Paulus si lèpa hari asa Yerusalem
21
Ropa palangu lii èle dènge kètu-kètu juma'at dhu mai nèti Epesus dènge d'ara bia, ka ji'i ca'e asa dedha kapa, ho pakèd'i taruu asa pulu Kos. Asa bèli èèna, ji'i ngare pulu Rodos. Nèti nèi, ji'i kako taruu asa kota hèb'a-namo cue, ngara na Patara. 2 Ètu èèna, ji'i puru nèti kapa. Ka ji'i ca'e hari kapa leo dhu neo la'e asa propensi Fenisia padètu dènge Siria. Ropa ji'i ngare dedha, ra ère dènge ka tangad'a. 3 Nèbhu boe ka, ji'i ladhe ngèdhi pulu Siprus re sebhe kariu ji'i. Ji'i dhuli boe, te ngaa kako taruu toke ji'i panahu ètu kota Tirus, ètu propensi Siria. D'ai era nèi, ra papuru mèdha nèti dedha kapa. 4 Lula rèngu papuru mèdha era, ka ji'i puru la'a ngad'o dhèu-dhèu sarani ètu èèna. Ropa paraga, hèia ji'i pea dènge ra ca migu kateme. Dhèu se'e se abhu le tadha nèti Roh Lamatua ho kai Paulus, sèna ka la'e ia ka asa Yerusalem. 5 Masi ka sèmi èèna, te ngaa ropa èle ca migu, ka ji'i la'a hari asa kapa. Dhèu sarani sèra aa'i-aa'i ra, bhèni-mone, dhèu kapai, ana iiki, ana ngèru dènge dhèu heka, lere ji'i toke d'ai hèb'a-namo. Ètu dedha nebhe, ji'i aa'i-aa'i mi patitu kètu urutuu ho manèngi-mangaj'i sama-sama. 6 Palangu lii èle, ka ji'i ca'e asa dedha kapa, aa rèngu aa'i-aa'i ra lèpa èmu.
7 Ji'i pakèd'i nèti Tirus, ka ji'i dhuli kota Ptolemais. Ètu nèi, ji'i puru, ka la'a tenge dhèu sarani ètu èèna. Paraga, ka ji'i pea dènge si ca lod'o. 8 Bèli èèna, ji'i pakèd'i nèti èèna, hèia d'ai kota Kaisarea. Ètu Kaisarea, ji'i pea taha ètu èmu Pelipus. Nèngu ne ka dhu bhoke uuru j'ara nèti Lii Lolo Be'a Lamatua Yesus ètu era èèna. Aa nèngu ne'e, ca dhèu nèti dhèu pidhu dhu hag'e rare ca hari nèi, ho pala-bagi nganga'a mi bhèni balu-ana lalu ètu Yerusalem.a 9 Pelipus ne, ana bhèni na, dhèu èpa. Ama Lamatua pake si, ho j'aj'i dhèu rèti lii padhai Na ho peka dad'èi Na.
10 Ropa ji'i pea dènge rèngu pèri-pèri lod'o, hèia dhèu èci, ngara na Agabus, mai nèti propensi Yudea. Lamatua pake ne, j'aj'i dhèu nèti lii padhai Na ho peka dad'èi Na.b 11 Na mai paraga dènge ji'i. Hèia nare dhara hake Paulus, ka na haheo mi ai dènge haga na. Hèia na peka, aku nèngu na, ‘‘Roh Lamatua dhu Mola-Mèci, peka sèmi ne'e ka: ‘Dhèu unu dhara hake ne, èèna na, dhèu Yahudi èki karadhe ne sèmi ne'e ka ètu Yerusalem. Èle èèna na, ra soro ne asa dhèu dhu Yahudi boe.’’’
12 Ropa ji'i tadèngi ngare lii dhèu ne'e, ji'i aa'i-aa'i mi manèngi dènge d'ara kateme sèna ka Paulus la'e ia ka asa Yerusalem. Ji'i dhu j'aj'i ana madhutu na, dènge dhèu-dhèu sarani ètu èèna, lii manèngi ji'i sèmi èèna ka. 13 Te ngaa Paulus dhaa, aku nèngu na, ‘‘Baku! Nga tao ka miu tangi sèmi èèna? Miu pabia le d'ara ja'a. Sèmi ne'e! Abhu dhèu dhu mema d'èi boe ja'a, lula ja'a madhutu Lamatua Yesus. De masi ka ra èki karadhe ja'a, do pamadhe ja'a, do tao tasamia èèna ka, ja'a sadia le sèmi kore.’’
14 Ropa ji'i nge'a, na, Paulus sèmi nare boe lii ji'i, ka ji'i soro tèke ne, peka na, ‘‘Hud'i ka laa! Pe, ti ladhe dad'èi Lamatua di.’’
Paulus si d'ai Yerusalem
15 Pea pèri-pèri lod'o ètu Kaisarea, ka ji'i lalau mèdha-panyau ji'i, ka ji'i pakèd'i asa Yerusalem. 16 Abhu kahèi pèri-pèri dhèu sarani nèti Kaisarea madhutu ji'i. Ra lere ji'i toke d'ai èmu cue, ho ji'i j'unu ètu èèna. Lamatua èmu na, ngara na Manason, nèti pulu Siprus. Nèngu ne, nèbhu le parcaya Lamatua Yesus. 17 Ropa ji'i d'ai Yerusalem, a'ari aa'i-aa'i ètu nèi sèmi rare ji'i dènge d'ara karej'e.
Paulus si lasi paraga dènge Yakobis
18 Bèli èèna, ka ji'i aa'i-aa'i la'a paraga dènge Yakobis. Aa dhèu heka-dhèu heka dhèu sarani aa'i-aa'i ra pakaboko le ètu èèna. 19 Ji'i hia lii maho'o èci dènge èci, hèia Paulus padhue-padhai aa'i-aa'i dhu Ama Lamatua tao le ètu mia-mia, hia mi dhèu Yahudi boe sèra. Na peka na, Lamatua Yesus bhoke le j'ara, ka rèngu parcaya Lamatua Yesus. Na lolo kahèi, tasa mera mia Lamatua pake ne dènge angalai-angalai na ètu d'ara sasab'a-la'a ra. 20 Ropa tadèngi rare lii lolo Paulus ne, rèngu aa'i-aa'i pakapai kolongara Ama Lamatua.
Hèia ra peka dènge Paulus, aku rèngu na, ‘‘Sèna ka èu me'a, abhu riho-riho dhèu Yahudi dhu parcaya le Lamatua Yesus. Te ngaa rèngu kèpe pa'èra era atora-atora dhu Musa papuru mai hia èdhi. 21 Te ngaa abhu dhèu dhu leko-monya palème ètu ne'e, peka na, èu ae ka dhu aj'a dhèu-dhèu Yahudi ètu era leo, peka na, rèngu madhutu ia ka atora-atora agama nèti Musa. Rèngu peka kahèi, na, èu kai si, sèna ka madhutu ia ka ad'a suna hia ana-ana mone rèngu. Aa èu kai dhèu sarani sèra kahèi, sèna ka madhutu ia ka atora ad'a dhu leo sèra nèti èdhi dhèu Yahudi. 22 De sanèd'e! Tatu dhèu Yahudi sèra tadèngi, na, èu ètu ne'e le. Ka dhèu dhu tadèngi lii lai-ngèlu sèra, tatu ra nasa. De èdhi tenge j'ara samia?
23 Madhutu a'abhu ji'i, sèmi ne'e ka: abhu dhèu èpa nèti ji'i, dhu pajaji le dènge Lamatua. Limuri ne, dhèu se'e neo lusu pakahoni kètu ra, ho j'aj'i mi tadha, peka na, rèngu tao aa'i le ngaa dhu ra pajaji na. 24 De hua iia, èu lamu palere dènge dhèu èpa se, asa d'ara Èmu Kapua Manèngi-Mangaj'i Ama Lamatua. Èu lamu madhutu rèngu kahèi, sèna ka pamèu iisi madhutu ad'a. Aa èu tago more bab'ae rèngu kahèi nèti tatao ad'a èèna. Ladhe èu tao sèmi èèna, dhèu re'a, na, èu kèpe pa'èra era atora agama Yahudi dhu Musa papuru hia èdhi. Aa ladhe tao sèmi èèna, rèngu re'a, na, sèra sa dhu leko-monya di, nèti lii lolo dhu peka na, èu ka dhu kai dhèu ho madhutu ia ka ad'a Yahudi!c
25 Te ngaa mi dhèu dhu Yahudi boe, dhu lèka le Lamatua Yesus, èdhi pa'adhu le sasuri hia ra. Èdhi peka le lii pama'ète èdhi ca hari nèi, dhu peka, rèngu parluu boe madhutu atora ad'a Yahudi aa'i-aa'i ra. Dhu rèngu hud'i tao madhutu, sèmi ne'e ku: bhèni-mone baku tao j'ara makae dènge dhèu dhu j'aj'i boe dhèu èmu-kamali ra. Rèngu baku pab'ali dènge mèdha sogo-tagu, aa baku ra'a nganga'a dhu tao madenge a'ari dhèu Yahudi. Conto sèmi: rèngu baku ra'a sisi sogo-tagu; baku ra'a raa badha; aa baku ra'a sisi badha madhe dhu ra pacèli koko.’’d
26 Ka Paulus sèmi nare dènge be'a lii manèngi ra. Hèia asa bèli èèna, nèngu dènge dhèu èpa se lasi palere asa Èmu Kapua Manèngi-Mangaj'i, ka ra pamèu iisi ra madhutu ad'a agama Yahudi. Èle ka, Paulus peka dènge ama agama ètu èèna, peka na, lod'o mia ho rèngu heka pamèci lii moa rèngu. Te ladhe èle lod'o èèna, rèngu ca dhèu-ca dhèu ka hud'i tao ku persembahan rèngu mi Lamatua.
Ra kèpe Paulus ètu Èmu Kapua Manèngi-Mangaj'i
27-29 Ropa oe èle pidhu lod'o dhu rèngu pamoa ho pa'èle tatao ad'a èèna, abhu pèri-pèri dhèu Yahudi nèti propensi Asia dhu rèdhi Paulus la'e asa d'ara kota Yerusalem, palere dènge angalai èci, ngara na Trofimus. Trofimus ne, dhèu kota Epesus, aa nèngu dhèu Yahudi boe. Ka ropa rèngu rèdhi Paulus la'e asa d'ara Èmu Kapua Manèngi-Mangaj'i, ka rèngu neo laa, na, Paulus nèti dènge Trofimus asa d'ara kahèi. Te madhutu atora, dhèu Yahudi boe bisa boe lasi asa d'ara Èmu èèna. Ka rèngu pake j'ara ne'e, sèna ka j'aj'i lii langu. Nèti èèna ka, ra kakèj'i dhèu dhu ètu sèra, ho ra kèpe Paulus. Aa ra pa'oo peka dènge dhèu-dhèu ètu sèra, peka na, ‘‘Woeh! Dhèu Isra'el sèra! Tulu ku ji'i laa! Nèngu ne ka dhu aj'a palème ètu mia-mia, peka na, core eele ka ad'a èdhi dhèu Yahudi. Nèngu ne'e ka dhu padhai lii pakarehe kahèi Èmu Kapua Manèngi-Mangaj'i ne. Ka doe ne'e ne, nèngu neo maso ho pakaj'alu era Lamatua dhu mola-mèci ne!’’e
30 Ropa tadèngi lii ne'e, dhèu ca kabarai nèti kota Yerusalem d'ara ra pana-mag'oro. Hèia dhèu ae rai lasi lingu rare Èmu Kapua Manèngi-Mangaj'i èèna. Ka ra kèpe rare Paulus, hèia ra nuni pa'oro ne asa li'u. Ka ra bèdho aa'i hèb'a oka nèti Èmu Kapua Manèngi-Mangaj'i.f
31 Ropa ra tasib'u neo pamadhe Paulus, ka komedhaa sordad'u Roma dhu ètu èèna, tadèngi lii maruru èèna. 32 Ka komedhaa ne paroa dènge ka sordad'u nèngu dènge kapala-kapala rèngu sèra, ho maso asa talora aae dhèu dhu maruru sèra. Ropa dhèu se'e ladhe rèdhi sordad'u dènge komedhaa aae sèra mai, ka ra ae eele game Paulus. 33 Èle èèna ka, komedhaa na kèpe Paulus, ka na pua ho sordad'u sèra èki ne pake rate bèsi dua. Ra èki rare, ka na karèi dhèu sèra, peka na, ‘‘Dhèu ne'e ne, cee? Na tao sala ngaa?’’
34 Te ngaa ra dhaa dènge lii baka-leo. Cahag'e peka na, ‘‘Na tao sèmi ne'e!’’ Cahag'e hari peka na, ‘‘Na tao sèmi èèna!’’ Ka komedhaa ne, j'aj'i bingu. Ne'a boe lii langu ne, kolo-kapua na tasamia, lula dhèu ae sèra pa'oo-parodha palere-lere. Nèti èèna ka, na pua ho rèti Paulus asa d'ara benteng sordad'u la'e. 35-36 Sordad'u se lere rèti Paulus, te ngaa dhèu ae se madhutu kahèi, dènge asa tabha maruru. Ropa oe ca'e langa, dhèu se'e asa ra hoe aae, ka ra karubhu asa madha lasi. Toke sordad'u se nedhe Paulus, sèna ka dhèu sèra baku ab'o palaho ne. Hèia ra pa'oo dènge lii mèdhu, aku rèngu na, ‘‘Pamadhe ne! Pamadhe eele ne!’’
Paulus manèngi ho siri iisi na ètu madha dhèu ae
37 Ropa rèngu neo maso asa d'ara benteng, Paulus manèngi komedhaa èèna, dhu tao lii Yunani, aku nèngu na, ‘‘Ama! Ja'a bisa padhai lii ciki, do?’’
Ropa tadèngi lii padhai Paulus sèmi èèna, ka komedhaa ne capa cag'ag'a, hèia na karèi, aku nèngu na, ‘‘Hee! Èu ne me'a lii Yunani di? Tasamia ka, èu bisa me'a lii Yunani? 38 Ladhe sèmi èèna, ngangee ja'a sala di. Ja'a neo laa, na, èu ne dhèu Masir dhu uru èèna, kakèj'i-rariu dhèu, sèna ka pakaco dènge maruru. Ka nèti èpa riho dhèu rèd'u dènge rèka, hèia ra rai asa d'ara pad'a sod'a. De èu ne, aad'o di, sina ma?’’
39 Ka Paulus dhaa, aku nèngu na, ‘‘Aad'o, ama! Ja'a ne, dhèu Yahudi. Ina ku nara iisi ja'a ètu kota Tarsus, ètu propensi Kilikia. Ja'a manèngi ama ku hia ja'a tebho ciki, ho ja'a padhai lii sèku dènge dhèu ae se.’’
40 Ka komedhaa madhutu kahèi lii manèngi Paulus. Hèia Paulus titu ètu dedha langa, ka na ded'e kacui-aai na, manèngi rèngu mau-mau, ho na neo padhai lii. Ka na mulai padhai lii tao lii rèngu unu ra, lii Aram. (Te ètu èèna, bèli-bèli dhèu Ibrani padhai lii pake lii Aram).g