8
1a Aa Saulus ètu èèna kahèi, ka nèngu d'èi ra pamadhe Stefanus kahèi.
Saulus paj'èra dhèu unu Lamatua Yesus
1b-2 Lod'o Stefanus madhe, abhu pèri-pèri dhèu dhu mamuri d'ara d'èi dènge Lamatua. Lasi rare ngi'u aae Stefanus ho ra padhane. Ka ra tangi ne.
Nèti lod'o èèna, ka dhèu paj'èra dhèu unu Lamatua Yesus ètu kota Yerusalem, toke d'ai rèngu j'èra bia. Èle èèna ka, rèngu rai pahag'a lasi asa propensi Yudea dènge propensi Samaria. Rèngu aa'i-aa'i rai, te ngaa tèke eele dhoka dhèu pajuu-paleha Yesus di ètu Yerusalem.
3 Te ngaa Saulus tenge j'ara taruu ho pa'èle dhèu unu Yesus sèra. Na tenge si ètu mia-mia. Na maso-kalua èmu dhèu ho na tenge si. Sad'i abhu dhèu mone, do dhèu bhèni, na kèpe si, ho na cèlu si asa d'ara bèdho.a
Pelipus lole Lii Lolo Be'a Lamatua Yesus ètu propensi Samaria
4 Masi ka ra paj'èra dhèu unu Yesus sèra ho ra rai asa haa asa dhimu, te ngaa rèngu loe boe peka-padhai Lii Lolo Be'a Lamatua Yesus asa mia-mia. 5 Conto sèmi, ca tèka, Pelipus la'e asa d'ara kota èci ètu propensi Samaria, ho peka dènge dhèu ètu sèra, na, Yesus, nuka Kristus, dhu Ama Lamatua paj'uj'u nèti uru ka mai. 6 Ropa dhèu ae ladhe rèdhi tadha-tadha malaa dhu na tao, ka ra pakaboko ho nanene paie ngaa dhu Pelipus peka-padhai.
7 Conto sèmi, ètu èèna, abhu kahèi dhèu-dhèu dhu nidhu tao. Nidhu sèra rai eele dhèu se'e dènge pakii-pakèce. Dhèu karuku dènge dhèu haga roe cabèka, èle dènge nèti papèd'a. 8 Nèti èèna ka, dhèu-dhèu ètu d'ara kota èèna karej'e titu kèna.
9 Ètu kota èèna, abhu dhèu èci dhu pake na'i, ngara na Simon. Nèbhu le na pake na'i ètu talora dhèu Samaria sèra. Ka na padedha iisi na, peka na, ‘‘Ja'a dhèu èra!’’
10-11 Ka nèti kota èèna, ana iiki do dhèu kapai, dhèu mone do bhèni, palolo dhoka dhèu ne'e di, aku rèngu na, ‘‘Dhèu ne'e ele-madha, nga! Ngaa-ngaa dhu na tao ne, mai nèti koasa Ama Lamatua!’’ Lula nèngu pake na'i, nèti uru ka mai dhèu ae lèka ne.
12 Te ngaa limuri ne, rèngu nanene Pelipus aj'a rèngu j'ara paredha Ama Lamatua. Aa na peka j'ara ho rèngu rèti kolongara Yesus, sèna ka rèngu bisa j'aj'i dhèu unu Ama Lamatua. Ropa ra tadèngi rare sèmi èèna, dhèu ae parcaya, ka j'aj'i dhèu unu Lamatua. Bhèni-mone aa'i-aa'i sèra j'aj'i sèmi èèna. Nèti èèna ka, ra abhu sarani. 13 Te ngaa Simon parcaya kahèi, ka manèngi j'aj'i dhèu unu Lamatua Yesus. Ka ra sarani ne. Hèia na madhutu Pelipus asa mia-mia. Ropa nèdhi tadha-tadha malaa dhu Pelipus tao, hèia na pangètu kètu na, peka na, ‘‘Ira ii! Sèmi ne'e ne, risi eele!’’
14 Lod'o èèna, dhèu pajuu-paleha Lamatua Yesus dhu ètu Yerusalem sèra, tadèngi, na, dhèu ae parcaya le Lii Lolo Be'a Lamatua ètu propensi Samaria. Ka ra manèngi Petrus dènge Yohanis lasi asa nèi. 15-17 Ropa dua ra d'ai nèi, rèngu heka re'a kèna, dhèu ètu nèi abhu mèka Roh Lamatua dhu Mola-Mèci. Rèngu dhoka abhu sarani pake kolongara Yesus di. Hèia Petrus dènge Yohanis bane ai mi dhèu sèra, ka ra manèngi-mangaj'i sèna ka dhèu Samaria sèra sèmi rare Roh Lamatua dhu Mola-Mèci kahèi. Ka dhèu se'e abhu dènge Roh kahèi.
18 Lod'o èèna, Simon ladhe nèdhi rèngu dua ra bane ai mi dhèu se'e, ka dhèu sèra sèmi rare Roh Lamatua. Hèia na j'ole doi asa Petrus dènge Yohanis, dènge lii manèngi, peka na, 19 ‘‘Ama-ama! Miu hia ku ja'a koasa èèna. Sèna ka ladhe ja'a bane ai mi dhèu, na, ra abhu Roh Ama Lamatua dhu Mola-Mèci kahèi.’’
20 Te ngaa Petrus jèke ne, aku nèngu na, ‘‘Ja'a dhoo èu dènge doi èu! Èu ngee, na, èu bisa hèli koasa Roh Mola-Mèci dènge doi dhari, do? Aad'o! Dhèu bisa boe hèli Roh Lamatua! 21 Èu dènge boe hak mi Roh Lamatua, lula d'ara èu mola boe. Èu dhoka tenge-tenge j'ara di. 22 Èu hud'i ae eele ku nèti sasala-sasigo èu sèra. Hua iia èu sabaj'a ho teko-teko Lamatua saku eele ngangee aapa èu. 23 Ja'a ke'a, na, d'ara èu aapa, aa j'ara karehe ae dhu èki èu!’’
24 Ka Simon manèngi dua si, peka na, ‘‘Ama-ama! Ladhe sèmi èèna, miu dua mi sabaj'a ku hia ja'a, sèna ka lii dhoo dhu miu peka èèna, baku lèke ja'a.’’
25 Èle èèna, hèia Petrus dènge Yohanis lole aa'i Lii Lolo Be'a Lamatua Yesus, aa ra lole Lii Holo-Nori Ama Lamatua ètu d'ara kota èèna. Hèia rèngu lèpa hari asa Yerusalem. Ra kako re rae-rae ètu propensi Samaria, ho lole Lii Lolo Be'a Lamatua Yesus mi dhèu ètu rae sèra.
Pelipus paraga dènge pegawi kapai nèti Afrika
26 Èle èèna ka, ana pajuu Lamatua nèti sorga pua Pelipus, peka na, ‘‘Lamu ku madhutu j'ara asa balèu. Madhutu j'ara dhui, dhu nèti kota Yerusalem la'e asa rai Gasa.’’ 27-28 Ropa tadèngi nare lii paredha èèna, ka na pakèd'i dènge ka. Lod'o nèngu kako ètu j'ara èèna, ladhe nèdhi dhèu èci. Dhèu èèna, pegawi kapai nèti rai Etiopia.b Nèngu ne ka dhu ladhe-leru mèdha-panyau dhèu aae bhèni, ngara na Kandake. Pegawi èèna heka sabaj'a nare ètu Yerusalem, ka na lèpa èmu ca'e kareta. Ropa Pelipus nèdhi ne, nèngu madhèdi baca ètu dedha kareta. Na baca sasuri dhèu nèti lii padhai Ama Lamatua, ngara na Yesaya. 29 Èle èèna ka, Roh Lamatua pua Pelipus la'e padètu asa kareta èèna, sèna ka na paraga dènge dhèu èèna. 30 Ropa na dètu, ka na tadèngi, na, dhèu èèna baca sasuri Yesaya. Ka Pelipus karèi ne, peka na, ‘‘Ama! Ama ku me'a, do aad'o, ngaa dhu ama baca èèna?’’
31 Ka dhèu ne dhaa, peka na, ‘‘Aad'o, ja'a ke'a boe. Hud'i abhu ku dhèu dhu peka-padhai dènge ja'a, heka ja'a ke'a kèna. Ca'e mai ho madhèdi dènge ja'a.’’ 32 Sasuri dhu na baca èèna, sèmi ne'e ka,
‘‘Ra nuni rèti Ne, sama sèmi nuni kahib'i-kalèbho,
ho neo roro Ne.
Nèngu j'aj'i sama sèmi ana kahib'i-kalèbho dhu dhèu g'ute rèu Ne,
te ngaa nèngu mau-mau sène, na kabee boe.
Hèb'a Na kutu mèno,
aa na kalua boe lii ca lamusi sa.
33 Ka ra lalangu Ne,
Ra j'ue lii langu Na lèke boe.
Lod'o èèna, ra pamadhe Ne,
masi ka Nèngu dènge boe sasala-sasigo.
De èdhi peka ngaa hari lula-nèti ana-èpu Na?’’c
34 Ropa na baca nare, hèia na karèi Pelipus, peka na, ‘‘Tasamia, ee? Sasuri Yesaya ne, lèke mi nèngu, do, lèke mi dhèu leo?’’
35 Ka Pelipus aj'a ne Lii Lolo Be'a Lamatua Yesus. Na lolo nèti lii sasuri Yesaya, ho pad'elo j'ara madhutu Yesus. 36 Lod'o rèngu ètu d'ara kakako era, rèngu rage loko èci dènge èi. Ka dhèu èèna peka dènge Pelipus, aku nèngu na, ‘‘Ama. Ladhe ku èi ka nèi. Ladhe èu ngee, na, cadhui boe, mai puru lati, ho èu sarani ku ja'a.’’
37 [Hèia Pelipus dhaa, aku nèngu na, ‘‘Ladhe ama tare'a-re'a parcaya Lamatua Yesus, na, cadhui boe. Mai dua ti puru ho ja'a sarani èu.’’
Ka na dhaa, peka na, ‘‘Ja'a parcaya tare'a-re'a, na, Yesus èèna Dhèu dhu Ama Lamatua paj'uj'u nèti uru ka mai. Nèngu èèna, Ana Ama Lamatua.’’]d
38 Hèia pegawi èèna, paredha ho patitu kareta. Ka dua ra puru asa d'ara èi èèna, ka Pelipus sarani ne.
39 Ropa ra kalua mai nèti d'ara èi, kabèdhi laa Roh Lamatua ded'e nèti Pelipus asa era leo. Ka dhèu èèna nèdhi heka Pelipus. Hèia pegawi kapai èèna lèpa dènge d'ara karej'e-karae. 40 Ka Pelipus cèu ètu rae èci, ngara na Asotus.e Nèti rae èèna, ka na la'e padhue-padhai taruu Lii Lolo Be'a Lamatua Yesus. Na dhuli rae-rae ètu rai èèna, toke d'ai kota Kaisarea.