23
D'ai èèna, ka ra hia Paulus sèna ka na siri iisi na. Hèia na ladhe palème dhèu ètu sèra aa'i-aa'i ra, ka na j'oka padhai lii na, aku nèngu na, ‘‘A'ari! Ja'a titu ètu era ne'e, dènge d'ara mola. Ama Lamatua dhu ne'a, na, ja'a karèi nèti ana iiki mai, d'ara ja'a dhu mola.’’2 Ropa tadèngi Paulus padhai lii sèmi èèna, Ananiasa , kètu kapai risi agama Yahudi, nasa titu kèna. Hèia na hia paredha mi dhèu dhu titu padètu dènge Paulus, peka na, ‘‘Tèbe hèb'a na!’’
3 Ka Paulus b'ala Ananias, peka na, ‘‘Pe Ama Lamatua b'ala tèb'e hèb'a èu. Te èu nuka sèmi agarii dhu heka lèke lame re li'u, te re d'ara dhu moca le. Èu madhèdi ètu era ne'e ne, ho tao ngi'u mu sèmi dhèu mola sa. Aa èu neo huku ja'a madhutu atora ad'a èdhi. Te ngaa èu unu mu sisu eele atora èèna, lod'o èu pua dhèu tèb'e ja'a.’’b
4 Ropa Paulus padhai lii sèmi èèna, dhèu ètu sèra kai ne, peka na, ‘‘Heh! Èu bisa boe padhai lii sèmi èèna, mi kètu kapai risi agama èdhi ne!’’
5 Hèia Paulus dhaa, aku nèngu na, ‘‘Tare'a, do? Ladhe sèmi èèna, ja'a manèngi sèna ka d'ara baku sala, lula ja'a ke'a boe, na, nèngu ne kètu kapai risi agama èdhi. Mema tare'a, Ama Lamatua pake le dhèu ho suri, peka na, ‘Miu baku padhai lii karehe mi kètu miu sèra.’’’c
6-8 Lod'o Paulus ladhe nèdhi dhèu dhu madhèdi pama'ète lii langu agama, na ne'a, peka na, rèngu dhu hag'e mi dua partei. Cahag'e nèti partei Saduki, dhu parcaya dhèu madhe bisa heka mamuri hari. Rèngu parcaya kahèi, peka na, Ama Lamatua dhu dènge boe ana pajuu ètu sorga. Samanga aad'o kahèi. Cahag'e hari madhutu partei Parisi, dhu parcaya, peka na, bèli-camèd'a Ama Lamatua pamamuri hari dhèu madhe. Rèngu sèra parcaya, peka na, ètu sorga Ama Lamatua dènge ana pajuu, aa abhu samanga kahèi.
Hèia Paulus padhai lii dènge lii mèdhu, aku nèngu na, ‘‘A'ari! Sèna ka miu aa'i-aa'i mi me'a, ja'a ne dhèu Parisi. Ama ku dènge baki ku, dhèu Parisi. Deo ne'e ne, miu neo huku ja'a, lula ja'a parcaya, peka na, Ama Lamatua bisa pamamuri hari dhèu madhe.’’d
Ropa Paulus padhai lii sèmi èèna, dhèu Parisi dènge dhèu Saduki patao, toke rèngu lii èci heka. Ka rèngu se hag'e eele j'aj'i mi dua. 9 Nèti èèna ka, dhèu se patao, ka j'aj'i maruru aae. Hèia pèri-pèri mese nèti partei Parisi kèd'i titu ho sarii Paulus, aku rèngu na, ‘‘Dhèu ne, sala boe! Tao-tao na abhu roh, do, ele boe, ana pajuu Ama Lamatua èci nèti sorga mai, ka padhai lii dènge ne!’’
10 Masi ka mese se padhai lii le sèmi èèna, te ngaa dhèu sèra asa ra hoe dènge patao. Nèti èèna ka, komedhaa ne j'aj'i madha'u. Na pangee, mage dhoka dhèu se game pamadhe Paulus. Hèia na paredha ana bua na sèra, lasi ère rare ne rèti asa d'ara benteng.
11 Ka d'ara mèda èèna, Lamatua Yesus mai pad'elo iisi mi Paulus. Na pa'èra d'ara Paulus, Na peka, aku nèngu na, ‘‘Paulus! Baku madha'u! Èu ne dhu lole peka le dènge dhèu-dhèu ètu Yerusalem lula-nèti Ja'a. De sanèd'e paie-iie! Èèna na, èu hud'i padhai lii ku sama sèmi èèna kahèi, ètu Roma nèi.’’
Dhèu pare'a lii ho pamadhe Paulus
12-13 Asa bèli mad'ae èèna, abhu èpa nguru risi dhèu Yahudi dhu rare lii èci ho neo pamadhe Paulus. Ka ra subha, aku rèngu na, ‘‘Ji'i ngo'o mèka nga'a-nginu, ladhe ji'i dhae pamadhe Paulus.’’ 14 Ropa ra subha rare, ka lasi peka dènge kètu agama Yahudi dènge dhèu heka ad'a Yahudi sèra, aku rèngu na, ‘‘Ama-ama si! Ji'i pasubha le, peka na, ji'i ngo'o boe nga'a-nginu, ladhe ji'i pamadhe mèka Paulus. 15 De dad'èi ji'i sèmi ne'e ka: ama si lami paraga dènge komedhaa, manèngi ho nèngu nèti Paulus asa era uri lii langu agama. Tao nuka sèmi dhu ama si neo hari parisa lii langu na. Pe ji'i mate si ètu talora j'ara, sèna ka pamadhe ne.’’
16 Te ngaa ana mone èci nèti ana hèni Paulus, tadèngi lii padhue rèngu èèna. Ka rai la'e peka dènge to'o na, asa d'ara benteng. 17 Ropa tadèngi nare lii lolo ana ne'e, Paulus paroa nare ama sordad'u dhèu èci, ka na peka, aku nèngu na, ‘‘Ne'e ne, ana ja'a. Lere mèti ne lai-lai asa komedhaa èu. Ho neo peka ngaa èci.’’
18 Ka ama sordad'u èèna lere nèti ana ne asa komedhaa na. Hèia na peka, aku nèngu na, ‘‘Ama! Paulus dhu èdhi taha na, manèngi sèna ka ja'a kèti ana ne'e mai asa madha ama. Te nèngu neo peka ngaa èci.’’
19 Hèia komedhaa kadhèi kacui-aai ana ne asa era èci, sèna ka dua ra di. Ka na karèi, aku nèngu na, ‘‘Èu neo peka ngaa dènge ja'a?’’
20 Hèia ana ne dhaa, peka na, ‘‘Abhu pèri-pèri dhèu Yahudi dhu rare lii èci, ho neo pamadhe to'o ku. Rèngu neo mai manèngi ama, sèna ka bèli èèna, ama lere mèti to'o ku, Paulus asa era uri lii langu agama. Rèngu se dhu leko-monya ho neo parisa hari lii Paulus, toke d'ai lutu la'e. 21 De ama ku baku madhutu dad'èi rèngu. Te èèna na, risi nèti èpa nguru dhèu dhu neo mate ama si ètu talora j'ara, ho ra neo pamadhe to'o ku. Rèngu pasubha le, peka na, rèngu ro'o mèka ra'a-rinu, ladhe rèngu pamadhe mèka to'o Paulus. De nuka ra pa'èra si. Rèngu di mate lii dhaa nèti ama ka.’’
22 Tadèngi nare lii lolo ana ne'e, hèia komedhaa peka dènge ne, ‘‘Èu baku peka dènge cee-cee, na, èu mai le peka lii ne'e mi ja'a.’’ Ropa padhai lii èle sèmi èèna, na pua ana ne lèpa dènge ka.
Ra lere Paulus asa gubernur Feliks ètu kota Kaisarea
23 Èle èèna, hèia komedhaa paroa kètu sordad'u dhèu dua. Ka na paredha si, peka na, ‘‘Miu pa'èra sordad'u biasa, dhèu dua ngasu dhèu; sordad'u dhu ca'e jara, pidhu nguru dhèu; dènge sordad'u dhu rèd'u kapoke, dua ngasu dhèu. Miu pakèd'i dènge ka mèda ne'e, d'ara hake ceo, ho lami asa kota Kaisarea. 24 Sadia mere jara ci'u hia Paulus. Miu hud'i lere paie-iie Paulus, sèna ka d'ai gubernur Feliks dènge sod'a.’’
25 Hèia na suri sasuri hia gubernur Feliks sèmi ne'e ka:
26 ‘‘Ama gubernur Feliks dhu ja'a pakab'ua. Lii maho'o nèti ja'a, Klaudius Lisias.
27 Dhèu dhu ja'a hia dhiu ne, ngara na Paulus. Dhèu Yahudi sèra kèpe rare ne, ka oe ra pamadhe ne kèna. Lod'o èèna, ana bua ja'a lasi nuni rare ne, nèti kacui-aai dhèu Yahudi sèra. Limuri, heka ja'a ke'a kèna, nèngu ne dènge hak ana kabarai Roma. 28 Ja'a neo ke'a, nga tao ka dhèu Yahudi se neo pamadhe ne. Nèti èèna ka, ja'a kèti ne asa era uri lii langu agama Yahudi. 29 Te ngaa ra abhu boe sasala na èci sa. Te mema, nèngu ne tao boe bhelu. De dhèu ne'e ne bisa boe pamaso ne asa d'ara bèdho, aa lèke boe abhu huku madhe. Dhèu ètu era uri lii langu agama Yahudi sèra, ra patao, lula lii holo-nori agama rèngu dhu baka-leo. Ka ja'a kèti hari dhèu ne asa d'ara benteng la'e. 30 Te ngaa asa bèli èèna, ja'a tadèngi, na, abhu dhèu Yahudi dhu rare lii èci ho neo pamadhe ne. Ka ja'a ka dhu hia paredha, ho lere rèti dhèu ne asa madha ama. Aa ja'a peka le kahèi dènge dhèu Yahudi sèra, dhu neo tao lii langu dènge dhèu ne'e, na, rèngu hud'i lasi asa madha ama. Sèna ka ama tadèngi unu mu, rèngu galaa ne, sasala na, tasamia.
Sasuri ja'a ne, d'ai sange ne'e ka. Makasi ae!’’
31 Hèia sordad'u se pa'èra le, ho pakako paredha nèti komedhaa. Ka d'ara mèda na kahèi, lere rèti dènge Paulus d'ai kota cue, ngara na Antipatris. 32 Asa bèli èèna, sordad'u dhu ca'e jara sèra, rèti Paulus d'ai kota Kaisarea. Te ngaa sordad'u dhu leo sèra, lèpa hari asa Yerusalem. 33 Ropa rèngu d'ai Kaisarea, hèia rèti sasuri èèna asa gubernur. Aa ra pangèd'u Paulus asa ai gubernur kahèi. 34 Baca nare sasuri èèna, hèia gubernur karèi Paulus, aku nèngu na, ‘‘Èu ne, dhèu mia?’’
Ka Paulus dhaa, aku nèngu na, ‘‘Ja'a ne, dhèu propensi Kilikia.’’
35 Ropa tadèngi Paulus peka sèmi èèna, ka gubernur ne'a, na, Paulus dhu nèd'u hak ana kabarai Roma. Hèia na peka, aku nèngu na, ‘‘Ja'a ka dhu kèd'u paredha ètu ne'e. De èèna na, ja'a ka dhu uri lii langu èu ne. Te ngaa èdhi hud'i mate ku dhèu-dhèu dhu galaa èu sèra, d'ai ne'e, heka ja'a parisa lii langu èu kèna.’’ Hèia na pua sordad'u sèra taha Paulus ètu era rèngu, ètu d'ara kompleks èmu pea gubernur, dhu uru èèna dhèu aae Herodes patitu.