dhasi èèna, heka ra d'ai era salae èèna kèna. 40 Hèia ra ète eele tangad'a sèra, hud'i sène ètu d'ara dhasi. Ka ra papuru uli, sèna ka hia kapa ne asa dae la'e. Hèia ra ère paca'e lai cika, sèna ka ngèlu tiu kapa ne asa era salae èèna. 41 Te ngaa, lula kapa ne rage oto, ka eta dènge ètu èèna, bisa heka kalau ciki sa. Hèia naha aae mai, hake pamae hui kapa ne.

42 Ropa sordad'u se ladhe rèdhi sèmi èèna, ka ra neo pamadhe aa'i ana bèdho sèra. Lula ra pangee, mage dhoka ana bèdho sèra nangi lasi asa dae, ho ra rai. 43 Te ngaa komedhaa Yulius kai sordad'u nèngu sèra, lula na neo sèna ka Paulus bisa mamuri. Ka na paredha ho dhèu aa'i-aa'i dhu re'a nangi ridhu asa d'ara dhasi, sèna ka nangi asa dae. 44 Aa dhèu dhu re'a boe nangi, na pua si kèpe papa, do sad'i rage ngaa sa, sèna ka madhutu naha hae asa dae. Ka ji'i aa'i-aa'i mi d'ai dae dènge sod'a.